NKHANI YA PAPEJI LAKWAMBA
Kumbi Tingaja ndi Umoyu Walikondwa?
“Virimika va umoyu widu ve machumi ngankhondi ndi ngaŵi pe, pamwenga virimika machumi ngankhondi ndi ngatatu asani tarutiliyaku; ndipuuli cho vititipingiya ifwi ndi suzgu ndi chitima.”—Sumu 90:10.
MAZU yanga ngauneneska chifukwa tikumana ndi ‘masuzgu’ nganandi ndipuso vinthu vakuchitiska “chitima.” Nyengu zinyaki tingajifumba kuti, ‘Kumbi tingaja ndi umoyu walikondwa?’
Ŵanaŵaniyani vo vikumuchitikiya mzichi munyaki, Maria. Nyengu zosi wagwiranga nchitu mwanthazi kweni po wafikiya vyaka 84, wafiska cha kwenda yija. Iyu wechekuŵanaŵana umampha kweni viŵaru vaki ve ndi nthazi cha. Nchinthu wuli cho chingamuwovya kuti waje ndi umoyu walikondwa?
Kumbi imwi mukumana ndi masuzgu wuli? Panyaki mukuŵanaŵanapu kuti umoyu winu ngwalikondwa cha chifukwa chakuti mugwira nchitu yakuvukisa ndipuso yambula kukondwesa. Anyaki awonga cha nchitu yo mugwira mwaphamphu. Nyengu zinyaki, vinthu vingakuyendiyaniku umampha pa umoyu winu, kweni mungayamba kuŵanaŵaniya za mo umoyu winu wazamuŵiya kunthazi. Pamwenga muchita phukwa kweniso kuguŵa chifukwa cha vinthu vinyaki. Vingachitika kuti mupindana m’banja mwinu pamwenga munthu yo mwamuyanjanga wakutayika. Mwakuyeruzgiyapu, munthu munyaki, zina laki André, waŵayanjanga ukongwa awiski kweni angwamba kutama mwamabuchibuchi, pavuli paki angufwa. Ivi vingumuŵaŵa ukongwa André ndipu wanguwona kuti kwenga kwakusuzga kukunthiyapu nyifwa ya awiski kweniso chitima cho wenga nachu.
Chifukwa chakuti tikumana ndi masuzgu, tikhumbisiska kuziŵa asani tingaja ndi umoyu walikondwa. Tingasaniya kwamuka mu vo Yesu Khristu wanguchita pa nyengu yo wenga pacharu chapasi, vyaka pafupifupi 2,000 vajumpha. Kukamba uneneska, Yesu wenga ndi umoyu walikondwa chinanga kuti wangukumana ndi masuzgu nganandi. Nasi tingaja ndi umoyu walikondwa asani tilondo chakuwoniyapu chaki.
