Baibõl̦ eo ej Naan in Anij. Ej ãinwõt juon lõta jãn juon jemãn me el̦ap an yokwe ajri ro nejin. (2 Timote 3:16) Anij ej kwal̦o̦k ilo Baibõl̦ eo kõn ta ko jemaroñ kõm̦m̦ani ñan kabuñbũruon. Ej bareinwõt kwal̦o̦k unin an kõtl̦o̦k bwe nana en wõnm̦aanl̦o̦k, im ta eo m̦õttan jidik enaaj kõm̦m̦ane ñan armej. Bõtab, em̦õj an rũkaki in kabuñ ko ukot katak ko ilo Baibõl̦. Kõn men in, elõñ armej rej pok im l̦õmn̦ak bwe reban maroñ mel̦el̦e kõn kobban.​—Jerbal 20:29, 30, UBS.

Jeova Anij ekõn̦aan bwe jen jel̦ã katak ko rem̦ool kõn e. Eñin unin ear letok Baibõl̦ eo, juon bok me epidodo ad mel̦el̦e kake.​—Riit 1 Timote 2:3, 4.

Jeova ear letok Baibõl̦ eo im ej bar jipañ kõj ñan mel̦el̦e kobban. Ear jilkintok Jijej bwe en katakin kõj. (Luk 4:16-21) Jijej ear jipañ ro rar roñjake e ñan mel̦el̦e kõn kobban Baibõl̦ eo ikijjeen an kar kõjerbal eoon ko ñan kõmel̦el̦eik er.​—Riit Luk 24:27, 32, 45.

Jijej ear kajutak eklejia eo an Kũrjin ro rem̦ool bwe ren wõnm̦aanl̦o̦k kõn jerbal eo ear jinoe. (Matu 28:19, 20) Rainin, ro em̦ool aer l̦oor Jijej rej jipañ armej ro jet ñan mel̦el̦e kõn katak ko rem̦ool kõn Anij me rej pãd ilo Baibõl̦. Ñe kokõn̦aan kal̦apl̦o̦k am̦ mel̦el̦e kõn katak ko jãn Baibõl̦ eo, Ri Kõnnaan ro an Jeova rem̦õn̦õn̦õ in jipañ eok.​—Riit Jerbal 8:30, 31.