Ed ou menm ek lezot par servi Parol Bondye

“Mon’n konsider tou ou bann lord konsernan tou keksoz konman drwat.”​—PS. 119:128.

KI OU POU REPONN?

Ki mannyer ou kapab servi byen Labib ler ou pe ansenny lezot?

Ki Pol ti oule dir kan i ti servi sa lekspresyon “remet drwat”?

Ki i vedir pour bann ansyen ek paran ‘disiplin avek lazistis’?

1. Akoz nou devret annan konfyans total dan Parol Bondye?

KAN bann ansyen pe vwar si en etidyan Labib i kalifye pour vin en proklanmater, zot demann zot lekor, ‘Eski sa dimoun i montre ki i krwar Labib i Parol enspire Bondye?’ * Pour en dimoun ki anvi vin en proklanmater, an tou ka, pour tou serviter Bondye, larepons sa kestyon i devret klerman wi. Akoz? Nou konfyans dan Parol Bondye e nou abilite pour servi Labib dan predikasyon pou ed nou ed lezot aprann lo Zeova e ganny sove.

2. Akoz nou devret ‘reste ferm dan sa ki nou’n aprann’?

² Zapot Pol ti met lanfaz lo lenportans Parol Bondye kan i ti ekrir Timote: “Reste ferm dan sa ki ou’n aprann, e dan sa ki ou’n vreman krwar.” “Sa ki ou’n aprann” ki Pol ti mansyonnen i bann laverite dan Labib ki ti pous Timote pour met lafwa dan sa bon nouvel. Sa bann laverite in annan menm lefe lo nou ozordi, e zot kontinyen ed nou ganny “lasazes ki kondir dan lavi eternel.” (2 Tim. 3:14, 15) Souvandfwa nou servi sa verse ki swiv pour montre lezot ki Labib i sorti kot Bondye, me an menm tan nou kapab ganny en lot byenfe atraver sa parol dan 2 Timote 3:16. (Lir.) Annou egzamin sa verse pli an detay. Ler nou fer sa, nou konfyans ki tou lansennyman Zeova i “drwat” pou vin pli for.​—Ps. 119:128.

“ITIL POUR ANSENNYEN”

3-5. (a) Ki mannyer lafoul ti reazir apre diskour Pyer zour Lapannkot e akoz? (b) Akoz bokou dimoun Tesalonik ti aksepte laverite? (c) Kwa ki kapab enpresyonn dimoun ozordi konsernan nou predikasyon?

³ Zezi ti dir nasyon Izrael: “Mon pou anvoy zot bann profet, bann saz ek bann [“ansenyan ki ansenny an  piblik,” NW].” (Mat. 23:34) Zezi ti pe koz lo son bann disip ki li menm i ti’n ansennyen konman pour servi Lekritir dan predikasyon. Zour Lapannkot lannen 33 N.L., zapot Pyer, enn parmi sa bann “ansenyan ki ansenny an piblik” ti fer en diskour avek en gran lafoul Zerizalenm kot i ti sit plizyer verse dan Lekritir Ebre. Kan zot ti tann laplikasyon sa bann verse, bokou ti “trouble en kantite.” Zot ti repantir, e apepre trwa mil zot ti demann Bondye pardon pour zot pese e zot ti vin Kretyen.​—Akt 2:37-41.

⁴ Zapot Pol, en lot ansenyan ki ti ansenny an piblik, ti pres bon nouvel dan bann landrwa pli lwen ki Zerizalenm. Par egzanp, dan lavil Tesalonik Masedwann, i ti koz avek bann ki ti pe ador Bondye dan sinagog. Pandan trwa Saba, Pol ti “diskit lo Lekritir avek bann dimoun ki ti la. I ti eksplik zot e montre ki dapre Lekritir Mesi ti bezwen soufer e resisite apre son lanmor.” Avek ki rezilta? “Serten [Zwif] parmi zot ti krwar parol Pol” e osi “en gran group Grek.”​—Akt 17:1-4.

⁵ Lafason ki bann serviter Bondye i servi Labib ozordi i enpresyonn bokou dimoun. Apre ki en met lakour Laswis ti’n ekout en ser lir Labib, i ti demann li: “Ki ou larelizyon ou?” I ti reponn: “Mwan ek mon zanmi nou Temwen Zeova.” Sa met lakour ti dir: “I pa drol. Apard Temwen Zeova, lekel ankor ki ti pou vin lir Labib avek mwan?”

6, 7. (a) Ki mannyer bann ki ansenyan dan kongregasyon i kapab byen servi Labib? (b) Akoz servi byen Labib dan letid i vreman enportan?

⁶ Ki mannyer nou kapab servi Labib pli byen ler nou ansennyen? Si ou annan sa privilez pour ansenny kongregasyon, servi bann verse spesifik dan Labib. Dan plas eksplik bann verse kle dan ou prop fason, oubyen lir lo en paz enprimen ouswa lekipman elektronik, ouver Labib e lir sa ki ladan e ankouraz lodyans pour fer parey. Anplis ki sa, pran letan pour aplik bann verse dan en fason ki pou ed ou lodyans vin pli pros avek Zeova. Olye servi bann legzanp konplike e bann leksperyans ki zis fer riye, pran letan pour eksplik Parol Bondye.

⁷ Ki nou devret gard antet kan nou pe kondwir en letid Labib? Ler nou servi bann piblikasyon Kretyen, nou bezwen lir bann verse ki ladan e pa oubliye pour ankouraz nou etidyan pour lir bann verse e ed li pour konpran sa bann verse. Ki mannyer nou kapab fer sa? Ankouraz sa etidyan pour eksprim son lekor olye fer sa letid vin konman en gran diskour e donn li en ta lenformasyon. Dan plas dir li ki pour krwar e ki pour fer, demann li kestyon refleksyon pour ki i tir sa bon konklizyon li menm. *

“ITIL . . . POUR KORIZ LERER”

8. Ki lalit Pol ti bezwen fer?

⁸ Souvandfwa nou krwar ki zis bann ansyen ki kapab “koriz lerer.” Anfet, i responsabilite bann ansyen pour ‘reprimann bann ki’n komet en pese.’ (1 Tim. 5:20; Tit 1:13) Me koriz nou prop lerer osi i enportan. Pol ti en Kretyen egzanpler ki ti annan en konsyans kler. (2 Tim. 1:3) Kantmenm sa, i ti ekrir: “Me mon trouv en lot lalwa dan mwan ki lit kont lalwa ki mon lespri i aprouve e ki fer mwan prizonnyen lalwa pese ki dan mwan.” Kan nou konpran konteks sa parol, nou pou pli byen konpran sa lalit ki Pol ti bezwen fer pour kontrol son natir enparfe.​—Lir Romen 7:21-25.

9, 10. (a) Ki febles petet Pol ti bezwen sirmonte? (b) Aparaman ki stratezi Pol ti servi pour lit kont son natir enparfe?

⁹ Ki febles Pol ti lite pour sirmonte?  Kantmenm i pa ti spesifye ki febles, i ti dir Timote ki i ti en “zonm ensolan” oparavan. (1 Tim. 1:13, NW) Avan ki i ti konverti, Pol ti annan en gran lakoler kont bann Kretyen. Konsernan son santiman anver bann Kretyen, i ti ekrir: “Mon ti sitan asarne kont zot.” (Akt 26:11) Pol ti aprann kontrol son lakoler, menm si parler i ti bezwen fer bokou zefor pour kontrol son santiman ek son parol. (Akt 15:36-39) Kwa ki ti ed li reisi?

¹⁰ Kan i ti ekrir bann Kretyen Korent, Pol ti dekrir sa stratezi ki i ti servi pour koriz son lekor. (Lir 1 Korentyen 9:26, 27.) I ti disiplin son natir enparfe par pran bann aksyon sever. I ti rod konsey dan Labib, sipliy Zeova dan lapriyer pour ed li aplik sa bann konsey e fer bokou zefor pour amelyore. * Nou kapab benefisye avek son legzanp parski nou osi nou pe lit kont nou natir enparfe.

11. Ki mannyer nou kapab ‘kontinyen teste’ nou lekor pour vwar si nou pe vreman mars dan semen laverite?

¹¹ Nou toultan devret amelyor nou ladorasyon pour Bondye. Nou bezwen ‘kontinyen teste’ nou lekor pour vwar si nou pe vreman mars dan semen laverite. (2 Kor. 13:5) Kan nou pe lir bann verse parey Kolosyen 3:5-10, nou kapab demann nou lekor: ‘Eski mon pe fer tou zefor pour met a mor mon bann tandans pour fer pese oubyen mon pe vin feb moralman? Kan mon pe servi Internet e en sit imoral i aparet, eski mon deswit sorti lo sa sit oubyen mon annan labitid rod bann sit ki pa apropriye?’ Kan nou aplik konsey Labib dan sa bann sityasyon, sa pou ed nou “reste vizilan e azen.”​—1 Tesa. 5:6-8.

“ITIL . . . POUR REMET DRWAT”

12, 13. (a) Ki nou bi kan nou pe “remet drwat,” e ki mannyer nou kapab swiv legzanp Zezi dan sa domenn? (b) Ki mannyer nou devret koze kan nou pe “remet [keksoz] drwat” avek lezot?

¹² Sa mo Grek ki’n ganny tradwir “remet drwat” i vedir “repar en domaz, koriz bann defo, refer, e remet dan en bon kondisyon.” Parler nou bezwen remet drwat serten keksoz avek lezot akoz zot in mal konpran nou oubyen mal konpran rezon par deryer nou aksyon. Par egzanp, bann sef relizye Zwif ti konplent ki Zezi pa ti devret azir byen anver bann “kolekter taks ek bann ki viv dan pese.” Zezi ti reponn zot: “Dimoun ki an bonn sante pa bezwen dokter, me zis bann ki malad. Al rode ki savedir: ‘Se konpasyon ki mon oule, e pa sakrifis zannimo.’” (Mat. 9:11-13) Avek pasyans ek ladouser, i ti eksplik parol Bondye avek tou dimoun. Alor, bann ki annan limilite ti vwar Zeova konman “en Bondye ki annan mizerikord ek konpasyon, ki pa ankoler vitman, e ki annan en kantite labonte leker ek laverite.” (Egz. 34:6) Gras a tou sa zefor ki Garson Bondye ti fer pour “remet drwat,” bokou in kapab met lafwa dan sa bon nouvel.

¹³ Legzanp Zezi i montre ki mannyer nou devret ed lezot. En dimoun ofanse i kapab dir, ‘War ou, mon pou bezwen remet keksoz drwat avek ou.’ Me, sa fason koze i pa annakor avek sa ki ganny dir dan 2 Timote 3:16. “Tou Lekritir” pa pe dir ki nou devret fer kanmi lezot. Zis parey “bann kou lepe,” ler nou kritik en dimoun severman, sa i zis fer li soufer e i pa anmenn okenn byenfe.​—Prov. 12:18.

14-16. (a) Ki mannyer bann ansyen i kapab ‘remet keksoz drwat’ pour ed lezot regle zot problenm? (b) Akoz ‘remet keksoz drwat’ dapre Labib i vreman enportan kan nou pe elve zanfan?

¹⁴ Ki mannyer nou kapab servi pasyans ek ladouser “pour remet [keksoz] drwat”?  Meton en koup marye i demann en ansyen pour ed zot aret argimante. Ki sa ansyen i kapab fer? San pran okenn kote, i kapab rezonn avek sa koup lo bann prensip Labib, petet par servi sa bann ki dan sapit 3 dan liv Sekre pour en Fanmiy ere. Anmezir sa ansyen i koz avek zot, sa msye ek sa madanm i kapab rekonnet ki konsey sakenn i devret aplike. Apre en serten letan, sa ansyen pou anvi konnen ki mannyer keksoz pe ale dan sa fanmir pour li kapab ofer plis led si i neseser.

¹⁵ Ki mannyer bann paran i kapab ‘remet keksoz drwat’ dan en fason ki i pou fortifye spirityalite zot zanfan? Fer krwar ou anvi ed ou fiy adolesan pour pa fer zanmi avek en dimoun ki kapab en move frekantasyon. Premyerman, ou devret rod laverite. Apre, si ou annan serten dout, ou kapab koz avek ou fiy an servan bann pwen dan liv Questions Young People Ask​—Answers That Work, Volim 2. Dan bann zour ki swiv, ou kapab fer zefor pour pas plis letan avek li. Ou osi kapab obzerv son latitid anver predikasyon oubyen kan zot pe detann an fanmir. Si ou demontre pasyans ek ladouser, ou fiy pou santi ki ou kontan li e enterese avek li. I pou pli motive pour aplik ou konsey e evit maler dan son lavi.

¹⁶ Pareyman, avek pasyans ek ladouser, nou kapab ankouraz bann ki enkyet pour zot lasante, ki tris akoz zot in perdi zot louvraz, oubyen bann ki pa pe konpran serten lansennyman dan Labib. Kan nou servi Parol Bondye ‘pour remet drwat,’ sa i anmenn bokou byenfe pour pep Bondye.

ITIL POUR DISIPLINEN

17. Akoz nou devret pare pour aksepte disiplin?

¹⁷ “Koreksyon i rann malere plito ki donn lazwa, me pli tar, i prodwi fri lape ek  lazistis pour tou bann ki’n ganny disiplinen par li.” (Ebr. 12:11) Laplipar Kretyen adilt i dakor ki disiplin ki zot ti gannyen avek zot paran Kretyen in ed zot. Disiplin ki Zeova i donn nou atraver bann ansyen i gard nou lo semen lavi.​—Prov. 4:13

18, 19. (a) Akoz sa konsey dan Proverb 18:13 i vreman enportan kan pe disiplin avek lazistis? (b) Kan bann ansyen i demontre ladouser ek lanmour anver sa enn ki’n komet pese, ki i kapab arive?

¹⁸ Pa bokou ki annan sa abilite pour disiplin dan en fason efikas. Zeova i dir ki bann Kretyen i devret disiplin avek “lazistis” oubyen ladrwatir. (2 Tim. 3:16) Alor, nou devret servi bann prensip Labib konman nou gid. Enn sa prensip i ganny trouve dan Proverb 18:13 ki dir: “Kan en dimoun pe reponn konsernan en size avan ki i’n ekoute, sa i en enbesilite lo son par e i en imilyasyon pour li.” Alor, kan bann ansyen i bezwen koz avek en dimoun ki’n komet en pese grav, zot bezwen egzamin byen pour konnen kwa ki’n vreman arive. (Det. 13:14) Sa i sel fason ki zot pou kapab disiplin avek “lazistis.”

¹⁹ Deplis, Parol Bondye i demann bann ansyen pour koriz lezot ‘avek ladouser.’ (Lir 2 Timote 2:24-26.) I vre ki en dimoun i kapab anmenn repros lo non Zeova e osi bles santiman en dimoun inosan. Kantmenm sa, en ansyen ki konsey avek lakoler pa anmenn okenn byenfe. Anfet, kan bann ansyen i imit “labonte Bondye,” sa i kapab motiv sa dimoun ki’n fer pese pour repantir.​—Rom. 2:4.

20. Ki prensip bann paran i devret aplike kan pe disiplin zot zanfan?

²⁰ Kan pe elve zot zanfan “dan en ledikasyon ek lenstriksyon Senyer,” bann paran i devret aplik bann prensip Labib. (Efe. 6:4) Par egzanp, ki en papa i kapab fer si en dimoun i dir li ki son garson in fer en keksoz mal? Sa papa i bezwen fer sir ki i konn tou lo sa size avan ki i pini son zanfan. Mazinen ki disiplin avek lakoler napa plas dan en fanmir Kretyen. Labib i dir ki Zeova “i ranpli avek labonte ek konpasyon,” e sa bann ki annan sa responsabilite pour disiplin zot zanfan i devret esey demontre sa bann kalite.​—Zak 5:11.

KADO PRESYE SORTI KOT ZEOVA

21, 22. Ki lekspresyon dan Psonm 119:97-104 ki pli byen dekrir ou santiman anver Parol Zeova?

²¹ Enn fwa, en serviter Bondye ti dir akoz i kontan lalwa Zeova. (Lir Psonm 119:97-104. *) Kan i ti etidye lalwa Bondye, i ti ganny lasazes, bon zizman ek konprenezon. Kan i ti swiv bann prensip, sa ti ed li pour pa fer bann keksoz ki ti pou sagrin lezot. I ti en plezir pour li etidye Lekritir e i ti ganny satisfaksyon. I ti determinen pour obeir sa Bondye ki son lenstriksyon ti anmenn byenfe dan son lavi.

²² Eski ou kontan “tou Lekritir”? Atraver li, ou batir ou lafwa ki Bondye pou akonplir son plan. Son konsey enspire i protez ou kont move lefe pese. Par eksplik li byen, ou kapab ed lezot pour vin e reste lo sa semen ki anmenn ver lavi. Annou servi byen “tou Lekritir” anmezir nou servi Zeova nou Bondye ki ranpli avek lanmour ek lasazes.

[Not anba lo paz]

[Kestyon]

[Portre lo paz 12]

[Portre lo paz 15]

Kan bann paran i servi Labib pour ‘remet keksoz drwat’ avek zot zanfan, sa i ed zot pour evit bann maler dan zot lavi (Vwar paragraf 15)