ONONDAKA ombo ombotyotyili! Omuenyo mouye uno weyula “ononkhumbi, nokuepuiya.” Hamwe welipulileale: ‘Okuti tyitavela umwe okukala nomuenyo omuwa hono?’

Tala ongeleka ya Maliya. Ankho omunthu wokuna ononkhono, mahi, pahe nomanima 84, ukala vala peumbo mokonda ketyivili vali okueenda aike. Nkhele utyivila okusoka nawa, mahi olutu lwae lutupu vali ononkhono. Oñgeni masoko okuti una omuenyo omuwa?

Iya ove? Hamwe pamwe welipulileale inkha omuenyo wove una esilivilo. Hamwe ulinga apeho ovilinga vike vala, vikuponeswa, nokukusoyesa. Vamwe kavesukile nononkhono ulinga. Namphila hamwe omuenyo wove ukahi nokueenda nawa, nkhele usukalala konthele yetyi matyikekumonekela komutwe. Pamwe, ukala nounye ine usoya. Hamwe mombunga yove muna ovitateka ovinyingi. Hamwe wankhisa umwe uhole. Omulume umwe utiwa o Andre, ankho epanga enene lia tate yae, mahi tate yae avele unene iya ankhi. Andre eihamenwa unene, iya asoko okuti kametyivili vali okukala nawa.

Namphila tukala novitateka, pena otyipuka tyimwe tuesukisa okunoñgonoka: Okuti tyitavela umwe okukala nomuenyo omuwa? Ekumbululo tupondola okulivasa mokulilongesa konthele ya Jesus Kristu wakalele pano pohi omanima 2.000 konyima. Namphila akalele novitateka ovinyingi, tyotyili Jesus ankho una omuenyo omuwa. Inkha tulandula ongeleka yae, nonthue matukala nomuenyo omuwa.