ANƐ Yesu tsui nɔ e mi ngɛ si himi mi niinɛ lo? E ngɛ heii kaa Yesu nyɛ kɛ e tsɛ nɛ a lɛ lɛ ɔ ji ohiatsɛmɛ, nɛ Yesu be helo nya níhi fuu. E be “he ko nɛ e kɛ e yi fɔɔ.” (Luka 9:57, 58) Jehanɛ se hu ɔ, nihi nyɛ lɛ, nɛ a tu e he munyu yaya, nɛ a gbe lɛ.

Eko ɔ, o ma de ke, ‘Nɔ ko kaa kikɛ ɔ tsui be nyɛe maa nɔ e mi ngɛ si himi mi!’ Se níhi fuu ya nɔ ngɛ Yesu si himi mi nɛ e sa kaa wa susu he. Nyɛ ha nɛ wa susu níhi eywiɛ nɛ ya nɔ ngɛ e si himi mi ɔ he nɛ waa hyɛ.

“Ye niye ní ji kaa ma pee nɔ nɛ tsɔ mi ɔ suɔmi nya ní.”—Yohane 4:34.

Yesu munyu tumi kɛ e ní peepee tsɔɔ kaa e suɔ nɛ e pee Yehowa * nɛ ji e hiɔwe Tsɛ ɔ suɔmi nya ní. Yesu bua jɔ Mawu suɔmi nya ní peemi he wawɛɛ. Kaa bɔnɛ ngmami ɔ nɛ a tsɛ ngɛ yinɔ ɔ tsɔɔ ɔ, Yesu ngɔ Mawu suɔmi nya ní peemi ɔ kɛ to niye ní he. Mo susu nɔ́ nɛ ba loko e ngɔ Mawu suɔmi nya ní peemi kɛ to niye ní he ɔ he nɛ o hyɛ.

Yesu tu munyu nɛ ɔ maa pee piani be mi. (Yohane 4:6) E ngɛ heii kaa jamɛ a be ɔ mi ɔ, hwɔ ngɛ Yesu yee, ejakaa kɛ je mɔtu ɔ, e nyɛɛ kɛ gu Samaria mahi nɛ a ngɛ yokuhi a nɔ ɔ mi. Ngɛ anɔkuale mi ɔ, e kaseli ɔmɛ kpa lɛ pɛɛ kaa “e ba wo e nya mi nɔ́ ko.” (Yohane 4:31) Heto nɛ Yesu ha mɛ ɔ tsɔɔ kaa ke e ngɛ Mawu nítsumi ɔ tsue ɔ, e nuɔ he kaa e tɔ nɛ e ngɛ he wami. Anɛ enɛ ɔ tsɔɔ we kaa Yesu tsui nɔ e mi ngɛ si himi mi lo?

“I suɔ Tsɛ ɔ.”—Yohane 14:31.

Huɛ bɔmi gbagbanii nitsɛ hi Yesu kɛ e Tsɛ ɔ a kpɛti ngɛ hiɔwe. Suɔmi nɛ mi kuɔ nɛ Yesu ngɛ kɛ ha e Tsɛ ɔ wo lɛ he wami nɛ e tsɔɔ nihi e Tsɛ ɔ biɛ, e Tsɛ ɔ yi mi tomihi, kɛ e Tsɛ ɔ suhi. Yesu munyu tumi, e ní peepee, kɛ e su ngɛ kaa e Tsɛ ɔ pɛpɛɛpɛ, lɔɔ he ɔ, ke wa na Yesu ɔ, e ngɛ kaa nɔ́ nɛ wa na e Tsɛ ɔ. Enɛ ɔ he ɔ, benɛ Filipo bi Yesu ke: “Tsɔɔ wɔ Tsɛ ɔ,” Yesu he nɔ ke: “Nɔ tsuaa nɔ nɛ na mi ɔ, e na Tsɛ ɔ.”—Yohane 14:8, 9.

Yesu suɔ e Tsɛ ɔ hluu kaa e suɔ nɛ e pee tue bumi kɛ ha lɛ kɛ ya su gbenɔ mi tete. (Filipibi 2:7, 8; 1 Yohane 5:3) Suɔmi nɛ mi wa nɛ ɔ nɛ Yesu ná kɛ ha e Tsɛ ɔ ha nɛ Yesu tsui nɔ e mi.

“Suɔmi nɛ se be ji kaa nɔ ko maa ngɔ e wami ngɔ fɔ si ngɛ e huɛmɛ a he.”—Yohane 15:13.

Mluku nɛ wa yi ɔ ha nɛ wa be hɛ kɛ nɔ fɔmi kpakpa ko kɛ ha hwɔɔ se. Baiblo ɔ de ke: “Nɔ kake [Adam] lɛ pee yayami, nɛ yayami kɛ gbenɔ ba. Enɛ ɔ ha gbenɔ sã nimli tsuo, ejakaa nɔ tsuaa nɔ pee yayami.” (Romabi 5:12) Wa be nyɛe maa tu yayami he hiɔwo nɛ ji gbenɔ ɔ nya fo ngɛ wɔ nitsɛmɛ wa he wami nya.—Romabi 6:23.

Bua jɔmi sane ji kaa Yehowa je suɔmi mi nɛ e to blɔ nya konɛ e kpɔ adesahi. E ha nɛ e Bi nɛ e ye mluku nɛ yayami ko be e he, nɛ́ pee se ɔ, a ba le lɛ kaa Yesu ɔ ba na nɔ́, nɛ e gbo, konɛ e kɛ kpɔ adesahi ngɛ yayami kɛ gbenɔ nyɔguɛ yemi mi. Suɔmi nɛ Yesu ngɛ kɛ ha e Tsɛ ɔ kɛ adesahi ɔ wo lɛ he wami nɛ e bu e Tsɛ ɔ tue, nɛ e ngɔ e we adesa wami nɛ ye mluku ɔ kɛ fɔ si ngɛ wa he. (Romabi 5:6-8) Suɔmi nɛ ha we nɛ nɔ foɔ lɛ pɛ e nɔ́ mi nɛ Yesu je kpo ɔ ha nɛ e tsui nɔ e mi ngɛ si himi mi. *

“Imi nitsɛ ye bi nɛ i suɔ ji nɛ ɔ nɛ! Ee, i ngɛ e he bua jɔmi saminya.”—Mateo 3:17.

Yehowa tu munyu nɛ ɔ kɛ je hiɔwe benɛ a baptisi Yesu ɔ. Yehowa de nɛ nihi nu kaa e suɔ Yesu nɛ ji e Bi ɔ, nɛ e bua jɔ e he saminya. E be nyakpɛ kaa Yesu kɛ nɔ mi mami de ke: “Tsɛ ɔ suɔ mi.” (Yohane 10:17) Akɛnɛ Yesu le kaa e Tsɛ ɔ suɔ lɛ, nɛ e bua jɔ e he heje ɔ, Yesu kɛ kã da si temi kɛ womi kɛ munyu yayahi nɛ a tu kɛ si lɛ ɔ nya. Suɔmi nɛ ɔ ha nɛ benɛ a maa gbe lɛ ɔ po e yi gbeye. (Yohane 10:18) Atsinyɛ jemi ko be he kaa akɛnɛ Yesu le kaa e Tsɛ ɔ suɔ lɛ nɛ e bua jɔ e he heje ɔ, Yesu tsui nɔ e mi ngɛ si himi mi.

Ngɛ anɔkuale mi ɔ, Yesu tsui nɔ e mi ngɛ si himi mi. E ngɛ heii kaa wa ma nyɛ maa kase níhi fuu ngɛ Yesu he nɛ́ ma ha nɛ wɔ hu wa tsui maa nɔ wa mi ngɛ si himi mi. Ngɛ munyu nɛ nyɛɛ se ɔ mi ɔ, wa ma susu ga womi kpakpa komɛ nɛ Yesu kɛ ha e se nyɛɛli ɔmɛ nɛ kɔɔ bɔnɛ e sa kaa a hi si ha a he ɔ he.