Kanbiọ Sinai Do Biblu Ji
Kanbiọ Sinai Do Biblu Ji
Be e yọnbasi nado mọnukunnujẹ Biblu mẹ ya?
Ohó Jiwheyẹwhe tọn wẹ Biblu yin. E taidi wekanhlanmẹ de sọn otọ́ owanyinọ de dè. (2 Timoti 3:16) To Biblu mẹ, Jiwheyẹwhe basi zẹẹmẹ lehe mí sọgan hẹn homẹ etọn hùn do, nuhewutu e do jotẹnna oylan, po nuhe e na wà na gbẹtọvi lẹ to sọgodo po tọn. Ṣigba, sinsẹ̀ngán lẹ ko slokọna nuplọnmẹ Biblu tọn lẹ; podọ enẹ zọ́n bọ mẹsusu nọ lẹndọ emi ma sọgan mọnukunnujẹ Biblu mẹ pọ́n gbede.—Owalọ lẹ 20:29, 30.
Jehovah Jiwheyẹwhe jlo dọ mí ni yọ́n nugbo lọ gando emi go. Enẹwutu, e na mí owe de he mẹ mí sọgan mọnukunnujẹ.—Hia 1 Timoti 2:3, 4.
Nawẹ a sọgan mọnukunnujẹ Biblu mẹ gbọn?
Gbọnvona dọ Jehovah na mí Biblu, e sọ nọ gọalọna mí nado mọnukunnujẹemẹ. E do Jesu hlan nado plọnnu mí. (Luku 4:16-21) Jesu gọalọna hosetọ etọn lẹ nado mọnukunnujẹ Owe-wiwe lẹ mẹ gbọn alọdindlẹndo wefọ voovo lẹ dali.—Hia Luku 24:27, 32, 45.
Jesu do agun Klistiani tọn ai, na azọ́n he ewọ bẹjẹeji lọ nido zindonukọn. (Matiu 28:19, 20) To egbehe, hodotọ nugbo Jesu tọn lẹ nọ gọalọna gbẹtọ lẹ nado mọnukunnujẹ nuhe Biblu plọnmẹ gando Jiwheyẹwhe go lẹ mẹ. Eyin e jlo mì nado mọnukunnujẹ Biblu mẹ, homẹ Kunnudetọ Jehovah tọn lẹ tọn na hùn nado gọalọna mì.—Hia Owalọ lẹ 8:30, 31.
Na nudọnamẹ dogọ, pọ́n weta 2 owe Etẹwẹ Biblu Plọn Mí Taun tọn, he Kunnudetọ Jehovah tọn lẹ zinjẹgbonu