¡SHIIMAIN maʼin pütchikat tia! Matüjüinsat choʼujawaa tü müliaakat; eesü waneepia. Makalaka eein na wayuu makana: «¿Eesüche süpüla talatüin taaʼin maaʼutpünaa?».

Jülüja waaʼin tü alatakat sümüin María, 84 suuyase. Matüjüinsat jimataa shia, shiasaʼa müin maaʼutpünaa jimataʼatsü shipialuʼu. Mayaasüjeʼe anayülüinya shia isaitpa süchiki suwarairaain. ¿Eesüche süpüla talatüin saaʼin wanee wayuu müle sukuwaʼipa?

¿Müsia pukuwaʼipa? Eesü jülüjüirüle paaʼin nnojoluin kasain talatüin atuma paaʼin. Eeshi piʼyataale sünain wanee kasa kojutüinsü sümaa paainjüinjatüin shia wattaʼawai. Otta müsia nnojotsü jaralüin eʼrüin süchiki tü piʼyataainkat. ¿Jama nnojorüle kasain choʼujaain pümüin? Eesü shapaale paaʼin sutuma tü kasa alateetkat mapeena, mojule paaʼin jee mojujiraale pia weinshi sümaa püpüshi. Eeshi amülouire wanee kasa pünain. Alatsü tia nümüin wanee wayuu kanüliakai André. Aakarülaa müsü naaʼin chi nüshikai sutuma wanee ayuulii, mojusü maʼin naaʼin sutuma tia süka matüjüin wattaa nia nuulia chi nüshikai. Nnojotsü eein wanee kasa atalateʼerüinjatka naaʼin naashin.

Mayaainjeʼe weʼrüin maʼin müliaa, keeʼireesü waaʼin watüjaain saaʼu tü talatüinjatkalü atuma waaʼin. Watüjaajeerü aaʼu tia sünainjee tü alatakat nümüin Jesucristo. Mayaainjeʼe niʼrüin müliaa, nnojotsü mojuin naaʼin. Meeria waaʼin washatüle nukuwaʼipa Jesuu.