GUR, riyul’ ni yafas rok Jesus e bay fan? Ba tamilang nni chuguliy u reb e tabinaw nib gafgow, ma nap’an ni ilal ma de yoor e chugum ni i fanay. Bin riyul’ riy, e “dariy bang ni nge pag ir riy nga but’ nge toffan.” (Luke 9:57, 58) Maku yima fanenikan, ma u nog e thin nib kireb u murung’agen, ma tomur riy ma pi toogor rok e ra lied nge yim’.

Sana ga ra lemnag ni ‘Gathi aram rogon e yafas ni bay fan!’ Machane, ka boor ban’en ko yafas rok Jesus nthingar da fal’eged i lemnag. Gad ra fal’eg i yaliy aningeg i ban’en ni bay rogon ko yafas rok.

“Ggan rog e nggu fol ko tin ni be finey e en ni l’ugeg ku gub.”​—John 4:34.

Ke guy Jesus rogon ni nge lebguy e tin nib m’agan’ Jehovah * ngay ni Chitamangin u tharmiy u daken e thin nge ngongol rok. Ma rin’ e tin nib m’agan’ Got ngay u fithik’ e felfelan’. Maruwel ni ma rin’ ni fan ngak Got e ke taareb rogonnag ko ggan ni bod rogon ni yog ko fare verse ni ka fini weliy.

Gonap’an ni ke misiw’ me weliy Jesus e re thin nem. (John 4:6) Kab kakadbul ni milekag u daken e burey u Samaria, ere dariy e maruwar riy ni ke yib e bilig ngak. Ma aram me yog pi gachalpen ngak nra gaargad: “Tamachib, mu koy ban’en!” (John 4:31) Ma fulweg ni pi’ Jesus e be m’ug riy ni bochan ni ke rin’ e tin nib m’agan’ Got ngay, ma bod ni ke gel e michan’ rok. Ere, gathi be yip’ fan e re n’ey ni yafas rok Jesus e bay fan?

“Ba t’uf rog e en ni Chitamangiy.”​—John 14:31.

Rib gel e tha’ u thilin Jesus nge Chitamangin u tharmiy. T’ufeg rok Jesus ngak Got e ke k’aring ni nge weliy ngak e girdi’ murung’agen fithingan, nge tin nib m’agan’ ngay, nge pi fel’ngin. Jesus e m’ug rarogon e Chitamangin rok u daken e thin, nge ngongol, nge lem rok ma aram fan ni gad ra guy Jesus ma gowa gad be guy Jehovah. Aram fan nnap’an ni yog Filip ngak Jesus ni gaar: “Somol, mu dag ngomad e en ni Chitamangiy.” Me fulweg Jesus ngak ni gaar: “Cha’ ni ke guyeg e ke guy e en ni Chitamangiy.”​—John 14:8, 9.

Chitamangin Jesus e rib t’uf rok, ma aram fan nib m’agan’ ngay ni nge fol rok nge mada’ ko yam’. (Filippi 2:7, 8; 1 John 5:3) Ke yib fan e yafas rok Jesus ni bochan e t’ufeg rok nrib gel ngak Got.

“Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.”​—John 15:13.

Bochan rarogodad ndawor da flontgad, ma dabisiy nra mo’maw’ e yafas rodad boch nga m’on. Be weliy e Bible ni gaar: “Denen e yib nga fayleng u daken taabe’ [Adam], ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Roma 5:12) Dabiyog u gelngidad ni ngad milgad ko denen, ni wenegan e yam’.​—Roma 6:23.

Gad ba felfelan’ ya ke pi’ Jehovah e ayuw ni nge yag ni ngan pithig e magawon ko girdi’. Me pag Jesus ni Fak nib flont ni ngan gafgownag me yim’ ya nge yag ni nge pi’ fare biyul nib t’uf ni fan ni nge dab kud manged sib ko denen nge yam’. Ba m’agan’ Jesus ngay ni nge pi’ e yafas rok nib flont ni fan ngodad ya ba t’uf e Chitamangin nge girdi’ rok. (Roma 5:6-8) Ma t’ufeg rok ni aram rogon e ke yibnag fan e yafas rok. *

“Ereray Fakag nib t’uf rog ni kari felan’ug ngak.”​—Matthew 3:17.

Nap’an ni taufenag Jesus, me non Jehovah u tharmiy ni yog e pi thin nem. Ere, ke tamilangnag Jehovah nib t’uf Jesus ni fak rok. Aram fan ni yog ni gaar: “En ni Chitamangiy e gub t’uf rok.” (John 10:17) Ma bochan ni manang Jesus nib m’agan’ e chitamangin ngak, ma kub t’uf rok ma aram fan ni i athamgil u fithik’ e gafgow nge moning ni i tay e girdi’ ngak u fithik’ e pagan’. Ma ki par nib mudugil laniyan’ u nap’an ni yibe n’en ni ngan li’ nge yim’. (John 10:18) Bochan ni manang Jesus nib t’uf mab m’agan’ e Chitamangin ngak, ma dariy e maruwar riy ni kari yib fan e yafas rok.

Ba mutrug ni bay fan e yafas rok Jesus. Mab tamilang nrayog ni ngad filed rok rogon ni nge yib fan e yafas rodad. Bin migid e article e ra pi’ boch e fonow nib tamilang ni ke pi’ Jesus ngak pi gachalpen ni bay rogon ko yafas.