តើជីវិតពិតជាអាចមានន័យខ្លឹមសារបានទេ?
អត្ថបទអំពីក្របទស្សនាវដ្ដី តើជីវិតពិតជាអាចមានន័យខ្លឹមសារបានទេ?
តើជីវិតពិតជាអាចមានន័យខ្លឹមសារបានទេ?
«កំណត់អាយុនៃយើងខ្ញុំ គឺបានត្រឹម៧០ឆ្នាំទេ ឬបើមាន កំឡាំងច្រើន នោះបានដល់៨០ឆ្នាំប៉ុណ្ណោះ គង់តែអ្វីៗដែលជាទីអួតក្នុងឆ្នាំទាំងនោះ សុទ្ធតែជាការនឿយលំបាក នឹងសេចក្ដីទុក្ខព្រួយ»។—ទំនុកតម្កើង ៩០:១០
ពាក្យនេះគឺពិតមែន! ភាគច្រើនជីវិតក្នុងពិភពលោកនេះពេញទៅដោយ«ការនឿយលំបាក នឹងសេចក្ដីទុក្ខព្រួយ»។ ប្រហែលជាអ្នកធ្លាប់ឆ្ងល់ថា៖ ‹តើយើងពិតជាអាចមានជីវិតដែលមានន័យខ្លឹមសារនៅសព្វថ្ងៃនេះបានទេ?›។
ជាឧទាហរណ៍ សូមគិតអំពីម៉ារៀ។ គាត់ធ្លាប់មានកម្លាំងច្រើននិងជាមនុស្សឧស្សាហ៍ តែឥឡូវគាត់មានអាយុ៨៤ឆ្នាំ គាត់មិនអាចចេញពីផ្ទះដោយខ្លួនឯងបានទេ។ ទោះជាខួរក្បាលរបស់គាត់នៅដំណើរការល្អក៏ដោយ តែរូបកាយមិនអាចដំណើរការដូចពីមុនទេ។ តើគាត់អាចចាត់ទុកថាជីវិតរបស់គាត់មានន័យខ្លឹមសារដូចម្ដេចបាន?
ចុះលោកអ្នកវិញ? លោកអ្នកប្រហែលជាធ្លាប់ឆ្ងល់ថាជីវិតរបស់លោកអ្នកអាចមានន័យខ្លឹមសារឬយ៉ាងណា។ ការងាររបស់លោកអ្នកប្រហែលជាគួរឲ្យធុញទ្រាន់ ធ្វើឲ្យអស់កម្លាំង និងដដែលៗ ហើយគ្មាននរណាមើលឃើញឬទទួលស្គាល់ការខំព្យាយាមនិងកិច្ចការរបស់លោកអ្នកទេ។ ទោះជាឥឡូវនេះ ជីវិតរបស់លោកអ្នកដំណើរការយ៉ាងរលូនក្ដី តែលោកអ្នកប្រហែលជានៅតែព្រួយបារម្ភអំពីអ្វីដែលនឹងកើតឡើងនៅអនាគត។ ជួនកាល លោកអ្នកប្រហែលជាមានអារម្មណ៍ឯកោឬធ្លាក់ទឹកចិត្ត ហើយក្នុងក្រុមគ្រួសារក៏ឧស្សាហ៍ឈ្លោះទាស់ទែងគ្នាទៀត។ ម្យ៉ាងទៀត លោកអ្នកក៏ប្រហែលជាមានអ្នកជាទីស្រឡាញ់ស្លាប់ដែរ។ ជាឧទាហរណ៍ មានបុរសម្នាក់ឈ្មោះអាន់ទ្រេ គាត់ជិតស្និទ្ធជាមួយនឹងឪពុករបស់គាត់ណាស់ តែថ្ងៃមួយ ស្រាប់តែឪពុកគាត់ធ្លាក់ខ្លួនឈឺហើយស្លាប់។ អាន់ទ្រេតក់ស្លុតនិងមានទុក្ខសោកជាខ្លាំង ហើយគាត់គិតថាគាត់មិនអាចមានអារម្មណ៍ស្រាកស្រាន្តបានទេ។
មិនថាយើងមានបញ្ហាអ្វីក៏ដោយ មានអ្វីមួយដែលយើងត្រូវតែដឹងគឺ តើជីវិតពិតជាអាចមានន័យខ្លឹមសារបានទេ? យើងអាចរកចម្លើយនេះបានតាមរយៈជីវិតរបស់បុរសម្នាក់ដែលធ្លាប់រស់នៅផែនដីប្រមាណ២.០០០ឆ្នាំមុន។ បុរសនោះគឺ លោកយេស៊ូ។ ទោះជាលោកជួបប្រទះឧបសគ្គជាច្រើនក្ដី ជីវិតរបស់លោកយេស៊ូពិតជាមានន័យខ្លឹមសារ។ យើងក៏អាចមានជីវិតដែលមានន័យខ្លឹមសារបានដែរ ប្រសិនបើយើងធ្វើតាមគំរូរបស់លោក។
[រូបភាពនៅទំព័រ៣]
