Yesu wa Lekisa Onjila Yoku Kuata Esanju Komuenyo

‘Endaenda ndeci Yesu a endaenda.’—1 Yoano 2:6.

OCIPAMA ca pita, ca lekisa okuti Yesu wa kuata esanju komuenyo. Omo liaco, nda tu yongola oku kuata esanju komuenyo, tu sukila oku setukula ongangu yaye loku pokola kalungulo aye.

Ocili okuti, ndomo tua ci mola vocisonehua ca tukuiwa kefetikilo liocipama cilo, Yehova o tu peya oku linga ndeci Yesu a linga. Voku endaenda ndeci Yesu a endaenda, mua kongela oku kuama ekalo liomuenyo waye wosi, kuenda alongiso aye. Oku ci linga, ci tu kuatisa oku taviwa la Suku kuenda oku kuata esanju komuenyo.

Valongiso a Yesu mua kongela olonumbi vi tu kuatisa oku enda ndeci eye a endaenda. Olonumbi viaco, vi sangiwa Vohundo a lingila Komunda. Tu konomuisi vimue pokati kolonumbi viaco, kuenda ndomo tu pondola oku vi kapako komuenyo wetu.

ONUMBI: ‘Va sumũlũha vana va limbuka okuti va sukila oku kũlĩha ondaka ya Suku, momo usoma wokilu wavo.’—Mateo 5:3.

NDOMO ONUMBI EYI YI TU KUATISA OKU KUATA ESANJU KOMUENYO: Yesu wa lekisa okuti, omanu va kuete onjongole yoku kũlĩha Suku. Tu konomuisi atambululo kapulilo ava: Momo lie tu kasilili komuenyo? Kilu lieve ku kasilili nye ohali? Anga hẽ Suku wa tu kapako muẽle? Kuli hẽ omuenyo noke yolofa? Tu sukila oku sanga atambululo kapulilo ava, momo tu yongola oku kuata esanju komuenyo. Yesu wa kũlĩhĩle okuti, atambululo kapulilo aco, a sangiwa vono yimosi lika okuti, Ondaka ya Suku. Poku likutilila ku Isiaye, wa popia hati: “Ondaka yove oyo ocili.” (Yoano 17:17) Anga hẽ Ondaka ya Suku, yi pondola muẽle oku tu kuatisa oku kũlĩha Suku loku kuata esanju komuenyo?

ULANDU UMUE WOCILI: Ulume umue o tukuiwa hati, Esa osimbu a kala oku songuila ocimunga cimue ca kemãla ca vakuakusika ovisisilo vio rock, wa simĩle okuti o kuete esanju komuenyo. Pole, noke Esa wa limbuka okuti kua kala ocina cimue co kambela. Eye wa popia hati: “Ndaño nda solele oku kala vocimunga colonjimbi, pole ovina viaco ka via ndi kuatisile oku kuata esanju liocili komuenyo.” Vokuenda kuotembo Esa wa lisanga Lolombangi Via Yehova. Eye wa popia hati: “Nda linga apulilo alua. Omo atambululo avo osi a likuata Lovisonehua, nda komõha kuenje, nda tava okuti va ndi lilongisa Embimbiliya.” Ovina Esa a lilongisa Vembimbiliya via vetiya utima waye kuenje, wa litumbika ku Yehova. Eye wa popia hati: “Kosimbu nda kuata ovitangi. Pole, cilo omuenyo wange u kuete ocimãho.” a

ONUMBI: “Vakuahenda va sumũlũha.”

—Mateo 5:7.

NDOMO ONUMBI EYI YI TU KUATISA OKU KUATA ESANJU KOMUENYO: Voku kuata ohenda mua kongela oku kuatisa omanu, oku lekisa esunguluko kokuavo loku va kapako. Yesu wa kuatela ohenda olosuke. Omo liohenda yaye, wa vetiyiwa oku kuatisa omanu vana va tala ohali. (Mateo 14:14; 20:30-34) Nda tu setukula ongangu ya Yesu poku kuatela ohenda omanu, tu vokiya esanju komuenyo wetu, momo vana va lekisa ohenda komanu, va tambula onima yesanju. (Ovilinga 20:35) Tu pondola oku lekisa ohenda komanu kolondaka kuenda kovilinga vietu, poku kuatisa vana va saka. Anga hẽ oku lekisa ohenda ci nena muẽle esanju komuenyo?

ULANDU UMUE WOCILI: Ukãi umue o tukuiwa hati, Maria la veyaye Carlos, vakuangangu yiwa yoku lekisa ohenda. Isia ya Maria ocimbumba, kuenje, eci pa pita anyamo amue, wa fetika oku vela calua. Maria la Carlos, vo wa ambata konjo yavo kuenda va fetika oku u tata. Omo o kuete uvei wo diabete olonjanja vimue, va siata oku pumba otulo, poku enda laye kosipitali. Ovo va popia vati, va siata oku yeva ekavo. Pole, ndomo Yesu a ci popia, va kuete esanju, momo va kũlĩha okuti, va kasi oku tata isia ya Maria, poku wĩha ovina a sukila.

NUMBI: “Ava va koka ombembua va sumũlũha.”—Mateo 5:9.

NDOMO ONUMBI EYI YI TU KUATISA OKU KUATA ESANJU KOMUENYO: Ondaka oku “koka ombembua,” yi lomboloka oku linga ovina vi nena “ombembua.” Omunu o linga ovina vi nena ombembua o kuata ndati esanju komuenyo? Tu ci linga poku kuata ukamba la vana tu lisungue lavo. Tu sukila oku kapako elungulo Liembimbiliya li popia hati: “Ndeci ca soka locikele cene, kali lombembua lomanu vosi nda ci tẽliwa.” (Va Roma 12:18) Vondaka “lomanu vosi,” mua kongela vakuepata lietu, kuenda omanu vakuavo okuti, ka va tiamẽlele ketavo lietu. Anga hẽ oku kala ukuambembua “lomanu vosi” ci tu nenela muẽle esanju komuenyo?

ULANDU UMUE WOCILI: Kũlĩhĩsa ulandu wukãi umue o tukuiwa hati Nair. Vokuenda kuotembo, wa pita lovitangi via seteka ocituwa caye coku kala ukuambembua, ca piãla enene la vakuepata liaye. Tunde eci ulume waye o siapo, pa pita ale anyamo 15, kuenda o kasi oku tekula omãla lika liaye. Umue pokati komãla vaye, wa fetika oku nyua olodroga loku tata lãvi inaye kumue la vamanjaye. Nair wa kolela okuti, ovina a lilongisa Vembimbiliya ovio vio kuatisa oku kala ukuambembua, ndaño lovitangi viaco. Eye ka setekele oku hoya, pamue oku tetulula ovitangi viaco lolondunge viaye muẽle. Pole, wa likolisilako oku lekisa ohenda, ocisola, kuenda esunguluko lomanu vakuavo. (Va Efeso 4:31, 32) Eye wa kũlĩhĩle okuti, oku kala ukuambembua, cu u kuatisa oku kuata ukamba la vakuepata liaye kuenda omanu vosi.

TIAMISILA UTIMA KOVINA VI KA PITA KOVASO YOLONEKE

Nda tu kapako elungulo lia Yesu, tu kuata esanju komuenyo lonjolela. Oco tu kuate esanju komuenyo, tu sukila oku kũlĩha ovina vi ka pita kovaso yoloneke. Pole, omo tua kũlĩha okuti tu kuka, tu vela kuenda eteke limue tu ka fa, tu pondola oku kuata ndati esanju komuenyo? Evi ovitangi vimue via siata oku pita lomanu mulo voluali.

Pole, kuli esapulo liwa! Yehova o sumũlũisa vana va likolisilako “oku endaenda ndeci Yesu a endaenda.” Olohuminyo via Yehova vioku nena oluali luokaliye, muna mu ka kala esunga, loku eca omuenyo ko pui ku vakuekolelo, ndopo vi ka tẽlisiwa. Ondaka yaye yi popia ndoco: “Tala, onjo ya Suku yi kasi pokati komanu. Eye o tunga lavo, va linga omanu vaye, kuenje Suku eye muẽle, o kala lavo, o linga Suku yavo. Eye o puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.”—Esituluilo 21:3, 4.

Maria wa tukuiwa kefetikilo liocipama cilo, okuti o kuete anyamo 84, o yongola oku mola oku tẽlisiwa kuolondaka evi. Nye ci popiwa kokuove? O yongola hẽ oku kũlĩha ovina vialua viatiamẽla koku kuata “omuenyo wocili,” una tu ka tambula vemẽhi Liusoma wa Suku?—1 Timoteo 6:19. b

[Atosi pombuelo]

[Elitalatu kemẽla 7]

Maria la Carlos

[Elitalatu kemẽla 7]

Nair