ICIPANDE ICIKALAMBA: KUTI MWABA NE NSANSA ISHINE SHINE

Bushe Cine Cine Kuti Twaba ne Nsansa?

“Inshiku sha myaka yesu shaba imyaka amakumi cinelubali (70)—lelo nga natukwatisha amaka, shiba imyaka amakumi cinekonsekonse (80), na lyo line shileta fye amafya ne fya kukalipwa.”—Amalumbo 90:10.

IFYO ili lembo lyalanda fya cine. Ilingi line abantu muno nshiku balakwata “amafya ne fya kukalipwa” ifingi. Nalimo mwaliyipushapo amuti, ‘Bushe cine cine abantu kuti baba ne nsansa muno nshiku?’

Natulande pali ba Maria. Ba Maria bali ne myaka 84. Akale bali abacincila sana, lelo pali ino nshita bekala fye pa ng’anda pa mulandu wa kukula. Nangu ca kuti bacili balebukisha bwino ifintu, umubili wabo wena walinaka. Bushe ubumi bwa musango uyu kuti bwalenga baba ne nsansa?

Bushe na imwe inshita shimo mulatontonkanyapo nga cine cine kuti mwaba ne nsansa? Nalimo mubomba fye imilimo imo ine, iimutendusha kabili iimulenga ukunaka sana. Bamo nalimo tabatasha no kutasha pa fyo mucita nelyo ifyo mubombesha. Nangu ca kuti mulaipakisha ubumi pali ino nshita, nalimo mulasakamikwa ifyo mukekala ku ntanshi. Inshita shimo nalimo mulatalalilwa nelyo ukupopomenwa. Nalimo mu lupwa lwenu mulomana sana e lyo no kulwa. Nalimo mwalifwilwa balupwa nelyo ifibusa. Ba André baleumfwana sana na bawishi, lelo bawishi baishilelwala fye mu kupumishika no kufwa bafwa. Ba André balyumfwile sana ububi kabili bomfwa kwati tabakabale ababapo ne nsansa.

Nangu twingaba na mafya ya musango shani, kwaliba icintu icimo ico tufwaisha ukwishiba: Bushe cine cine kuti twaba ne nsansa? Kuti twasanga icasuko nga twabelenga ilyashi lya mwaume uwali pa calo nalimo imyaka 2,000 iyapitapo. No yu mwaume ni Yesu Kristu. Nangu ca kuti alekwata amafya, Yesu ali uwa nsansa. Na ifwe kuti twaba ne nsansa nga twapashanya ifyo Yesu acitile.