CASI bidúʼyanu lu tema gudídinu ca, galán bibani Jesús ne guyuu nayecheʼ. Pa racaláʼdxinu guibáninu casi bibánibe la? naquiiñeʼ chinándanu ejemplu stibe ne ca conseju ni bidiibe.

Casi na textu ni cá ra bizulú tema riʼ, Jiobá rinabaʼ laanu guibáninu casi bibani Jesús, nga riníʼ chinándanu ejemplu stibe ne cani bisiidibe lu guiráʼ ni gúninu. Zacá ziuulaʼdxiʼ Dios cani gúninu ne ziuʼnu nayecheʼ.

Para ganda chinándanu ejemplu stiʼ Jesús, bidiibe laanu caadxi conseju ni zanda gacané laanu, ne stale de laacani bizeetebe cani lu libana ni bidiibe lu dani. Guidúʼndanu chonna de laacani ne guidúʼyanu ximodo zanda gúninu cani lu xquendanabáninu.

XIMODO RACANÉ CONSEJU RIʼ LAANU:

Jesús bisiene dede ora gale binni nga maca nuu ndaaniʼ ladxidóʼ chuʼ gaxha de Dios. Nga runi, caquiiñeʼ gánnanu caadxi cosa casi: Xi pur nabáninu. Xiñee nabé racaná binni. Ñee rizaalaʼdxiʼ Dios laanu la? Ñee rié binni paxaraa ora maʼ guti la? Óraruʼ guiénenu cani nga zanda guibáninu nayecheʼ. Ne gunna Jesús Stiidxaʼ Dios si nga zanda guicabi ca guendarinabadiidxaʼ riʼ. Ora biʼniʼ orarbe Bixhózebe guniʼbe: «Dxandíʼ stiidxa luʼ» (Juan 17:17). Ñee zanda gacané Biblia laanu chuʼnu gaxha de Dios la?

NI BIZAACA BINNI:

Ti hombrehuiiniʼ láʼ Esa biindaʼ lade ti grupu ni nabé binibiáʼ binni ne xcaadxi si biaadxaʼ laabe para ñácabe ti binni nabé risaca ni ruxhidxi rock. Neca zaqué, guyuu ora biʼniʼ sentirbe casi ora riaadxaʼ xiixa laabe. Sicaríʼ guniʼbe: «Neca nabé riuuladxeʼ chuaaʼ lu grupu que la? laaca racalaʼdxeʼ chuaaʼ jma nayecheʼ». De raqué binibiaʼbe ti testigu stiʼ Jiobá, ne nabe: «Oraqueca gunabadiidxaʼ laabe stale cosa. Jneza modo biquiiñebe Biblia para bicábibe ca guendarinabadiidxaʼ que, ne ngue bicaa naa chuuladxeʼ guiziideʼ jma, de raqué bizulú biindanebe naa Biblia.» Ca cosa ni biziidibe que yendácani ndaaniʼ ladxidoʼbe ne bicaacani laabe gudiibe xquendanabánibe Jiobá. Ne laaca guniʼbe: «Dxiqué guizáʼ gupaʼ guendanagana, nin caʼruʼ guireeʼ de tobi maʼ nuaaʼ lu stobi. Peru yanna huaxa maʼ nannaʼ xi pur nabaneʼ». *

XIMODO RACANÉ CONSEJU RIʼ LAANU:

Pa rianu binni, nga zucaa laanu gácanu nachaʼhuiʼ ne guiénenu laacaʼ. Jesús nabé biá ca binni ni caquiiñeʼ tu gacané laacaʼ. Cumu dxandíʼ biabe binni la? gucanebe stale binni ni cayacaná neca qué ninábacaʼ ni laabe (Mateo 14:14; 20:30-34). Ora gúninu casi bíʼnibe ca, racaneni laanu chuʼnu nayecheʼ ne guibáninu jma galán (Hechos 20:35). Zanda gusihuínninu rianu binni pur cani guininu ne cani gúninu ora gacanenu cani caquiiñeʼ chuʼ tu gacané laacaʼ. Peru zándaca chuʼ tu guinabadiidxaʼ: «Ñee dxandíʼ nga zabaneʼ nayecheʼ pa guiaʼyaʼ sti binni la?».

NI BIZAACA BINNI:

Maria ne Carlos, xheelaʼ, nabé riacaʼ binni. Cumu viudu bixhoze Maria ne maʼ ziné chupa chonna iza de maʼ qué randa rizá la? yenécabe laabe ralídxicabe ti ganda gápacabe laabe. Nabé huabee xcaandacabe pur rápacabe laabe, ne cumu nápabe dxiña la? nuu biaje runiná ni laabe ne nagueendaca rinecaʼ laabe ra  hospital. Ne neca riuu biaje runi sentírcabe guizáʼ maʼ bidxágacabe, peru nabánicabe nayecheʼ casi guníʼ Jesús que, purtiʼ nánnacabe cayacanécabe bixhoze Maria ne cudiicabe laa guiráʼ ni caquiiñeʼ.

XIMODO RACANÉ CONSEJU RIʼ LAANU:

Ca diidxaʼ «ni riguixhe dxí enda ridínde» ni zeeda lu griegu riniʼni tuuxa ni ruyubi chuʼ binni tobi si. Ximodo zanda guibáninu nayecheʼ pa guyúbinu chuʼ xcaadxi binni tobi si yaʼ. Zacaneni laanu chuʼnu galán né xcaadxi binni. Nga runi, galán chinándanu conseju riʼ: «Laguni biaʼ ganda para cadi chuʼ dinde né tu irutiʼ. Zaa guni cabe ni laacabe peru cadi né rusi ca laatu» (Romanos 12:18). Ca diidxaʼ «cadi chuʼ dinde né tu irutiʼ» laaca caníʼcani de binnilídxinu ne xcaadxi binni ni cadi naca de religión stinu. Ñee zabáninu nayecheʼ pa «cadi chuʼ [dindenenu] irutiʼ» la?

NI BIZAACA BINNI:

Nabé nagana guca para ti gunaa láʼ Nair cadi chuʼdindené sti binni, purtiʼ nabé huayápabe guendanagana lu xquendanabánibe ne jmaruʼ si né binnilídxibe. Maʼ raca quince iza de bisaana xheelabe laabe ne maʼ laasibe cusiniisibe ca xiiñibe. Tobi de laacaʼ nabé guduʼbaʼ guixi ne nabé ridxé ique ne rucaalú laabe ne ca bizaʼnaʼ. Nair nanna racané Biblia laa para gaca nadóʼ ne gucueeza laa neca nabé nagana ra cadiʼdiʼ. Lugar de tíndebe pur intiica si cosa, rúnibe stipa pur gácabe nachaʼhuiʼ ne guiénebe binni (Efesios 4:31, 32). Cumu maʼ biziidibe gácabe nadóʼ la? nga racané laabe chuʼbe galán né binnilídxibe ne xcaadxi binni.

Pa chinándanu ca conseju ni bidii Jesús, zabáninu galán ne ziuʼnu nayecheʼ. Peru para ganda guibáninu jma nayecheʼ laaca naquiiñeʼ gánnanu xi nuu para laanu despué. Zanda xa guibáninu nayecheʼ pa ni nánnasinu nga ra tiidiʼ tiempu zióxhonu, zaca huaranu ne zátinu. Triste guininu ni, peru zacá nga nabani binni yanna.

Peru nuu caadxi diidxaʼ sicarú para laanu. Nabé stale ndaayaʼ zudii Jiobá ca binni ni guibani casi bibani Jesús. Maʼ bidii stiidxabe zúnibe guidxilayú riʼ nacubi ne zabani binni casi maca gudíxhebe guibánicaʼ: qué chuʼ dxi gáticaʼ ne gácacaʼ nazaaca. Stiidxabe na: «Biiyaʼ, ma nabeza Dios lade binni. Laape be zabeza né be laacaʼ. Zaca ca xpinni be, ne laabe zaca be Dios sticaʼ. Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué» (Apocalipsis 21:3, 4).

Maria, gunaa ni napa 84 iza ni bizéʼtenu lu primé tema stiʼ revista riʼ guizáʼ riecheʼ ora guiníʼ ique zuuyaʼ ora gaca ni na ca diidxaʼ ca. Yanna lii yaʼ, ñee riuuláʼdxiluʼ gánnaluʼ ximodo zabani binni ora guni mandar Reinu stiʼ Dios la? (1 Timoteo 6:19.) Pa zacá ni, galán guiníʼneluʼ ti testigu stiʼ Jiobá ni nuu neza ra nabézaluʼ o bicaa ra nuu cani runi revista riʼ. *