IKỌ emi ẹdi ofụri akpanikọ. Uwem ererimbot emi ọyọhọ ye “afanikọn̄ ye ọkpọsọn̄ ubiak.” Ekeme ndidi emetiene ekere m̀mê owo ekeme ndisụk n̄kop inem uwem ke utọ ererimbot emi.

Da Maria ke uwụtn̄kpọ. Maria ekedi ata okopidem an̄wan. Edi idahaemi enye edide isua 84 mi, enye ikemeke ndiwọrọ an̄wa aba. Idịghe nte enye idiọn̄ọke idem-o, enye ke ọfọfiọk n̄kpọ, edi idem esie itiehe aba nte ekesitiede. Ndi utọ owo emi ekeme ndisụk n̄kop inem uwem?

Afo ndien-e? Ekeme ndidi emesikere ndusụk ini m̀mê nso idi ufọn uwem emi afo odude. Ekeme ndidi utom emi esinamde esisọn̄ etieti unyụn̄ ukopke inem utọ utom oro. Onyụn̄ ekeme ndidi owo ikwe ofụri ukeme oro esịnde. Idem ọkpọkọm n̄kpọ ọfọfọn ye afo idahaemi, omosụk ekeme nditịmede esịt mban̄a se iditịbede ke ini iso. Ndusụk ini emekeme ndikop ndobo, mîdịghe ofụhọ. Ufọk mbufo ekeme nditie ikọ ikọ, utọk utọk. Ekeme ndidi odu owo mbufo emi akpade ndondo emi. Ete kiet emi ekerede André ama esinen̄ede ama ete esie, edi udọn̄ọ ama edịbede ete esie, ibịghike-bịghi ete oro akpa. N̄kpọ emi ama abiak André tutu, ndien eketie enye nte ke tutu amama idụhe se ididọn̄de enye esịt.

Ofụri afanikọn̄ emi isobode ke uwem ekeme ndinam ibụp ite: Ndi owo osụk ekeme ndikop inem uwem ke ererimbot emi? Jesus Christ emi okodude uwem n̄kpọ nte isua 2,000 emi ekebede ọbọrọ mbụme emi. Kpa ye oro enye okosobde ata ediwak afanikọn̄, Jesus ama enen̄ede okop inem uwem. Nnyịn n̄ko imekeme ndikop inem uwem edieke itienede uwụtn̄kpọ esie.