KALA ki tua mono ku milongi ia bhiti, Jezú ua zediuile kiavulu ku muenhu. Mu kiki, se tua mesena ku zediua ku muenhu, tua tokala ku kaiela o phangu iê ni kuívua o milongi iê.

Mu kidi, kiki kiene ué kia tu tendelesa Jihova o ku bhanga, kála kilondekesa o velusu ia Bibidia ku thandu. Kuenda kala kiende Jezú, kulombolola ku kaiela o phangu ni ilongesu iê. Ku bhanga kiki, kia-nda bhangesa Nzambi ku tu zola ni ku zediua ku muenhu.

Jezú ua longo bhu kaxi ka ijila i tena ku tu kuatekesa ku kaiela o phangu iê. O ijila íii, tu i sanga mu Diskursu dia bhange ku Mulundu. Tua-nda di longa o ijila ia longo muéne ni kiebhi ki tu tena ku i kumbidila ku muenhu uetu.

KIEBHI O KIJILA KIKI KI KUATEKESA O KU ZEDIUA KU MUENHU:

Jezú ua londekesa kuila o athu a a bhange ni vondadi ia kuijiia Nzambi ni ku bhanga o vondadi iê. Etu tu mesena kuijiia o itambuijilu ia ibhuidisu kala íii: mukonda diahi tuala ku muenhu? Mukonda diahi kuene hadi iavulu mu ixi? O kuila Nzambi ua tu zolo? Ihi i bhita n’etu kioso ki tu fuá? Phala ku zediua ku muenhu, tua tokala kuijiia o itambuijilu ia ibhuidisu íii. Jezú ua londekesa kuila kuala ngó divulu dimoxi dia kidi di tena ku bhana o itambuijilu ia ibhuidisu íii—o Mak’â Nzambi. Kioso kia kexile mu zuela ni Tat’ê ia diulu bhu kaxi ka musambu, Jezú uambe: ‘O maka mê ene o kidi.’ (Nzuá 17:17) O kuila o Mak’â Nzambi, o Bibidia, a tena ku tu kuatekesa ku mu ijiia ni ku zediua ku muenhu?

MUSOSO UA KIDI:

Eza ua kexile ku pholo mu kuimba kumoxi ni kibuka kiê ni ku tambula fuma kala Ngimbidi ia rock. Maji né kiki, Eza ka zediuile ku muenhu. Muéne uambe: “Sumbala nga uabhele kiavulu ku kala ku kibuka, eme nga mesenene ku zediua ku muenhu.” Maji mu ku bhita thembu, Eza ua zuela ni Jimbangi ja Jihova. Eza uambe: “Nga a bhange ibhuidisu iavulu. O itambuijilu iâ iambote ia Bibidia ia ngi tula ku muxima, eme nga mateka ku di longa o Bibidia ni ene.” O ima ia kexile mu di longa Eza mu Bibidia ia mu tula ku muxima ni ku mu suínisa ku di bhakula kua Jihova. Muéne uambe: “M’ukulu nga kexile ni maka avulu. Lelu nga zediua ku muenhu.” *

KIEBHI O KIJILA KIKI KI KUATEKESA O KU ZEDIUA KU MUENHU:

O henda ilombolola ku bhanga mbote ku muthu, ku kala muthu uambote ni ku xila. Jezú ua londekesa henda kua ió a bhindamene. O henda ia mu suínisa ku kuatekesa ió akexile mu tala hadi. (Matesu 14:14; 20:30-34) Kioso ki tu kaiela o phangu ia Jezú ia kulondekesa henda ku athu, tu zediua ku muenhu, mukonda oso alondekesa henda kua akuâ, athu a zediua. (Ikalakalu 20:35) Tu tena kulondekesa henda ku athu mu izuelu ietu ia uabha ni mu ima i tu bhanga, ku kuatekesa ió a bhindamena o kikuatekesu kietu. O kuila o kulondekesa henda ku athu, ku tu kuatekesa ku zediua ku muenhu?

MUSOSO UA KIDI:

Madiia ni muadi uê Karlu, phangu iambote ia kulondekesa henda. O tata ia Madiia, mutudi, mu izuua ia sukidila-ku muéne ua kumbama. Madiia ni Karlu, a mu ambata kubhata diâ phala ku mu kuatekesa. Saí izuua, a bhita usuku sé ku zeka, phala ku mu ambata mu  inzo ia ku saka, kioso muéne kia bua ni uhaxi ua diabete. Ene a zuela kuila saí ithangana a bhuile kiavulu. Maji a sanguluka, kála kiambe Jezú, mukonda ejiia kuila a mu bhanga ioso phala ku kuatekesa o tata ia Madiia.

KIEBHI O KIJILA KIKI KI KUATEKESA O KU ZEDIUA KU MUENHU:

O ku kala muthu ua ‘paze’ kulombolola “kulondekesa paze.” Kiebhi o kulondekesa o paze ku bhangesa o muthu ku zediua ku muenhu? Kioso ki tu londekesa o paze ku akuetu, tu kala ni ukamba uambote ni athu oso a tu kondoloka. Kima kiambote ku kaiela o milongi ia Bibidia: “Se mua ki tena, kalenu ku paze ni athu oso; mvunda ki i tunde ko kuenu.” (Loma 12:18) O kizuelu “athu oso” kilombolola, o muiji ni athu a mukuá ki abhezi a Nzambi. O kuila o kulondekesa o paze ku “athu oso” ku tena ku tu bhekela ku zediua ku muenhu?

MUSOSO UA KIDI:

Tanga o musoso ua muhatu, a mu ixana Nairi. Tundé ukulu, Nairi uene mu dibhana ni ibhidi i mu bhonzesa kulondekesa o paze, bhenge-bhenge ku muiji uê. Tundé muadi uê kia mu xisa, kua bhiti kiá 15 dia mivu, muéne uene mu sasa o tuana tuê ubheka uê. Umoxi-bho ua kexile mu tambula ji droga, saí ithangana muéne ua kexile mu tesa uôma, eme ni tuana tuami tua ahatu. Nairi u xikina kuila o Bibidia iene ia mu kuatekesa kulondekesa o paze mu ithangana íii ia bhonzo. Nairi kene mu sota ku bhanga jinvunda mba ku di kuata ni mona. Muéne u bhanga nguzu phala ku kala muthu ua lenduka, uambote ulondekesa henda ku akuâ. (Efezo 4:31, 32) Muéne u sanguluka mu kuijiia kuila, o kulondekesa o paze, kua mu kuatekesa ku dibhana kiambote ni muiji uê ni athu oso.

Se tu kaiela kiambote o milongi ia Jezú, tua-nda sanguluka ni ku zediua ku muenhu. Maji phala ku zediua ku muenhu, tua bhingi kuijiia o ima ia-nda kuíza ku hádia. Mu kidi, kiebhi ki tu tena o ku zediua ku muenhu se tuejiia kuila, hádia tua-nda kuka, tua-nda kata ni kufuá? Kiki kiene kiala o mundu.

Maji saí-ku njimbu iambote! Jihova ua-nda besoala kiavulu oso a bhanga nguzu phala ‘kuenda kala kiende Jezú.’ Jihova ua tu kanena kuila hádia, ua-nda bheka mundu ua ubhe kua-nda kala o athu ambote, kala kia mesenene muéne ku dimatekenu—ku kalela-ku ku muenhu ni sauidi ia iuka. O Maka mê a zuela: ‘Talesa, kindala o balaka ia Nzambi iala mu’axaxi ka athu! Nzambi muéne uenda jinga-nâ, u kala Nzambi iâ. Muéne u a kondona o masoxi moso ku mesu mâ! Ki ku kala dingi kufuá, né ngó mukôndo, mba kudila, mba kukata. Mukonda ima ia diangele-ku, ia bhiti.’—Dijingunuinu 21:3, 4.

Madiia, o muhatu uala ni 84 a mivu, u tua mu tange kiá ku milongi ia dianga, u sanguluka kiavulu mu ku kingila o kikanenu kiki ku di kumbidila. Abha eie? O kuila ua mesena kuijiia dingi ia lungu ni “muenhu ua kidi”—ua-nda bheka o Utuminu ua Nzambi? (1 Timote 6:19) Se ua mesena, bhinga ku Jimbangi ja Jihova ku diembu diê mba u soneka ku kibuka kia edika, a bhange o kadivulu kaka. *