Nshalelo a muloo—Yesu etulesha eshinda
‘Tutambukile mwitata mubaadi Yesu nabene mutambukile.’—1 Yowano 2:6.
BU BIATUMWENE mu mwisambo ukile, Yesu baadi mupete muloo mu nshalelo aaye. Byabya su atukyebe shi muwa wetu wikale na muloo, abitungu kulonda kileshesho kyaaye na kuteemesha malango aaye.
Nyi kikwete kwituteka Yehowa bwashi tukite, bu abilesha uno verse e kunundu. Kutambuka mwishinda dibaadi Yesu mutambukile akulesha kwikala na mwikeelo bu waye na kulonda malongyesha aaye. Kukita byabya akwitukwasha bwa kukuminyibwa n’Efile Mukulu na kupeta muloo mu nshalelo etu.
Mu malongyesha aaye, Yesu baadi mutuushe mayi a kulonda akumbeene kwitukwasha bwa kutambuka mwishinda dibaadi mutambukile. Atupete ano mayi ebungi a kulonda mu mwisambo waye wa pa mwengye. Tubande kutaluula angi mayi a kulonda na mushindo watudi balombeene kwiatumikila mu muwa wetu.
EYI DYA KULONDA: “Baba abashingûla byabadi na lukalo lw’Efile Mukulu be na wa kusepêla.”—Mateo 5:3, EEM.
MUSHINDO AWITUKWASHA DINO EYI BWA KWIKALA NA MULOO MU NSHALELO ETU:
Yesu baadi muleshe shi bantu, kubanga ku butandwa abekalaa na lukalo lwa kuuka Efile Mukulu. Twi na lukalo lwa kupeta myalulo ya ku nkonko bu ino: Bwakinyi twi pano pa nsenga? Bwakinyi kwi makyenga akile bungi pa nsenga lelo uno? Efile Mukulu etatshishaa bwetu su? Nkinyi akikitshikaa su muntu baafu? Bwa kupeta muloo mu nshalelo etu abitungu tupete myalulo ibuwa ku ino nkonko. Yesu baadi auku shi kwi nka mbalo imune yatudi balombeene kwata myalulo ibuwa ya ino nkonko: Mu Eyi dy’Efile Mukulu. Mu luteko lubelele kwi Nshaye, Yesu bambile shi: “Eyi dyoobe ndya binyibinyi.” (Yowano 17:17) Eyi dy’Efile Mukulu ndilombeene kwitukwasha bwa kuuka Efile Mukulu na kwikala na muloo su?
KILESHESHO:
Bu bibaadi ngomba mukata mu kisaka kikata kya ngono, Esa baadi akulupila kwikala ngomba mwende nkumo. Sunga mbyabya, Esa baadi apusha shi e na kintu kyadi mukutwe. Amba shi: “Sunga mbinaadi napusha buwa bwa kwikala mu kyakya kisaka, naadi nakimbi nshalelo mukile buwa, nshalelo a muloo.” Anka, kunyima kwa byabya, Esa bafumankeene na Batemwe ba Yehowa. Amba shi: “Ami nkwibapompa nkonko. Myalulo yaabo ibabadi batuushe kalolo na ayitukila mu Bifundwe ibankanyishe ngofu, ndjo ami nkukumina bwashi alongye naami Bible.” Myanda ibaadi Esa mulongye mu Bible ibaadi imukume kwishimba na kumutakula bwashi elambule kwi Yehowa. Amba dingi shi: “Kala, naadi na nkalakasho ibungi na bilumbu. Binobino ne na muloo mu muwa wande, namono shi kintu kyooso ki pa mbalo yakyo.” *
EYI DYA KULONDA: “Baba abafwila bangi lusa be na wa kusepêla.”—Mateo 5:7, EEM.
MUSHINDO AWITUKWASHA DINO EYI BWA KWIKALA NA MULOO MU NSHALELO ETU:
Lusa alulesha kupushisha bangi na kwikalakasha bwabo na kwibakitshina myanda na kalolo kooso. Yesu baadi mulesha lusa kwi bantu abaadi mu makyenga. Pa mwanda wa lusa lubaadi nalo, baadi etatshisha bwa kukwasha baaba babaadi mu makyenga. (Mateo 14:14; 20:30-34) Su atulondo kileshesho kya Yesu kya lusa, atwikala na muloo ukata mu nshalelo etu, mwanda baaba abalesha bangi lusa abekala na muloo. (Bikitshino 20:35) Twi kulesha shi atupusha bangi lusa patudi na ngakwilo ebuwa na patwibakitshina myanda ibuwa, na kukwasha baaba abakimbi bukwashi. Kulesha bangi lusa akwitukwasha binyibinyi bwa kwikala na muloo mu nshalelo etu su?
Carlos na Maria
KILESHESHO:
Maria na mulume aaye, Carlos, be bu kileshesho kikata kya bantu baasha lusa. Nshaye na Maria baadi mufwishe mukashi, na mu bipwa bikile baadi mushale nka mu nshibo pa mwanda wa maladi. Maria na Carlos mbamwate bwashi ashaale kwabo ku nshibo bwabadya kumukwashanga. Misango ibungi abakutwaa tulo, ingi nsaa abitungu kwenda naaye lubilo ku lupitalo nsaa ayimupulukila maladi a diabète. Abamba shi ingi nsaa abakokaa ngofu. Kadi be na muloo, anka bu bibambile Yesu, mwanda abasangala pa kumona shi bakwete kukwasha nshaye na Maria.
EYI DYA KULONDA: “Baba abafwishâ kufukama munkatshi mwa bantu be na wa kusepêla.”—Mateo 5:9, EEM.
MUSHINDO AWITUKWASHA DINO EYI BWA KWIKALA NA MULOO MU NSHALELO ETU:
Muntu afwishaa kufukama mulombeene kwikala na muloo mu nshalelo aaye su? Oolo mwanda, ekala na kipwano kibuwa na bantu be pepi naaye. Bibuwa tulonde elango dya mu Bible adyamba shi: “Su bi mushindo, nukite mupuunda kalolo keenu, nwikale na bantu booso mu kufukama.” (Beena-Looma 12:18, Kilombeno kipya 2009) Mu bano “bantu booso” twi kutemuna beena kifuko n’etu na bangi bantu bashi beena Kidishitu. Kufwisha kufukama munkatshi mwa “bantu booso” nkulombeene binyibinyi kwitukwasha bwa kwikala na muloo mu nshalelo etu?
Nair
KILESHESHO:
Twate kileshesho kya mukashi umune abetanyinaa bu Nair. Munda mwa bipwa bibungi, baadi mupete nkalakasho ibungi ibaadi ikyebe kumukutshisha bwashi tekalanga afwisha kufukama, bikishekishe mu kifuko kyaaye. Munda mwa bipwa pepi na 15, mulume aaye mumusumbusheene na baana, aye nkubanga kwibakusha aye nabeene. Mwan’aye mulume umune babangile kutoma kabangi, nkupambuka na dingi nkubanga kumukanyina aye na baana baaye bakashi. Nair alesha shi myanda ibaadi mulongye mu Bible ngimupe bukome bwa kulama kufukama, mpa na mu ino myanda i bukopo. Ta mutontoole na muntu sunga kulwa ngoshi bwa bintu kampanda nya. Kwete kwitatshisha bwa kwikala na kalolo, kwipushena na bantu, na kupushiisha bangi. (Beena-Efeeze 4:31, 32) Auku shi kwitatshisha bwa kufwisha kufukama nkumukwashe bwa kwikala na kipwano kibuwa na bakwabo ba mu kifuko mpa na bangi bantu.
MULOO WA MU MAFUKU AAFIKI
Su tubalondo malango ebuwa a Yesu, atupete muloo mu nshalelo etu na kusangala na byatudi nabyo. Kadi, bwashi tupete muloo mu nshalelo etu, abitungu dingi kuuka akitutengyela mu mafuku e kumpala. Na dingi, muloo kinyi watudi balombeene kupeta mu nshalelo etu su atuuku shi kunyima atukyebe kununupa, kukumba, na kufwa? Pakutala, ino nyi myanda yatukwete kumona lelo uno pa nsenga.
Kadi, kwi mukandu wibuwa! Yehowa mulamine bano booso ‘abatambukila mwitata mubaadi Yesu nabene mutambukile’ myabi ibungi. Yehowa etulaa shi akyebe binobino kukita nsenga ipya ya bululame, amukashaala bantu balulame mu mushindo ubaadi Yehowa mukyebe shi bantu bekale na muwa—muwa wa looso na mbidi bukome. Eyi dyaye adyamba shi: “Kibombelo ky’Efile Mukulu ki munkatshi mwa bantu akambombêla nabo, abo namu abakekala bantu bê. Ôlo Efile Mukulu ê nabêne akekala nabo, akekala Efile aabo. Akebakumuna mpolo yoso. T’akukekala’nyi lufu, sunga mmâlo, sunga nkutompola, sunga mmitanyo mwanda myanda ya kala ibapu kushimina.”—Bifumbulwe 21:3, 4, EEM.
Maria, mukashi e na bipwa 84 atwikalanga besambe mu mwisambo wa kumpala, e na lukulupilo lwa kumona apakakumbana ino myanda. Kadi obe namu? Okumiina kuuka ingi myanda itale “muuwa wa binyibinyi”—muuwa mu Bufumu bw’Efile Mukulu su? (1 Timotee 6:19) Su mbyabya, we mulombeene kuteka Batemwe ba Yehowa be peepi nobe sunga kufundjila bano batuushe uno jurnale. *
^ par. 8 Mwanda wa Esa mbeulonde kalolo mu “Bible kwete kushintuula bantu—Naadi muntu sh’etombo”.
^ par. 18 Mukanda wa A nkinyi akilongyesha namu Bible?, wabadi batuushe kwi Batemwe ba Yehowa, ngukwashe bantu bebungi bwa kulonga Bifundwe muyiile mitwe ya myanda.
Tala dingi
NGALUULO YA KU NKONKO YA MU BIBLE
Muwa aupatuula kinyi?
Kasha todi muiyipushe’shi: ‘Muwa win a kepatshila kinyi?’ Longa ngaluulo ya mu Bible ku luno lukonko.
