WA SÕSG ning sẽn loogã sẽn wilgã, a Zezi vɩɩmã talla barka. Rẽnd d sã n dat tɩ d vɩɩmã tall barka, d segd n dɩka a togs-n-taar la d tũ a saglsã.

A Zeova pʋd n sagl-d lame tɩ d maan woto, wa vɛrse ning sẽn be yĩngrã sẽn wilgdã. Tũ a Zezi naoã baoodame tɩ d rɩk a togs-n-taar la d tũ a saglsã d vɩɩmã nens fãa pʋgẽ. Woto, d na n taa Wẽnnaam yam la d paam sũ-noog hakɩka.

A Zezi kõo tõnd sagls me sẽn tõe n sõng-d tɩ d rɩk a naoore. Wala makre, a sẽn wa n sõsd ne nebã tãngã zugã, a kõ-b-la sagls wʋsgo. D na n goma sagl-kãens kẽer yelle, la d ges d sẽn tõe n tũ-b to-to.

SAGLGÃ TŨUB SẼN TÕE N KÕ-D SŨ-NOOG TO-TO: A Zezi wilgame tɩ ninsaal fãa tog n baoa Wẽnnaam. Wala makre, d rat n bãnga sogsg nins sẽn pʋgdã leoore: Bõe yĩng tɩ tõnd be tẽngã zugu? Bõe yĩng tɩ nebã namsdẽ? Rẽ yĩnga tõnd yell paka Wẽnnaam sɩda? Ned sã n ki, saame bɩ? D sã n dat tɩ d vɩɩmã tall barka, rẽnda d paam sogs-kãensã leoore. A Zezi ra miime tɩ yaa Wẽnnaam Gomdã pʋgẽ bal la d tõe n paam sogs-kãensã leoore. Daar a ye, a pʋʋsa a Ba wã n yeel woto: “Yãmb goamã yaa sɩda.” (Zã 17:17) Wẽnnaam Gomdã sɩd tõe n sõnga tõnd tɩ d bãng Wẽnnaam n paam sũ-noogo.

KIBAR SẼN WILGD RẼ: A Esa ra yaa yɩɩn-yɩɩndb taoor soaba, tɩ wõnd a ra na n wa lebga ned yʋʋr sẽn yi. Baasgo, a ra pa tar sũ-noog woto ye. Ad a sẽn yeele: “Baa yɩɩlã sẽn da noom maamã, mam da baooda vɩɩm bark sẽn yɩɩd rẽ.” La kaoosg zugẽ, a wa n bãnga a Zeova Kaset soab a ye. A yeela woto: “Mam sok-a-la sogsg wʋsgo. A sẽn da tikd Biiblã n leokd maamã yɩ-m-la noogo, tɩ m sak n na n zãms Biiblã ne-a.” A Esa sẽn bãng bũmb ning Biiblã pʋgẽ wã kẽ-a lame t’a rɩk a meng n kõ a Zeova. A paasa woto: “Pĩndã, mam da baooda yɛl n kõt m menga. La masã, mam vɩɩmã tara barka.” *

SAGLGÃ TŨUB SẼN TÕE N KÕ-D SŨ-NOOG TO-TO: Nimbãan-zoɛt yaa ned sẽn kʋmd a taaba, la a sõngd-ba. A Zezi yɩɩ woto. Neb nins sẽn da namsdã nimbãaneg sẽn da tar-a wã, a ra sõngd-b lame. (Matɩe 14:14; 20:30-34) D sã n dɩk a Zezi togs-n-taar n zoet d taabã nimbãanega, d vɩɩmã na n talla barka, bala d na n maand-b-la neere, tɩ kõt-d sũ-noogo. (Tʋʋma 20:35) D tõe n wilgame tɩ d yaa nimbãan-zoɛt ne d no-goam la d tʋʋmã, n sõngd sẽn dat-b sõngrã. Rẽ yĩnga nimbãan-zoɛt sɩd paamda sũ-noog bɩ?

KIBAR SẼN WILGD RẼ: A Maria ne a sɩd a Carlos yaa nimbãan-zoɛtba. A Maria ma wã maana kaalem n bas a ba wã. La sẽn nan pa kaoose, a ba wã lʋɩɩ bãag n komse. A Maria ne a Carlos tall-a lame n kul b yirã n tɩ get a yelle. Naoor wʋsgo, b pa gõe yʋng ye. A diabɛtã sã n mi n yik me, yaa tɩlae tɩ b rɩk-a n kẽng logtor-yir tao-tao. B yeelame tɩ yaamsã mi n wʋm-b lame. La  rẽ kõt-b-la sũ-noog wa a Zezi sẽn yeelã, bala, b miime tɩ b tʋmda tʋʋmd sẽn yaa tɩlae n get a Maria ba wã sẽn dat b sõngrã yelle.

SAGLGÃ TŨUB SẼN TÕE N KÕ-D SŨ-NOOG TO-TO: Gɛrk gom-bil ning b sẽn lebg ka tɩ “zab-paasdbã” võor yaa “neb sẽn baood laafɩ.” Wãn to la laafɩ wã baoob kɩtd tɩ ned vɩɩm tall barka? A nafa a ye yaa tɩ sõngd-d lame tɩ d paam zems-n-taar ne d taabã. Biiblã sagl-d-la woto: “Bɩ y maan yãmb sẽn tõe tɛka, t’a sã n tõe, bɩ laafɩ zĩnd yãmb ne nebã fãa sʋka.” (Rom dãmba 12:18) B sẽn yeel tɩ “nebã fãa” wã, yãmb zakã nebã ne neb nins sẽn pa y tẽed-n-taasã naagame. Sãmbg sẽn ka be, d sã n mao tɩ laafɩ be tõnd ne “nebã fãa” sʋka, d na n paama sũ-noog hakɩka.

KIBAR SẼN WILGD RẼ: D gom pag yʋʋr sẽn boond t’a Nair yelle. A sega zu-loees wʋsgo. Rẽ kɩtame tɩ sẽn na yɩl tɩ laafɩ kell n zĩnd yẽ ne nebã sʋka, sẽn yɩɩd fãa ne a zakã rãmba, a segd n modga wʋsgo. Na maan yʋʋm 15 woto, a sɩdã bas-a lame t’a wubd a kambã a ye. Sẽn paase, a bi-ribl a ye n yũud dorge, n mi n yik n namsd-a ne a bi-puglã. La a Nair kɩsa sɩd tɩ bũmb ning a sẽn bãng Biiblã pʋgẽ wã kõt-a-la raoodo, tɩ baa ne zu-loe-kãensã, a ket n modgdẽ tɩ laafɩ be yẽ ne nebã sʋka. A maanda a sẽn tõe fãa n gind no-koɛɛm la zaba. A maoodame n maand a taabã neer la a kʋmd-ba. (Efɛɛz rãmba 4:31, 32) A kɩsa sɩd t’a sẽn baood laafɩ ne nebã kɩtame t’a tar zems-n-taar ne a zakã rãmba, la ne neb a taabã.

D sã n tũ a Zezi saglsã, d na n paama sũ-noog hakɩka. La d sã n dat tɩ d vɩɩmã tall barka, d segd n bao n bãnga Wẽnnaam sẽn pʋlem tõnd bũmb ninsã. Rẽ yĩnga vɩɩmã tɛk sã n yaa d wa kʋʋle, n lʋɩt bãas n wa baas n ki, tara võor sɩda? Bʋko, rũndã-rũndã d yɛlã yaa woto.

La koe-noog n be! A Zeova pʋlma neb nins sẽn modgd n tũud a Zezi naoã bark wʋsgo. A pʋlmame tɩ ka la bilfu, a na n lugla dũni-paalg tɩrlem sẽn na n zĩnd a pʋgẽ, tɩ sakdbã paam n vɩɩmd wakat sẽn kõn sa wa yẽ sẽn sɩng n datã. Biiblã yeela woto: “Ad Wẽnnaam yirã bee ninsaalb sʋka. Wẽnnaam na n zĩnda ne nebã. Bãmb na n yɩɩ Wẽnnaam neba, la Wẽnnaam mengã na n paa ne bãmba. Wẽnnaam na n yẽesa nintãm fãa sẽn be b ninẽ wã. Kũum kõn le zĩnd ye, la sũ-sãoong wall yãbre, wall toog kõn le zĩnd ye, bala, dẽenem bũmba fãa loogame.”—Wilgri 21:3, 4, Kãab-paalgã Koe-noogo.

D tẽeg a Maria sẽn tar yʋʋm 84 tɩ d gom a yell pipi sõsgã pʋgẽ wã yelle. A gũuda gom-kãensã pidsg ne yãgbo. La yãmb yẽ? Yãmb dat n bãnga “vɩɩm sẽn yaa sɩdã” Wẽnnaam Rĩungã sẽn na n wa ne wã sẽn na n yɩ to-to bɩ? (1 Tɩmote 6:19) Sã n yaa woto, bɩ y kos a Zeova Kaset rãmb nins sẽn moond yãmb babgẽ wã sõngre, wall y gʋls seb-kãngã yiisdbã. *