Nineve wenga likulu la Ufumu wa Asiliya. Msumba uwu, wenga ukulu ukongwa wenga ndi nyumba za chifumu zakutowa, nyumba zakusopiyamu, misewu yikuluyikulu kweniso malinga ngatalingatali. Kweni mchimi wachiheberi Nahumu, wangukamba kuti, wenga “msumba wa ndopa.”—Nahumu 3:1.

Kwenga kwakwenere kuwukamba viyo chifukwa vakujambula vo venga munyumba ya chifumu yaku Senakaribu, valongonga nkhaza zo Asiliya achitanga. Chakujambula chimoza, chalongonga msilikali wakhajuwa lilimi laku kapolu yo amumanga manja uku asilikali anyaki amuko. Vakulemba navu vikonkhoska so kuti akapolu aŵaguzanga ndi vingwi vo amangiriyangaku mbeja zo aŵahomanga pamphunu pamwenga pamulomu. Ŵanthu a maudindu wo akolekanga ukapolu, aŵavwalikanga mitu ya mafumu ngawu mukhosi nge nekelesi.

Munthu yo wafufuzanga mbiri ya ku Siliya, Archibald Henry Sayce, wangukonkhoska nkhaza zo Asiliya achitanga asani apunda. Iyu wangukamba kuti: “Asilikali awunjikanga mitu ya ŵanthu wo aŵabaya asani apunda nkhondu, anyamata ndi asungwana aŵawotchanga ndi motu ŵeche amoyu, nyengu zinyaki aŵasunganga kuti aziŵatombozgi kunthazi. Anthurumi aŵapayikanga pa chimiti, aŵafuŵanga khungu ŵeche amoyu, aŵakolowonga masu, aŵadumuwanga manja, malundi ndipuso makutu ndi mphunu.”

Chiuta wangulangula Ayuda kuti: “Muchizenga nyumba yifya, muyichitiyengi chiguŵa cha pa mutenji winu, alinga kuti mureki kutole kalema ka ndopa pa nyumba yinu, asani weyosi wangawa kutuwa paku yo.” (Marangu 22:8) Ayuda agwiriyanga nchitu pachanya pa nyumba zawu, mwaviyo kampanda kaŵavikiliyanga kuti aleki kuwa.

Pachanya pa nyumba za Ayisraele anandi pajanga pakuti skee. Ndipu ŵanthu awothiyangapu lumwi, ajanga penipo kuti timphepu tiŵaputeku, agwiriyangapu nchitu zinyaki kweniso ngenga malu ngamampha kugonapu nyengu ya chihanya. (1 Samuele 9:26) Alimi anikangapu mbewu zawu ŵechendaziperi, vipasu va mukuyu ndi mphereska.—Yoswa 2:6.

Pachanya pa nyumba zenizi, asopiyangapu Chiuta wauneneska penipo anyaki asopiyangapu angoza. (Nehemiya 8:16-18; Yeremiya 19:13) Mwakuyeruzgiyapu, wakutumika Petro, wanguluta pachanya pa nyumba kuchiromba nyengu ya 12 koloku, msana. (Machitidu 10:9-16) Ndipuso, azengangapu chitanthali cho achiyeŵanga ndi mani nga mphereska pamwenga mugwalangwa ndipu pajanga muduzi wamampha ukongwa.

Buku linyaki likamba kuti, nyumba za Ayisraele zajanga ndi makwereru ngo ŵanthu agwiriskiyanga nchitu asani aluta pachanya pa nyumba. Makwereru ngenanga, angamikanga “mkati mwanyumba cha kweni pabalaza la pabwalu.” (The Land and the Book) Mwaviyo, asani mweneku wanyumba wasikiya pasi wafikanga munyumba chayimu cha. Venivi vikolerana ndi vo Yesu wangukamba vakukwaskana ndi kukhumbika kwa kuthaŵa mwaliŵi asani msumba we pafupi kubwanganduka. Iyu wangukamba kuti: “Wapa nyumba pachanya wangasika cha kwachito va munyumba yaki.”—Mateyu 24:17.