1. Mɛni heje nɛ e sa nɛ wa ná hemi kɛ yemi nɛ mi wa ngɛ Mawu Munyu ɔ mi ɔ?

LOKO asafo mi nikɔtɔma amɛ maa ngmɛ Baiblo kaselɔ ko blɔ nɛ e bɔni fiɛɛmi yami ɔ, a biɔ a he ke, ‘Anɛ nɔ ɔ munyu tumi tsɔɔ kaa e he ye kaa Baiblo ɔ ji womi nɛ je Mawu ngɔ lo?’ * E sa nɛ wɔ tsuo waa kɛ wa ní peepee kɛ wa munyu tumi nɛ tsɔɔ kaa wa he Baiblo ɔ ye. Mɛni heje? Ke wa ngɛ hemi kɛ yemi nɛ mi wa ngɛ Mawu Munyu ɔ mi, nɛ waa kɛ tsuɔ ní saminya ngɛ fiɛɛmi nítsumi ɔ mi ɔ, lɔɔ ma ha nɛ wa maa ye bua nihi konɛ a ná yi baami.

2. Mɛni heje nɛ e sa kaa waa ya nɔ nɛ waa ngɔ níhi nɛ wa kaseɔ ɔ kɛ tsu ní ɔ?

² Bɔfo Paulo ma nɔ mi kɛ ha Timoteo kaa Mawu Munyu ɔ he hia. E ngma ke: “Anɔkuale ɔ nɛ a tsɔɔ mo nɛ o he ye ɔ, yaa nɔ nɛ o pɛtɛ he.” “Anɔkuale ɔ” nɛ Paulo wo ta a ji Baiblo ɔ mi anɔkualehi nɛ ha nɛ Timoteo ná hemi kɛ yemi ngɛ sane kpakpa a mi ɔ nɛ. Anɔkuale nɛ ɔmɛ ná wɔ hu wa nɔ he wami jã nɔuu, nɛ a yaa nɔ yeɔ bua wɔ nɛ́ waa ‘le ní konɛ a he wa yi wami.’ (2 Tim. 3:14, 15) E ngɛ mi kaa behi fuu ɔ, wa daa nɔ́ nɛ Paulo de ngɛ 2 Timoteo 3:16 nɔ kɛ tsɔɔ nihi kaa Mawu lɛ ha nɛ a ngma Baiblo ɔ nɛ, se wɔ nitsɛmɛ hu wa ma nyɛ ma ná ngmami nɛ ɔ he se. (Kane 2 Timoteo 3:16.) Nyɛ ha nɛ wa susu kuku nɛ ɔ he fitsofitso nɛ waa hyɛ. Ke wa pee jã a, e ma ha nɛ hemi kɛ yemi nɛ wa ngɛ kaa Yehowa tsɔɔmi ɔmɛ da a mi maa wa.—La 119:128.

3-5. (a) Kɛ nimli asafo ɔ pee a ní ngɛ munyu nɛ Petro tu ngɛ Pentekoste ligbi ɔ nɔ ɔ he ha kɛɛ, nɛ mɛni heje? (b) Mɛni heje nɛ nihi fuu nɛ a ngɛ Tesalonika a kplɛɛ anɔkuale ɔ nɔ ɔ? (d) Mwɔnɛ ɔ, mɛni nihi yɔseɔ kaa wa peeɔ ngɛ wa fiɛɛmi nítsumi ɔ mi?

³ Yesu de Israel ma a ke: “Ma tsɔ gbali kɛ ní leli, kɛ  tsɔɔli kɛ ba nyɛ ngɔ.” (Mat. 23:34) Yesu ngɛ e kaseli ɔmɛ a he munyu tue. E tsɔɔ mɛ bɔnɛ a kɛ Ngmami ɔ ma tsu ní ngɛ a fiɛɛmi nítsumi ɔ mi ha. Ngɛ Pentekoste 33 M.B. ɔ, Petro nɛ ji “tsɔɔli” nɛ ɔmɛ a kpɛti nɔ kake ɔ tu munyu kɛ tsɔɔ nimli asafo ko ngɛ Yerusalem nɛ e tsɛ ngmamihi fuu a se kɛ je Hebri Ngmami ɔ mi. Benɛ ni ɔmɛ nu bɔnɛ Petro tsɔɔ Ngmami ɔmɛ a sisi ha a, a kpɛti nihi fuu ‘hao wawɛɛ.’ A pia a he ngɛ yayamihi nɛ a pee ɔ he. A kpɛti nihi maa pee akpe etɛ ba pee Kristofoli.—Níts. 2:37-41.

⁴ Bɔfo Paulo nɛ lɛ hu e ji tsɔɔlɔ ɔ fiɛɛ we sane kpakpa a ngɛ Yerusalem, mohu ɔ, e ya fiɛɛ ngɛ ma kpahi a nɔ. Kaa nɔ hyɛmi nɔ́ ɔ, e kɛ Yudabi nɛ a jaa ngɛ kpe he ɔ tu munyu ngɛ Makedonia ma nɛ ji Tesalonika a mi. Ngɛ Hejɔɔmi ligbi etɛ sɔuu nɔ ɔ, Paulo kɛ mɛ ‘ya hla ngmami ɔmɛ a mi nɛ e tsɔɔ mɛ níhi a mi heii kaa e sa kaa Kristo ɔ nɛ na amanehlu, nɛ e te si kɛ je gbeje.’ Mɛni je mi kɛ ba? “Ni ɔmɛ a ti ni komɛ he ye,” jã nɔuu nɛ ‘Helabi ɔmɛ a ti nihi babauu hu he ye.’—Níts. 17:1-4.

⁵ Nihi fuu yɔse kaa Mawu sɔmɔli nɛ a ngɛ mwɔnɛ ɔ kɛ Baiblo ɔ maa níhi nɛ a tsɔɔ nihi ɔ nɔ mi. Wa nyɛmiyo ko ngɛ Switzerland kane ngmami ko kɛ ha nyumu ko ngɛ fiɛɛmi mi. Nyumu ɔ bi wa nyɛmiyo ɔ kɛ nɔ nɛ piɛɛ e he ɔ ke: “Mɛni sɔlemi nyɛɛ yaa?” Wa nyɛmiyo ɔ ha heto ke: “Yehowa Odasefoli ji wɔ.” Nyumu ɔ de ke: “Jinɛ e sɛ nɛ ma bi nyɛ sane nɛ ɔ, ejakaa Yehowa Odasefoli pɛ nɛ a maa ba ye we mi ba kane Baiblo kɛ ha mi.”

6, 7. (a) Mɛni blɔ nɔ nihi nɛ a tsɔɔ ní ngɛ asafo ɔ mi ɔ maa gu kɛ ngɔ Baiblo ɔ kɛ tsu ní ngɛ blɔ kpakpa nɔ? (b) Mɛni heje nɛ ke wa ngɛ we mi Baiblo mi nikasemi pee ɔ, e he hia wawɛɛ nɛ waa kɛ Ngmami ɔ nɛ tsu ní ɔ?

⁶ Ke wa ngɛ nihi ní tsɔɔe ɔ, mɛni blɔ nɔ wa maa gu konɛ waa kɛ Baiblo ɔ nɛ tsu ní saminya? Ke a ha mo nítsumi ngɛ asafo mi kpehi a sisi ɔ, ngɔɔ ngmamihi nɛ sa kɛ tsu ní. Mo ko tu ngmami ɔ he munyu kɛkɛ, nɛ koo fia kɛ fɔ womi nɔ nɛ o kane, nɛ koo kane ngɛ computer klama ko nɔ hulɔ, mohu ɔ mo bli Baiblo ɔ nitsɛ nɛ o kane, nɛ́ o wo tue buli he wami nɛ a pee jã. Jehanɛ se hu ɔ, moo to o tsui si kɛ tsɔɔ ngmami ɔ mi ngɛ blɔ nɛ ma ha nɛ huɛ bɔmi gbagbanii maa hi tue buli ɔmɛ kɛ Yehowa Mawu a kpɛti ɔ nɔ. Koo ngɔ nɔ́ heto mi níhi kɛ níhi a si kpamihi nɛ a sisi numi yee nɛ a woɔ nɔ nya mwɔ kɛ tsu ní, mohu ɔ, ngɔɔ be ɔ kɛ tsɔɔ Mawu Munyu ɔ nya.

⁷ Mɛni e sa kaa e hi wa juɛmi mi ke wa ngɛ wa Baiblo kaseli ní tsɔɔe? Ke waa kɛ mɛ ngɛ Baiblo kasemi womi ko kasee ɔ, e sɛ nɛ wa ma wa hɛ kɛ fɔ ngmami ko nɛ a tsɛ se ngɛ kuku ɔ mi ɔ nɔ. E sa nɛ waa wo ní kaselɔ ɔ he wami konɛ e kane ngmamihi nɛ a tsɛ se ɔ, nɛ waa ye bua lɛ nɛ e nu sisi. Mɛni blɔ nɔ wa ma nyɛ maa gu kɛ pee jã? Kɛ gu ní kaselɔ ɔ he wami nɛ wa maa wo konɛ e je e gbi kpo ngɛ ngmami ɔ he ɔ nɔ mohu pe nɛ wɔ nitsɛmɛ wa maa tsɔɔ ngmami ɔ nya gagaaga. E sa nɛ wa bi lɛ sanehi nɛ maa ye bua lɛ konɛ lɛ nitsɛ e ma e juɛmi nya si ngɛ blɔ kpakpa nɔ mohu pe nɛ wa ma de lɛ nɔ́ nɛ e sa kaa e pee aloo e kplɛɛ nɔ. *

8. Mɛni Paulo kɛ hwu ta ngɛ e mi?

⁸ Behi fuu ɔ, wa naa asafo mi nikɔtɔmahi kaa mɛ pɛ ji nihi nɛ a ngɛ he blɔ kaa a ‘kãa nɔ hɛ mi.’ Ngɛ anɔkuale mi ɔ, e ji asafo mi nikɔtɔma amɛ a blɔ nya nítsumi kaa a kã “nihi nɛ peeɔ yayami” ɔ a hɛ mi. (1 Tim. 5:20; Tito 1:13) Se e he hia nɛ wa kã wɔ nitsɛmɛ hu wa hɛ mi. Paulo ji Kristofono nɛ pee nɔ hyɛmi nɔ́ kpakpa nɛ e he nile bui lɛ fɔ. (2 Tim. 1:3) Se ngɛ lɔɔ tsuo se ɔ, e ngma ke: “I na kaa mlaa muno ko ngɛ ní tsue ngɛ ye nɔmlɔtso ɔ mi. Mlaa nɛ ɔ kɛ nɔ́ nɛ ngɛ ye juɛmi mi ɔ yi kulaa. Nɔ́ nɛ ye juɛmi deɔ mi ke e da nɛ ma  pee ɔ, i ya peeɔ nɔ́ kpa kulaa mohu. Yayami su nɛ ngɛ ye mi nɛ ɔ peeɔ mi nyɔguɛ.” Ke wa susu nɔ́ nɛ e de ɔ he ɔ, lɔɔ ma ha nɛ waa nu ta nɛ Paulo kɛ yayami su nɛ ngɛ e mi ɔ hwu ɔ sisi saminya.—Kane Romabi 7:21-25.

9, 10. (a) Mɛni gbɔjɔmihi nɛ eko ɔ, Paulo hwu kɛ si? (b) Kɛ Paulo plɛ kɛ ya nɔ hwu kɛ si yayami ha kɛɛ?

⁹ Mɛni gbɔjɔmihi nɛ Paulo bɔ mɔde kaa e maa ye a nɔ? E ngɛ mi kaa e tsɔɔ we gbɔjɔmi ɔmɛ pɔtɛɛ mohu lɛɛ, se e ngma ya ha Timoteo kaa e “pee níhi basabasa.” (1 Tim. 1:13) Loko Paulo ma tsake ba pee Kristofono ɔ, e wa Kristofoli ɔmɛ a yi mi wawɛɛ. Lɛ nitsɛ e tu bɔnɛ e kɛ Kristo se nyɛɛli ɔmɛ ye ha a he munyu ke: “Ye hɛ dɔ wo mɛ.” (Níts. 26:11) E ngɛ mi kaa Paulo kase he nɔ yemi mohu lɛɛ, se eko ɔ, be komɛ ɔ, e he maa wa ha lɛ kaa e maa ye e he nɔ, nɛ e ma kudɔ e lilɛ. (Níts. 15:36-39) Mɛni ye bua lɛ nɛ e ye manye ngɛ enɛ ɔ mi?

¹⁰ Benɛ Paulo ngɛ womi ngmae ya ha Kristofoli nɛ a ngɛ Korinto ɔ, e tsɔɔ bɔnɛ e plɛɔ kɛ kãa lɛ nitsɛ e hɛ mi ha a. (Kane 1 Korintobi 9:26, 27.) E wa e nɔmlɔtso nɛ yi mluku ɔ yi mi konɛ e nyɛ nɛ e pee Mawu suɔmi nya ní. Atsinyɛ jemi ko be he kaa e hla Ngmami ɔ mi ga womihi, nɛ e sɔle kɛ ha Yehowa konɛ e ye bua lɛ nɛ e nyɛ nɛ e kɛ ga womi ɔmɛ nɛ tsu ní. * Wa ma nyɛ ma ná nɔ hyɛmi nɔ́ nɛ e pee ɔ he se, ejakaa wɔ hu waa kɛ wa nɔmlɔtso nɛ yi mluku ɔ ngɛ ta hwue.

11. Mɛni blɔ nɔ wa maa gu kɛ “ka” wɔ nitsɛmɛ wa he nɛ waa hyɛ kaa wa ngɛ nyɛɛe ngɛ anɔkuale ɔ nya lo?

¹¹ E sɛ nɛ wa susu kɔkɔɔkɔ kaa wa ma nyɛ ma kpa ta nɛ wa hwuɔ kɛ siɔ wa gbɔjɔmihi ɔ. Mohu ɔ, e sa nɛ waa ya nɔ nɛ waa “ka” wɔ nitsɛmɛ wa he nɛ waa hyɛ kaa wa ngɛ nyɛɛe ngɛ anɔkuale ɔ nya niinɛ lo. (2 Kor. 13:5) Ke wa ngɛ ngmami komɛ kaa Kolosebi 3:5-10 kanee ɔ, wa ma nyɛ ma bi wa he ke: ‘Anɛ i ngɛ mɔde bɔe wawɛɛ konɛ ma gbe yayami su nɛ ngɛ ye mi ɔ lo, aloo ye je mi bami ngɛ puɛe? Ke i kɛ Internet ɔ ngɛ ní tsue, nɛ je mi bami yaya ní peepee ko je kpo ngɛ nɔ ɔ, anɛ i gbeɔ aloo i hlaa hehi nɛ je mi bami yaya he ní peepeehi ngɛ ɔ mohu nɛ i yaa lejɛ ɔ?’ Ke waa kɛ Mawu Munyu ɔ mi ga womi tsu ní ɔ, lɔɔ maa ye bua wɔ konɛ “waa hi hɛ ngmengmle, nɛ wa hɛ mi nɛ ka si.”—1 Tes. 5:6-8.

12, 13. (a) Mɛni ji “nɔ dlami,” nɛ mɛni blɔ nɔ wa maa gu kɛ kase Yesu ngɛ enɛ ɔ blɔ fa mi? (b) Ke wa ngɛ hlae nɛ wa ‘dla’ waa kɛ nihi wa kpɛti ɔ, mɛni munyu e sɛ kaa waa tu?

¹² Nɔ́ nɛ Hela munyu nɛ a tsɔɔ sisi ke “nɔ dlami” ɔ tsɔɔ tutuutu ji, “nɛ o ma ha nɛ nɔ́ ko maa hi, e maa da, e maa pee kpakpa ekohu.” Be komɛ ɔ, e sa nɛ waa bɔ mɔde nɛ wa dla waa kɛ nihi wa kpɛti pɛhi. Kaa nɔ hyɛmi nɔ́ ɔ, Yuda jami nya dali ɔmɛ tu munyu kɛ si Yesu kaa e jeɔ mi mi jɔmi kpo kɛ haa “tó tsuli kɛ yayami peeli.” Yesu ha mɛ heto ke: ‘Nihi nɛ ngɛ he wami ɔ, tsopatsɛ he hia we mɛ. Nyɛɛ ya nɛ nyɛ ya hla ngmami nɛ ɔ sisi: “Mɔbɔ nami i ngɛ hlae se pi bɔ sami!”’ (Mat. 9:11-13) E to e tsui si nɛ e kɛ mi mi jɔmi tsɔɔ mɛ tsuo Mawu Munyu ɔ nya. Enɛ ɔ he ɔ, he si bali ɔmɛ ba le Yehowa kaa e ji ‘Mawu mɔbɔ nalɔ, kɛ dloolɔ, e mi mi fu we mla, nɛ e suɔmi kɛ anɔkuale yemi hiɛ babauu.’ (2 Mose 34:6) Enɛ ɔ ha nɛ nihi fuu nɛ a baa a he si ɔ he sane kpakpa a ye.

¹³ Yesu nɔ hyɛmi nɔ́ ɔ tsɔɔ wɔ bɔnɛ wa ma plɛ kɛ ye bua nihi ha. Blɔ tsɔɔmi nɛ ngɛ 2 Timoteo 3:16 tsɔɔ we kaa ke wa ngɛ hlae nɛ wa dla waa kɛ nihi wa kpɛti ɔ, waa kɛ mɛ nɛ tu munyu kɛ abofu. Ngmami ɔ ha we wɔ he blɔ kaa ke waa kɛ nihi ngɛ munyu tue ɔ, wa ko susu a he numi he. Ke waa kɛ nihi tuɔ munyu nɛ wa kɔɛ wa lilɛ  mi ɔ, wa munyu ma nyɛ maa ye mɛ “awi kaa klaate.”—Abɛ 12:18.

14-16. (a) Ke nihi ngɛ nyagba ko ɔ, mɛni blɔ nɔ asafo mi nikɔtɔmahi maa gu kɛ ‘dla’? (b) Mɛni heje nɛ e hia nɛ fɔli nɛ a da Ngmami ɔ nɔ kɛ ‘dla’ níhi ngɛ a weku ɔ mi ɔ?

¹⁴ Lɛɛ mɛni blɔ nɔ wa maa gu konɛ waa kɛ tsui si tomi kɛ mi mi jɔmi nɛ ‘dla’ waa kɛ nihi wa kpɛti mɔ? Ngɔɔ lɛ kaa nyɛmi ko kɛ e yo a pɔɔ pɛmi, nɛ a ya na asafo mi nɔkɔtɔma ko konɛ e ye bua mɛ. Mɛni asafo mi nɔkɔtɔma a maa pee? E be a ti nɔ ko se fie, mohu ɔ, e kɛ mɛ ma nyɛ ma susu Baiblo sisi tomi mlaahi a he, eko ɔ, ní nɛmɛ nɛ je kpo ngɛ The Secret of Family Happiness womi ɔ yi 3 ɔ mi ɔ. Be mi nɛ asafo mi nɔkɔtɔma a kɛ mɛ ngɛ sisi tomi mlaa nɛ ɔmɛ a he susue ɔ, huno ɔ kɛ e yo ɔ ma nyɛ ma yɔse kaa e sa nɛ a pee tsakemi komɛ ngɛ a si himi mi. Pee se ɔ, asafo mi nɔkɔtɔma a ma nyɛ ma bi mɛ ni enyɔ ɔmɛ kaa níhi ngɛ hie lo, nɛ ke e he hia kaa e ya nɔ nɛ e ye bua mɛ ɔ, e maa ya nɔ maa pee jã.

 ¹⁵ Mɛni blɔ nɔ fɔli maa gu kɛ ye bua a bimɛ konɛ a pee níhi nɛ da? Ngɔɔ lɛ kaa o ngɛ hlae maa ye bua o biyo ko nɛ e ye jeha 13 kɛ yaa, se e yi jeha 20 lolo konɛ e ko bɔ huɛ yaya. Kekleekle ɔ, e sa nɛ o le nihi nɛ e kɛ mɛ bɔɔ. Lɔɔ se ɔ, ke o na kaa nihi nɛ e kɛ mɛ bɔɔ ɔ ma nyɛ ma puɛ lɛ ɔ, o ma nyɛ maa tu munyu kɛ tsɔɔ lɛ, o kɛ lɛ pɛ. O ma nyɛ maa da otihi nɛ ngɛ womi nɛ ji, Questions Young People Ask—Answers That Work, Kpo 2 ɔ mi ɔ nɔ kɛ ye bua lɛ. Lɔɔ se ɔ, e sa nɛ o ná deka kɛ ha lɛ. O ma nyɛ maa hyɛ bɔnɛ e peeɔ e ní ha ke e ngɛ fiɛɛmi tso mi aloo ke e kɛ weku ɔ ngɛ a hɛja jee. Ke o to o tsui si nɛ o je mi mi jɔmi kpo kɛ ha lɛ ɔ, e maa na kaa o susuɔ e he. Atsinyɛ jemi ko be he kaa lɔɔ maa wo lɛ he wami konɛ e bu ga womi nɛ o kɛ haa lɛ ɔ tue, konɛ e pee juɛmi nɛ da ngɛ e si himi mi.

¹⁶ Jã nɔuu kɛ̃ nɛ ke wa toɔ wa tsui si nɛ wa jeɔ mi mi jɔmi kpo ɔ, wa ma nyɛ maa wo nihi nɛ hiɔ ngɛ mɛ haoe, aloo nihi nɛ a  nítsumi puɛ nɛ a ngɛ tsui yee, aloo nihi nɛ a nui Ngmami ɔ mi tsɔɔmi komɛ a sisi ɔ he wami. Ke waa kɛ Mawu Munyu ɔ ‘dla’ níhi ɔ, wa náa he se ngɛ blɔhi fuu a nɔ.

17. Mɛni heje nɛ e sa nɛ waa kɛ bua jɔmi nɛ kplɛɛ tsɔsemi nɔ ɔ?

¹⁷ “Be mi nɛ a ngɛ nɔ ko tsɔsee ɔ, bua jɔmi be mi; e dɔɔ lɛ wawɛɛ.” Se kɛ̃ ɔ, ‘pee se ɔ, e naa he se; e yeɔ dami sane, nɛ enɛ ɔ he ɔ, e hii si ngɛ he jɔmi mi.’ (Heb. 12:11) Kristofoli fuu nɛ a wa a tsɔɔ kaa a ná tsɔsemi nɛ a fɔli nɛ a ji Odasefoli kɛ ha mɛ ɔ he se. Nɛ ke Yehowa gu asafo mi nikɔtɔmahi a nɔ kɛ tsɔse wɔ ɔ, lɔɔ maa ye bua wɔ nɛ waa ya nɔ nɛ waa nyɛɛ wami blɔ ɔ nɔ.—Abɛ 4:13.

18, 19. (a) Ke asafo mi nikɔtɔmahi suɔ nɛ a tsɔse nɔ ko nɛ e “ba e je mi saminya” a, mɛni heje nɛ ga womi nɛ ngɛ Abɛ 18:13 ɔ he hia wawɛɛ ɔ? (b) Ke asafo mi nikɔtɔmahi je mi mi jɔmi kɛ suɔmi kpo kɛ tsɔɔ yayami peelɔ ko ɔ, behi fuu ɔ, mɛni jeɔ mi kɛ baa?

¹⁸ E biɔ ga lemi loko nɔ ko ma nyɛ ma tsɔse nɔ ko saminya. Yehowa de Kristofoli kaa a tsɔse nihi konɛ a ‘ba a je mi saminya.’ (2 Tim. 3:16) Enɛ ɔ he ɔ, e sa nɛ wa ha nɛ Baiblo sisi tomi mlaahi nɛ kudɔ wɔ. Sisi tomi mlaa nɛ ɔ eko je kpo ngɛ Abɛ 18:13 ɔ. E de ke: “Ke a ngɛ mo munyu tue ɔ, bu tue loko o ha heto. Ke o pee we jã a, a ma tsɛ mo kuasia, nɛ o hɛ mi ma pue si.” Enɛ ɔ he ɔ, loko asafo mi nikɔtɔmahi kɛ nɔ ko nɛ a po e nya kaa e pee yayami nɛ hɛdɔ ngɛ he maa tu munyu ɔ, e sa nɛ a hla sane ɔ mi fitsofitso loko a pee jã. (5 Mose 13:14) Ja nikɔtɔma amɛ pee jã loko a ma nyɛ ma tsɔse nɔ ɔ nɛ e ‘ba e je mi saminya.’

¹⁹ Jehanɛ se hu ɔ, Mawu Munyu ɔ fã asafo mi nikɔtɔmahi kaa a tsɔse nihi kɛ “mi mi jɔmi.” (Kane 2 Timoteo 2:24-26.) Ngɛ anɔkuale mi ɔ, nɔ ko ma nyɛ ma ha nɛ a gbe Yehowa he guɛ nɛ e ye ni kpahi awi mohu lɛɛ, se kɛ̃ ɔ, ke asafo mi nɔkɔtɔma ko kɛ abofu wo nɔ ɔ ga a, lɔɔ be nɔ ɔ ye buae. Se ke asafo mi nikɔtɔma amɛ kase ‘Mawu mi mi jɔmi’ ɔ, lɔɔ ma nyɛ maa wo nɔ nɛ pee yayami ɔ he wami nɛ e tsake e tsui.—Rom. 2:4.

20. Mɛni sisi tomi mlaahi nɛ e sa kaa fɔli nɛ a kɛ tsu ní ke a ngɛ a bimɛ tsɔsee?

²⁰ Ja fɔli kɛ Baiblo sisi tomi mlaahi tsu ní loko a ma nyɛ ma tsɔse a bimɛ nɛ maa ‘sa Yehowa hɛ mi.’ (Efe. 6:4) Ke nɔ ko po jokuɛ ko nya kɛ ha e tsɛ kaa jokuɛ ɔ pee nɔ́ ko nɛ hí ɔ, e sa kaa tsɛ ɔ nɛ hla sane ɔ mi fitsofitso loko ke e he hia kaa e gbla e tue ɔ nɛ e pee jã. E sɛ nɛ Kristofoli kɛ abofu nɛ nya wa nɛ pee a ní ngɛ weku ɔ mi. Yehowa “mi mi jɔ, nɛ e naa mɔbɔ,” enɛ ɔ he ɔ, e sa kaa nihi tsuo nɛ e ji a blɔ nya kaa a ma tsɔse jokuɛwi ɔ nɛ a je su nɛ ɔmɛ kpo.—Yak. 5:11.

21, 22. Ke o kane La 119:97-104 mɛni munyuhi ngɛ lejɛ ɔ nɛ tsɔɔ bɔnɛ o bua jɔɔ Yehowa Munyu ɔ he ha?

²¹ Be ko ɔ, Mawu sɔmɔlɔ ko tsɔɔ nɔ́ heje nɛ e suɔ Yehowa mlaa a. (Kane La 119:97-104.) Akɛnɛ e kase Yehowa mlaa a heje ɔ, e ná nile, níhi a se yomi, kɛ níhi a sisi numi. Mawu Munyu ɔ mi ga womi nɛ e kɛ tsu ní ɔ ye bua lɛ nɛ e pee we tɔmihi nɛ nihi peeɔ ɔ. E bua jɔ Mawu Munyu ɔ kasemi he nɛ lɔɔ ha nɛ e tsui nɔ e mi. E mwɔ e yi mi kpɔ kaa e kɛ Mawu mlaa a ma tsu ní ngɛ e wami si himi mi tsuo.

²² Anɛ o buɔ Baiblo ɔ kaa nɔ́ ko nɛ he jua wa lo? Baiblo ɔ ma nyɛ maa ye bua mo konɛ o ná hemi kɛ yemi kaa Mawu yi mi tomi ɔ maa ba mi. E mi ga womi ɔ ma nyɛ maa bu o he konɛ o ko pee yayami nɛ gbenɔ ma nyɛ maa je mi kɛ ba. Ke o kɛ Baiblo ɔ tsu ní saminya a, o ma nyɛ maa ye bua nihi konɛ a nyɛɛ wami blɔ ɔ nɔ daa. Nyɛ ha nɛ waa kɛ “ngmami tsuaa ngmami” nɛ ngɛ Baiblo ɔ mi ɔ nɛ tsu ní, nɛ waa ya nɔ nɛ wa sɔmɔ wa Mawu nɛ ji Yehowa, nɛ e ngɛ suɔmi kɛ nile pe nɔ tsuaa nɔ ɔ.