Nga Mulefwaya Ukuba ne Nsansa Mufwile Ukupashanya Yesu

‘Mufwile ukuba ne mibele iyo na Yesu aali na yo.’—1 Yohane 2:6.

NGA fintu twalandilepo mu cipande cafumineko, Yesu ali ne nsansa mu bumi bwakwe. Kanshi nga tulefwaya ukuba ne nsansa, ninshi tufwile ukulamupashanya no kulamumfwila.

Nga fintu ilembo lili pa muulu lilelanda, Yehova atweba ukulapashanya Yesu. Pa kuba ne mibele iyo Yesu aali na yo, tufwile ukulamupashanya sana mu fyo alecita no kulaumfwila ifyo alesambilisha. Ukucita ifi, kukalenga Lesa ukututemwa kabili tukaba ne nsansa.

Pa fyo Yesu asambilishe, pali ne fyo tufwile ukucita pa kuti tulemupashanya. Fimo pa fyo asambilishe, afilandile mu Lyashi lya pa Lupili. Natulande pa fintu fimo ifyo alandilepo e lyo tumone ne fyo twingacita pa kukonka ifyo alandile.

IFYO YESU ALANDILE: “Balipaalwa abaishiba ukuti balakabila ifya kwa Lesa.”—Mateo 5:3.

IFYO IFI FYEBO FINGALENGA UMUNTU UKUBA NE NSANSA: Ifyo Yesu alandile filanga fye ukuti abantu mu cifyalilwa balafwaya ukwishiba Lesa. Ku ca kumwenako, tulafwaisha ukwishiba ifyasuko ku fipusho pamo nga: Mulandu nshi twabela pano calo? Mulandu nshi ukucula kwafulila ifi? Bushe Lesa alatusakamana? Bushe umuntu nga afwa, alakonkanyapo ukuba no mweo? Tulingile ukwishiba ifyasuko kuli ifi fipusho pa kuti tube ne nsansa. Yesu alishibe ukuti uko twingasanga fye ifyasuko fya cine, ni mu Cebo ca kwa Lesa. Yesu apepele kuli Wishi ukuti: “Icebo cenu e cine.” (Yohane 17:17) Bushe cine cine Icebo ca kwa Lesa kuti catwafwa ukwishiba Lesa no kutulenga ukuba ne nsansa?

ICACITIKE: Ba Esa e baletungulula akalibumba ka bakalisha wa filimba kabili aka kalibumba kaleya kalelumbukilako. Na lyo line, ba Esa tabali ne nsansa. Batile: “Nangu ca kuti nalitemenwe ukuba muli ili ibumba lya bakemba ba nyimbo, nalefwaisha sana ukuba ne nsansa.” Tapakokwele ba Esa balishibene no mwaume umo Inte ya kwa Yehova. Batile: “Nalimwipwishe ifipusho ifingi. Nalitemenwe sana ifyo aleasuka bwino ifipusho ukubomfya Baibolo, ne ci calengele nsumine ukulasambilila Baibolo.” Ifyo ba Esa basambilile muli Baibolo fyalibafikile sana pa mutima kabili ici calengele ukuti batendeke ukubombela Yehova. Batile: “Kale tapalepita inshita ninshi naba mu bwafya, lelo ino nshita naliba ne nsansa.” *

IFYO YESU ALANDILE: “Balipaalwa aba luse.”—Mateo 5:7.

IFYO IFI FYEBO FINGALENGA UMUNTU UKUBA NE NSANSA: Ukuba no luse, kulangulukilako bambi e lyo no kubacitila ifisuma. Yesu ali no luse ku balecula. Uluse e lwalelenga ukuti aleafwa abalecula. (Mateo 14:14; 20:30-34) Nga twaba no luse nga filya Yesu aali, kuti twaba ne nsansa, pantu ababa no luse kuli bambi balaba ne nsansa. (Imilimo 20:35) Kuti twalanga ukuti tuli ba luse mu fyo tulanda e lyo na mu fyo tucitilako bambi abalekabila ubwafwilisho. Bushe ukuba uwa luse kuti kwalenga umuntu ukuba ne nsansa?

ICACITIKE: Ba Maria na bena mwabo ba Carlos, balikwata sana uluse. Bawishi ba ba Maria balifwilwa abena mwabo, kabili pali ino nshita balilwala, tabema na pa busanshi. Ba Maria na ba Carlos balisenda bawishi ku ng’anda ku mwabo uko babatensesha. Ilingi line ba Maria na ba Carlos balafilwa no kulaala pantu limo bawishi nga balwala sana ubulwele  bwa shuga, balababutushisha ku cipatala. Ba Maria na ba Carlos batila limo balanaka sana. Lelo nga fintu Yesu alandile, baliba ne nsansa pa mulandu wa kuti balasakamana abafyashi babo.

IFYO YESU ALANDILE: “Balipaalwa aba mutende.”—Mateo 5:9.

IFYO IFI FYEBO FINGALENGA UMUNTU UKUBA NE NSANSA: Ishiwi lya kuti “umutende” lyafuma kwi shiwi lya ciGriki ilipilibula ukuti “ukupanga umutende.” Bushe ukuba uwa mutende kuti kwalenga shani umuntu ukuba ne nsansa? Ukuba aba mutende, kulalenga twaba na bucibusa ubusuma na bantu bambi. Tufwile ukukonka ifyo Baibolo ilanda ukuti: “Mule-esha na maka yenu yonse ukuba aba mutende ku bantu bonse.” (Abena Roma 12:18) “Abantu bonse” abo Baibolo yalandapo ni balupwa lwesu e lyo na bantu abo tushipepa na bo. Bushe cine cine ukuba uwa mutende ku “bantu bonse” kuti kwalenga umuntu ukuba ne nsansa?

ICACITIKE: Natulande pa cacitikiile ba Nair. Pa myaka iingi balikwete amafya ayengi mu lupwa lwabo ayali no kubalenga ukukanaba no mutende. Apo abalume ba ba Nair babashiliile napapita imyaka 15 kabili ba Nair e basunga abana babo. Umwana wabo umwaume alikunkwime ku kubomfya imiti ikola kabili alebacusha sana ica kuti alebatiinya pamo na bankashi yakwe. Ba Nair basangile ukuti nangu ca kuti balikwete amafya, ifyo balesambilila mu Baibolo fyalibakoseshe sana ukutwalilila ukuba aba mutende. Ba Nair tabomana na bantu bambi kabili kabili tabakwata ulubuli. Baliba sana no luse ne cikuuku kabili balalangulukilako abantu bambi. (Abena Efese 4:31, 32) Balishininkisha ukuti ukuba uwa mutende kwalibalenga ukuba na bucibusa ubusuma no lupwa lwabo e lyo na bantu bambi.

UKWISHIBA IFYO IFINTU FIKABA KU NTANSHI

Nga twakonka ifyo Yesu alandile, tukaba aba nsansa icine cine. Na lyo line, pa kuba ne nsansa sha cine cine, tufwile no kwishiba ifyo ifintu fikaba ku ntanshi. Te kuti tube ne nsansa nga twaishiba fye ukuti bushiku bumo tukakota, tukalwala e lyo pa numa tukafwe. Lelo, ifi fine e fitucitikila.

Nangu ca kuti ifi fintu filatucitikila, ku ntanshi kukaba ifisuma! Yehova alilaya ifintu ifingi ifisuma kuli bonse abesha sana “ukuba ne mibele iyo na Yesu aali na yo.” Yehova alilaya ukuti nomba line akatupeela icalo icisuma umo abalungama bakekala umuyayaya kabili ukwabula ukulwala, ukulingana no kufwaya kwakwe. Icebo cakwe citila: “Moneni! Itenti lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.

Ba Maria abali ne myaka 84 abo tulandilepo mu cipande ca kubalilapo muli fino fipande ifikonkene, balafwaisha sana ukubako ilyo ifyalandwapo muli ili lembo fikafikilishiwa. Inga imwe, bushe kuti mwatemwa ukwishibilapo na fimbi pa “mweo wine wine,” uo tukakwata mu Bufumu bwa kwa Lesa? (1 Timote 6:19) Nga kuti mwatemwa, kuti mwalanshanya ne Nte sha kwa Yehova abekala ku cifulo mwikalila nelyo kuti mwalembela abalemba ino magazini. *

[Amafutunoti]