KIT ma wanyamo kwede i pwony mukato-ni, Yecu okwo kwo ma onongo tye ki tyen lok. Pi meno, ka wamito bedo ki kwo ma tye ki tyen lok omyero walub lanenne ki pwonye.

Ki lok ada, Jehovah cuko cwinywa me timo meno, kit ma ginacoya ma malo-ni nyuto kwede. Lubo kit kwo acel ma yam Yecu olubo-ni kwako lubo lanenne ki dok keto pwonye i tic i yo me kwowa ducu. Timo man bikonyowa me nongo cwak pa Lubanga ki dong bedo ki kwo ma tye ki tyen lok.

Pwony pa Yecu kwako cik mapol ma gitwero konyowa me lubo kit kwo ma en olubo. Wanongo cik magi i pwony ma pud dong ngene loyo ma en omiyo i Wi Got. Kong wanenu jami mogo ma en opwonyogi ki kit ma watwero ketogi kwede i tic i kwowa.

KIT MA PWONY MAN KONYOWA KWEDE ME BEDO KI KWO MA TYE KI TYEN LOK: Yecu onyuto ni kinywalo dano ki miti me ngeyo Lubanga.

Watye ki miti madit me ngeyo lagam pi lapeny macalo magi: Pingo watye i lobo kany? Pingo peko onya mapol ata i lobo? Lubanga tika ada paro piwa? Tika kwo tye i nge to? Omyero wange lagam me lapeny magi wek wabed ki kwo ma tye ki tyen lok. Yecu onongo ngeyo ni lagam me lapeny magi nonge i kabedo acel keken​—Lok pa Lubanga. I legane bot Wonne, Yecu owaco ni: “Lokki en ada.” (Jon 17:17) Lok pa Lubanga tika ada twero konywa me ngeyo Lubanga ki dok bedo ki yomcwiny?

GIN MUTIMME ADA: Macalo lawer ma telo wi luwote i gurup me wer, Esa onongo dong tye ka nongo yweka.

Kadi bed kumeno, Esa onongo winyo ni gin mo tye ma orem i kwone. En owacci: “Kadi bed ni onongo amaro bedo i gurupwa me wer, onongo amito ni abed ki kwo ma tye ki tyen lok.” Lacen, Esa orwatte ki ngat acel i kin Lucaden pa Jehovah. Esa owacci: “Apenye ki lapeny mapol.” En omedde ni: “Kit ma en ogamo kwede lapenya ki diro kun tiyo ki Ginacoya otugo mitina ci aye ni en okwan Baibul kweda.” Jami ma Esa opwonyo ki i kwano Baibul ogudo cwinye mumiyo en odyero kwone bot Jehovah. En owacci: “I kare mukato angec, onongo abedo ka poto i peko cawa weng, ento kombeddi dong atye ki tyen lok me kwo.”

KIT MA PWONY MAN KONYOWA KWEDE ME BEDO KI KWO MA TYE KI TYEN LOK: Kica kwako bedo ki niango kun nongo waparo dok wadiyo cwinywa i kom jo mukene.

Yecu onyuto cwiny me kica bot jo ma onongo gimito kony. Pi kica matut ma en onongo tye kwede, en olaro jo mukene ki i can. (Matayo 14:14; 20:30-34) Ka walubo lanen pa Yecu i bedo lukica, ci kwowa bedo ki tyen lok pien jo ma gitye ki cwiny me kica i kom jo mukene ginongo yomcwiny. (Tic pa Lukwena 20:35) Watwero nyuto cwiny me kica bot jo mukene i lokwa kacel ki ticwa, kun wakweyo cwiny jo ma gimito konywa. Nyuto cwiny me kica tika ada medo ber bedowa?

GIN MA OTIMME ADA: Maria gin ki cware Carlos, gitye lanen maber pa jo ma ginyuto cwiny me kica.

Dako pa won Maria oto woko, dok pi mwaki mogo mukato angec kome odoko lit adada mumiyo en pe a ki i kitandane. Maria gin ki Carlos gukele i pacogi ci dong gitye ka miye kony ducu ma mitte. Pe gunino i dyewor pi tyen mapol pien nongo myero gularre ki ot yat ka two cukarine-ni  omedde. Giye ni i kine mogo giol adada. Ento cwinygi yom ma lubbe ki lok pa Yecu, pien gitye ki yengo me ngeyo ni gitye ka mini won Maria kony ma mitte.

KIT MA PWONY MAN KONYOWA KWEDE ME BEDO KI KWO MA TYE KI TYEN LOK: Te lokke me ‘bedo ki kuc’ aye “kelo kuc.”

Bedo ngat ma kelo kuc weko wabedo ki kwo ma tye ki tyen lok nining? Tye kono ni wabedo ki wat maber ki jo ma gurumo ka ngetwa. Omyero watim ber walubu tira man me Baibul, ma wacci: “Ka ce twerre ki tung botwu, myero wubed ki kuc ki dano ducu.” (Jo Roma 12:18) “Dano ducu” kwako lupacowa ki dok jo mukene ma gipe i niyewa. Tika ada bedo ngat ma kelo kuc ki “dano ducu” medo tyen lok me kwowa?

GIN MA OTIMME ADA: Nen kong kwo ma dako mo ma nyinge Nair owok ki iye.

Pi mwaki mapol, en orwatte ki dic mapol ma otemo kerone ka ce en romo gwoko kuc, dok man oa tutwalle ki bot jo me pacone. Nicakke ma cware weke kwede kine ka mwaki 15 mukato angec, en obedo ka pito lutinone kene. Wode mo acel onongo tiyo ki yadi calo jayigi-ni dok i cawa mukene onongo pe jukke kun keto bura i kome kacel ki nyare. Nair oye ni gin ma epwonyo ki i Baibul omiye kero me bedo ki kuc, kadi wa i kare ma kwo tek kuman. En pe otemme me cero lok nyo lweny pi jami. En otute matek me bedo lakica, ki dok nyuto niango bot jo mukene. (Jo Epeco 4:31, 32) En pe tye ki akalakala mo keken ni pwonyo bedo ki kuc okonye me bedo ki wat maber loyo ki lupacone kacel ki jo mukene.

Ka ce walubu tira me ryeko pa Yecu, ci wabinongo yomcwiny ki yengo i kwo. Ento, me bedo ki kwo ma tye ki tyen lok me ada, omyero bene wange gin ma bitimme i anyim. Ada, kwo pe twero bedo ki tyen lok ka ce gin ma wangeyo keken aye ni wabitii, wabitwo ki dong wabito woko. Ento, magi aye gin ma timme i kwowa i loboni.

Kadi bed kumeno, tye kwena maber! Jehovah tye ki mot mapol ata pi jo ducu ma gitute me ‘lubo kit kwo acel ma yam Yecu olubo.’ Jehovah cikke ni ebikelo lobo manyen, ka ma dano ma gigenne gibikwo iye ma komgi yot pi naka kit ma Jehovah oyubo kwede pigi con. Lokke waco ni: “Nen, kabedo pa Lubanga dong tye bot dano. En bibedo kacel kwedgi, ci gin gibibedo jone. Lubanga kikome aye bibedo kwedgi, kun bene bedo Lubangagi. En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”​—Niyabo 21:3, 4.

Maria, dako ma mwakane tye 84 ma kiloko i kome i pwony mukwongo-ni, tye ki yomcwiny pien tye ki gen ni lok meno bicobbe. In kono? Tika imito medo ngecci i kom “kwo ma en aye kwo kikome”​—ma Ker pa Lubanga bikelone-ni? (1 Temceo 6:19) Ka tye kumeno, itwero penyo Lucaden pa Jehovah ma gitye cok kwedi nyo itwero coyo waraga bot jo ma gugoyo magajin man. *