ANU bu mutuvua baleje mu tshiena-bualu tshishale, Yezu uvua ne muoyo uvua ne tshipatshila. Nunku tuetu basue bua muoyo wetu wikale ne tshipatshila, tudi ne bua kuidikija tshilejilu tshiende ne kuteleja mibelu yende.

Bushuwa, Yehowa udi utulomba bua kuenza nanku anu bu mudibi bileja mu mvese udi kuulu eku. Kuenda bu muvua Yezu muende kudi kulomba kulonda tshilejilu tshiende ne malongesha ende mu nsombelu wetu mujima. Tuetu benze nunku, Nzambi neatuanyishe ne netuikale ne muoyo udi ne tshipatshila.

Mu malu avua Yezu mulongeshe muvua mêyi adi mua kutuambuluisha bua kuenda bu muvuaye muende. Tudi tupeta mêyi aa mu Muyuki wa Yezu muende lumue wa pa Mukuna. Tukonkononayi amue mêyi ne tumone mutudi mua kuatumikila mu nsombelu wetu.

MUDI DÎYI EDI DIAMBULUISHA BUA KUIKALA NE MUOYO UDI NE TSHIPATSHILA:

Yezu wakaleja ne: bantu badi ne dijinga dia ku tshilelelu dia kumanya Nzambi. Tudi mua kupeta mandamuna a nkonko bu mudi eyi: Bua tshinyi tudi pa buloba? Bua tshinyi makenga bungi nunku pa buloba? Nzambi utuku ututabalela anyi? Padi muntu ufua udiku utungunuka ne kuikala ne muoyo anyi? Tudi basue kupeta mandamuna a nkonko eyi bua kuikala ne muoyo udi ne tshipatshila. Yezu uvua mumanye ne: anu mu Dîyi dia Nzambi ke mutudi mua kupetela mandamuna a nkonko eyi. Yezu wakalomba Tatuende mu disambila wamba ne: “Dîyi diebe mbulelela.” (Yone 17:17) Dîyi dia Nzambi didiku mua kutuambuluisha bua kumanya Nzambi ne kuikala ne disanka anyi?

TSHILEJILU TSHIA MU NSOMBELU:

Bu muvua Esa mulombodi wa dingumba kampanda dia bimbi ba misambu bende lumu, uvua musue kulua muimbi munene wa mizike ya rock muende lumu. Nansha nanku, Esa uvua udiumvua mupangile bualu kampanda. Udi wamba ne: “Nansha mumvua munange bikole dingumba edi, mvua musue bua muoyo wanyi wikale ne tshipatshila.” Kadi mu kupita kua matuku, Esa wakapetangana ne Ntemu wa Yehowa. Esa udi wamba ne: “Ngakamuela nkonko ya bungi. Kadi mushindu uvuaye mungandamune bimpe ne Bible wakankemesha, ke meme kuitaba bua kutuadija kulonga nende Bible.” Malu avua Esa mulonge mu dilonga diende dia Bible akalenga muoyo wende ne kumusakawu bua kudilambula kudi Yehowa. Udi wamba ne: “Kumpala, mvua misangu yonso ne malu ne ntatu. Kadi mpindieu ndi ne muoyo udi ne tshipatshila tshilelela.” *

MUDI DÎYI EDI DIAMBULUISHA BUA KUIKALA NE MUOYO UDI NE TSHIPATSHILA:

Luse ludi lumvuija kuditeka pa muaba wa bantu bakuabu, kuikala nabu bimpe ne kubangata ne mushinga. Yezu wakaleja luse kudi bavua nalu dijinga. Bu muvuaye umvuila bantu luse, wakenza muende muonso bua kujikija ntatu ya bakuabu. (Matayi 14:14; 20:30-34) Patudi tumvuila bantu luse anu bu Yezu, muoyo wetu udi upeta tshipatshila, bualu bantu badi bumvuila bakuabu luse badi bapeta disanka. (Bienzedi 20:35) Tudi mua kuleja mutudi tumvuila bakuabu luse mu mêyi mimpe ne mu bienzedi, tuambuluisha bantu badi dijinga ne diambuluisha. Kuleja bantu luse kudi mua kutuvudijila diakalenga anyi?

TSHILEJILU TSHIA MU NSOMBELU:

Maria ne bayende Carlos bavua bumvuila bantu luse bikole. Katshia Maria wafuisha mamuende, kukadi kuenze ndambu wa bidimu bidi tatuende katshiyi nansha ne makanda a kudijukila nkayende pa bulalu. Maria ne bayende Carlos bakamuangata kuyabu nende kuabu ne badi bamukumbajila majinga ende onso. Misangu ya bungi bualu ebu buvua bubapangisha mua kulala tulu, bavua kabidi batambakana nende mu lupitadi pavua disama  diende dia nsukadi dimujuka. Badi bamba ne: imue misangu bavua badiumvua batshioke menemene. Kadi badi ne disanka anu muvua Yezu muambe, bualu badi ne disanka dia bungi bua kumanya ne: badi bakumbajila tatuende wa Maria majinga ende onso.

MUDI DÎYI EDI DIAMBULUISHA BUA KUIKALA NE MUOYO UDI NE TSHIPATSHILA:

Mmunyi mudi kuikala ‘mukebi wa ditalala’ kuvuija muoyo wa muntu muikale ne tshipatshila? Bualu kudi kutuambuluisha bua kushemesha malanda atudi nawu ne bantu badi batunyunguluke. Tudi ne bua kulonda mubelu udi Bible utupesha wa ne: “Bikalaku mushindu, nuenze muenu muonso bua kuikala mu ditalala ne bantu bonso.” (Lomo 12:18) Munkatshi mua “bantu bonso” badibu bamba muaba eu, mudi balela betu ne bantu bakuabu badi kabayi ne ditabuja dimue netu. Kusomba ne “bantu bonso” mu ditalala kudiku mua kuvuija muoyo wetu ne tshipatshila anyi?

TSHILEJILU TSHIA MU NSOMBELU:

Tukonkonone tshilejilu tshia mamu mukuabu diende Nair. Wakatuilangana ne ntatu mikole munkatshi mua bidimu ivua ikeba kumupangisha mua kusomba ne bantu mu ditalala, nangananga bena mu dîku diende. Katshia bayende wamulekela kukadi bidimu 15, udi udikoleshila yeye nkayende bana. Umue wa ku bana bende ukavua unua diamba bikole ne katshivua bukuatshi to, yeye ne muanende wa bakaji bakavua bamutshina. Nair udi wamba ne: malu avuaye mulonge mu Bible avua mamupeshe bukole bua kusomba ne bantu mu ditalala, nansha mu ntatu ya mushindu eu. Kavua utanda ne bantu anyi uluangana nabu bua bintu to. Uvua udienzeja bua kuikala muena malu malenga, muena luse ne muditeki wa pa muaba wa bakuabu. (Efeso 4:31, 32) Mmutuishibue ne: kudienzeja bua kuikala mukebi wa ditalala nkumuambuluishe bua kuikala ne malanda mimpe matambe ne bena mu dîku diende ne bantu bakuabu kabidi.

Tuetu balonde mibelu mimpe ya Yezu, netupete disanka ne netusanke ne bitudi nabi. Kadi bua kupeta muoyo udi ne tshipatshila tudi kabidi ne bua kumanya tshituikala mua kupeta mu matuku atshilualua. Mushindu kayi udi muoyo wetu mua kuikala ne tshipatshila, petu bamanye ne: netukulakaje, netusame ne netufue? Bushuwa aa ke malu adi atufikila pa buloba ebu.

Kadi kudi lumu luimpe. Yehowa mmulongoluele bantu bonso badi baditatshisha bua ‘kuenda anu bu muvua Yezu muende’ masanka a bungi. Yehowa mmulaye ne: mu katupa kîpi emu nekuikale buloba bupiabupia bua buakane buikale bantu bakane mua kusomba mu mushindu udiye musue, mmumue ne: ne makanda a mubidi bua kashidi ne tshiendelele. Bible udi wamba ne: “Tangilayi! Ntenta wa Nzambi udi ne bantu, ne yeye neasombe nabu, ne bobu nebikale bantu bende. Nzambi muine neikale nabu. Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Malu a kale ajiminyi.”​—Buakabuluibua 21:3, 4.

Maria ukadi ne bidimu 84 utudi bakule bualu buende mu tshiena-bualu tshia kumpala mu tshibejibeji etshi, mmuindile ne muoyo kulu kulu dîba dikala mêyi aa ne bua kukumbana. Netuambe tshinyi buebe wewe? Udiku musue kumanya malu a bungi adi atangila “muoyo wa bushuwa” wikala nawu bantu mu Bukalenge bua Nzambi anyi? (1 Timote 6:19) Bikalabi nanku, udi mua kumonangana ne Bantemu ba Yehowa badi muaba uudi musombele anyi kufundila bapatudi ba mukanda eu. *