Ufayssiya Deˈuwaa Deˈanau Yesuusa Leemisuwaa Kaalla
“Kiristtoosi de7idoogaadan de7anau bessees.”—1 Yohaannisa 2:6.
YESUUSI ufayssiya deˈo deˈidoogaa hagaappe kasetiya huuphe yohuwan beˈida. Yaatiyo gishshau, nu deˈuwan keehippe ufayttanau a leemisuwaa kaallananne a zoriyaa siyana bessees.
Qommoora deˈiya xiqisee bessiyoogaadan, Yihooway nuuni hegaadan oottanaadan zorees. Yesuusi deˈidoogaadan deˈiyoogee nu deˈo ubban a leemisuwaa kaalliyoogaanne i tamaarissidobaa oottiyoogaa gujjees. Nuuni hegaadan oottiyoogee, Xoossan nashettanaadaaninne ufayssiya deˈo deˈanaadan maaddees.
Yesuusi tamaarissidobay, i deˈidoogaadan deˈanau nuna maaddana danddayiya kaaletuwaa gujjees. He kaaletotuppe darota Yesuusi Deriyaa Bolla Timirttiyan qonccissiis. He kaaletotuppe amaridaageeta, qassi hegeeta nu deˈuwan waatidi oosuwan peeshshana danddayiyaakko ane beˈoos.
KAALETUWAA: “Bantta ayyaanan hiyyeesa gididoogaa eriyaageeti anjjettidaageeta.”—Maatiyoosa 5:3.
HA KAALETOY UFAYSSIYA DEˈUWAU MAADDIYO OGIYAA:
Yesuusi asaa naati ayyaanaabaa koshshay deˈiyoogeeta gididi merettidoogaa qonccissiis. Nuuni ha oyshatu zaaruwaa eranau koyoos: Nuuni ha saˈan deˈiyoy aybissee? Ha saˈan metoynne tuggay daridoy aybissee? Tumuppe Xoossay nuussi qoppii? Hayqqi simmin deˈoy deˈii? Nuuni ufayssiya deˈo deˈanau hagaa mala oyshatu zaaruwaa erana koshshees. Ha oyshatuyyo ammanttiya zaaro demmana danddayiyoy Xoossaa Qaalaa xallaappe gidiyoogaa Yesuusi erees. Yesuusi ba Aawaakko woossido woosan, “Ne qaalaikka tumatettaa” yaagiis. (Yohaannisa 17:17) Xoossaa Qaalay ayyaanaaban koshshiyaabaa nuuni demmanaadan tumuppe maaddana danddayii?
HANIDABAA:
Erettida banddiyan waannatiya yettancha gidida Eesi hegaappekka aaruwan erettanau matiis. Gidikkokka, Eesi ba deˈuwan keehippe ufayttenna. I, yettaa yexxiyoogan ufayttiyaaba gidikkokka, hegaappekka aaruwan ufayssiya deˈo deˈanau keehi koyidoogaa yootiis. SHin, Eesi guyyeppe issi Yihoowa Markkaara gayttiis. I hagaadan giis: “Taani a daro oyshaa oychaas. I Geeshsha Maxaafaappe zaarido ammanttiya zaaruwan taani keehi ufayttido gishshau, aara Geeshsha Maxaafaa xannaˈanau maayaas.” Eesi Geeshsha Maxaafaappe xannaˈidobaa wozanappe ammanido gishshau, ba huuphiyaa Yihoowayyo geppanau koyiis. I, “Taani hagaappe kase darotoo metuwaaninne daafaban gelays. SHin haˈˈi ufayssiya deˈo deˈays” yaagiis. *
KAALETUWAA: “Maariyaageeti anjjettidaageeta.” —Maatiyoosa 5:7.
HA KAALETOY UFAYSSIYA DEˈUWAU MAADDIYO OGIYAA:
Maariyoogaa giyoogee haratuyyo qarettiyoogaa, etau kehiyoogaanne qoppiyoogaa giyoogaa. Yesuusi metootidaageeta maariis. I wozanappe qarettidi, harata metuwaappe shemppissiis. (Maatiyoosa 14:14; 20:30-34) Harata maariyaageeti ufayttiyo gishshau, nuuni Yesuusa leemisuwaa kaallidi maariyaageeta gidiyo wode ufayttoos. (Oosuwaa 20:35) Kehabaa haasayiyoogaaninne oottiyoogan harata maarana danddayoos; hegaadan oottiyoogee nu maadoy koshshiyoogeeta woppissees. Harata maariyoogee tumuppe nuuni ufayttanaadan oottii?
Maariyonne Karloosa
HANIDABAA:
Maariyanne i keettaaway Karloosi maariyoogan leemiso gidoosona. Maaree aaway machiyaa hayqqin barkka deˈees; qassi mata wodeppe doommidi keehi sahettidi hiixaappekka denddenna. Maariyanne Karloosi a bantta soo efiidi, koshshiya ubbaban maaddoosona. Eti darotoo xiskkennan aqoosona; ubba sahoy goobiyo wode darotoo aakime keetti efoosona. Eti issi issitoo keehippe daafuriyoogaa yootoosona. SHin eti keehippe ufayttoosona; ayssi giikko, eti Maaree aawaassi koshshiyaabaa kunttiyoogaa eriyoogee Yesuusi giidoogaadan wozanappe ufayttanaadan oottees.
KAALETUWAA: “Sarotettaa medhiyaageeti ufayttiyaageeta.”—Maatiyoosa 5:9, NW.
HA KAALETOY UFAYSSIYA DEˈUWAU MAADDIYO OGIYAA:
Sarotettaa medhiyoogee ufayttanaadan oottiyoy ayba ogiyaanee? Sarotettaa medhiyaageeta gidiyoogee nuuni asa ubbaara siga deˈanaadan maaddees. Geeshsha Maxaafay, “Asa ubbaara sarotettan de7anau, intte baggaara, intteyyo danddayettidabaa ubbaa oottite” giyo zoriyaa nuuni oosuwan peeshshana koshshees. (Roome 12:18) “Asa ubbaara” giyaagee nu soo asaanne harata, geella nu ammanuwaa kaallennaageetakka gujjees. “Asa ubbaara” sarotettan deˈiyoogee tumuppe nuuni ufayttanaadan oottii?
Nayro
HANIDABAA:
Nayro giyo maccaasee hanotaa qoppa. A hara asaara, ubba qassi so asaara sarotettan deˈennaadan paacciya darobay adussa wodiyau gakkiis. I azinay 15 laytta gidiya wodeppe kase o aggidi biis; he wodeppe doommada ba naata barkka dichausu. I naatuppe issoy jallissiya xaliyaa goˈettiyo meezee deˈiyoogaa; i darotoo wayssees, qassi onne i naˈiyo yashissees. Nayra Geeshsha Maxaafaappe tamaaridobay, hegaa mala metiya hanotankka sarotettaa medhanaadan o maaddidoogaa akeekaasu. A issi metoy merettiyo wode palamettennan woy ooyettennan agganau baaxetausu. Qassi haratussi kehiyaaro, qarettiyaaronne qoppiyaaro gidanau baaxetausu. (Efisoona 4:31, 32) Sarotettaa medhiyoogaa xeelliyaagan tamaaridobay so asaaranne haratuura a siga deˈanaadan maaddidoogaa ammanausu.
SINTTANAABAA QOPPIYOOGAA
Nuuni Yesuusi zorido aadhida eratetta zoriyaa kaalliyaaba gidikko, nu deˈuwan ufayssaanne woppaa demmana. Gidikkokka, nuuni tumuppe ufayssiya deˈo deˈanau sinttanaabaa erana koshshees. Qassi, asaa wurssettay ceeggiyoogaa, sahettiyoogaanne hayqqiyoogaa xalla giidi nuuni qoppiyaaba gidikko, deˈoy waani ufayssiyaagaa gidana danddayii? SHin ha alamiyan deˈoy hegaa mala gidiyoogee qoncce.
Gidikkokka, mishiraachoy deˈees! “Kiristtoosi de7idoogaadan de7anau” baaxetiya ubbau Yihooway daro anjjuwaa giigissi wottiis. Yihooway ammanettida asaa naati deˈanaadan i halchido ogiyan, giishin xilloti payya gididi merinau deˈiyo, ooratta alamiyaa mata wode ehaanau qaalaa geliis. A Qaalay hagaadan gees: “Xoossaa keettai asaara de7ees; Xoossai asaara issippe de7ana. Eti a asa gidana; Xoossai ba huuphen etaara de7ana. I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajjuutaa 21:3, 4.
Ibaa kasetidi yootido, 84 laytta maccaasiyaa Maariya, ha qaalay polettiyo wode beˈanau hidootan naagausu. Neeni shin? Xoossaa Kawotettan demmiyo “tumu de7uwaa” xeelliyaagan gujjada eranau koyay? (1 Ximootiyoosa 6:19) Koyiyaaba gidikko, ne heeran deˈiya Yihoowa Markkata oychana danddayaasa woy ha maxeetiyaa giigissiyaageetussi xaafana danddayaasa. *
^ MENT. 8 Eesa deˈuwaa xeelliyaagan kumetta qofaa ha maxeetiyan sinttaa 14-15 nabbabana danddayaasa.
^ MENT. 18 Yihoowa Markkati attamissido Tumuppe Geeshsha Maxaafay Tamaarissiyoy Aybee? giya maxaafay dumma dumma huuphe yohuwan Geeshsha Maxaafay yootiyoobaa xannaˈanau darota maaddiis.
Hageeta Beˈadii?
GEESHSHA MAXAAFAABAA OYCHCHIYOOBATU ZAARUWAA
Nuuni Merettido Gaasoy Aybee?
‘Nuuni merettidoy aybissee?’ gaada oychcha eray? Geeshsha Maxaafay he oyshaa woygi zaariyaakko akeeka.
GEESHSHA MAXAAFAABAA OYCHCHIYOOBATU ZAARUWAA
Xoossaa Kawotettay Sinttappe Ay Oottanee?
Xoossaa kawotettay saˈaa haariyo wode aybi hanana gaada naagana danddayiyaakko akeeka.
