IA UWEN mehlel en mahsen pwukat! Mour nin sampah wet kin kalapw direkihla “pwunodte oh apwal.” Ele ke kin medewe, ‘I kak ahneki mour ehu me uhdahn mie katepe ahnsou wet?’

Karasepe, mie emen lih me ede Maria. E kin uhdahn pwerisek ahnsou koaros, ahpw met, ni eh sounpar 84, e solahr kak kelehpw pedoisang ni imweo. Eh madamadau mwamwahute, ahpw paliwere mwomwen solahr kak wia dahme e kin medewehda. Ia duwen eh kak medewe me eh mour mie katepe?

Ia duwen kowe? Mwein mie pak ke kin idek rehmw ma mie katepen omw mour. Ele omw doadoahk kin kapwang oh kasangat oh ke kin pwurepwurehng wia soahng teieu. Me tohto ele sohte ese de katapanki uwen laud en omw kin doadoahk. Mehnda ma ke ahneki mour mwahu met, ahpw mwein ke kin pwunodki dahme pahn wiawi ahnsou kohkohdo. Ekei pak, ele ke pil kin sangat de nsensuwed. Omw peneinei ele kin kalapw akamai. Mwein emen me ke poakohng mehla. Emen ohl me ede André kin uhdahn karanih eh pahpao, me soumwahudahte mehla. André medewe me e sohte kak powehdi pwuriamwei oh nsensuwed wet me e ahneki.

Sohte lipilipil soangen apwal dah me kitail ele kin lelohng, mie mehkot me kitail kin men ese: Kitail kak uhdahn ahneki mour ehu me mie katepe? Kitail kak diar pasapengpen met sang atail tehk mouren emen ohl me mi sampah sounpar 2,000 samwalahro, me iei Sises Krais. Mendahki soangen kahpwal koaros me lelohng ih, Sises uhdahn sapwellimanki mour ehu me mie katepe. Kitail pil kak ahneki soahngohte ma kitail idawehn sapwellime mehn kahlemeng.