E PALABRANAN akí ta referí na un echo innegabel, esta, ku nos bida por ta yen di “molèster i doló.” P’esei, kisas bo ta puntra bo mes: ‘Bida tin sentido?’

Wak por ehèmpel Maria. Semper e tabata un hende masha aktivo. Pero awor ku e tin 84 aña, práktikamente e no ta sali kas mas. Aunke e ta bon bei, su kurpa sí no ta duna muchu mas. Kon bida di un hende den un situashon asina por tin sentido?

Pero kiko di abo? Bo a yega di puntra bo mes si bo bida tin sentido? Podisé bo trabou ta monótono, laf i frustrante. Anto pa kolmo ta parse ku niun hende no ta apresiá bo esfuersonan. Asta si aworakí kosnan ta bai bon ku bo, tòg kisas bo ta preokupá ku futuro. Tin ora, bo por asta sinti bo bandoná òf deprimí. Tal bes tin hopi desakuerdo i pleitu den bo famia. Òf kisas bo a pèrdè un ser kerí den morto. Wak e kaso di André. E tabata masha pegá na su tata. Pero di un dia pa otro su tata a bira malu i fayesé. Pa André, esaki tabata un sla hopi duru ku a laga un bashí inmenso atras.

Sea kual sea e molèster òf doló ku nos ta pasa aden, nos tur ke sa si bida por tin sentido. Pa haña sa esei, nos tin ku analisá bida di un persona ku a biba un 2.000 aña pasá riba tera, esta, Hesukristu. Apesar di tur e opstákulonan ku el a konfrontá, su bida sí tabatin sentido. Si nos sigui su ehèmpel, nos tambe por hiba un bida asina.