Amulemeke Zyina Lya Jehova Lipati

“Njoolemeka izina lyako lyoonse.”—INT. 86:12.

SENA INGA MWAPANDULULA?

Ino caamba nzi kuzyiba zyina lya Leza?

Mbuti Jehova asyoonto-syoonto mbwaayubununa zyina lwakwe?

Ino caamba nzi kweenda muzyina lya Jehova?

1, 2. Mukwiimpana azikombelo zya Bunakristo Bwanyika, ino Bakamboni ba Jehova balibona buti zyina lya Leza?

ZIKOMBELO zinji mu Bunakristo Bwanyika zyalyaandaanya kuzyina lya Leza. Mucikozyanyo, majwi aantalisyo mu Bbaibbele lya Revised Standard Version, aamba kuti: “Kubelesya zyina lililoonse lya Leza uuli alikke . . . taciluzi pe ku Zikombelo zya Bunakristo.”

² Kulubazu lumwi Bakamboni ba Jehova, balikkomene kwiitwa azyina lya Leza alimwi akulilemeka. (Amubale Intembauzyo 86:12; Isaya 43:10.) Kuyungizya waawo, tucibona kuti ncoolwe kumvwisya ncolyaamba zyina eelyo alimwi amakani aakusalazyigwa kwandilyo. (Mt. 6:9) Nokuba boobo, eeci ncoolwe ncotweelede kubikkila maano. Cakweelela atulange-lange mibuzyo yotatwe iiyandika: Ino kuzyiba zyina lya Leza caamba nzi? Mbuti Jehova mbwazuzikizya ncolyaamba zyina lyakwe, akupa kuti lilemekwe? Alimwi mbuti mbotukonzya kweenda muzyina lya Jehova?

NCOCAAMBA KUZYIBA ZYINA LYA LEZA

3. Ino kuzyiba zyina lya Leza caamba nzi?

³ Kuzyiba zyina lya Leza cibikkilizya zinji kutali buyo kuzyiba zyina lyakuti “Jehova.” Cilabikkilizya akuzyiba mpuwo, bube, makanze alimwi amilimo ya Jehova kweelana amboitondezyedwe mu Bbaibbele, mbuli mbwabeendelezya babelesi bakwe. Masimpe ngakuti, Jehova ulatugwasya kumvwisya asyoonto-syoonto kweelana akuzuzikizyigwa kwamakanze aakwe. (Tus. 4:18) Jehova wakayubununa zyina lyakwe kubanabukwetene bakusaanguna, nkakaambo kaako Eva wakalibelesya zyina eeli naakazyala Kaini. (Matl. 4:1) Basinsiku basyomeka ba Nowa, Abrahamu, Isaka alimwi a Jakobo bakalilizyi zyina lya Leza. Kuyungizya waawo, bakalizyiba kabotu zyina eeli ciindi Jehova naakabalongezya, kubalanganya alimwi akuyubununa makanze aakwe kulimbabo. Musa wakapegwa kumvwisya kwaalubazu kwazyina lya Leza.

4. Nkaambo nzi Musa wakabuzya Leza kujatikizya zyina lyakwe, alimwi nkaambo nzi kulibilika kwa Musa ncokwakali kumvwika?

 ⁴ Amubale Kulonga 3:10-15. Ciindi Musa naakali amyaka iili 80 yakuzyalwa, Leza wakamupa mukuli mulemu, wakamwaambila kuti: “Ukapozye bantu bangu ba-Israyeli kuzwa ku-Egepita.” Musa wakaingula cabulemu amubuzyo uuyandika kapati. Munzila imwi Musa wakali kubuzya kuti: ‘Nduwe ni zyina lyako?’ Akaambo kakuti zyina lya Leza lyakalizyibidwe kuzwa kaindi, ino mubuzyo wa Musa wakali kupandulula nzi? Kulibonya kuti wakali kuyanda kuzyiba zinji kujatikizya muntu wakali kwiimininwa azyina eeli—twaambo twakali kukonzya kusinizya kubantu ba Leza kuti ncobeni wakali kuyakubafwutula. Kulibilika kwa Musa kwakali kulimvwisya, nkaambo bana Israyeli bakali mubuzike kwaciindi cilimbocibede. Ambweni bakali kudooneka kuti naa Leza wabamawisi wakali kukonzya kubafwutula. Masimpe, bana Israyeli bamwi bakatalikide kukomba baleza babana Egepita.—Ezk. 20:7, 8.

5. Mbuti Jehova mbwaakayubununa makani aambi kujatikizya zyina lyakwe ciindi naakali kwiingula Musa?

⁵ Ino Jehova wakawiingula buti mubuzyo wa Musa? Mubufwaafwi wakaamba kuti: “Mbuboobu mboelede kwaambila bana ba-Israyeli. ‘[NDIYOOBA KUFWUMBWA MBWEYOOBA] . . . ngowakandituma kulindinywe.’” * Kumane wakayungizya kuti: “Jehova Leza wabamauso . . . wandituma kulindinywe.” Leza wakayubununa kuti uyakuba kufwumbwa ncayakusala kuba kutegwa azuzikizye makanze aakwe, alimwi akuti lyoonse uyakucita kweelana ajwi lyakwe. Aboobo, mukapango 15 tubala kuti Jehova lwakwe wakaamba kuti: “Eeli ndezyina lyangu lyoonse alyoonse, alimwi eeci nceciibalusyo cangu kuzyalani azyalani.” Eelo kaka kweelede kuti majwi aaya akamukkomanisya kapati Musa alimwi akuyumya lusyomo lwakwe!

JEHOVA WAKAZUZIKIZYA NCOLYAAMBA ZYINA LYAKWE

6, 7. Mbuti Jehova mbwaakazuzikizya ncolyaamba zyina lyakwe lipati?

⁶ Kakwiindide buyo ciindi cisyoonto kuzwa ciindi Jehova naakapa Musa mulimo, Jehova wakazuzikizya ncolyaamba zyina lyakwe kwiinda ‘mukuba’ Mufwutuli wabana Israyeli. Wakapenzya bana Egepita azipenzyo zili kkumi, aciindi nciconya eeco wakayubununa baleza babana Egepita—kubikkilizya a Farao—kuti tabajisi nguzu. (Kul. 12:12) Kumane Jehova wakaandaanya Lwizi Lusalala akusololela bana Israyeli kuti bazabuke, alimwi wakanyikizya Farao ampi yabasikalumamba bakwe. (Int. 136:13-15) ‘Munkanda mpati iiyoosya,’ Jehova wakatondezya kuti Nguuponya ciindi naakabapa cakulya alimwi amaanzi bantu bakwe, ndiza ibakali kubalilwa ku 2  naa 3 miliyoni naa kwiinda waawo. Alimwi wakapa kuti zisani alimwi ampato zyabo zitamani. (Dt. 1:19; 29:5) Inzya, taakwe cikonzya kukasya Jehova kuzuzikizya caamba zyina lyakwe. Mukuya kwaciindi, wakaamba boobu kuli Isaya: “Ndime, ndime Jehova. Taakwe Mufutuli umbi.”—Is. 43:11.

⁷ Joshua iwakabweza busena bwa Musa, awalo wakalibonena milimo ya Jehova iiyoosya kaicitika mu Egepita alimwi amunkanda. Aboobo, kumamanino aabuumi bwakwe, Joshua wakali kukonzya kwaambila bana Israyelinyina kuti: “Mulizi camyoyo yanu yoonse acamiyeeyo yanu yoonse kuti taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika, taakwe niciba comwe icakawida ansi.” (Jos. 23:14) Masimpe, cakutadooneka Jehova wakazuzikizya jwi lyakwe—‘akuba kufwumbwa mbwayanda.’

8. Mbuti Jehova mbwazuzikizya ncolyaamba zyina lyakwe mazuba aano?

⁸ Mbubwenya buyo amazuba aano, Jehova ‘ulaba kufwumbwa mbwayanda.’ Kwiinda mu Mwanaakwe, wakaambilalimwi kuti mumazuba aamamanino, mulumbe wa Bwami uyakukambaukwa “munyika yoonse.” (Mt. 24:14) Nguni uumbi kunze lya Leza Singuzuzyoonse uukonzya kwaambilalimwi mulimo mupati uuli boobu, kubona kuti wacitwa alimwi akubelesya bantu banji ‘batayiide kapati alimwi bantu buyo’ kuuzuzikizya? (Mil. 4:13) Aboobo, ciindi notutola lubazu mumulimo ooyu, tuzuzikizya businsimi bwamu Bbaibbele. Tulemeka Taateesu alimwi tutondezya kuti tuli masimpe notupaila kuti: “Alisalazyigwe zyina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu.”—Mt. 6:9, 10.

ZYINA LYAKWE NDIPATI

9, 10. Kweelana ambwaakabeendelezya bana Israyeli, mbuti Jehova mbwaakazumanana kupa bupanduluzi bwazyina lyakwe, alimwi ncinzi cakacitika?

⁹ Kakwiindide buyo ciindi cisyoonto kuzwa ciindi bana Israyeli nobakalonga kuzwa ku Egepita, Jehova wakaba cintu cipya kubantu bakwe. Kwiinda mucizuminano ca Mulawo, wakaba ‘mulumi wabo,’ akulisungula kunyamuna mikuli yoonse yakajatikizyidwe. (Jer. 3:14) Kumane, bana Israyeli bakaba mukaintu wakwe wacikozyanyo, bantu baitwa azyina lyakwe. (Is. 54:5, 6) Ciindi nobakazumanana kulibombya kulinguwe cakuliyandila alimwi akubamba milawo yakwe, wakali kutondezya ncobeni kuti ngo ‘Mulumi’ uulondokede. Wakali kubalongezya, kubalanganya, alimwi akubapa luumuno. (My. 6:22-27) Aboobo, zyina lya Jehova lipati lyakalemekwa akati kabamasi. (Amubale Deuteronomo 4:5-8; Intembauzyo 86:7-10.) Masimpe, ciindi coonse cakubako kwabana Israyeli, bamuzwakule banji bakatalika bukombi bwakasimpe. Munzila imwi bakaamba mbubwenya mbwaakaamba Rute muna Moabu kuli Naomi kuti: “Bantu bako bayooba bantu  bangu, a-Leza wako uyooba Leza wangu.”—Rut. 1:16.

¹⁰ Myaka iili 1,500, ciindi Jehova naakali kweendelezya bana Israyeli, nzyaakali kucita zyakayubununa mbazu zimbi zinji zyabube bwakwe. Nokuba kuti bakali kumuzangila Jehova cakwiinduluka-induluka, wakatondezya kuti “[ngu] Leza siluzyalo” alimwi “uutafwambi kukalala.” Wakali Leza uukkazyika moyo. (Kul. 34:5-7) Nokuba boobo, kukkazyika moyo kwa Jehova kwakalijisi magolelo, alimwi magolelo aayo akasika ciindi ba Juda nobakakaka alimwi akujaya Mwanaakwe. (Mt. 23:37, 38) Baluzubo lwa Israyeli bakumubili bakaleka kuba bantu bazyina lya Leza. Bakafwa kumuuya, mbubwenya mbuli cisamu cakayuma. (Lk. 23:31) Mbuti eeci mbocakajatikizya mbobakali kulibona zyina lya Leza?

11. Mbuti zyina lya Leza mbolyakaleka kubelesyegwa aba Juda?

¹¹ Makani aakaindi atondezya kuti mukuya kwaciindi ba Juda bakatalika kuliyoowa zyina lya Leza, kulibona mbuli kuti ncintu ncobateelede kubelesya. (Kul. 20:7) Asyoonto-syoonto zyina lya Leza lyakaleka kubelesyegwa mucikombelo caba Juda. Cakutadooneka, cakamucisa Jehova kubona zyina lyakwe kalitalemekwi. (Int. 78:40, 41) Nokuba boobo, akaambo kakuti “ngu Leza sibufwi,” taakwe naakali kuyakulekela kuti bantu aaba ibakamukaka awalo mbaakakaka kuti bazumanane kwiitwa azyina lyakwe. (Kul. 34:14) Makani aaya ayelede kukankaizya kulindiswe kaambo kakuti zyina lya Mulengi wesu liyandika kulemeka kapati.

CISI CIPYA CIITWA AZYINA LYA LEZA

12. Mbaani bakazikuba bantu baitwa azyina lya Leza?

¹² Kwiinda muli Jeremiya, Jehova wakayubununa makanze aakwe aakutangana “cizuminano cipya” acisi cipya, Israyeli wakumuuya. Jeremiya wakasinsima kuti boonse ibanooli mucizuminano eeci “nibaba baniini nibaba bapati” ‘bayakumuzyiba Jehova.’ (Jer. 31:31, 33, 34) Businsimi oobu bwakatalika kuzuzikizyigwa lya Pentekoste 33 C.E. ciindi Leza naakatalisya cizuminano cipya. Cisi cipya, ba “Isilayeli ba Leza,” icakali kubikkilizya aba Juda a Bamasi, cakaba “bantu bazyina lya [Leza],” Jehova wakaamba kuti “ibantu baitwa azyina lyangu.”—Gal. 6:16; amubale Milimo 15:14-17; Mt. 21:43.

13. (a) Sena Banakristo bakusaanguna bakali kulibelesya zyina lya Leza? Amupandulule. (b) Ino coolwe cakubelesya zyina lya Jehova mumulimo wamumuunda mucibona buti?

¹³ Cakutadooneka, mbuli “bantu baitwa azyina lya [Leza],” aabo ibakali cibeela cacisi cakumuuya bakali kubelesya zyina lya Leza ciindi nobakali kuzubulula Magwalo aaci Hebrayo. * Aboobo, ciindi mwaapostolo Petro naakali kwaambaula abantu ibakali kuzwa muzisi zisiyene-siyene, ba Juda alimwi abaabo bakasanduka lya Pentekoste 33 C.E., wakabelesya zyina lya Leza ziindi zili mbozibede. (Mil. 2:14, 20, 21, 25, 34) Banakristo bakusaanguna bakali kumulemeka Jehova, kumane awalo wakabalongezya mumulimo wabo wakukambauka. Mbubwenya buyo amazuba aano, Jehova ulaulongezya mulimo wesu ciindi notukambauka kujatikizya zyina lyakwe alimwi akubatondezya bantu bali aaluyandisisyo zyina eeli muma Bbaibbele aabo kuti kacikonzyeka. Kuti twacita oobo tulabazyibya kuli Leza wakasimpe. Eelo kaka ncoolwe eeco—kuli mbabo akulindiswe! Kubazyibya ooku cimwi ciindi kulakonzya kuba ngamatalikilo aacilongwe cibotu a Jehova iciyakuzumanana kukomena alimwi akuyuma.

14, 15. Ncinzi Jehova ncaacita kujatikizya zyina lyakwe lyaciibalusyo, nokuba kuti luleyo lwavwula?

¹⁴ Mukuya kwaciindi luleyo lwakatalika kunyonganya mbungano yakusaanguna ya Banakristo, kwaambisya nobakafwa baapostolo. (2 Te. 2:3-7) Mane buya bamayi bakubeja bakatalika kutobela cilengwa caba  Juda cakutabelesya zyina lya Leza. Sena Jehova wakali kuyakuzumizya zyina lyakwe lyaciibalusyo kuti ligwisyigwe? Peepe! Masimpe kuti lino tatukonzyi kuzyiba ibwini mbolyeelede kwaambwa zyina eeli, nokuba boobo, lyazumanana kubelesyegwa. Mukuya kwaciindi, lyalembwa mubusanduluzi bunji bwama Bbaibbele alimwi amumalembe aabasikwiiya zyamu Bbaibbele. Mucikozyanyo, mu 1757, ba Charles Peters bakalemba kuti zyina lyakuti “Jehova,” mukwiimpana amazyina aakwe manji aabulemu, “lilibonya kuti ndezyina litondezya kabotu mbwabede.” Mubbuku lyabo lyamu 1797 ilyaamba zyakukomba Leza, ba Hopton Haynes bakatalika caandaano 7 amajwi aakuti: “JEHOVA izyina lyeelede lya LEZA akati kaba Juda, walo alikke ngobakali kukomba; mbubwenya mbwaakali kucita Kristo alimwi a Baapostolo bakwe.” Ba Henry Grew (1781-1862) bakalibelesya zyina lya Leza alimwi bakalizyi kuti lyakasampaulwa akuti lyeelede kusalazyigwa. Mbubwenya buyo, abalo ba George Storrs (1796-1879), beenzinyina baba Charles T. Russell, bakali kulibelesya zyina lya Leza mbubwenya mbobakacita ba Russell.

¹⁵ Mwaka wa 1931, wakali mwaka uuyandika kapati nkaambo mumwaka ooyu Basikwiiya Bbaibbele Bazwa Mumasi Asiyene-siyene kweelana ambobakali kwiitwa bantu ba Leza kaindi, bakatambula zyina lyamu Magwalo lyakuti Bakamboni ba Jehova. (Is. 43:10-12) Aboobo, bakaambilizya munyika kuti bakalikkomene kuba babelesi ba Leza uuli alikke, kuba “bantu bazyina lyakwe,” batembaula zyina eelyo. (Mil. 15:14) Eezyi zyintu izyakacitika zituyeezya majwi aa Jehova aajanika mulugwalo lwa Malaki 1:11, aakuti: “Kuzwa kumazwido aazuba akusika kumabbililo aalyo izina lyangu lilalemekwa akati kabamasi.”

AMWEENDE MUZYINA LYA JEHOVA

16. Nkaambo nzi ncotweelede kukubona kuti nkulemekwa kweenda muzyina lya Jehova?

¹⁶ Musinsimi Mika wakalemba kuti: “Misyobo yoonse ileenda muzina lyamizimu yayo, aswebo tuleenda muzina lya-Jehova Leza wesu lyoonse mane kukabe kutamani.” (Mik. 4:5) Kuzumizya Basikwiiya Bbaibbele nkwaakacita Jehova kuti kababelesya zyina lyakwe, kwakali kubalemeka kapati. Alimwi cakali citondezyo cakuti wakali kubakkomanina. (Amubale Malaki 3:16-18.) Mbuti nywebo kumugama? Sena mulasola kusikila mpomugolela “[kw]eenda muzina lya-Jehova”? Sena mulizyi kuti eeci cibikkilizya nzi?

17. Ncinzi cijatikizyidwe mukweenda muzyina lya Leza?

¹⁷ Kweenda muzyina lya Leza kubikkilizya zyintu zyotatwe. Cakusaanguna, tweelede kwaambila bamwi kujatikizya zyina eeli, katuzyi kuti balikke aabo ‘baita zyina lya Jehova mbebayakufwutulwa.’ (Lom. 10:13) Cabili, tweelede kutondezya bube bwa Leza, kwaambisya luyando lwakwe. Alimwi catatu, tuleenda muzyina lya Leza ciindi notulibombya kuzyeelelo zyakwe ziluleme, kuti taakwe notwacita oobo tulapa kuti zyina lisalala lya Taateesu lisampaulwe. (1 Jo. 4:8; 5:3) Sena mulikanzide “[kw]eenda muzina lya-Jehova Leza wesu lyoonse mane kukabe kutamani”?

18. Nkaambo nzi aabo boonse balemeka zyina lya Jehova lipati ncobakonzya kulanga kumbele calusyomo?

¹⁸ Ino-ino boonse batabikkili maano kuzyina lya Jehova bayakusinikizyigwa kumuzyiba. (Ezk. 38:23) Eeci cilabikkilizya abantu bali mbuli Farao, iwakaamba kuti: “Ma! Nguni Jehova? Sa ndakonzya kuswiilila ijwi lyakwe?” Tiilyakalampa wakamuzyiba! (Kul. 5:1, 2; 9:16; 12:29) Pele swebo twamuzyiba Jehova cakuliyandila. Tulikkomene kuzyibwa azyina lyakwe alimwi akuba bantu bazyina lyakwe ibamvwida. Aboobo, calusyomo tulangila kumbele kacisyomezyo cilembedwe mulugwalo lwa Intembauzyo 9:10, cakuti: “[Aabo] bazi izina lyako balakusyoma, nkaambo webo, O Jehova, tobalekelezyi abo bakuyandaula.”

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 25]

Musa wakalizyi ncolyakali kwaamba zyina lya Leza alimwi eeci cakayumya lusyomo lwakwe

[Cifwanikiso icili apeeji 26]

Farao wakakaka kuzyiba Jehova kuti ngo Leza