MAZGU agha ngaunenesko nadi! Umoyo mu caru ici ngwakuzura na ‘masuzgo na vitima.’ Panji muli kujifumbapo kuti, ‘Kasi vingacitika nadi kuŵa na umoyo wacandulo?’

Mwaciyelezgero wonani ivyo vili kucitikira Maria. Wakaŵa munthu wakulimbikira nchito, kweni sono apo wali na vilimika 84 wangenda yayi yekha. Wacali na mahara ghake ghose, kweni thupi lake ndakuti wangagwiraso yayi nchito. Kasi wangagomezga wuli kuti umoyo wantheura uli na candulo?

Kasi imwe mukuwona wuli? Panji nyengo yinyake muli kujifumbapo usange umoyo winu ngwacandulo. Panji mungaŵa kuti mukugwira nchito yimozamoza kwa nyengo yitali kweniso yakuvuska. Nyengo zinyake ŵanji ŵangamanya na kumanya wuwo yayi ivyo mukucita kweniso kuti mukufwilirapo. Nanga vingaŵa kuti vikumwenderani makora, kweni mungenjerwa nipera na vyamunthazi. Nyengo zinyake mungacita phukwa na kusuzgika maghanoghano. Mu mbumba yinu mungaŵa kuti mukukhalira waka kugazgana na kutimbana. Panji vingaŵa kuti wakutemweka winu wali kufwa. Munthu munyake zina lake André wakaŵatemwanga comene ŵadada ŵake ndipo mwamabuci ŵakalwara na kufwa. Ici cikamuŵinya comene André, ndipo wakuwona kuti wangaluwa yayi.

Nanga tingakumana na suzgo likuru wuli, kweni pali cinthu cinyake ico tikwenera kumanya. Kasi vingacitika kuŵa na umoyo wacandulo? Zgoro tingalisanga kwa munthu uyo wakaŵa pa caru capasi vyaka 2,000 ivyo vyajumpha. Munthu uyu ni Yesu Khristu. Nangauli wakakumana na masuzgo ghanandi, kweni wakaŵa na umoyo wacandulo. Nase tingaŵa na umoyo wacandulo usange tingacita nga ndiyo.