HA XIQISEE yootiyoobay tuma. Ha alamiyan deˈoy ‘metoynne tuggay’ kumidoogaa. Geella neeni, ‘Ha wodiyan ufayssiya deˈo deˈiyoogee danddayettiyaabee?’ gaada qoppennan aggakka.

Leemisuwau, Maariyo giyo maccaasee hanotaa qoppa. A kase mino oosancha; shin haˈˈi issi layttay 84, qassi a asi maaddennan sooppe kare kiyana danddayukku. A maara qoppiyaaba gidikkokka, i bollay hitiis. A hegaa mala deˈoy ufayssiya deˈo gaada qoppana danddayiyoy ayba ogiyaanee?

Neeni shin? Ne deˈoy ufayssiya ufayssennaakko issi wode qoppennan aggakka. Ne oosoy daafurssiyaagaanne salettiyaagaa gidana danddayees. Neeni ay keena minnada oottiyaakko harati akeekennan aggana danddayoosona. Neeyyo issi issibay hirattikkokka, sinttanaabaa hirggennan aggakka. Qassi neeni issi issitoo boorasana woy unˈˈettana danddayaasa. Ne so asaa deˈoy ooshshi daridoogaa gidana danddayees. Woy neeni siiqiyo uri hayqqido asa gidana danddayaasa. Anddira giyo bitanee ba aawaa keehippe siiqees; shin a aaway sahettidi qoppennan hayqqi bayiis. Anddiree hegan keehi kayyottido gishshau, ba azzanuwaappe mule minettana danddayennabadan qoppiis.

Nuna gakkiya metoy ayba gidikkonne, ufayssiya deˈo deˈiyoogee danddayettiyaabakkonne nuuni erana koshshees. Ha saˈan 2,000 gidiya layttappe kase deˈida, Yesuus Kiristtoosa deˈuwaappe hegaa erana danddayoos. Yesuusi daro metoy gakkishinkka, ufayssiya deˈo deˈiis. A leemisuwaa kaallikko, nuunikka ufayssiya deˈo deˈana danddayoos.