YESŨ ekalaa e na ũtanu o tondũ vaneenewa ĩsomonĩ yĩla yavĩta. Kwoou, o naitũ twenda kwĩkala twĩ na ũtanu twaĩle kũatĩĩa ngelekany’o yake na ũtao wake.

Ũu nĩw’o Yeova ũtwĩaa twĩke o tondũ ĩandĩko yĩla yĩ vau ĩũlũ yonanĩtye. Kũatĩĩa mwĩkalo wa Yesũ nĩ kwĩkala kwosana na mũendele wake na momanyĩsyo make. Tweeka ũu, tũkeethĩwa na ũnyanya vamwe na Ngai na tũyĩkala twĩ na ũtanu.

Yesũ aimanyĩsya nĩwawetie myolooto ĩla ĩtonya kũtũtetheesya kũatĩĩa ngelekany’o yake. Nĩtũsomaa myolooto ĩsu nthĩnĩ wa Ũtavany’a wa Yesũ wa Kĩĩmanĩ. Ekai tũneenee ĩmwe ya myolooto ĩsu na ũndũ tũtonya kũmĩatĩĩa.

ŨNDŨ MWOLOOTO ŨSU ŨTONYA KŨTŨTETHEESYA KWĨKALA TWĨ NA ŨTANU:

Yesũ oonanasya kana andũ mombĩtwe me na wendi wa kũmũmanya Ngai. Twĩthĩawa twĩ na wendi wa kũmanya mosũngĩo ma makũlyo aa: Nĩkĩ andũ moombiwe? Nĩkĩ andũ mathĩnaa? We Ngai nũtũthĩnĩkĩaa? Andũ makw’a makathayũũka? Twaĩlĩte kũmanya mosũngĩo ma makũlyo asu nĩ kana twĩkale twĩ na ũtanu. Yesũ nĩweesĩ kana tũtonya kũkwata mosũngĩo asu kuma Ndetonĩ ya Ngai. Yesũ aivoya aisye atĩĩ: “Ndeto yaku nĩyo w’o.” (Yoana 17:17) Yo Ndeto ya Ngai no ĩtũtetheesye kũmũmanya na kwĩthĩwa twĩ na ũtanu?

NGELEKANY’O:

Vau mbeenĩ, Esa ainaa na mbandi yĩ nguma na aĩ vakuvĩ kũtw’ĩka mwini wĩ nguma. Ĩndĩ ndaĩ na ũtanu. Easya ũũ: “O na kau neew’aa mũyo nĩ mwini, ndyaĩ na ũtanu.” Ĩtina wa kavinda, Esa nĩwakomanie na Ngũsĩ ya Yeova. Easya atĩĩ: “Nĩnamũkũlilye makũlyo maingĩ. Nĩnendeeiw’e mũno nĩ mosũngĩo make nũndũ maumĩte Maandĩkonĩ, na kwoou neetĩkĩla amanyĩsye Mbivilia.” Maũndũ ala Esa weemanyĩisye nĩmatumie eyumya kũla kwĩ Yeova. Easya ũũ: “Ndemanyĩĩtye Mbivilia natindĩaa kũlika mathĩnanĩ. Ĩndĩ ũmũnthĩ nĩthĩawa na ũtanu.” *

ŨNDŨ MWOLOOTO ŨSU ŨTONYA KŨTŨTETHEESYA KWĨKALA TWĨ NA ŨTANU:

Mũndũ wĩ tei nũthĩnĩkĩaa andũ ala angĩ. Yesũ nĩweew’ĩaa tei andũ ala maĩ na thĩna, na kwondũ wa ũu nĩwamatetheeasya. (Mathayo 14:14; 20:30-34) Ĩla tweew’ĩa andũ tei o tondũ Yesũ wamew’ĩaa, nĩtwĩthĩawa na ũtanu. (Meko ma Atũmwa 20:35) Twonanasya kana nĩtũkwĩw’ĩa ala angĩ tei kwĩsĩla meko na ũneeni witũ. Kwĩka ũu nĩkũtumaa mew’a me eanĩe. Kw’o kwĩthĩwa na tei nĩkũtumaa twĩthĩwa na ũtanu?

NGELEKANY’O:

Maria na Carlos nĩ andũ me tei mũno. Ĩthe wa Maria nĩwakw’ĩĩwe nĩ mũka, na nĩ mũwau ũkethĩa ndetonya. Ĩndĩ Maria na Carlos nĩmamwosie mekalae nake nĩ kana mamũsũvĩe. Mavinda maingĩ maikomaa, o na nĩmamũtwaa sivitalĩ ũtukũ ĩla ũwau wake wa sukalĩ wookĩla. Mavinda amwe manoaa mũno. Ĩndĩ methĩawa me atanu nũndũ wa kũmũthĩnĩkĩa ĩthe wa Maria.

ŨNDŨ MWOLOOTO ŨSU ŨTONYA KŨTŨTETHEESYA KWĨKALA TWĨ NA ŨTANU:

Kwĩka mũuo kũtonya kũtũtetheesya ata tũkekala twĩ atanu? Kwĩka ũu nĩkũtumaa twĩkala na ngwatanĩo nzeo vamwe na andũ ala angĩ. Nũseo kũatĩĩa ũtao ũũ wa Mbivilia: “Ethĩwa nũtonyeka, kwa ngalĩ ĩla yenyu, mwĩthĩwe na mũuo na andũ onthe.” (Alomi 12:18) “Andũ onthe” ala mawetetwe ĩandĩkonĩ yĩu nĩ andũ ma mũsyĩ na andũ ala angĩ mate Ngũsĩ. Kw’o kwĩthĩwa na mũuo na “andũ onthe” no kũtume twĩkala twĩ atanu?

NGELEKANY’O:

Kwasũanĩa ngelekany’o ya kĩveti kĩtawa Nair. Nair akwatĩtwe nĩ mathĩna maingĩ mũsyĩnĩ wake ala matumĩte wĩthĩwa ũte ũndũ wĩ laisi kwake kwĩkala na mũuo. Nair ethĩĩtwe aĩea syana syake e weka kuma ĩla mũũme wake wamũkolile myaka 15 mĩvĩtu. Mwana ũmwe wake nĩwanyusaa ndawa sya kũmila na mavinda maingĩ nĩweethĩawa na ithokoo na nĩwatĩsasya eĩtu-a-inyia na inyia wake. Nair aasyaa kana kĩla kĩmũtethetye ethĩwe na mũuo mavinda asu ma thĩna nĩ kwĩmanyĩsya Mbivilia. Nũtataa ndakethĩwe na ngananĩo. Vandũ va ũu, atataa ethĩwe na tei na aielewa andũ ala angĩ. (Aeveso 4:31, 32) Nĩwĩsĩ nesa ki kana kwĩthĩwa e na mũuo nĩkw’o kũtumĩte ethĩwa na ngwatanĩo nzeo vamwe na andũ ma mũsyĩ na andũ angĩ.

Twaatĩĩa ũtao wa Yesũ tũkekalaa twĩ na ũtanu na twĩ eanĩe. Ĩndĩ, nĩ kana twĩthĩwe na ũtanu wa w’o no nginya tũsũanĩe ĩũlũ wa ĩvinda yĩla yũkĩte. Lilikana kana mũndũ ndatonya kwĩthĩwa e na ũtanu vyũ ethĩwa nĩwĩsĩ akakũa, awae, na aikw’a. Ĩndĩ maũndũ asu no nginya matũkwate.

O na ũu wĩ o vo, ve ũvoo mũseo! Yeova akaathima ala matataa ‘kũatĩĩa mwĩkalo wa Yesũ.’ Yeova nĩwathanĩte kana o mĩtũkĩ akaete moalyũku maingĩ vaa nthĩ, na andũ ala alũngalu mayĩkala tene na tene mate kũwaa. Ndeto yake ĩtũtavĩtye ũũ: “Sisya, ĩeema ya Ngai yĩ vamwe na andũ, nake akatũa vamwe nao, namo makeethĩwa andũ make, na Ngai mwene akeethĩwa vamwe nao, Ngai woo: na akavyaĩa methoi onthe methonĩ moo; na kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.”—Ũvuan’yo 21:3, 4.

Kĩla kĩveti kĩtawa Maria kĩ na myaka 84 na kĩla kĩwetiwe ĩsomonĩ ya mbee, kĩ na wĩkwatyo wa kwona ndeto isu iyĩanĩa. We wĩ na wĩkwatyo ta ũsu? We no wende kũmanya maũndũ maingangĩ ĩũlũ wa “thayũ wa w’o” ũla tũkakwata Ũsumbĩnĩ wa Ngai? (1 Timotheo 6:19) Ethĩwa no wende kũmanya, kũlya Ngũsĩ sya Yeova kana ũandĩkĩe ala makyavĩthĩtye ĩkaseti yĩĩ. *