AVRO ọ rrọ ẹme yena ha. Akpọ nana ọ vọ avọ “uye gbe omaorọ.” Ẹsejọhọ whọ nọ no ẹdẹjọ inọ, ‘Kọ o ginẹ lọhọ re a wo evawere evaọ akpọ nana?’

Roro kpahe aye jọ nọ a re se Maria. Ọ jọ sasasa vẹre, rekọ enẹna nọ o te ikpe 84 no na, ọ gbẹ be sai no uwou ze he. Ọ be sai roro eware te ziezi, rekọ ọ gbẹ be sai ru eware te epanọ ọ jẹ hai ru vẹre he. Kọ ẹvẹ ọ sae rọ were eva evaọ oghẹrẹ uzuazọ utioye?

Kọ ẹvẹ kpahe owhẹ? Ẹsejọhọ whọ nọ omara no ẹdẹjọ sọ emamọ uzuazọ who bi gine yeri na. Iruo ra e be bẹ owhẹ te unu. Yọ o sae jọnọ ahwo buobu a bi muẹrohọ oghẹrẹ nọ whọ be daoma te he. O tẹ make rọnọ eware e be riẹ nya kẹ owhẹ enẹna, ẹsejọ whọ rẹ sae ruawa kpahe oghẹrẹ nọ eware e te jọ evaọ obaro. Ẹsejọ dede, whọ rẹ sae jọ ọkora. O sae jọnọ ebẹbẹ e da uviuwou ra fia. Ẹsejọhọ ohwo jọ nọ who you gaga o whu. Ọzae jọ nọ a re se André o you ọsẹ riẹ gaga, rekọ idudhe na ọsẹ na o te kie ẹyao je whu. André o roro nọ uwhu ọsẹ riẹ na u ti re ọyomariẹ ẹro vievie he.

Makọ oghẹrẹ nọ ebẹbẹ nọ ma bi lele muabọ e ga te kẹhẹ, oware jọ o riẹ nọ o gwọlọ nọ ma rẹ riẹ: Kọ o ginẹ lọhọ re ohwo o wo evawere evaọ akpọ nana? Ma rẹ sae ruẹ uyo onọ nana evaọ oghẹrẹ uzuazọ nọ Jesu Kristi o yeri, ọnọ ọ rria otọakpọ na ikpe idu ivẹ (2,000) nọ i kpemu. Makọ oghẹrẹ edawọ nọ o lele muabọ kẹhẹ, o wo evawere. Ma te lele oriruo riẹ, ma ti wo evawere re.