Nọ Yí Ohó Jiwheyẹwhe Tọn Zan Nado Gọalọna Dewe po Mẹdevo lẹ Po

“Yẹn hia osẹ́n towe gbọn onú lẹpo dali nado yin jijlọ.”—PS. 119:128.

NAWẸ HIẸ NA NA GBLỌNDO GBỌN?

Nawẹ hiẹ sọgan yí Owe-wiwe lẹ zan po azọ́nyinyọnẹn po to whenue hiẹ to nuplọn mẹdevo lẹ gbọn?

Etẹ dọ wẹ Paulu te to whenue e dọho gando “onú lẹ hinhẹn sọgbe” go?

Nawẹ mẹho agun tọn lẹ po mẹjitọ lẹ po sọgan nọ domẹplọnlọmẹgo “to dodowiwa mẹ” gbọn?

1. Naegbọn mí dona tindo jide mlẹnmlẹn to Ohó Jiwheyẹwhe tọn mẹ?

 EYIN mẹho agun tọn lẹ to hodọdopọ hẹ Biblu plọntọ de nado yọnẹn eyin e pegan nado tindo mahẹ to lizọnyizọn kunnudegbe tọn mẹ, yé nọ kanse yede dọ, ‘Be hodidọ mẹlọ tọn lẹ dohia dọ ewọ yise dọ Biblu yin Ohó gbọdo Jiwheyẹwhe tọn ya?’ a Mẹdepope he jlo na lẹzun wẹnlatọ Ahọluduta lọ tọn, podọ na taun tọn, devizọnwatọ Jiwheyẹwhe tọn lẹpo dona yise dọ Biblu yin Ohó Jiwheyẹwhe tọn. Etẹwutu? Eyin mí dejido Ohó Jiwheyẹwhe tọn go bo wleawuna nugopipe lọ nado nọ yí i zan ganji to lizọnyizọn lọ mẹ, mí na gọalọna mẹdevo lẹ nado yọ́n Jehovah bo mọ whlẹngán.

2. Naegbọn mí dona ‘zindonukọn to nuhe mí ko plọn lẹ mẹ’?

² Apọsteli Paulu zinnudo nujọnu-yinyin Ohó Jiwheyẹwhe tọn ji to whenue e kanwehlan Timoti dọmọ: “Zindonukọn to nuhe hiẹ ko plọn bo ko yin linlẹndiọna nado yise lẹ mẹ.” “Nuhe hiẹ ko plọn” he hodọ Paulu te tofi wẹ nugbo Biblu tọn he whàn Timoti nado tindo yise to wẹndagbe lọ mẹ lẹ. Nugbo ehelẹ nọ yinuwado mí ji to aliho dopolọ mẹ to egbehe, podọ yé nọ gọalọna mí nado yin “nuyọnẹntọ na whlẹngán” zọnmii. (2 Tim. 3:14, 15) Mí nọ saba yí hodidọ Paulu tọn he bọdego lẹ zan nado dohia mẹdevo lẹ dọ Biblu yin Ohó gbọdo Jiwheyẹwhe tọn, ṣigba mílọsu sọgan mọaleyi dogọ sọn hodidọ enẹ he tin to 2 Timoti 3:16 mẹ. (Hia.) Mì gbọ mí ni gbadopọnna wefọ enẹ to gigọ́ mẹ. Mọwiwà na gọalọna mí nado hẹn jidide mítọn lodo dọ nuplọnmẹ Jehovah tọn lẹpo wẹ yin “jijlọ.”—Ps. 119:128.

“YIN ALENU NA MẸPINPLỌN”

3-5. (a) Nawẹ gbẹtọgun de yinuwa gando hodidọ Pita tọn to Pẹntikọsti whenu go gbọn, podọ etẹwutu? (b) Naegbọn mẹsusu to Tẹsalonika do kẹalọyi nugbo? (c) Etẹwẹ sọgan hẹn awuji gbẹtọ lẹ to lizọnyizọn mítọn mẹ to egbehe?

³ Jesu dọna akọta Islaeli tọn dọmọ: “Yẹn to yẹwhegán lẹ, nuyọnẹntọ lẹ po nuplọnmẹtọ gbangba tọn lẹ po dohlan  mì todin.” (Mat. 23:34) Jesu to hodọ gando devi etọn lẹ go, mẹhe e ko plọn nado nọ yí Owe-wiwe lẹ zan to lizọnyizọn yetọn mẹ. To Pẹntikọsti owhe 33 W.M., apọsteli Pita, yèdọ dopo to “nuplọnmẹtọ gbangba tọn” ehelẹ mẹ, na hodidọ to gbẹtọgun daho de nukọn to Jelusalẹm bo yihodọ sọn adà voovo Owe-wiwe Heblu tọn lẹ tọn mẹ. To whenue todoaitọ susu sè lehe Pita do yọ́n-na-yizan hodidọ ehelẹ tọn hia do, “e vẹna yé yì ahun mẹ.” Yé lẹnvọjọ sọn ylando yetọn he wayi lẹ mẹ. Nudi gbẹtọ fọtọ́n donu atọ̀n to yé mẹ wẹ biọ jonamẹ Jiwheyẹwhe tọn bo lẹzun Klistiani.—Owalọ 2:37-41.

⁴ Nuplọnmẹtọ gbangba tọn devo wẹ apọsteli Paulu, mẹhe dọyẹwheho wẹndagbe lọ tọn to Jelusalẹm podọ to fisusu devo lẹ. Di dohia, to Tẹsalonika he yin tòdaho Makedonia tọn de, e dọhona mẹhe to sinsẹ̀n-basi to sinagọgu de mẹ lẹ. Paulu “to hoyijlẹdohogo hẹ yé sọn Owe-wiwe lẹ mẹ na gbọjẹzan atọ̀n, bo to zẹẹmẹ basi bosọ to didohia gbọn alọdlẹndonu lẹ dali dọ dandan wẹ dọ Klisti ni jiya bo fọ́n sọn oṣiọ lẹ mẹ.” Etẹwẹ yin kọdetọn lọ? “Delẹ to yé [Ju lẹ] mẹ lẹzun yisenọ” kẹdẹdile “gbẹtọgun daho Glẹkinu lẹ tọn” de wà do.—Owalọ 17:1-4.

⁵ Aliho he mẹ devizọnwatọ Jiwheyẹwhe tọn lẹ nọ yí Biblu zan te to egbehe nọ hẹn awuji mẹsusu. To Suisse, to whenue whétọ de ko dotoaina wefọ he mẹmẹyọnnu mítọn de hia godo, dawe lọ kanse e dọ: “Sinsẹ̀n tẹwẹ mì nọ yì?” Mẹmẹyọnnu lọ gblọn dọmọ: “Yẹn po awetọ ṣie po yin Kunnudetọ Jehovah tọn lẹ.” Dawe lọ dọmọ: “Yẹnlọsu ko lẹnmọ. Gbọnvona Kunnudetọ Jehovah tọn lẹ, mẹdevo tẹwẹ sọgan wá owhé ṣie gbè bo hia Biblu?”

6, 7. (a) Nawẹ mẹhe nọ plọnmẹ to agun mẹ lẹ sọgan yí Biblu zan to aliho dagbe mẹ gbọn? (b) Naegbọn mí dona nọ yí Biblu zan po azọ́nyinyọnẹn po to anadidena plọnmẹ Biblu lẹ whenu?

⁶ Nawẹ mí sọgan yí Biblu zan to gigọ́ mẹ to mẹpinplọn mítọn whenu gbọn? Eyin hiẹ tindo lẹblanulọkẹyi nado plọnmẹ sọn oplò ji to agun mẹ, nọ yí wefọ Biblu tọn tangan lẹ zan. Kakati nado yihodọ sọn wefọ tangan lẹ mẹ poun kavi nado nọ hia yé sọn wema de mẹ kavi sọn nuyizan lẹtliki tọn de mẹ, hùn Biblu lọsu tlọlọ bo hia sọn e mẹ, bo na tuli mẹplidopọ lẹ nado wà nudopolọ. Humọ, nọ yí whenu nado do yọ́n-na-yizan wefọ lọ lẹ tọn hia to aliho he na gọalọna mẹplidopọ lẹ nado dọnsẹpọ Jehovah dogọ mẹ. Kakati nado nọ yí apajlẹ he mayin dandan tọn po numimọ he nọ do nukiko namẹ poun lẹ po zan, nọ yí whenu enẹ zan nado basi zẹẹmẹ he họnwun do Ohó Jiwheyẹwhe tọn ji.

⁷ Etẹwẹ mí dona hẹn do ayiha mẹ to whenue mí to anadena plọnmẹ Biblu lẹ? Dile mí to owe mítọn lẹ yizan, mí dona tin to aṣeji ma nado jo wefọ tangan lẹ do. Mí dona na tuli nuplọntọ lọ nado hia wefọ he yin dide lẹ bo gọalọna ẹn nado mọnukunnujẹ zẹẹmẹ yetọn mẹ. Gbọnna? E ma yin nado nọ basi zẹẹmẹ gaa do wefọ lọ lẹ ji bo gbọnmọ dali hẹn nupinplọn lọ zun apọṣimẹnu wẹ gba, ṣigba mí dona na tuli nuplọntọ lọ nado dọ nuhe e lẹn gando wefọ lọ lẹ go. Kakati nado dọ nuhe e na yise kavi lehe e na yinuwa gbọn lẹ na ẹn, mí sọgan kàn kanbiọ mẹhẹnlẹnnupọn tọn lẹ sè e, ehe na gọalọna ẹn nado wá tadona he sọgbe lẹ kọ̀n. b

‘YIN ALENU NA WỌHẸMẸ’

8. Ayilinlẹn tẹwẹ Paulu hoavùn hẹ?

⁸ Mí nọ saba pọ́n whẹho “wọhẹmẹ” tọn hlan taidi azọngban mẹho agun tọn lẹ tọn. Podọ, na nugbo tọn, mẹho agun tọn lẹ wẹ tindo azọngban lọ nado “nọ wọhẹ mẹhe hẹn ylando zun aṣa lẹ.” (1 Tim. 5:20; Titu 1:13) Ṣigba, e sọ yin nujọnu nado nọ wọhẹ mídelẹ. Paulu yin Klistiani apajlẹ dagbenọ de he tindo ayihadawhẹnamẹnu he wé. (2 Tim. 1:3) Etomọṣo, e wlan dọmọ: “Yẹn mọ osẹ́n devo to awutugonu ṣie lẹ mẹ he to awhànfun sọta osẹ́n ayiha ṣie mẹ tọn bo to hinhẹn mi zun kanlinmọ na osẹ́n ylando tọn.” Eyin mí gbadopọnna lẹdo hodidọ enẹ tọn, mí na mọnukunnujẹ avùn he Paulu hò nado sọgan dava ayilinlẹn ylando tọn etọn mẹ ganji.—Hia Lomunu lẹ 7:21-25.

9, 10. (a) Madogán tẹlẹ wẹ Paulu na ko diahi hẹ? (b) Nawẹ Paulu na ko hoavùn sọta ylando gbọn?

 ⁹ Madogán tẹlẹ ji wẹ Paulu dovivẹnu nado dù te? Dile etlẹ yindọ ewọ ma donu yé go tlọlọ, e kàn hlan Timoti dọ emi ko yin “kanylantọ de” dai. (1 Tim. 1:13) Whẹpo Paulu do lẹzun Klistiani de, e dohomẹkẹn Klistiani lẹ to aliho sinsinyẹn mẹ. E yigbe numọtolanmẹ etọn lẹ tọn gando hodotọ Klisti tọn lẹ go dọmọ: “Yẹn jẹma do yé ji tlala.” (Owalọ 26:11) Paulu wá plọn nado nọ duto ede ji, etomọṣo, to whedelẹnu ewọ dona nọ dovivẹnu nado dava numọtolanmẹ po hodidọ etọn lẹ po. (Owalọ 15:36-39) Etẹwẹ gọalọna ẹn nado tindo kọdetọn dagbe?

¹⁰ To whenue e to wekanhlan Klistiani he tin to Kọlinti lẹ, Paulu basi zẹẹmẹ lehe e wọhẹ ede do tọn. (Hia 1 Kọlintinu lẹ 9:26, 27.) Ewọ nọ tunnú agbasa mape etọn po akotokún gbigbọmẹ tọn he nọ yin anadena ganji lẹ po. Ayihaawe ma tin dọ ewọ nọ dín ayinamẹ lẹ sọn Owe-wiwe lẹ mẹ, nọ vẹ̀ Jehovah to odẹ̀ mẹ nado gọalọna ẹn nado yí yé do yizan mẹ, bosọ nọ wazọ́n sinsinyẹn nado yinukọn. c Mí sọgan mọaleyi sọn apajlẹ etọn mẹ, na mílọsu to ahidi hẹ ayilinlẹn mape tọn mítọn lẹ wutu.

11. Nawẹ mí ‘nọ tẹ́n míde pọ́n’ nado yọnẹn eyin vlavo mí to zọnlinzin to aliho nugbo lọ tọn ji gbọn?

¹¹ Mí ma dona yin vọdonanutọ gbede to sinsẹ̀n-bibasi mítọn mẹ. Kakatimọ, mí dona ‘nọ tẹ́n míde pọ́n’ nado hẹn ẹn diun dọ mí to zọnlinzin to aliho nugbo tọn lọ ji nugbonugbo. (2 Kọl. 13:5) To whenue mí to wefọ delẹ taidi Kọlọsinu lẹ 3:5-10 hia, mí sọgan nọ kanse míde dọmọ: ‘Be n’to vivẹnudo nado hù ayilinlẹn ylando tọn ṣie lẹ ya kavi wiwejininọ ṣie to walọyizan-liho to didepo? To whenue n’to Intẹnẹt yizan bọ nọtẹn walọ gblezọn tọn de sọawuhia, be n’nọ tọ́n sọn e ji to afọdopolọji ya kavi yẹnlọsu wẹ nọ dín nọtẹn he ma sọgbe enẹlẹ mọ?’ Ayinamẹ Ohó Jiwheyẹwhe tọn lẹ tọn yiyizan na míde to ninọmẹ mọnkọtọn lẹ mẹ nọ gọalọna mí nado “nọ nukle bo gbọṣi lẹnpọn dagbenọ-yinyin mítọn mẹ.”—1 Tẹs. 5:6-8.

‘YIN ALENU NA ONÚ LẸ HINHẸN SỌGBE’

12, 13. (a) Etẹwẹ e zẹẹmẹdo nado ‘hẹn onú lẹ sọgbe,’ podọ nawẹ mí sọgan hodo apajlẹ Jesu tọn to ehe wiwà mẹ gbọn? (b) Aliho hodidọ tọn tẹwẹ mí dona dapana to whenue mí jlo na ‘hẹn onú lẹ sọgbe’ to haṣinṣan mítọn mẹ hẹ mẹdevo lẹ?

¹² Hogbe Glẹki tọn he yin lilẹdo “onú lẹ hinhẹn sọgbe” zẹẹmẹdo “nado hẹn nude sọgbe, nado jla nude do, nado vọ́ nude jlado, kavi hẹn ẹn wá ninọmẹ pipé mẹ.” To whedelẹnu, mí dona ze afọdide nado hẹn onú lẹ sọgbe to haṣinṣan mítọn mẹ hẹ mẹhe ma mọnukunnujẹ mí go kavi nuyiwa mítọn mẹ lẹ. Di apajlẹ, nukọntọ sinsẹ̀n Ju tọn delẹ hlunnudọ gando Jesu go dọ ewọ to mẹtọnhopọn dohia “tòkuẹ-ṣinyantọ lẹ po ylandonọ lẹ po.” Jesu gblọnna yé dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ. Enẹwutu, mì yì bo plọn nuhe ehe zẹẹmẹdo, dọ, ‘Lẹblanu wẹ yẹn jlo, e ma yin avọ́sinsan gba.’” (Mat. 9:11-13) Ewọ yí homẹfa po mẹtọnhopọn po do basi zẹẹmẹ ohó Jiwheyẹwhe tọn na mẹlẹpo. Gbọnmọ dali, whiwhẹnọ lẹ wá yọ́n Jehovah taidi “Jiwheyẹwhe he gọ́ na akọndonanu podọ dagbewanyinọ, awuwhletọ nado sadi, podọ susunọ to lẹblanu po nugbo po mẹ.” (Eks. 34:6) Na Visunnu Jiwheyẹwhe tọn dovivẹnu nado ‘hẹn onú lẹ sọgbe’ to haṣinṣan etọn hẹ mẹdevo lẹ mẹ wutu, mẹsusu wá tindo yise to wẹndagbe lọ mẹ.

¹³ Apajlẹ Jesu tọn plọn mí lehe mí dona gọalọna mẹdevo lẹ do. Mẹhe gblehomẹ de sọgan yí hogbe sinsinyẹn zan to whenue e jlo na hẹn onú lẹ sọgbe to haṣinṣan etọn mẹ hẹ mẹhe hẹn ẹn gblehomẹ lọ. Ṣigba, mọwiwà ma sọgbe hẹ lẹndai nuhe yin didọ to 2 Timoti 3:16 mẹ tọn gba. “Owe-wiwe lẹpo” ma na mí gbè nado ylangbè na mẹdevo lẹ. Taidi “sisọ́ ohí de tọn,” homọdọdomẹgo to aliho sinsinyẹn mẹ nọ saba hẹn awufiẹsa susu wá podọ ehe ma nọ hẹn ale depope wá.—Howh. 12:18.

14-16. (a) Nawẹ mẹho agun tọn de sọgan ‘hẹn onú lẹ sọgbe’ to whenue e to alọgọna mẹdevo lẹ nado didẹ nuhahun yetọn lẹ gbọn? (b) Naegbọn e do yin nujọnu dọ mẹjitọ lẹ ni nọ yí Owe-wiwe lẹ zan nado ‘hẹn onú lẹ sọgbe’ to whenue yé to ovi yetọn lẹ plọn whẹ́n?

 ¹⁴ To whelọnu lo, nawẹ mí sọgan yí homẹfa po homẹdagbe po zan nado nọ ‘hẹn onú lẹ sọgbe’ gbọn? Mí ni dọ dọ asu po asi po de biọ to mẹho agun tọn de si nado gọalọna yé nado didẹ gbemanọpọ he yé nọ saba tindo lẹ. Etẹwẹ mẹho agun tọn lọ dona wà? Kakati nado yíwhẹ̀ do mẹdepope ji, ewọ sọgan yihojlẹdohogo hẹ yé do nunọwhinnusẹ́n Biblu tọn lẹ ji, vlavo dehe tin to owe Aṣli Ayajẹ Whẹndo Tọn to weta 3 mẹ lẹ. Dile mẹho agun tọn lọ to anadena hodọdopọ lọ, asu po asi po lọ sọgan doayi ayinamẹ he dopodopo yetọn lẹ dona yizan dogọ lẹ go. To nukọn mẹ, mẹho lọ sọgan dindona lehe nulẹ to yìyì do to whẹndo lọ mẹ, bo gọalọ eyin nuhudo etọn tin.

 ¹⁵ Nawẹ mẹjitọ lẹ sọgan nọ ‘hẹn onú lẹ sọgbe’ to aliho de mẹ na ovi yetọn lẹ nido yin hinhẹn lodo to gbigbọ-liho gbọn? Mí ni dọ dọ mẹjitọ de jlo na gọalọna viyọnnu aflanmẹ etọn nado doalọtena họntọnjiji he fọ́n ayihaawe dote. Tintan whẹ́, hiẹ dona dindona whẹho lọ ganji. Enẹgodo, eyin a mọdọ whẹho lọ yin nugbo, hiẹ sọgan dọho po e po vlavo gbọn nuagokun he tin to owe lọ Les jeunes s’interrogent—Réponses pratiques, Bladopọ 2 mẹ lẹ yiyizan dali. To azán he bọdego lẹ mẹ, hiẹ sọgan yí whenu zan hẹ viyọnnu towe dogọ. Hiẹ sọgan sọ doayi nuhe tin to ayiha etọn mẹ go dile mì to mahẹ tindo to sinsẹ̀nzọn kunnudegbe tọn mẹ kavi to whenue whẹndo lọ to ayidedai. Eyin hiẹ do homẹfa po homẹdagbe po hia, viyọnnu towe na doayi owanyi he a tindo na ẹn go. E yọnbasi dọ ewọ na yin whinwhàn nado yí ayinamẹ towe do yizan mẹ bo dapana nudide ylankan to gbẹzan etọn mẹ.

¹⁶ Gbọn homẹfa po homẹdagbe po yiyizan dali, mí sọgan na tuli mẹhe to nuhà gando agbasalilo go, mẹhe jẹflumẹ na e hẹn agbasazọ́n bu wutu, kavi mẹhe e vẹawuna nado  kẹalọyi nuplọnmẹ Biblu tọn delẹ. Ohó Jiwheyẹwhe tọn yiyizan nado ‘hẹn onú lẹ sọgbe’ nọ hẹn ale daho wá na omẹ Jehovah tọn lẹ.

‘YIN ALENU NA MẸPLỌNLỌDIDOMẸGO TO DODOWIWA MẸ’

17. Naegbọn mí dona yọ́n pinpẹn mẹplọnlọ tọn bosọ kẹalọyi i?

¹⁷ “Mẹplọnlọ depope ma nọ sọawuhia nado yin ayajẹnu to whenue e tin to aimẹ, adavo awublanu; ṣogan to godo mẹ, e nọ de sinsẹ́n jijọho tọn, yèdọ dodowiwa tọ́n na mẹhe e ko yin yíyí do plọn lẹ.” (Heb. 12:11) Klistiani susu wẹ nọ dọ dọ mẹplọnlọ he emi mọyi sọn mẹjitọ yisenọ emitọn lẹ dè wẹ gọalọna emi. Podọ alọkikẹyi mẹplọnlọ he Jehovah nọ na mí gbọn mẹho agun tọn lẹ gblamẹ, nọ gọalọna mí nado gbọṣi aliho ogbẹ̀ tọn lọ ji.—Howh. 4:13.

18, 19. (a) Naegbọn ayinamẹ he tin to Howhinwhẹn lẹ 18:13 mẹ do yin nujọnu taun na “mẹplọnlọdidomẹgo to dodowiwa mẹ”? (b) Etẹwẹ nọ saba yin kọdetọn lọ, eyin mẹho lẹ do walọmimiọn po owanyi po hia to whenue yé to nuyiwa hẹ ylanwatọ lẹ?

¹⁸ E nọ biọ azọ́nyinyọnẹn nado domẹplọnlọmẹgo po kọdetọn dagbe po. Jehovah biọ to Klistiani lẹ si nado nọ domẹplọnlọmẹgo “to dodowiwa mẹ.” (2 Tim. 3:16) Enẹwutu, mí dona dike nunọwhinnusẹ́n Biblu tọn lẹ ni nọ deanana mí to whẹho ehe mẹ. Dopo to nunọwhinnusẹ́n enẹlẹ mẹ tin to Howhinwhẹn lẹ 18:13 mẹ. E dọmọ: “Ewọ he gblọnho jẹnukọnna sisè, nulunu po winyan po wẹ na ẹn.” Enẹwutu, to whenue mẹho lẹ jlo na dọho hẹ mẹhe yè sawhẹ ylando sinsinyẹn tọn dokọna de, yé dona dindona whẹho lọ kitokito nado sọgan mọnukunnujẹemẹ to gigọ́ mẹ. (Deut. 13:14) Gbọnmọ dali, yé na penugo nado domẹplọnlọmẹgo “to dodowiwa mẹ.”

¹⁹ Humọ, Ohó Jiwheyẹwhe tọn na ayinamẹ mẹho agun tọn lẹ nado “nọ yí walọmimiọn” do domẹplọnlọmẹgo. (Hia 2 Timoti 2:24-26.) Nugbo wẹ dọ ylando he mẹde wà sọgan hẹn vlẹko wá oyín Jehovah tọn ji bosọ hẹn awugblena homẹvọnọ lẹ. Etomọṣo, mẹho agun tọn he gblehomẹ to whenue e to mẹplọnlọ do omẹ mọnkọtọn go ma na gọalọna mẹlọ. Ṣigba, eyin mẹho agun tọn lẹ hodo apajlẹ “homẹdagbe Jiwheyẹwhe tọn,” yé sọgan whàn mẹhe ṣinuwa lọ nado lẹnvọjọ.—Lom. 2:4.

20. Nunọwhinnusẹ́n tẹlẹ wẹ mẹjitọ lẹ dona nọ yizan to whenue yé to mẹplọnlọ do ovi yetọn lẹ go?

²⁰ Eyin mẹjitọ lẹ na penukundo ovi yetọn lẹ go “to mẹplọnlọ po anademẹ Jehovah tọn po mẹ,” yé dona nọ yí nunọwhinnusẹ́n Biblu tọn lẹ zan. (Efe. 6:4) Otọ́ de dona hẹn ẹn diun dọ emi dindona owhẹ̀ he yin sisadokọna ovi emitọn to gigọ́ mẹ whẹpo do domẹplọnlọ e go. Adi zogbe ma tindo otẹn depope to whẹndo Klistiani tọn mẹ. “Jehovah tindo owanyi sisosiso bosọ yin lẹblanunọ,” podọ mẹhe tindo azọngban nado domẹplọnlọ jọja lẹ go lẹ dona nọ dovivẹnu nado do jẹhẹnu owanyinọ dopolọ lẹ hia.—Jak. 5:11.

BIBLU YIN NUNINA HỌAKUẸ DE SỌN JEHOVAH DÈ

21, 22. Hogbe he tin to Psalm 119:97-104 mẹ tẹlẹ wẹ sọgbe hẹ numọtolanmẹ he a tindo gando Ohó Jehovah tọn go?

²¹ To ojlẹ de mẹ wayi, dawe he nọ budisi Jiwheyẹwhe de dọ nuhewutu e do yiwanna osẹ́n Jehovah tọn. (Hia Psalm 119:97-104.) Gbọn Ohó Jiwheyẹwhe tọn pinplọn dali, ewọ tindo nuyọnẹn, zinzin po nukunnumọjẹnumẹ po. Ayinamẹ etọn lẹ yíyí do yizan mẹ gọalọna ẹn nado dapana nudide he sọgan hẹn awugble wá mẹdevo lẹ ji. E mọ ayajẹ po pekọ nujọnu tọn po to Ohó Jiwheyẹwhe tọn pinplọn mẹ. Ewọ magbe nado nọ setonuna Jiwheyẹwhe, mẹhe anademẹ etọn lẹ ko hẹn ale susu wá na ẹn to gbẹzan etọn mẹ.

²² Be hiẹ yọ́n pinpẹn “Owe-wiwe lẹpo” tọn ya? Biblu sọgan gọalọna we nado hẹn yise towe lodo dọ Jiwheyẹwhe na hẹn lẹndai etọn di. Ayinamẹ gbọdo etọn lẹ na basi hihọ́na we sọn kọdetọn ylankan he ylando nọ hẹnwa lẹ si. Eyin a nọ yí azọ́nyinyọnẹn do basi zẹẹmẹ do Biblu ji, hiẹ sọgan gọalọna mẹdevo lẹ nado wá aliho nugbo tọn ji bosọ gbọṣi e ji. Mì gbọ mí ni nọ yí “Owe-wiwe lẹpo” zan to gigọ́ mẹ dile mí to Jehovah, Jiwheyẹwhe nuyọnẹntọ podọ owanyinọ mítọn sẹ̀n zọnmii.

[Nudọnamẹ odò tọn]

[Kanbiọ Oplọn tọn lẹ]