DISPELA tok em i tru! Planti taim laip long dispela graun i pulap long ‘hatwok na hevi tasol.’ Olsem na ating yu tingting olsem, ‘Long nau, i gat rot long mi inap kisim laip we i gat as tru bilong en?’

Tingim Maria. Em i wanpela strongpela meri, tasol nau, taim em i gat 84 krismas, em i save sindaun tasol long haus. Tingting bilong em i wok gut yet, tasol skin bilong em i no gat strong moa. So yu ting em bai pilim olsem laip bilong em i gat as tru bilong en?

Olsem wanem long yu? Ating sampela taim yu tingting olsem laip bilong yu i gat as bilong en o nogat. Ating yu mekim wankain wok long olgeta de, yu taiet na skin i les. Na ating i no gat man i luksave o tingim ol hatwok bilong yu. Na maski sampela wok bilong yu i bin kamap gutpela, tasol bai yu wari na tingting planti yet long wanem samting bai kamap bihain. Sampela taim bai yu pilim olsem yu stap wanpis tru o kisim sik dipresen. Ating i gat kros na pait insait long famili bilong yu. Ating wanpela yu laikim tumas em i dai. Wanpela man nem bilong en André, em i save pas gut wantaim papa bilong em, na wantu papa i kisim sik na i dai. Dispela hevi i bagarapim tru bel bilong André, na em i pilim olsem em bai no inap long winim dispela bel hevi.

Maski wanem kain hevi i painim yumi, i gat wanpela samting yumi olgeta i laik save long en, olsem: Yu ting yumi inap kisim laip i gat as tru bilong en? Yumi inap kisim bekim bilong dispela askim taim yumi skelim i stap bilong wanpela man husat i bin i stap long graun inap 2,000 yia i go pinis—em Jisas Krais. Maski ol kain kain hevi i bin painim Jisas, i stap bilong em i gat as tru bilong en. So i stap bilong yumi tu bai i gat as tru bilong en sapos yumi bihainim pasin bilong em.