1. ?From wanem yumi mas trastem Baebol fulwan?

BIFO we wan Baebol stadi i stat blong prij, hem i mas bilif se Baebol i tok blong God. Long olgeta samting we yumi mekem mo yumi talem, yumi mas soemaot se yumi trastem Baebol. Taem yumi trastem Baebol fulwan mo yumi yusum gud long wok blong prij, yumi save givhan long ol man blong oli save Jehova, nao oli save kasem laef we i no save finis.

2. ?From wanem yumi mas holemstrong long ol samting we yumi lanem long Baebol?

² Aposol Pol i talemaot klia se Tok blong God i impoten tumas. Hem i talem long Timoti se: “Yu mas holemstrong ol samting ya we mifala i tijim yu long hem.” “Ol samting” ya i minim ol trutok blong Baebol we oli pulum Timoti blong i bilif long gud nius. Ol samting we yumi lanem long Baebol, oli save mekem se yumi tu yumi gat strong bilif. Baebol i save givhan long yumi blong yumi “waes, . . . blong God i save sevem” yumi. (2 Tim. 3:14, 15) Pol i talem wan narafala samting we i soemaot se Baebol i kamaot long God. ?Be wanem narafala samting we yumi save lanem long ol tok blong 2 Timoti 3:16? (Ridim.) Bambae yumi tokbaot wanwan haf blong vas ya, olsem nao yumi save trastem moa se olgeta tijing blong Jehova oli stret.—Sam 119:128.

3-5. (1) ?Wanem i hapen afta we Pita i givim wan tok long dei blong Pentekos, mo from wanem? (2) ?From wanem plante man long Tesalonaeka oli bilif long trutok? (3) ?Plante man tede oli sapraes long wanem samting?

³ Jisas i talem long ol laen blong Isrel se: “Bambae mi sanem ol profet mo ol waes man mo ol tija blong Loa oli kam long yufala.” (Mat. 23:34) Long vas ya, Jisas i stap tokbaot ol disaepol blong hem. Hem i tijim olgeta blong oli yusum Baebol long wok blong prij. Long Pentekos long yia 33, aposol Pita i givim wan tok long wan bigfala hip blong ol man long Jerusalem. Hem i talem sam tok we i kamaot long ol vas long Hibru haf blong Baebol. Taem ol man oli harem Pita i eksplenem ol  vas ya, plante long olgeta oli harem nogud tumas from ol nogud samting we oli bin mekem. Ale, oli tanem tingting blong olgeta from ol sin blong olgeta, mo oli askem long God blong i fogivim olgeta. Long dei ya, samwe tri taosen man oli kam Kristin.—Wok 2:37-41.

⁴ Aposol Pol i stap talemaot gud nius long ol ples afsaed long Jerusalem. Eksampol blong hem i save tijim yumi. Taem hem i stap long Masedonia, long taon ya Tesalonaeka, hem i toktok long ol man Isrel we oli stap mekem wosip long haos prea blong olgeta. Nao long tri Sabat dei, Pol wetem ol man ya oli stap “mekem plante toktok from ol tok blong Baebol.” Hem i pruvum long olgeta se Mesaea bambae i mas harem nogud long bodi blong hem gogo i ded, mo God bambae i mekem hem i laef bakegen. Ale, sam man Isrel mo plante man Gris oli kam Kristin.—Wok 17:1-4.

⁵ Plante man tede oli sapraes blong luk olsem wanem yumi naf blong yusum Baebol long wok blong prij. Tu Kristin sista long Swiselan, tufala i stap prij. Wan long tufala i ridim wan vas blong Baebol long man we tufala i prij long hem. Mo man ya i wantem save se sista ya i joen long wanem jos. Ale, sista ya i talem se tufala i Witnes blong Jehova. Man ya i talem se hem i sud luksave samting ya finis, from we ol Witnes blong Jehova nomo oli stap go long ol haos wanwan, mo oli ridim Baebol long ol man.

6, 7. (1) ?Olgeta we oli givim ol tok long miting, oli save yusum gud Baebol olsem wanem? (2) ?From wanem i impoten blong yusum gud Baebol, taem yumi stadi wetem wan man?

⁶ ?Yumi save mekem wanem blong yumi yusum gud Baebol blong tijim narafala? Sipos yu mas givim wan pablik tok, no sam narafala tok long miting, i gud yu yusum ol vas we oli stret long tok blong yu. Yu mas ridim ol vas stret long Baebol i bitim we yu talem nomo, no yu ridim long wan pepa. Yu mas askem long ol man we oli lesin blong oli yusum Baebol blong olgeta tu. Yu eksplenem mining blong ol vas mo olsem wanem ol vas ya oli save givhan long olgeta blong oli fren gud wetem Jehova. Yu mas yusum taem ya blong tokbaot Tok blong God, i bitim we yu talem ol pijatok we oli had blong man i kasem save long olgeta, no we oli blong mekem man i laf nomo.

⁷ ?Yumi mas tingbaot wanem, taem yumi stap tijim ol Baebol stadi blong yumi? Taem yumi stadi wetem wan man, yumi mas talem long hem blong i ridim ol vas we oli raetem i stap long buk. Biaen, yumi mas eksplenem ol vas ya. Be taem yumi stap mekem olsem, yumi no mas toktok tumas. Yumi mas askem long Baebol stadi tu blong i talemaot tingting blong hem. Yumi mas askem ol gudfala kwestin we oli save givhan long hem blong i kasem save long wanem we Baebol i tijim. Hemia i gud moa i bitim we yumi talem samting we hem i mas bilif long hem, mo samting we hem i mas mekem. *

8. ?Wanem samting we Pol i mas faet agensem?

⁸ Ol elda long kongregesen oli gat wok ya blong blokem no stretem olgeta we oli stap mekem sin. (1 Tim. 5:20; Taetas 1:13) Be yumi nidim tu blong stretem yumi wan. Pol i wan gudfala Kristin we tingting blong hem i klin gud. (2 Tim. 1:3) Be nating se i olsem, Pol i mas faet agensem sin we i stap long hem. Hem i talem se: “Mi luk we rabis fasin ya, we i stap wok long laef blong mi, hem i narafala. Hem i agens long Loa ya, we long tingting blong mi, mi glad tumas long hem. Fasin ya i stap mekem mi, mi olsem slef blong fasin blong sin.” Bambae yumi tokbaot samting we Pol i mekem, blong hem i save faet agensem slak fasin blong hem.—Ridim Rom 7:21-25.

9, 10. (1) ?Wanem slak fasin we maet Pol i gat? (2) ?Pol i mekem wanem blong hem i save winim slak fasin blong hem?

⁹ Pol i no talem wanem kaen slak fasin we hem i gat, be hem i talem se bifo, hem i “stap tok nogud” long ol narafala. (1 Tim. 1:13) Bifo we Pol i kam wan Kristin, hem i mekem i nogud tumas long ol Kristin. Hem i talem se hem i “kros tumas  long olgeta.” (Wok 26:11) Pol i lanem blong bos long kros blong hem, be maet hem i mas wok had yet blong bos long tingting blong hem mo long ol toktok blong hem. (Wok 15:36-39) ?Wanem i givhan long hem blong mekem olsem?

¹⁰ Long fas leta we Pol i raetem i go long ol Kristin long Korin, hem i eksplenem samting we hem i mekem, blong hem i gohed blong stretem hem wan. (Ridim 1 Korin 9:26, 27.) Hem i wok strong blong winim slak fasin blong hem. I klia se Pol i lukaot ol advaes long Baebol, hem i prea long Jehova blong i halpem hem blong hem i save folem ol advaes ya long laef blong hem, mo hem i traehad blong obei long ol advaes ya. * Eksampol blong Pol i save givhan long yumi from we yumi tu, yumi mas faet agensem ol slak fasin blong yumi.

11. ?Yumi save mekem wanem blong yumi “luklukgud long laef” blong yumi?

¹¹ Yumi no mas ting se yumi save stop blong faet agensem ol slak fasin blong yumi. Yumi mas “luklukgud long laef” blong yumi blong faenemaot sipos yumi stap gohed gud long trutok no nogat. (2 Kor. 13:5) Taem yumi ridim ol vas olsem Kolosi 3:5-10, yumi save askem ol kwestin olsem: ‘?Mi mi stap wok had blong faet agensem slak fasin blong mi? ?No mi stap laekem ol samting we Jehova i talem se oli rong? Sipos mi stap lukluk Intenet, nao wantaem nomo wan narafala Websaet i kamaot we i gat rabis pija long hem, ?bambae mi kamaot kwiktaem long Websaet ya, no bambae mi gohed blong lukluk?’ Sipos yumi tingbaot olsem wanem blong folem ol advaes blong Baebol long laef blong yumi, yumi save stap “wekap, we hed blong yumi i klia gud.”—1 Tes. 5:6-8.

12, 13. (1) ?Tok ya “stretem ol krangke fasin” i minim wanem? ?Yumi save mekem wanem blong folem eksampol blong Jisas? (2) ?Sipos yumi wantem stretem wan samting, yumi no mas talem wanem toktok?

¹² Taem Baebol i tokbaot “stretem ol krangke fasin,” hem i min se man i mekem gud wan samting no i stretem wan samting. Samtaem yumi mas stretem wan samting, taem narafala i no kasem save long samting we yumi talem no yumi mekem. Yu traem tingbaot ol lida blong skul blong ol man Jiu. Olgeta oli stap komplen taem oli luk we Jisas i kaen long “ol man blong tekem mane blong takis, mo ol man nogud.” Jisas i stretem olgeta taem hem i talem se: “Man we i no sik, hem i no nidim dokta, be man we i sik, yes, hem i nidim dokta. I gud yufala i go lanem mining blong tok ya blong Baebol we God i talem se, ‘Mi mi no wantem fasin ya we man i stap kilim anamol blong mekem sakrefaes long mi, mi mi wantem we oltaem man i gat sore long man.’” (Mat. 9:11-13) Mo tu, Jisas i stretem tingting we ol man oli gat long saed blong God se hem i hu. Jisas i gat longfala tingting taem hem i tijim ol man. Mo hem i tok kaen long ol man taem hem i talem se Jehova i gat ‘sore long man, mo hem i stap givhan long man long gladhat blong hem. Hem i no save kros kwik. Oltaem hem i stap lavem man mo oltaem hem i stap holemstrong promes blong hem.’ (Eks. 34:6) Ale from samting ya, plante man oli bilif long gud nius.

¹³ Yumi mas folem fasin blong Jisas taem yumi stap givhan long ol narafala. Ol tok blong 2 Timoti 3:16, oli no min se yumi mas tok nogud long ol narafala taem yumi wantem stretem wan samting. Baebol i no givim raet long yumi blong tok nogud long wan man be yumi no tingbaot filing blong hem. Sipos yumi tok nogud long wan man, toktok blong yumi i olsem “naef blong faet.” Bambae yumi mekem man ya i harem nogud mo bambae yumi no givhan long hem nating.—Prov. 12:18.

14-16. (1) ?Ol elda oli save mekem wanem blong stretem wan samting, taem oli stap givhan long narafala? (2) ?From wanem i impoten we ol papa mama oli yusum Baebol blong stretem ol samting insaed long famle?

¹⁴ Taem yumi yusum Baebol blong stretem wan samting, ?yumi save mekem wanem blong yumi gat longfala tingting mo yumi kaen? Yu traem tingbaot wan man mo woman blong hem  we tufala i stap raorao oltaem. Ale, tufala i go luk wan elda blong i givhan long tufala. Elda ya bambae i no tekem saed blong wan long tufala, mo bambae hem i no talem prapa tingting blong hem long problem blong tufala. Be, hem i yusum ol advaes blong Baebol blong givhan long tufala blong tufala i no moa raorao. Maet hem i yusum ol rul blong Baebol we oli stap long japta 3 blong buk ya Spesel Rod Blong Mekem Famle i Hapi. Taem oli stap tokbaot ol rul ya, maet man ya mo woman blong hem, tufala i luksave se tufala i nidim blong mekem sam jenis. Samtaem biaen, elda ya bambae i askem long tufala sipos tufala i no moa raorao. Biaen, sipos i nidim, bambae hem i givim sam moa advaes long tufala.

 ¹⁵ ?Ol papa mama oli save mekem wanem blong stretem wan samting wetem pikinini blong olgeta? Yu traem tingbaot se yangfala gel blong yu i gat wan niufala fren. Be yu yu ting se niufala fren ya, hem i mekem sam desisen we oli no stret. Fastaem, yu mas traem save gud fren ya. Biaen, sipos yu stap wari yet long gel blong yu, i gud yu toktok wetem hem. Yu save yusum ol rul blong Baebol we oli stap long buk ya Ol Kwestin We Ol Yangfala Oli Askem—Ol Ansa We Oli Wok Gud. Biaen yu mas meksua se yu spenem moa taem wetem hem. I gud yu lukluk ol fasin we hem i soemaot taem hem i stap long wok blong prij, mo taem hem i stap wetem famle. Sipos yu gat longfala tingting mo yu toktok wetem gel blong yu long kaen fasin, bambae hem i save se yu yu lavem hem mo yu tingbaot hem. Ale, samting ya bambae i givhan long hem blong i folem ol advaes we yu givim long saed blong ol fren blong hem. Mo bambae hem i no mekem ol desisen we oli no waes.

¹⁶ ?Hu ol narafala we oli nidim se yumi givhan long olgeta? Hemia olgeta we oli wari from oli sik, oli lusum wok, no oli no kasem save long sam tijing blong Baebol. Yumi mas gat longfala tingting mo yumi toktok long kaen fasin, taem yumi stap givhan long olgeta. Yumi evriwan i save kasem plante blesing, taem yumi yusum Baebol blong stretem sam samting.

17. ?From wanem yumi mas glad taem narafala i stretem yumi?

¹⁷ Baebol i talem se taem narafala i stretem yumi, samting ya i no mekem yumi harem gud. Mo samtaem, yumi harem se i had blong akseptem, taem narafala i stretem yumi. Be sipos yumi akseptem, mo yumi folem ol advaes long laef blong yumi, samting ya i save mekem yumi stret gud long fes blong God. (Hib. 12:11) Plante yangfala Kristin we oli gruap long trutok, oli talem se samting we i givhan long olgeta hemia taem papa mama blong olgeta i stretem olgeta. Mo taem ol elda oli stretem yumi, samting ya i save mekem yumi stap long rod ya blong laef.—Prov. 4:13.

18, 19. (1) ?From wanem i impoten we ol elda oli folem advaes blong Ol Proveb 18:13, taem oli stretem narafala? (2) ?Sipos ol elda oli stretem wan Kristin wetem lav mo fasin we i kwaet, maet Kristin ya i mekem wanem?

¹⁸ ?Wanem i save givhan long ol elda mo ol papa mama blong oli stretem narafala long fasin we i stret? Jehova i talem se yumi mas stretem narafala long “stret fasin.” (2 Tim. 3:16) Hemia i min se yumi mas yusum ol rul blong Baebol, taem yumi stretem narafala. Wan impoten rul blong Baebol i stap long Ol Proveb 18:13 we i talem se: “Yu mas lesin long tok blong ol man fastaem, nao biaen bambae yu save givim ansa long olgeta. Sipos no, fasin ya i soemaot we yu yu no gat hed, mo bambae yu sem bigwan from.” Taswe, sipos wan man i talem se wan brata no wan sista i mekem wan bigfala sin, ol elda oli mas traem save gud fastaem long saed blong bisnes ya, bifo we oli stretem Kristin ya. (Dut. 13:14) Olsem nao, oli save stretem hem long “stret fasin.”

¹⁹ Baebol i talem tu se ol elda oli mas stretem ol narafala wetem “fasin we i kwaet nomo.” (Ridim 2 Timoti 2:24-26.) I tru se taem wan Kristin i mekem sin, ol narafala oli save tingting nogud long saed blong Jehova. Mo maet fasin blong Kristin ya i mekem ol narafala oli kros long hem. Sipos wan elda i kros taem hem stap givim advaes long Kristin ya, bambae elda ya i no save givhan long hem nating. Be sipos elda ya i folem fasin blong God mo i toktok kaen, maet Kristin ya i tanem tingting blong hem.—Rom 2:4.

20. ?Wanem ol rul blong Baebol we ol papa mama oli mas folem, taem oli stretem pikinini blong olgeta?

²⁰ Ol Kristin papa mama tu oli mas folem ol rul blong Baebol, taem oli stap stretem pikinini blong olgeta. (Efes. 6:4) Sipos wan man i talem long wan papa se boe blong hem i mekem wan samting we i no stret, ?papa ya i mas mekem wanem? Papa ya i mas meksua se hem i save evri samting, bifo we hem i panisim boe blong hem. Mo ol narafala long famle oli no mas kros tumas nao oli kilim boe ya. “Hae God i kaen tumas, mo hem i gat sore long man,” mo ol papa mama oli mas folem eksampol blong hem taem oli stretem pikinini blong olgeta.—Jem. 5:11.

21, 22. ?Taem yu ridim Ol Sam 119:97-104, wanem tok we i soemaot tingting we yu gat long Baebol?

²¹ Wan man blong wok blong Jehova bifo, i tokbaot from wanem hem i lavem ol loa blong Jehova. (Ridim Ol Sam 119:97-104.) Taem hem i stadi Baebol, hem i kam waes mo hem i kasemsave long ol dip save blong Baebol. Taem hem i folem ol rul blong Baebol, samting ya i givhan long hem blong i no mekem plante mastik we ol narafala oli mekem. Hem i glad tumas taem hem stadi long Baebol. Mo taem hem i folem ol advaes blong Baebol, samting ya i mekem i gud long hem. Hem i gat strong tingting blong folem loa blong God long olgeta laef blong hem.

²² ?Yu yu luk Baebol se hem i wan sas samting? Baebol i save givhan long yumi blong yumi gat strong bilif long ol samting we Jehova bambae i mekem. Ol advaes blong Jehova long Baebol, oli givhan long yumi blong yumi no mekem sin we i save lidim yumi blong yumi ded. Yumi save yusum Baebol blong givhan long ol narafala blong stap long rod ya we i go kasem laef. Yumi mas gohed blong yusum Baebol long ol defren rod ya, taem yumi stap mekem wok blong Jehova, God ya blong yumi we i waes mo i lavem yumi.