IA DUWE, Sises uhdahn sapwellimanki mour ehu me mie katepe? E sansal me e ketin tikida nan peneinei ehu me sohte nohn kepwehpwe, oh erein eh mour nin sampah, e sohte sapwellimanki dipwisou tohto. Ni mehlel, ‘sohte wasa me e kak wendi oh kommoaldi ie.’ (Luk 9:57, 58) Patehng met, sapwellime imwintihti ko kailongki, karaunlikamwih, oh kemehla ih.

Ele ke kin medewe, ‘I sohte medewe me soangen mouro mie katepe!’ Ahpw mie soahng tohto nan sapwellimen Sises mour me kitail anahne medemedewe. Kitail tehkpene soahng pahieu.

“Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.”​—Sohn 4:34.

Sang sapwellime mahsen oh wiewia, Sises kin ketin rapahki en kapwaiada kupwuren Semeo nanleng, Siohwa. * Sises ketin diar peren laud ni eh ketin wia kupwuren Koht. E ketin kapahrekihong met eh tungoal, duwehte me iren Paipelo ahpwtehn kasalehda. Medemedewe irair en ahnsowo me e ketin kapahrekihong eh tungoal eh wia kupwuren Koht.

Sises mahsanih mahsen pwukat ni eh kerenlahngehr nin souwas. (Sohn 4:6) E ketin sapasapalseli nan nahna kan en Sameria ni mensengo pwon oh e uhdahn men konotada. Sapwellime tohnpadahk ko patohwanohng: “Maing Sounpadahk, komw ketin konot.” (Sohn 4:31) Sang sapwellime pasapeng, Sises ketin kasalehda me e ketin tihnainda oh kehlailda ni eh wia sapwellimen Koht doadoahk. Met sou kin kasalehda me ih soangen aramas men me eh mour mie katepe?

“I poakohng Semei.”​—Sohn 14:31.

Sises kin uhdahn ketin karanih Semeo nanleng. Sapwellime limpoak ong Koht kamwakid ih en ketin kasalehda duwen mwaren Semeo, kupwure, oh sapwellime irair kan. Sang sapwellime mahsen, wiewia oh madamadau, Sises ketin kasalehda ni unsek duwen Semeo, kahrehda ni atail wadek duwen ih, e kin kereniong duwehte atail kin wadewadek duwen Semeo. Eri ni ahnsou me Pilip idek rehn Sises: “Komw ketin kasalehiong kiht Sahm,” Sises ketin sapeng mahsanih: “Mehmen me kilangieier pil kilangehr Sahm.”​—Sohn 14:8, 9.

Sises uhdahn ketin poakohng Semeo ihme kahrehda e kupwurki peikiong ih lao lel mehla. (Pilipai 2:7, 8; 1 Sohn 5:3) Soangen limpoak laud me Sises sapwellimanki ong Koht kahrehiong eh mour en uhdahn mie katepe.

“Iet limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.”​—Sohn 15:13.

Pwehki kitail sohte unsek, atail koapworopwor en wie momour sohte mwahu. Paipel kawehwehda: “Dihp tepidohng sampah sang rehn aramas tehmen [Adam], ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Kitail sohte kak pein pitsang imwilahn dihp, me iei mehla.​—Rom 6:23.

E wia kalahngan ehu me Siohwa ni limpoak ketikihda koasoandi ehu pwehn kamwahwihala irair en aramas. E ketin mweidada sapwellime Ohl me unsek oh sohte dipe, me mwuhr mwarenkihla Sises, en lokolok oh mehla pwehn kihda meirong me anahn pwehn kapitasang aramas akan pahn kalidu en dihp oh mehla. Pwehki Sises ketin mwekidki limpoak me e sapwellimanki ong Semeo oh aramas akan, e kupwurki ketikihda sapwellime mour nin duwen aramas unsek men pwehki kitail. (Rom 5:6-8) Soangen limpoak soh roporop wet kin kahrehiong sapwellime mour en mie katepe. *

“Kowe, me iei nei pwutak kompoake, me I kin kupwurperenki.”​—Madiu 3:17.

Siohwa ketin mahsanih mahsen pwukat sang nanleng ni ahnsou me Sises papidaisla. Siohwa ketin kasalehda ni sansal me e ketin poakohng oh kupwurperenki sapwellime Ohl, Sises. Ihme kahrehda Sises uhdahn kak ketin mahsanih: “Semei kin poakohng ie”! (Sohn 10:17) Pwehki Sises ese me Semeo ketin poakohng oh kupwurperenki ih, met kihong ih eimah pwehn dadaurete pahn uhwong oh ni aramas akan kin kauwe ih. Pwehki Semeo ketin poakohng oh kupwurperenki, met kin sewese Sises ni eh pahn mehla. (Sohn 10:18) E pil kalaudehla katepen sapwellime mour.

Sises uhdahn ketin sapwellimanki mour ehu me mie katepe. E sansal me kitail kak sukuhlki soahng tohto sang ih duwen atail kak weweidki mour ehu me uhdahn mie katepe. Iren mwuhr pahn koasoia ekei kaweid mwahu kan me Sises ketikihong sapwellime tohnpadahk kan duwen arail pahn kin momour.