Le Bibliaoʼ u Tʼaan Dios. Bey junpʼéel carta ku túuxtik juntúul taatatsil tiʼ u paalal jach u yaabiltmeʼ (2 Timoteo 3:16). Teʼ Bibliaoʼ Dioseʼ ku yaʼalik bix jeʼel k-kiʼimakkúuntik u yóoleʼ, baʼaxten yaan muʼyajil, yéetel baʼax ken u beet ichil junpʼíit kʼiin tu yoʼolal tuláakal máak. Baʼaleʼ yaan religionoʼobeʼ maʼ patal bix u kaʼansajoʼob, le beetik yaʼab máak maʼ tu naʼatik le Bibliaoʼ (Baʼaxoʼob 20:29, 30).

Jéeoba Dioseʼ u kʼáat ka k-kʼaj óolte. Le oʼolal tu tsʼáajtoʼon junpʼéel libro jeʼel u páajtal k-naʼatik baʼax ku yaʼalikeʼ. (Xok 1 Timoteo 2:3, 4.)

Jéeobaeʼ maʼ chéen tu tsʼáajtoʼon le Bibliaoʼ, baʼaxeʼ ku yáantkoʼon k-naʼate. Letiʼeʼ tu túuxtaj Jesús utiaʼal u kaʼansoʼon (Lucas 4:16-21). Jesuseʼ tu yáantaj máak u naʼat le jejeláas baʼaxoʼob ku yaʼalik le Kiliʼich Tsʼíiboʼoboʼ. (Xok Lucas 24:27, 32, 45.)

Jesuseʼ tu pʼataj junmúuchʼ máakoʼob utiaʼal ka tsʼoʼoksaʼak le meyaj tu káajsoʼ (Mateo 28:19, 20). Bejlaʼeʼ le máaxoʼob jach tu jaajil u disipuloʼob Jesusoʼ táan u yáantkoʼob máak u naʼat baʼax ku yaʼalik le Biblia yoʼolal Diosoʼ. Wa a kʼáat a naʼat baʼax ku yaʼalik le Bibliaoʼ u j-jaajkunajoʼob Jéeobaeʼ jeʼel u yáantkechoʼob yéetel kiʼimak óolaleʼ. (Xok Baʼaxoʼob 8:30, 31.)