SUD MACHIEGNI GI NYASAYE
“Kwauru, Eka Nomiu”
“Ruoth, puonjwa lemo.” (Luka 11:1) Achiel kuom jopuonjre Yesu nopenje penjoni. Kane Yesu dwoko penjono, nochiwo ranyisi ariyo mapuonjowa kaka wanyalo lemo mi Nyasaye winjwa. Kapo ni isegapenjori kabe Nyasaye winjo lemo magi, ibiro mor ng’eyo dwoko ma Yesu ne ochiwo.—Som Luka 11:5-13.
Ranyisi mokwongo keto pachwa kuom ng’at ma lemo. (Luka 11:5-8) E siganano, ng’ato yudo wendo e chuny otieno to oonge chiemo monyalo miye. Ng’at ma nigi wendono neno ni nyaka otim gimoro gie sano. Kata obedo ni en otieno kamano, odhi ir osiepne mondo okwaye mkate. Osiepneno kwongo tamore chiewo nikech ok odwa chando joode manindo. To nikech ng’at ma nigi wendono ok ol kata wiye ok kuodi, otimo sinani kokwayo nyaka osiepneno chung’ malo kendo miye gima odwarono. *
Ang’o ma ranyisini puonjowa e wi wach lemo? Yesu nyisowa ni dwarore ni watim sinani kata kik waol—wadhi nyime kwayo, manyo, koda dwong’o. (Luka 11:9, 10) Nikech ang’o? Be en adier ni Yesu wacho ni Nyasaye ok dwar winjowa sama walemo? Ooyo. Yesu nyisowa ni mopogore gi osiep ng’ato ma digni konye, Nyasaye to gombo miyowa gik mowinjore ma wakwaye ka wan gi yie. Wanyiso yie ma kamano kuom timo sinani. Kuom kwayo nyadinwoya, wanyiso ni wadwaro gadier gima wakwayo kendo wayie chuth ni Nyasaye nyalo miyowago ka wachno luwore gi dwache.—Mariko 11:24; 1 Johana 5:14.
Ranyisi mar ariyo keto pachwa kuom ‘jawinj kwayo’ mag ji, ma en Jehova. (Zaburi 65:2) Yesu penjo niya: “To ere ng’ato kuomu ma wuon nyathi, ma ka wuode okwaye . . . rech, domiye thuol kar rech koso? Kata ka okwaye tong gweno, domiye okela koso?” Dwoko nenore maler—onge wuoro mohero nyithinde manyalo miyogi gik manyalo hinyogi. Kae to Yesu nolero kaka ranyisino tiyo: Ka jo maricho e ma ong’eyo miyo nyithindgi “mich mabeyo,” donge ‘Wuoru me polo ok nochiw mokadho roho maler’—ma en e mich maberie moloyo—monyalo miyo nyithinde manie pinyka mokwaye! *—Luka 11:11-13; Mathayo 7:11.
Nyasaye gombo miyowa gik mowinjore ma wakwaye ka wan gi yie
Ang’o ma ranyisini puonjowa e wi Jehova, ma en ‘Jawinj kwayo mag ji’? Yesu dwaro ni wang’e ni Jehova en Wuoro madewowa kendo madwaro miyowa gigo ma wachando. Omiyo, jogo malamo Jehova nyalo bedo thuolo nyise gigo manie chunygi. Kendo ng’eyo ni odwaro ni giyud ber miyo girwako dwoko momiyogi kata obedo ni ok en dwoko ma ne giparo. *
Ndiko Mochan Mondo Osom e Dwe mar April
^ par. 4 Ranyisi ma Yesu nogolono nyiso gik matimore e ngima gadier. Jo-Yahudi ne neno ni rwako welo en ting’ ma Nyasaye dwaro ni gichop. Kindego, ji ne loso mkate moromo mana odiechieng’ achiel, omiyo kwaruok mkate ka mar ng’ato orumo ne en gima gijotimo. Bende, kapo ni ne gin jochan, joodno duto ne nyalo nindo piny e ot achiel.
^ par. 6 Kinde mang’eny, Yesu ne konyo ji neno kor wach kuom nyisogi ni ka dhano ma jaricho nyalo timo gimoro maber, to nade Nyasaye ma jahera.
^ par. 7 Mondo ipuonjri kaka inyalo lemo kendo Nyasaye owinji, ne sula mar 17 e bug Ang’o ma Muma Puonjo Kuom Adier? mogo gi Joneno mag Jehova.
