MVOVO miami mialudi kikilu. E zingu mu nza yayi kiazala ye “mfuntu ye mpasi.” ‘Nanga olenda kiyuvula: Nga dilendakana o kala ye zingu kiakiese o unu?’

Badika nona kia Maria. Nkento a nzunzu kakala, kansi owau kena ye mvu 84 kelendanga diaka vaika mu nzo ko. Wakinu ye zayi wandi kansi kena diaka ye nkuma wa sala ko. Aweyi kalenda mwena e kiese muna zingu kia mpila yayi?

Adieyi tuvova mu kuma kiaku? Ongeye mpe nanga olenda kiyuvula kana vo olenda kala ye zingu kiakiese. Nanga olenda mona vo salu kiau kimosi kaka osalanga, kitoma kuyoyesanga ye kuyangalelanga kio ko. E ngolo ovanganga muna salu kiaki nanga ke zimonekanga kwa wantu ko. Kana nkutu vo e zingu kiaku kiambote kwandi o unu, nanga olenda tokana mu kuma kia dina dilenda kubwila kuna sentu. Ezak’e ntangwa, olenda mona kinsona yovo kendalala. E zingu kia nzo aku nanga kiazala ye ntantani. Nanga wafwilwa kala muntu ozolanga. Yakala dimosi oyikilwanga vo André, wakala nkundi a s’andi, kansi o s’andi wabakama kimbevo yo fwa vana vau. André wamonanga vo kelenda sunda ntantu ye nkenda zandi ko.

Kana nkutu nkia mpasi tulenda nwana zau, vena ye diambu diamfunu tuvavanga o zaya: O kala ye zingu kiakiese nga dilendakana? Tulenda baka e mvutu muna lusansu lwa Yesu Kristu ona wazinga ova ntoto se vioka 2.000 ma mvu. Kana una vo wabwilwa mambu mayingi mampasi, Yesu wakala ye zingu kiakiese. Oyeto mpe tulenda kweto kala ye zingu kiakiese avo tulende e mbandu andi.