Loko U Landzela Xikombiso Xa Yesu Ni Tidyondzo Takwe U Nga Va Ni Vutomi Lebyi Nga Ni Xikongomelo
‘Fambisa leswi Yesu a fambiseke swona.’—1 Yohane 2:6.
HILAHA hi buleke hakona eka xihloko lexi nga hundza, Yesu u hanye vutomi lebyi nga ni xikongomelo. Loko hi lava leswaku vutomi bya hina byi va ni xikongomelo, hi endla kahle loko hi tekelela xikombiso xa Yesu ni ku yingisa ndzayo yakwe.
Entiyisweni, Yehovha u hi khutaza ku endla tano, hilaha Tsalwa leri nga laha henhla ri kombaka hakona. Ku famba hi ndlela leyi Yesu a fambeke ha yona swi katsa ku pfumelelanisa ndlela ya hina hinkwayo ya vutomi ni xikombiso xakwe ku katsa ni tidyondzo takwe. Ku endla tano swi ta endla leswaku hi amukeriwa hi Xikwembu naswona hi va ni vutomi lebyi nga ni xikongomelo.
Yesu u dyondzise milawu ya Bibele leyi nga hi pfunaka leswaku hi tekelela ndlela leyi a hanyeke ha yona. Hi kuma milawu leyi yo hlayanyana eka Dyondzo yakwe ya le Ntshaveni leyi dumeke. A hi kambisiseni milawu yi nga ri yingani ni ndlela leyi hi nga yi tirhisaka ha yona evuton’wini bya hina.
NAWU: “Va tsaka lava khathalaka hi xilaveko xa vona xa moya.”—Matewu 5:3.
NDLELA LEYI HA YONA NAWU LOWU WU HOXAKA XANDLA EKA VUTOMI LEBYI NGA NI XIKONGOMELO:
Yesu u kombise leswaku vanhu hi ntumbuluko va fanele va tiva Xikwembu. Hi rindzele ku tiva tinhlamulo ta swivutiso swo tanihi leswi nge: Ha yini hi ri laha? Ha yini ku ri ni ku xaniseka konghasi emisaveni leyi? Xana hakunene Xikwembu xa khathala hi hina? Xana ku ni vutomi endzhaku ka rifu? Hi fanele hi tiva tinhlamulo ta swivutiso swo tano leswaku hi ta va ni vutomi lebyi nga ni xikongomelo. Yesu a a swi tiva leswaku i xihlovo xin’we ntsena lexi tshembekaka lexi nga hlamulaka swivutiso sweswo—Rito ra Xikwembu. Loko a khongela eka Tata wakwe, Yesu u te: “Rito ra wena i ntiyiso.” (Yohane 17:17) Xana Rito ra Xikwembu ri nga hi pfuna leswaku hi xi tiva ni ku va lava tsakeke?
XIKOMBISO XA VUTOMI BYA XIVIRI:
Esa xiyimbeleri lexikulu lexi nga eka ntlawa lowu dumeke a a ri ekusuhi ni ku va ni ndhuma eka vuyimbeleri bya rhok. Hambiswiritano, Esa u swi xiyile leswaku a nga ri na ntsako hi ku helela. U ri: “Hambileswi a swi ndzi tsakisa ku va eka ntlawa lowu, a ndzi lava ku hanya vutomi lebyi nga ni xikongomelo.” Hambiswiritano, hi ku famba ka nkarhi, Esa u hlangane ni Mbhoni ya Yehovha. Esa u ri: “Ndzi yi tlhave hi swivutiso. Tinhlamulo ta yona leti twisisekaka ta Matsalwa ti ndzi tsakisile, kutani ndzi pfumerile leswaku yi dyondza na mina Bibele.” Leswi Esa a swi dyondzeke eBibeleni swi n’wi khumbile kutani swi n’wi susumetela ku nyiketela vutomi byakwe eka Yehovha. U ri: “Enkarhini lowu nga hundza, nkarhi na nkarhi a ndzi tshamela ku va ni swiphiqo. Sweswi ndzi hanya vutomi lebyi nga ni xikongomelo.” *
NAWU: “Va tsaka lava nga ni tintswalo.” —Matewu 5:7.
NDLELA LEYI HA YONA NAWU LOWU WU HOXAKA XANDLA EKA VUTOMI LEBYI NGA NI XIKONGOMELO:
Tintswalo ti katsa ku komba van’wana ntwela-vusiwana, ku va ni musa ni ku va anakanyela. Yesu u kombise tintswalo eka vanhu lava pfumalaka. Leswi a a susumetiwa hi ntwela-vusiwana lowukulu, u teke goza ro herisa ku xaniseka ka vanhu. (Matewu 14:14; 20:30-34) Loko hi tekelela Yesu hi ku va na tintswalo, hi endla leswaku vutomi bya hina byi va ni xikongomelo naswona lava kombisaka van’wana tintswalo va tsaka eku heteleleni. (Mintirho 20:35) Hi nga kombisa van’wana tintswalo hi marito ya hina ya musa ni hi swiendlo naswona swi ta pfuna lava lavaka mpfuno wa hina. Xana hakunene ku kombisa tintswalo swi nga antswisa rihanyo ni ntsako wa hina?
Maria na Carlos
XIKOMBISO XA VUTOMI BYA XIVIRI:
Maria ni nuna wakwe Carlos i swikombiso swa ku va ni tintswalo. Tata wa Maria u feriwe hi nsati naswona eka malembe ya sweswinyana u lamarile. Maria na Carlos va tshama na yena ekaya ka vona naswona siku rin’wana ni rin’wana va khathalela swilaveko swakwe. Va pfumela leswaku minkarhi yin’wana va pfa va karhala. Kambe va tsakile, hilaha Yesu a vuleke hakona, hikuva va ni ku eneriseka ka xiviri hi ku tiva leswaku va nyika tata wa Maria nkhathalelo lowu a wu lavaka.
NAWU: “Va tsaka lava kondletelaka ku rhula.”—Matewu 5:9.
NDLELA LEYI HA YONA NAWU LOWU WU HOXAKA XANDLA EKA VUTOMI LEBYI NGA NI XIKONGOMELO:
Ku va wo “rhula” hi ku kongoma swi vula ku va “la kondletelaka ku rhula.” Ha yini ku va wo rhula swi endla leswaku vutomi byi va ni xikongomelo? Hikuva hi tiphina hi vuxaka byo antswa ni vanhu lava hi tshamaka na vona. Hi endla kahle loko hi yingisa ndzayo ya le Bibeleni leyi nge: “Loko swi koteka, swi titshege hi n’wina, vanani ni ku rhula ni vanhu hinkwavo.” (Varhoma 12:18) “Vanhu hinkwavo” va katsa swirho swa ndyangu ni vanhu van’wana lava nga riki eka vukhongeri bya hina. Xana hakunene ku va la rhuleke eka “vanhu hinkwavo” swi nga endla leswaku hi va ni xikongomelo xa xiviri evuton’wini?
Nair
XIKOMBISO XA VUTOMI BYA XIVIRI:
Xiya ntokoto wa wansati loyi a vuriwaka Nair. Eka malembe lama nga hundza, u langutane ni ntshikilelo lowukulu lowu ringeke vuswikoti byakwe byo va ni ku rhula, ngopfu-ngopfu eka ndyangu wakwe. Nuna wakwe u n’wi tshike eka malembe ya kwalomu ka 15 lama nga hundza naswona u kurisa vana vakwe a ri swakwe. Un’wana wa vana vakwe a a godzomberiwe hi swidzidziharisi naswona u sungule ku ka a nga ha lawuleki ivi a xungeta yena ni n’wana wakwe wa nhwana. Nair u tshemba leswaku leswi a swi dyondzeke eBibeleni swi n’wi nyike matimba yo va munhu la rhuleke, hambi ku ri ehansi ka swiyimo sweswo swo tika. U ringeta ku nga vuli kumbe ku lwela swilo swo karhi. U endla matshalatshala yo va ni musa, ntwela-vusiwana naswona wa va twisisa vanhu van’wana. (Vaefesa 4:31, 32) Wa tshemba leswaku ku dyondza ku va la rhuleke swi n’wi pfune leswaku a va ni vuxaka bya kahle ni swirho swa ndyangu ni van’wana.
LESWI VUMUNDZUKU BYI HI KHOMELEKE SWONA
Loko hi landzela ndzayo ya vutlhari ya Yesu, hi ta kuma ntsako ni ku eneriseka evuton’wini. Hambiswiritano, leswaku hi va ni xikongomelo xa xiviri evuton’wini, hi fanele hi tlhela hi tiva leswi vumundzuku byi hi khomeleke swona. Xana swi nga kotekisa ku yini ku va ni vutomi lebyi nga ni xikongomelo loko hi tiva leswaku hi ku hatlisa hi ta dyuhala, hi vabya kutani hi fa? Kambe, leswi hi swona leswi humelelaka emisaveni leyi.
Hambiswiritano, hi lawa mahungu yo tsakisa! Yehovha u hlayise mikateko yo tala eka vanhu hinkwavo lava tiyimiseleke ku ‘fambisa leswi Yesu a fambiseke swona.’ Yehovha u tshembisa leswaku ku nga ri khale u ta tisa misava leyintshwa yo lulama, laha vanhu vo lulama va nga ta tshama kona tanihi leswi ku nga xikongomelo xakwe leswaku va tshama kona—hilaha ku nga heriki va ri ni rihanyo lerinene. Rito rakwe ri ri: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.
Maria wansati loyi a nga ni malembe ya 84 loyi a boxiweke exihlokweni xo sungula xa swihloko leswi swa nxaxamelo, u swi langutele hi mahlo-ngati leswaku xitshembiso xa marito wolawo xi hetiseka. Ku vuriwa yini hi wena? Xana u nga tsakela ku tiva leswi engetelekeke malunghana ni “[vutomi] bya xiviri”—lebyi nga ta va kona ehansi ka Mfumo wa Xikwembu? (1 Timotiya 6:19) Loko swi ri tano, u nga kombela Timbhoni ta Yehovha ta laha u tshamaka kona kumbe u tsalela vakandziyisi va magazini lowu. *
^ ndzim. 8 U nga hlaya rungula ra Esa leri heleleke exihlokweni lexi nge Bibele Yi Hundzula Vutomi Bya Vanhu—“A Ndzi Ri Ni Tihanyi”.
^ ndzim. 18 Buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha yi pfune vanhu vo tala leswaku va dyondza leswi Matsalwa ma swi dyondzisaka hi tinhloko-mhaka to hambana-hambana.
U Nga Ha Tsakela
SWIVUTISO LESWI HLAMURIWAKA HI BIBELE
Hi Xihi Xikongomelo Xa Vutomi?
Xana u tshame u tivutisa leswaku, ‘Hi xihi xikongomelo xa vutomi?’ Dyondza ndlela leyi Bibele yi hlamulaka xivutiso xexo.
SWIVUTISO LESWI HLAMURIWAKA HI BIBELE
I Yini Leswi Mfumo Wa Xikwembu Wu Nga Ta Swi Endla?
Twana leswi u nga swi langutelaka loko hulumendhe ya Xikwembu se yi fuma emisaveni.
