TAAKƐ wɔsusu he yɛ sane ni tsɔ hiɛ lɛ mli lɛ, Yesu hi shi bɔ ni ha etsui nyɔ emli. No hewɔ lɛ, kɛ́ wɔmiitao ni wɔtsuii anyɔ wɔmli lɛ, ehe baahia ni wɔbɔ mɔdɛŋ wɔnyiɛ Yesu nɔkwɛmɔ nɔ lɛ sɛɛ, ni wɔbo eŋaawoo toi.

Anɔkwa, Yehowa woɔ wɔ hewalɛ koni wɔfee nakai pɛpɛɛpɛ taakɛ ŋmalɛ ni yɔɔ yiteŋ gbɛ lɛ tsɔɔ lɛ. Kɛ́ wɔbaanyiɛ taakɛ Yesu nyiɛ lɛ, ebaabi ni wɔha wɔshihilɛ gbɛ fɛɛ kɛ enɔkwɛmɔnɔ kɛ etsɔɔmɔi lɛ akpã gbee. Kɛ́ wɔfee nakai lɛ, ebaaha Nyɔŋmɔ akpɛlɛ wɔnɔ ni wɔtsui baanyɔ wɔmli.

Yɛ Yesu nitsɔɔmɔi amli lɛ, etsɔɔ Biblia shishitoo mlai komɛi ni baanyɛ aye abua wɔ koni wɔhi shi taakɛ ehi shi lɛ. Wɔnaa Biblia mli shishitoo mlai komɛi yɛ Yesu Gɔŋ nɔ Shiɛmɔ ni ehé gbɛ́i waa lɛ mli. Ha wɔsusu shishitoo mlai nɛɛ fioo komɛi ahe, ni wɔkwɛ bɔ ni wɔbaafee wɔkɛtsu nii yɛ wɔshihilɛ mli.

BƆ NI SHISHITOO MLA NƐƐ HAA MƆ TSUI NYƆƆ EMLI:

Yesu tsɔɔ akɛ yɛ adebɔɔ naa lɛ, adesai shweɔ akɛ amɛle Nyɔŋmɔ. Wɔshweɔ akɛ wɔná sanebimɔi ni nyiɛ sɛɛ nɛɛ ahetoo: Mɛni hewɔ wɔyɔɔ biɛ? Mɛni hewɔ piŋmɔ efa babaoo yɛ shikpɔŋ lɛ nɔ nɛkɛ? Ani Nyɔŋmɔ susuɔ wɔhe lɛɛlɛŋ? Ani shihilɛ ko yɛ gbele sɛɛ? Ehe miihia ni wɔná sanebimɔi nɛɛ ahetoo bɔni afee ni wɔtsui anyɔ wɔmli yɛ shihilɛ mli. Yesu le akɛ abaaná sanebimɔi nɛɛ ahetoo kɛjɛ he kome pɛ ni anyɛɔ akɛ he fɔ̃ɔ nɔ—Nyɔŋmɔ Wiemɔ lɛ mli. Beni Yesu kɛ e-Tsɛ wieɔ yɛ sɔlemɔ mli lɛ, ekɛɛ akɛ: “Owiemɔ lɛ anɔkwaleŋ.” (Yohane 17:17) Ani Nyɔŋmɔ Wiemɔ lɛ baanyɛ aye abua wɔ koni wɔle Nyɔŋmɔ, ni wɔtsui anyɔ wɔmli?

SANE KO NI BA DIƐŊTSƐ:

Nuu ko ni atsɛɔ lɛ Esa lɛ ji lalɔi akuu ko ni ehé gbɛ́i waa lɛ hiɛnyiɛlɔ, ni eshwɛ fioo kɛkɛ ni ebaatsɔ rɔk lalafolɔ ni ehé gbɛ́i waa. Fɛɛ sɛɛ lɛ, Esa nu he akɛ etsui enyɔɔɔ emli yɛ shihilɛ mli. Ewie akɛ: “Eyɛ mli akɛ mimii shɛɔ mihe akɛ mifata kuu lɛ he moŋ, shi minuɔ he akɛ mitsui enyɔɔɔ mimli tsɔ yɛ shihilɛ mli.” Kɛlɛ, fee sɛɛ lɛ, Esa kɛ Yehowa Odasefonyo ko kpe. Esa kɛɛ: Mito sanebimɔi mishwie enɔ. Bɔ ni ejɛ ŋmalɛi lɛ amli ekɛ mi susu saji ahe kɛha misanebimɔi lɛ ahetoo lɛ ha minaa kpɛ mihe waa, no hewɔ lɛ mikpɛlɛ koni ekɛ mi akase Biblia lɛ.” Nɔ ni Esa kase kɛjɛ Biblia lɛ ni ebɔi kasemɔ lɛ mli lɛ ta etsuiŋ waa, ni no tsirɛ lɛ ni ejɔɔ ewala nɔ eha Yehowa. Ekɛɛ akɛ: “Be ko ni eho lɛ, etsɛɛɛ nɔŋŋ kɛkɛ lɛ miyagbee naagba ko mli. Shi amrɔ nɛɛ, mitsui enyɔ mimli diɛŋtsɛ yɛ shihilɛ mli.” *

BƆ NI SHISHITOO MLA NƐƐ HAA MƆ TSUI NYƆƆ EMLI:

Mɔbɔnalɛ biɔ ni ajie musuŋtsɔlɛ kpo atsɔɔ mɛi, koni akɛ amɛ aye yɛ mlihilɛ mli ni asusu amɛhe. Yesu jie mɔbɔnalɛ kpo etsɔɔ mɛi ni ehia amɛ lɛ. Musuŋtsɔlɛ sɔŋŋ hewɔ lɛ, eye ebua mɛi ni piŋɔ lɛ koni amɛhe ajɔ amɛ. (Mateo 14:14; 20:30-34) Kɛ́ wɔkase Yesu musuŋtsɔlɛ lɛ, wɔtsui nyɔɔ wɔmli, ejaakɛ mɛi ni naa mɛi krokomɛi mɔbɔ lɛ náa miishɛɛ. (Bɔfoi lɛ Asaji 20:35) Wɔbaanyɛ wɔtsɔ wiemɔi kɛ nifeemɔi ni mlihilɛ yɔɔ mli lɛ anɔ wɔna mɛi ni wɔyelikɛbuamɔ he hiaa amɛ lɛ mɔbɔ. Ani eji anɔkwale akɛ kɛ́ wɔna mɛi krokomɛi mɔbɔ lɛ, ehaa wɔtsui nyɔɔ wɔmli?

SANE KO NI BA DIƐŊTSƐ:

Maria kɛ ewu Carlos fee nɔkwɛmɔnɔ ni wɔbaanyɛ wɔkase yɛ mɔbɔnalɛ he. Maria papa ji okulafo, ni nyɛsɛɛ nɛɛ hu hela eha papa nɛɛ eka saa mli. Maria kɛ Carlos ŋɔ epapa kɛba amɛshĩa lɛ, ni amɛkwɛɔ etsiabo. Bei komɛi lɛ, kɛ́ shɛ gbɛkɛ lɛ amɛnyɛɛɛ amɛwɔ yɛ nuu lɛ shihilɛ lɛ hewɔ,  ni amɛkɛ lɛ yaa helatsamɔhe kɛ́ esikli hela lɛ wo ehe nɔ. Amɛwie yɛ faŋŋ mli akɛ, bei komɛi lɛ etɔɔ amɛ bliboo. Shi, taakɛ Yesu kɛɛ lɛ, amɛyɛ miishɛɛ ejaakɛ amɛtsuɔ Maria papa hiamɔ nii ahe nii amɛhaa lɛ, ni no haa amɛtsui nyɔɔ amɛmli waa.

BƆ NI SHISHITOO MLA NƐƐ HAA MƆ TSUI NYƆƆ EMLI:

Mɛɛ gbɛ nɔ mɔ ni kpãtãa lɛ tsui nyɔɔ emli babaoo yɛ shihilɛ mli? Nɔ kome ji akɛ, wɔnáa wɔkɛ mɛi krokomɛi ateŋ naanyobɔɔ kpakpa. Ehi jogbaŋŋ akɛ wɔkɛ Biblia mli ŋaawoo nɛɛ baatsu nii, ekɛɛ: “Kɛ́ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ [loo toiŋjɔlɛ] mli.” (Romabii 12:18) Wiemɔ ni ji “gbɔmɛi fɛɛ” lɛ kɔɔ wɔwekumɛi kɛ mɛi krokomɛi ni wɔkɛ amɛ bɛ hemɔkɛyeli kome mli lɛ ahe. Kɛ́ wɔkɛ “gbɔmɛi fɛɛ” hi shi yɛ toiŋjɔlɛ mli lɛ, ani wɔtsui baanyɛ anyɔ wɔmli?

SANE KO NI BA DIƐŊTSƐ:

Susumɔ yoo ko ni atsɛɔ lɛ Nair lɛ niiashikpamɔ lɛ he okwɛ. Yɛ afii ni tsɔ hiɛ lɛ amli lɛ, ekɛ nɔnyɛɛ babaoo kpe, ni enɛ ka toiŋjɔlɛ sɛɛ ni etiuɔ lɛ, titri lɛ yɛ lɛ diɛŋtsɛ eweku lɛ mli. Kɛjɛ beni ewu shi lɛ aaafee afii 15 ni eho nɛ lɛ, ekometoo pɛ ekwɛ ebii lɛ. Ebihii lɛ ateŋ mɔ kome kɛ tsofai tsu nii yɛ gbɛ ni ejaaa nɔ, ni bei pii lɛ anyɛɛɛ lɛ akudɔ, ni ewoɔ emami kɛ enyɛmi yoo lɛ awala he gbeyei. Nair heɔ eyeɔ akɛ nibii ni ekase yɛ Biblia lɛ mli lɛ ji nɔ ni ewaje lɛ ni enyɛɔ etiuɔ toiŋjɔlɛ yɛ shihilɛ ni wawai tamɔ nɛkɛ po lɛ amli lɛ. Ebɔɔ mɔdɛŋ koni ekataa saji anaa loo ekabe hu yɛ nibii komɛi ahe. Emiaa ehiɛ koni yɛ ekɛ mɛi krokomɛi asharamɔ mli lɛ, ejie mlihilɛ kɛ musuŋtsɔlɛ kpo, koni enu amɛ shishi. (Efesobii 4:31, 32) Eheɔ eyeɔ diɛŋtsɛ akɛ toiŋjɔlɛ ni etiuɔ lɛ eha wekukpãa kpakpa ebakã ekɛ ewekumɛi kɛ mɛi krokomɛi ateŋ.

Kɛ́ wɔkɛ Yesu ŋaawoo ni nilee yɔɔ mli lɛ tsu nii lɛ, wɔbaaná miishɛɛ ni wɔtsui baanyɔ wɔmli diɛŋtsɛ yɛ shihilɛ mli. Kɛlɛ, dani wɔtsui baanyɔ wɔmli diɛŋtsɛ lɛ, esa akɛ wɔle nɔ ni baaba wɔsɛɛ. Ejaakɛ, kɛ́ nɔ pɛ ni wɔle ji akɛ wɔsɛɛ lɛ wɔbaagbɔlɔ, wɔhe baaye, ni wɔbaagboi lɛ, te baafee tɛŋŋ wɔtsui anyɔ wɔmli yɛ shihilɛ mli hu? Kɛlɛ, nakai pɛpɛɛpɛ ji bɔ ni sane lɛ ji yɛ jeŋ shihilɛ nɛɛ mli.

Fɛɛ sɛɛ lɛ, sane kpakpa ko yɛ kɛha wɔ! Jɔɔmɔi babaoo yɛ ni Yehowa kɛbaaha mɛi fɛɛ ni ‘nyiɛɔ taakɛ Yesu nyiɛ lɛ nɔŋŋ’ lɛ. Yehowa ewo shi akɛ etsɛŋ ekɛ jalɛ jeŋ hee ko baaba, ni adesai anɔkwafoi baahi mli kɛya naanɔ yɛ gbɔmɔtsoŋ hewalɛ ni yeɔ emuu mli taakɛ eto eyiŋ kɛjɛ shishijee lɛ. Nyɔŋmɔ Wiemɔ lɛ kɛɔ akɛ: “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.

Maria, yoo nukpa ni eye afii 84 ni atsĩ etã yɛ saji ni wɔsusuɔ he nɛɛ klɛŋklɛŋ nɔ̃ lɛ mli lɛ kɛ miishɛɛ miikpa sane nɛɛ mlibaa gbɛ. Ni bo hu? Ani obaasumɔ ni ole “anɔkwa wala lɛ” he nibii krokomɛi—wala ni abaaná yɛ Nyɔŋmɔ Maŋtsɛyeli lɛ shishi lɛ? (1 Timoteo 6:19) Kɛ́ nakai lɛ, obaanyɛ obi Yehowa Odasefoi ni yɔɔ he ni oyɔɔ lɛ ateŋ mɔ ko loo ŋmaa kɛyaha mɛi ni fee wolo nɛɛ. *