Mour Ehu me Mie Katepe Sises Ketin Kasalehda Ahlo
“Momourki mour me duwehte mour me Sises ketin ieiaski.”—1 Sohn 2:6.
NIN duwen me ire kan mwowe kasalehda, Sises sapwellimanki mour ehu me mie katepe. Eri, ma kitail men atail mour en mie katepe, kitail en alasang sapwellime mehn kahlemeng oh rong sapwellime kaweid.
Ni mehlel, Siohwa ketin kangoange kitail en wia met, duwehte me iren Paipel me kileldi powe kasalehda. En momourki mour me duwehte mour me Sises ketin ieiaski kin pidada atail en alasang sapwellime mehn kahlemeng oh sapwellime padahk kan nan atail mour unsek. Atail wia met pahn sewese kitail en pwungla rehn Koht oh pil ahneki mour ehu me mie katepe.
Sises ketin padahngki padahk mehlel en Paipel tohto me kak sewese kitail en alasang mwomwen sapwellime mour. Kitail kin diar ekei ire kesempwal pwukat nan sapwellime Kapahrek en Pohn Dohl. Kitail pahn tehk ekei ire kesempwal pwukat oh ia duwen atail kak doadoahngki nan atail mour.
IRE MEHLEL: “Meid pai me koapworopworki Koht ni mehkoaros; pwe iei arail wehio Wehin Koht!”—Madiu 5:3.
IA DUWEN IRE KESEMPWAL WET EH KIN SEWESE KITAIL EN AHNEKI MOUR EHU ME MIE KATEPE?:
Sises ketin kasalehda me aramas akan ipwidi oh ahneki anahn en esehla Koht. Kitail kin men esehla pasapengpen soangen peidek pwukat: Dahme kahrehda kitail miehki? Dahme kahrehda mie lokolok laud nan sampah wet? Ia duwe, Koht kin uhdahn ketin nsenohkin kitail? Mie ehu mour mwurin mehla? Kitail anahne esehla pasapengpen peidek pwukat pwehn ahneki mour ehu me mie katepe. Sises mwahngih me Mahsen en Koht kelehpw me likilik oh kak sapengala peidek pwukat. Sises patohwanohng Semeo nan eh kapakap: “Sapwellimomwi mahsen, iei me mehlel.” (Sohn 17:17) Ia duwe, Mahsen en Koht kak uhdahn sewese kitail en kaitarala atail anahn en esehla Koht?
DAHME UHDAHN WIAWI:
Nin duwen sounkoul men en pwihn en koul wadawad ehu, Esa kohkohlahngehr en wiahla sounkoul ndand men. Mendahki met, Esa pehm me e sohte uhdahn peren. E nda: “Mehnda I kin iang pwihnen koul wet, I men ahi mour en uhdahn mie katepe.” Ahpw mwuhr, Esa tuhwong emen Sounkadehdehn Siohwa. Esa nda: “I idek reh peidek tohto. Eh pasapeng mwahu kan sang nan Paipel kamwakid ie, eri I pwungki en onop Paipel rehi.” Dahme Esa sukuhlki nan eh onop en Paipel uhdahn sair eh mohngiong oh kamwakid ih en inoukihong Siohwa eh mour. E nda: “Mahso, I kin kalapw loiong kahpwal kan. Ahpw met miehier kahrepen ahi mour.”
IRE MEHLEL: “Meid pai me kin kalahngan.”—Madiu 5:7.
IA DUWEN IRE KESEMPWAL WET EH KIN SEWESE KITAIL EN AHNEKI MOUR EHU ME MIE KATEPE:
Kalahngan kin pidada omw kasalehda omw poakehla meteikan, ni omw kin kadek oh nsenohki irail. Sises ketin kasalehda kalahngan ong irail kan me anahne sawas. Sang ni eh ketin poakeirailla ni mehlel, e ketin tiengla mwowe pwehn ketikihsang arail lokolok. (Madiu 14:14; 20:30-34) Ni atail kin alasang Sises oh kasalehda kalahngan, kitail kin kahrehiong atail mour en mie katepe, pwehki irail kan me kin kasalehda kalahngan ong meteikan kin imwikihla ahneki peren. (Wiewia 20:35) Kitail kak kasalehda kadek ong meteikan sang atail lokaia oh wiewia oh sewesehda irail kan me anahne atail sawas. Ia duwe, kasalehda kalahngan ong meteikan kak uhdahn kalaudehla atail nsenamwahu?
DAHME UHDAHN WIAWI:
Maria oh eh pwoud, Carlos, wia mehn kahlemeng en kasalehda kadek. En Maria pahpao eh pwoudo mehla oh me keren, e soumwahuda oh e kin mihmihte nan deweo. Maria oh Carlos wahla ih imwarao oh kin apwalihala eh anahn koaros. Ara meir kin kalapw ohla pak tohto, oh ira pil kin tangahkihla ih imwen wini ma eh soumwahu en suke kin laudla. Ira nda me ira uhdahn pwangada ekei pak. Ahpw ira uhdahn kin peren, duwehte me Sises mahsanih, pwehki ira pehm me ira wiahda uwen ara kak en apwalih anahn en ahn Maria pahpao.
IRE MEHLEL: “Meid pai me kin wia doadoahk en kamwahu.”—Madiu 5:9.
IA DUWEN IRE KESEMPWAL WET EH KIN SEWESE KITAIL EN AHNEKI MOUR EHU ME MIE KATEPE:
En wia “doadoahk en kamwahu” kin wehwehki “emen me kin wiahda popohl.” Ia duwen emen me kin wiahda popohl eh kin kahrehda mour eh mie katepe? Ehu, kitail kin perenki atail nanpwungmwahu rehn mehn mpatail kan. Kitail kin kapwaiada kaweid en Paipel me mahsanih: “Kumwail wia uwen amwail kak pwe kumwail en ahneki popohl rehn aramas koaros.” (Rom 12:18) “Aramas koaros” kin pidada tohn atail peneinei oh meteikan me sohte iang kamehlele dahme kitail kamehlele. Ia duwe, en kasalehda popohl ong “aramas koaros” kak uhdahn kahrehiong atail mour en katapan?
DAHME UHDAHN WIAWI:
Medewehla dahme wiawihong emen lih me ede Nair. Sounpar tohto e kin lelohng kasongosong kan me kin kasonge eh kolokol popohl, ahpw mehlel rehn eh peneinei. Sangete ahnsou me eh pwoudo kohkohsang ih mpen sounpar 15 samwalahro, e kin kelehpw apwalih nah seri ko. Emen nah pwutak ko sohte kak uhdihsang eh doadoahngki wini en kasahliel oh kin kalapw lemei oh kamasak ih oh nah serepeino. Nair kamehlele me dahme e sukuhlki sang Paipel kin kakehlaka ih pwe en meleilei, mendahki soangen irair apwal me e mi loale. E kin song en dehr akamai de peiki soahng kan. E kin nantihong kadek oh wehwehki pepehm en meteikan. (Episos 4:31, 32) E uhdahn kamehlele me eh sukuhlki en kasalehda popohl sewese ih en kak ahneki nanpwungmwahu rehn eh peneinei oh pil meteikan.
MEDEMEDEWE AHNSOU KOHKOHDO
Ma kitail idawehn sapwellimen Sises kaweid, kitail pahn diar peren oh nsenamwahu nan mour. Ahpw pwehn ahneki mour ehu me uhdahn mie katepe, kitail pil anahne ese dahme pahn wiawi ahnsou kohkohdo. Pwe ma ihte me kitail ese iei atail pahn kedekedeo mahla, soumwahuda oh mehla, eri mour pahn kak mie katepe? Ahpw met akan iei me kin uhdahn wiawi nan atail mour nin sampah wet.
Ahpw mie rohng mwahu! Siohwa ketin nekinekid kapai tohto ong koaros me kin nantihong en “momourki mour me duwehte mour me Sises ketin ieiaski.” Siohwa ketin inoukihda me ni ahnsou keren, e pahn ketin wiahda sampah kapw ehu, wasa me aramas lelepek kan pahn kousoan ie oh ahneki roson unsek kohkohlahte nin duwen me e ketin kupwurki. Paipel mahsanih: “Iet tehnpas en Koht rehn aramas akan! E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:3, 4.
Maria, lih me sounpar 84 me kitail koasoiapenehr nan iren mwoweo, perenki eh pahn kilang mahsen pwukat ar pahn pweida. A ia duwen komwi? Komw pahn men kalaudehla omw ese duwen “mouro me uhdahn mour mehlel” me pahn wiawi pahn kaundahn Wehin Koht? (1 Timoty 6:19) Ma ei, ke kak idek rehn Sounkadehdehn Siohwa kan me mi ni omw wasa de ntinglahng wasa me wiahda kisin pwuhk wet. *
^ Pwuhken Dahme Paipel Uhdahn Padahngki?, me Sounkadehdehn Siohwa kan wiahda, sewesehier me tohto ren onopki dahme Paipel padahngki duwen soangsoangen oaralap kan.
