NGA UMO tikawonera mu nkhani iyo yajumpha, Yesu wakaŵa na umoyo wacandulo. Ntheura, usange tikukhumba kuŵa na umoyo wacandulo tikwenera kucita nga ni Yesu na kulondezga ulongozgi wake.

Nakuti Yehova wakuticiska kuti ticite mwakuyana na ivyo lemba lapacanya ili likuyowoya. Kwenda umo Yesu wakenderanga kukung’anamura kulondezga mu umoyo withu wose ivyo Yesu wakacitanga na kusambizga. Kucita nthena kuwovwirenge kuti Ciuta watitemwe kweniso tiŵe na umoyo wacandulo.

Yesu wakayowoya fundo izo zingatovwira kuti tendenge nga umo iyo wakenderanga. Zinandi mwa fundo izi zikusangika mu nkhani ya upharazgi wake wa pa lupiri. Tiyeni tiwone zinyake mwa fundo izi ndiposo umo tingazilondezgera mu umoyo withu.

UMO FUNDO IYI YIKOVWILIRIRA KUTI TIŴE NA UMOYO WACANDULO:

Yesu wakalongora kuti mwakawiro ŵanthu ŵali na khumbo lakumanya Ciuta. Tikukhumba kumanya mazgoro gha mafumbo gha nga ni agha: Cifukwa wuli tili na umoyo? Cifukwa wuli pa caru capasi pali masuzgo ghanandi nthena? Kasi Ciuta wakutipwelelera nadi? Kasi ŵakufwa ŵazamuwukaso? Tikukhumbikwira kumanya mazgoro gha mafumbo agha mwakuti tiŵe na umoyo wacandulo. Yesu wakamanya kuti mazgoro ghakukhorweska ghakusangika mu Mazgu gha Ciuta pera. Apo wakalombanga ku Ŵawiske, Yesu wakati: “Mazgu ghinu mbunenesko.” (Yohane 17:17) Kasi Mazgu gha Ciuta ghangatovwira nadi kuti timanye Ciuta na kuŵa ŵakukondwa?

CAKUCITIKA CANADI:

Esa wakaŵa mulongozgi wa gulu lakumanyikwa la kwimba, ndipo wakakhala pacoko kuti wazgoke nkhwantha pakwimba. Nangauli vikaŵa nthena, Esa wakawonanga kuti wakusoŵerwa kanthu kanyake. Iyo wakati: “Nangauli nkhakondwanga kuŵa mu gulu ili, kweni nkhadokeranga kuŵa na umoyo wacandulo.” Kweni nyengo yikati yajumphapo, Esa wakakumana na Kaboni wa Yehova. Esa wakati: “Nkhamuphurunga na mafumbo. Kweni mazgoro ghake ghakudunjika gha mu Malemba ghakanicontha, ntheura nkhazomera kuti wasambirenge nane Baibolo.” Ivyo Esa wakasambira mu Baibolo vikamucontha ndipo vikamovwira kuti wajipatulire kwa Yehova. Iyo wakati: “Kumasinda uku, nkhakhaliranga waka masuzgo kweni sono nili na umoyo wacandulo.” *

UMO FUNDO IYI YIKOVWILIRA KUTI TIŴE NA UMOYO WACANDULO:

Kuŵa na lusungu kukusazgapo kulengera citima ŵanji na kuŵaghanaghanira. Yesu wakacitiranga lusungu ŵanthu ŵakusoŵerwa. Citima cikakhuŵilizga Yesu kuti wawovwire ŵanthu ŵakusuzgika. (Mateyu 14:14; 20:30-34) Para tikulongora ŵanji lusungu nga ni Yesu, tikuŵa na umoyo wacandulo, cifukwa awo ŵakulongora ŵanji lusungu ŵakuŵa ŵakukondwa. (Milimo 20:35) Tingalongora lusungu ŵanji kwizira mu mazgu na vyakucita vithu vyalusungu, na kovwira awo ŵakukhumbikwira wovwiri. Kasi kuŵa ŵalusungu kukovwira nadi kuti tiŵe na umoyo uwemi?

CAKUCITIKA CANADI:

Maria na mfumu wake Carlos nchakuwonerapo ciwemi pa nkhani ya lusungu. Awiske Maria ni cokoro, ndipo mu vilimika vya sonosono apa ŵakamba kulwara comene ndipo ŵakafika pa kutondeka na kuwuka wuwo. Maria na Carlos ŵali kuŵatora na kukhala nawo ndipo ŵakuŵapwelelera pa cilicose. Nyengo zinandi Maria na Carlos ŵakutondeka kugona usiku, ndipo nyengo zinyake ŵakucimbilira nawo ku cipatala para matenda gha shuga ghakwera. Iwo ŵakuti nyengo zinyake ŵakuvuka comene.  Kweni mbakukondwa nga umo Yesu wakayowoyera, cifukwa ŵakumanya kuti wakovwira pa vinthu ivyo ni vyakukhumbikwa.

UMO FUNDO IYI YIKOVWILIRA KUTI TIŴE NA UMOYO WACANDULO:

Kuŵa ŵamtende kukung’anamura kucitapo kanthu kuti paŵe mtende. Kasi kutemwa mtende kungawovwira wuli munthu kuti waŵe na umoyo wacandulo? Para tikuyezgayezga kuti tiŵe pa mtende na ŵanji, tikuŵa paubwezi wakukhora na ŵanyithu. Tingacita makora kupulikira ulongozgi wa mu Baibolo uwu uwo ukuti: “Usange nchamacitiko, muŵe pa mtende na ŵanthu wose, mwakuyana na umo mungafiskira.” (Ŵaroma 12:18) Mazgu ghakuti “ŵanthu wose” ghakusazgapo ŵamumbumba na ŵanji awo tikusopera lumoza yayi. Kasi kuŵa pa mtende na “ŵanthu wose” kungawovwira nadi kuti tiŵe na umoyo wacandulo?

CAKUCITIKA CANADI:

Wonani ivyo vili kucitikira mwanakazi munyake zina lake Nair. Kwa vyaka vinandi wakumana na masuzgo agho ghakakhumbanga kumutondeska kuti waŵe pa mtende comenecomene na ŵamumbumba yake. Kufuma waka apo mfumu wake wakamucimbilira vilimika 15 kumasinda uku, wakulera yekha ŵana. Mwana wake munyake wakumwa munkhwala wakutimbanizga wongo nakuti kanandi wakucita nkhwesa ndipo wakumofya iyo pamoza na mudumbu wake. Nair wakugomezga kuti ivyo wali kusambira mu Baibolo vyamovwira kuŵa wamtende nanga mphanyengo zakusuzga nga ni izi. Wakuyezeska kuti ŵaleke kugazgana panji kwambana pa vinthu vinyake. Wakufwilirapo kuŵa walusungu, kweniso wakuŵapulikiska ŵanji. (Ŵaefeso 4:31, 32) Iyo wakuti kusambira kuŵa wamtende kwamovwira kuti waŵe paubwezi wakukhora comene na ŵamumbumba yake kweniso ŵanji.

Usange tikulondezga ulongozgi wa Yesu uwo ngwavinjeru, tiŵenge ŵakukondwa kweniso tikhorwenge na umoyo. Kuti tiŵe na umoyo wacandulo, tikweneraso kumanya ivyo vili munthazi. Nakuti kasi umoyo ungaŵa na candulo wuli usange tikumanya waka kuti tizamucekura, kulwara na kufwa? Ndipouli, waliyose wakumanya kuti ivi ndivyo vikucitika nakale pa umoyo.

Kweni pali nkhani yakukondweska. Yehova waŵasungira vitumbiko vinandi wose awo ŵakuyezgayezga ‘kwenda nga umo Yesu wakenderanga.’ Yehova wakulayizga kuti sonosono apa wakhazikiskenge caru ciphya ico muzamuŵa urunji, umo ŵanthu ŵakugomezgeka ŵazamukhala na umoyo wamuyirayira nga umo Yehova wakakhumbiranga pakwamba. Mazgu ghake ghakuti: “Wonani! Hema la Ciuta lili na ŵanthu, ndipo wazamukhala nawo, ndipo iwo ŵazamuŵa ŵanthu ŵake. Ndipo Ciuta iyomwene wazamuŵa nawo. Ndipo wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale vyafumapo.”—Uvumbuzi 21:3, 4.

Maria uyo sono wali na vilimika 84 uyo wazunulika mu nkhani yakwambilira, wakulindilira mwakukondwa kuzakawona kuti mazgu agha ghakufiskika. Imwe ke? Kasi namwe mungatemwa kumanya vinandi vyakukhwaskana na “umoyo wanadi” uwo uzamuŵa mu Ufumu wa Ciuta? (1 Timote 6:19) Usange mungatemwa, mungafumba Ŵakaboni ŵa Yehova ŵa ku cigaŵa cinu panji lemberani ku ŵeneco ŵa magazini iyi. *