TALAGA kadi a makapnek ti biag ni Jesus? Dimmakkel iti napanglaw a pamilia. Iti unos ti panagbiagna, manmano ti material a sanikuana. Kinapudnona, “awan pangisaadanna iti ulona.” (Lucas 9:57, 58) Kasta met, nagurgura, napardaya, ken idi agangay pinapatay dagiti kabusorna.

Mabalin nga ibagam, ‘Para kaniak, saan a kasta ti makapnek a biag!’ Ngem saan la a dayta ti usigentayo maipapan iti biag ni Jesus. Ammuentayo ti uppat nga aspeto ti biagna.

“Ti taraonko isu ti panangaramidko iti pagayatan daydiay nangibaon kaniak.”—Juan 4:34.

Babaen ti sao ken aramidna, inkagumaan ni Jesus a tinungpal ti pagayatan ti nailangitan nga Amana, ni Jehova. * Pagragsakan ni Jesus nga aramiden ti pagayatan ti Dios. Inyarigna dayta iti taraon, kas ipakita ti teksto a kalkalpas a nadakamat. Usigentayo dagiti kasasaad no apay nga inyarigna dayta iti taraon.

Imbaga ni Jesus dagita a sasao idi tengngan ti aldaw. (Juan 4:6) Sigurado a mabisinen ta kagudua nga aldaw a nagna iti katurturodan ti Samaria. Kinapudnona, indagadag kenkuana dagiti pasurotna: “Rabbi, manganka.” (Juan 4:31) Ipakita ti sungbat ni Jesus a nataraonan ken napabileg iti panagaramidna iti trabaho nga impaannong ti Dios. Saan kadi a makapnek ti biag ti kasta a tao?

“Ay-ayatek ti Ama.”—Juan 14:31.

Nakasingsinged ni Jesus iti nailangitan nga Amana. Ti napalalo a panagayat ni Jesus iti Dios ti nangtignay kenkuana a mangipakaammo iti nagan, panggep, ken galad ti Amana. Babaen ti sasao, tigtignay, ken kababalinna, naan-anay nga imparangarang ni Jesus ti Amana. Isu nga idi kinuna ni Felipe ken Jesus: “Ipakitam kadakami ti Ama,” kinuna ni Jesus: “Ti nakakita kaniak nakitana met ti Ama.”—Juan 14:8, 9.

Kasta unay ti panagayat ni Jesus iti Amana ta situtulok a nagtulnog agingga ken patay. (Filipos 2:7, 8; 1 Juan 5:3) Ti napalalo a panagayat ni Jesus iti Dios ti namagbalin a makapnek ti biagna.

“Awan asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.”—Juan 15:13.

Kas imperpekto a tattao, nakalkaldaang ti masakbayantayo. Kuna ti Biblia: “Babaen iti maysa a tao [ni Adan] simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Ditay maliklikan ti ipapatay a supapak ti basol.—Roma 6:23.

Makaparagsak ta siaayat a nangipaay ni Jehova iti solusion ti nakaay-ay-ay a kasasaad ti sangatauan. Impalubosna nga agsagaba ken matay ti perpekto ken awanan basol nga Anakna a ni Jesus tapno masubbot ti sangatauan manipud pannakaadipen iti basol ken ipapatay. Gapu iti panagayat ni Jesus iti Amana ken kadagiti tattao, sidadaan a nagtungpal ken intedna ti perpekto a natauan a biagna agpaay kadatayo. (Roma 5:6-8) Naaddaan iti makapnek a biag gapu iti di agimbubukodan nga ayatna. *

“Daytoy ti Anakko, ti dungdungnguen, nga inanamongak.”—Mateo 3:17.

Dinakamat ni Jehova dagita a sasao manipud langit idi nabautisaran ni Jesus. Sipapanayag nga inyebkas ni Jehova ti panagayat ken anamongna iti Anakna a ni Jesus. Di pakasdaawan a kinunana: “Ay-ayatennak ti Ama”! (Juan 10:17) Gapu ta ammona nga ay-ayaten ken an-anamongan ni Amana, situtured nga inibturan ni Jesus ti ibubusor ken pammabalaw. Natimbeng ken natibker met ti pakinakemna uray idi mapapatay. (Juan 10:18) Sigurado a ti pannakarikna ni Jesus iti panagayat ken anamong ni Amana ti makagapu nga ad-adda a makapnek ti biagna.

Talaga a makapnek ti biag ni Jesus. Nalawag nga adu ti masursurotayo kenkuana tapno maaddaantayo iti makapnek a biag. Mausig iti sumaruno nga artikulo dagiti balakadna kadagiti pasurotna maipapan iti umiso a panagbiag.