1. Sooq Guutip oqaasianik tatiginnilluinnartariaqarpugut?

BIIBILIMIK atuaqqissaaqatigineqartartup oqaluussisartunngunnginnermini Biibili Guutip oqaaserigaa upperalugu erserseqqaartariaqarpaa. * Tamatta Biibilimik tatiginninnerput oqaatsitsigut iliuutsitsigullu ersersittariaqarparput. Biibilimik tatiginnilluinnarutta oqaluussinitsinnilu tamatuminnga atuilluartarutta allat Jehovamik ilisarisimannilernissaannut inuunermillu naassaanngitsumut aqqummik atuaalernissaannut ikiorsinnaavavut.

2. Sooq ‘ilinniarsimasavut aalajangiuttariaqarpavut’?

² Apustilip Paulusip paatsuugassaanngitsumik allappoq Guutip oqaasia pingaaruteqartorujussuusoq. Timotheusimut ima allappoq: “Ilinniarsimasatit nakimaatsumillu upperilersimasatit aalajangiunniakkit!” Matumani sallusuissutit Biibilimeersut Timotheusip nutaarsiassamik nuannersumik upperinnilissutigisai Paulusip innersuussutigai. Biibilimit ilikkakkavut upperluarnerulissutigisinnaavavut. Biibili iluaqutigalugu ‘annannissamut ilisimassuseqalersinnaavugut’. (2 Tim 3:14, 15) Biibilip Guutimeersuunera Paulusip oqaaserisaanit tulliuttunit erserpoq. Timotheusimut allakkat aappaat 3:16 qanoq allamik ilinniarfigisinnaavarput? (Atuaruk). * Allassimaffimmik tamatuminnga misissueqqissaarnerput Jehovap ilinniartitsissutaasa ‘eqqortuunerannik’ tatiginninnerulissutigissavarput. — Tuss 119:128, NW.

3-5. (a) Piinsip ulluani Petrusi inuppassuarnut oqalugiareermat qanoq pisoqarpa, aamma sooq? (b) Sooq Thessalonikamiorpassuit sallusuissummik upperinnilerpat? (c) Inuppassuit oqaluussiffigineqaraangamik suna maluginiartarpaat?

³ Jiisusip Israelikkut ima oqarfigai: “Pruffiitinik ilisimasunillu  allakkanillu ilisimasunik ilissinnut aallartitsivunga.” (Matt 23:34) Matumani Jiisusip ajoqersukkani, oqaluussinermi Allakkanik atuisarnissaannik ilinniartissimasani, pivai. Ukiumi 33-mi piinsip ulluani apustili Petrusi Jerusalemimi inuppassuarnut oqalugiarpoq. Allakkat Hebræerisuut arlaleriarluni issuarpai. Inuit Petrusip allassimaffiit pillugit nassuiaatai tusaramikkit ajortuliarisimasatik “uummatimikkut anniutigaat”. Ajortuliatik peqqissimissutigaat Guutimullu isumakkeerfigeqqullutik. Ulloq taanna inuit 3000-it missaanniittut kristumiunngorput. — ApS 2:37-41.

⁴ Uaguttaaq apustili Petrusi, Jerusalemip ungasissuani nutaarsiassaq nuannersoq pillugu oqaluussisoq, ilinniarfigisinnaavarput. Illoqarfimmi Thessalonikami Makedoniamiittumi juutinut synagogimi pallorfiginnittunut oqaluppoq. Paulusip sabbatini “tulleriinni pingasuni oqaloqatigisarpai [eqqarsalersinniarlugit oqaloqatigisarpai, NW] Allakkat najoqqutaralugit. Allakkat nassuiarpai erseqqissarlugulu Kristusi anniartariaqarsimasoq toqusunillu makissimalluni.” Juutit taakkua ilaat, grækererpassuillu, uppertunngorput. — ApS 17:1-4.

⁵ Ullumikkut inuppassuit maluginiartarpaat Biibili atorlugu ilinniartitsissutivut uppernarsartarivut. Schweizimi qatanngutitta oqaluussinermini Biibilimi allassimaffik atuaramiuk pulaakkamit oqaluffimmut sorlermut ilaasortaanersoq aperineqarpoq. Qatannguterput oqaluusseqatigisanilu oqarput Jehovap Nalunaajaasuinut ilaallutik. Pulaagarlu ima oqarpoq: “Taannaqami, kikkummi allat angerlarsimaffitsinnut kasuttussagamik Biibilimillu allassimaffimmik atuarlutik.”

6, 7. (a) Ilagiinni ilinniartitsisartut Biibili qanoq pitsaanerpaamik atorsinnaavaat? (b) Sooq Biibilimik atuaqqissaaqateqarnermi Biibilimik atorluaasarnissaq pingaaruteqarpa?

⁶ Inunnik allanik ilinniartitsinitsinni Biibili qanoq pitsaanerpaamik atorsinnaavarput? Ataatsimiinnerni oqalugiarsinnaanermik immikkut pisinnaatitaaffeqaruit allassimaffiit atortakkit. Allassimaffimmi qanoq allassimasoqarnersoq najuuttunut oqaatigiinnarnagu allassimaffillu pappiaqqamit atortorissaarummilluunniit elektroniskiusumit atuaannarnagu Biibilinnit atuartaruk. Najuuttut Biibiliminnik atuinissaannut kajumissaakkit. Allassimaffiit qanoq isumaqarnersut allassimaffiillu iluaqutigalugit qanoq Jehovamik attaveqarlualersinnaanersut nassuiaruk. Assersuutit paasiuminaatsut misigisalikkersaarutilluunniit najuuttunut illartitsiniutaannaasut atornagit piffissat Guutip oqaasianik eqqartuinissamut atortaruk.

⁷ Biibilimik atuaqqissaaqatigisartakkavut ilinniartikkaangatsigit suna eqqaamasariaqarparput? Atuaqqissaaqateqaraangatta atuakkami allassimaffiit innersuussutigineqartut alluinnartassanngilagut. Atuaqqissaaqatigisartakkat allassimaffinnik innersuussutigineqartunik atuartittaruk. Atuakkatsinnillu nassuiaanitsinni kisitta oqaluunnarnata atuaqqissaaqatigisartagarput isummersortittassavarput. Sumillu upperinninnissaanik imaluunniit qanoq iliuuseqarnissaanik oqaluttuutiinnarnagu Biibilimi ajoqersuutigineqartunik paasinninnissamut iluaqutigisassaanik apeqquteqartarsinnaavugut. *

8. Paulusi inuutsimigut ilorlikkut qanoq akiugaqarpa?

⁸ Ilagiinni utoqqaanertat ajortuliortartunik oqaaqqissaarinissaminnut, imaluunniit perorsaatissiinissaminnut, akisussaaffeqarput. (1 Tim 5:20; Tit 1:13) Uaguttaarli imminut oqaaqqissaartariaqarpugut. Paulusi kristumiuulluartuuvoq ilerasuuteqanngitsoq. (2 Tim 1:3) Inuutsimigulli ilorlikkut akiugaqarpoq. Ima allappoq: “Paasisarpara inatsisinik allanik avatinniittoqartoq, taakkulu inatsisinut eqqarsaatinniittunut akerartortuusut ajortillu inatsisaanit avatinniittunit tiguagaatillunga.” Paulusip sanngiissutini akiorsinnaajumallugit qanoq iliortariaqarsimasoq sammissavarput. — Atuakkit Romamiut 7:21-25.

9, 10. (a) Paulusip suna sanngiissutigisimagunarpaa? (b) Paulusi sanngiissutiminik qanoq akiuisimagunarpa?

 ⁹ Paulusip suna sanngiiffiginerlugu eqqaanngilaa allapporli ‘angutaasersorsuusimalluni’, tassa peqqarniitsuusimallunilu ataqqinnittuusimanani. (1 Tim 1:13) Paulusip kristumiunngunngikkallarami kristumiut ajortorujussuarmik pisarsimavai. Allappoq ‘kamaatingaarsimallugit’. (ApS 26:11) Paulusip paasivaa kamannermi nununissaa ilinniartariaqarlugu, misigissutsiminulli oqaatsiminullu tunngatillugu imminut naalakkersinnaanissani sulissutigiuarsimassavaa. (ApS 15:36-39) Suna iluaqutigaa?

¹⁰ Korinthimiunut allakkamini siullermi Paulusip imminut oqaaqqissaartuarsimanini allaatigaa. (Atuakkit 1 Korinthimiut 9:26, 27). Sapinngisani tamaat sanngiissutiminik akiuivoq. Qularnanngitsumik Allakkani siunnersortissarsiortarlunilu atuakkaminik maleruaanissaminut ikioqqulluni Jehovamut qinusarlunilu sapinngisani tamaat naalanniartuarpoq. * Paulusip maligassiaa ilinniarfigisinnaavarput. Uaguttaaq sanngiissutitsinnik akiugassaqarpugut.

11. Sallusuissutip aqqutaatigut saqinerluta paasiumallugu qanoq imminut ‘misilittuarsinnaavugut’?

¹¹ Sanngiissutitsinnik akiuisariaqanngitsutut eqqarsalinngisaannartariaqarpugut. Sallusuissutip aqqutaatigut saqinerput qulakkeerniarlugu imminut ‘misilittuartariaqarpugut’. (2 Kor 13:5) Kolossemiut 3:5-10 allassimaffiilluunniit tamatumunnga assingusut atuaraangatsigit imminut ima aperisinnaavugut: ‘Sapinngisara tamaat sanngiissutikka akiortarpakka? Imaluunniit Jehovap eqqunngitsuuneragai nuannarilersimavakka? Assersuutigalugu nittartagaq kinguaassiuutitigut inuunerlunnermik imalik nueriataarpat igalaasaq ingerlaannaq tarrisissavara? Imaluunniit nittartakkat ajortut ujartarpakka?’ Guutip oqaasiani siunnersuutinik qanoq maleruaasinnaanerluta eqqarsaatigigaangatsigu ‘eqqumasinnaallutalu aalakuussanngilagut’. — 1 Th 5:6-8.

12, 13. (a) Naqqiineq qanoq paasisariaqarpa, naqqiinermullu tunngatillugu Jiisusi qanoq ilaarsinnaavarput? (b) Allanik naqqiisariaqarnitsinni qanoq oqalunnaveersaartariaqarpugut?

¹² Biibilimi ‘naqqiineq’ eqqaaneqaraangat eqqortuliorneq iluarsiinerlu pineqartarput. Ilaannikkut oqaatsivut iliuutsivulluunniit allanit paatsoorneqarsimagaangata naqqiisariaqartarpugut. Assersuutigalugu juutit upperisarsiornikkut siuttuisa Jiisusi ‘ilanngaaserisunut ajortuliortunullu’ inussiarnerpallaarnerarlugu naammagittaalliorput. Jiisusip naqqillugit ima oqarpoq: “Peqqissut nakorsamik pisariaqanngillat, napparsimasulli. Oqaatsit uku qanoq isumaqarnersut ilinniariartorsiuk: ‘Piumasaraara nallittuineq, pilliutit toqutassat pinnagit.’” (Matt 9:11-13) Aamma Guutip kinaassusivia pillugu inuit eqqunngitsumik eqqarsartaaseqarmata Jiisusip naqqippai. Kamagittarluni inussiarnerlunilu inuit ilinniartippai Jehova tassaasoq Guuti “nallittuisoq saammaasorlu, kamajaatsoq ilumoornermik sallusuissummillu peqangaartoq”. (2 Mos 34:6) Tamatuma kingunerisaanik inuppassuit maniguuttut nutaarsiassaq nuannersoq upperilerpaat.

¹³ Allanik ikiuiniarnitsinni Jiisusi ilaartariaqarparput. Timotheusimut allakkat aappaanni 3:16-imi najoqqutassiat naapertorlugit imaanngilaq allanik naqqiigaangatta sukannersumik oqaluttassasugut. Allakkat naapertorlugit allanut misigittaatsumik oqaluttarnissamut tunngavissaqanngilagut. Inoqaterput sukannersumik isorigutsigu oqaatsivut ‘panatut kapisisutut’ issinnaapput. Taamaaliorutta oqaluussarput ajuallatsissavarput ikiornagulu. — Uss 12:18.

14-16. (a) Qanoq utoqqaanertat uppeqatitik ajornartorsiuteqarnertik pissutigalugu ikiorneqartariaqartut naqqissinnaavaat? (b) Sooq angajoqqaat meeqqaminnik ‘naqqiinerminni’ Biibilimik atuisarnissaat pingaaruteqarpa?

¹⁴ Naqqiinitsinni Biibilimik atuigutta qanoq  kamagittartuusinnaallutalu inussiarnersuusinnaavugut? Aappariit assortuutikulasut takorluukkit. Utoqqaanertamut ikioqqupput. Utoqqaanertaq kinaassusersiortuussanngilaq ajornartorsiutaallu isummerfigissanagu. Akerlianilli assortuukkunnaarnissaminnut iluaqutissaannik najoqqutassianik Biibilimiittunik paasinninnissaannut ikiussavai. Atuakkami Ilaqutariittut pilluarneq isertugaateqarpoq-mi kapitali 3-mi najoqqutassiat sammineqartut atorsinnaavai. Imaassinnaavoq aappariit najoqqutassianik eqqartuinerminni paasigaat allannguisariaqarlutik. Kingusinnerusukkut utoqqaanertap aperissavai atugaat ilorraap tungaanut saassimanersut pisariaqartitsippatalu ikiueqqinnissaminik neqeroorfigissavai.

 ¹⁵ Angajoqqaat meeqqamik naqqiinissaannut qanoq ikiorsinnaavaat? Takorlooruk inuusuttuaraatit ikinngutitaarsimasoq. Illilli isumaqarputit ikinngutitaarisimasaa eqqunngitsumik aalajangiisartoq. Siullertut ikinngutaa pillugu paasisaqarnerusariaqarputit. Tamatumalu kingorna paniit pillugu suli isumakuluuteqaruit oqaloqatigisinnaavat. Atuakkami Unge spørger — Svar der duer-imi, atuakkami 2-mi eqqartorneqartut najoqqutassiat Biibilimeersut atorsinnaavatit. Taava paninnik peqateqarnerunissat qulakkeertariaqarpat. Oqaluusseqataanermini ilaquttaminilluunniit peqateqarnermini qanoq isiginnittaaseqarnersoq maluginiarsinnaavat. Panippit oqaloqatiginerani kamagittaruit inussiarnersuullutillu paniit asaneqartutut soqutigineqartutullu misigissaaq. Taamaaliornerit ikinngutinik toqqaasarneq eqqunngitsumillu aalajangiisarneq pillugu siunnersuutinnik maleruaanissamut iluaqutigissavaa.

¹⁶ Kina alla ilinnit ikiorneqarnissaminik pisariaqartitsiva? Allat peqqissutsiminnik isumakuluutiginnittut, suliffeerussimanertik pissutigalugu isumatsaqqasut imaluunniit Biibilimi ajoqersuutigineqartunik paasiuminaatsitsisut kamagittartumik inussiarnersumillu naqqissinnaavavut. Guutip oqaasia atorlugu naqqiisarnerput tamatta sutigut tamatigut iluaqutigissavarput.

17. Sooq perorsaatissinneqartarnerput qujamasuutigisariaqarparput?

¹⁷ “Perorsagaaneq sunaluunniit atuutsilluni iluaaginartuusaraluarpoq nuannersortaqarnani, kingunerisarpaali eqqissineq iluarnerlu.” (Hebr 12:11) Kristumiut inersimasut sallusuissummi peroriartorsimasut amerlanersaat oqartarput angajoqqaaminnit perorsaatissinneqartarnertik iluaqutigisimallugu. Utoqqaanertanillu Jehovameersumik perorsaatissinneqarnerput inuunerup aqqutaaniiginnarnissatsinnut iluaqutigisarparput. — Uss 4:13.

18, 19. (a) Sooq siunnersuut Ussatit 18:13-imi allassimasoq utoqqaanertanut allanik perorsaatissiisariaqartunut taama pingaaruteqartigaa? (b) Utoqqaanertat saamasumik asannittumillu perorsaatissiisarnerat qanoq kinguneqarajuppa?

¹⁸ Utoqqaanertat angajoqqaallu qanoq sunniuteqarluartumik perorsaatissiisarneq ilinniarsinnaavaat? Jehovap ‘naapertuilluartumik’ perorsaatissiisaqquaatigut. (2 Tim 3:16, NW) Tassa allat perorsaatissikkaangatsigit najoqqutassiat Biibilimiittut atortariaqarpavut. Najoqqutassiat Biibilimiittut pingaarutillit ilaat Ussatit 18:13-imi allassimavoq: “Oqaaserineqartut naalaarluaqqaarnagit akissuteqarneq sianiitsorpallanneruvoq kanngunarsaataallunilu.” Taamaattumik utoqqaanertat qatanngutit ilaat ingasattumik ajortuliorsimanerannik tusagaqaraangamik perorsaatissiinnginnerminni ilumut tusakkamittut pisoqarsimanersoq qulakkeeqqaartariaqarpaat. (5 Mos 13:15) Taamaalioreerunillu aatsaat ‘naapertuilluartumik’ perorsaatissiisinnaapput.

¹⁹ Biibilimi allassimavoq utoqqaanertat “saamasumik” perorsaatissiisassasut. (Atuakkit 2 Timotheusi 2:24-26). Ilumoorpoq inuup ajortuliornera Jehovap tusaamanerlugaalerneranik allalluunniit ajuallatsinneqarneranik kinguneqarsinnaasoq. Utoqqaanertarli perorsaatissiinermini siunnersuinerminiluunniit kamaleruni utoqqaanertap oqaluussani ikiorsinnaassanngilaa. Utoqqaanertaq Guutimik ilaarsippat inussiarnersumillu oqaluppat ajortuliorsimasoq naqqinneqartoq allamik isumataarniarluni aalajangersinnaalissaaq. — Rom 2:4.

20. Angajoqqaat meeqqaminnik perorsaatissiigaangamik najoqqutassiat suut maleruartariaqarpaat?

²⁰ Aamma angajoqqaat meeqqaminnik perorsaatissiigaangamik najoqqutassiat Biibilimiittut maleruartariaqarpaat. (Ef 6:4) Assersuutigalugu ataataasoq ernermi ajortuliorsimaneranik oqarfigineqaruni qanoq iliussava? Ataataasup ernerminik pillaannginnermini ilumut tusakkamisut pisoqarsimanersoq qulakkeeqqaartariaqarpaa. Ilaqutariit kristumiut kamannertik pissutigalugu nakuusilinngisaannartariaqarput. Jehova “nallittuingaarpoq saammaassingaarlunilu,” angajoqqaallu meeqqaminnik perorsaatissiileraangamik taanna ilaarniartariaqarpaat. — Jaak 5:11.

21, 22. Tussiaat 119:97-104-mi oqaatsit sorliit illit Jehovap oqaasia pillugu misigissutsinnik allaatiginnippat?

²¹ Ilaanni Guutimut kiffaasup sooq Jehovap inatsisaanik nuannarinninnerluni allaatigaa. (Atuakkit Tussiaat 119:97-104). Biibilimik atuaqqissaartarnermigut silatussuseqalerlunilu ilisimassuseqalerlunilu paasinnilluarsinnaanngorpoq. Najoqqutassianik Allakkaniittunik maleruaanermigut inuppassuit kukkussutigisartagaat ingalassimavai. Allakkanik atuaqqissaartarnini qiimmattaatigingaarlugulu tamatumani siunnersuutigineqartunik maleruaanini iluaqutigaa. Guutip inatsisaanik maleruaanissani inuunini tamaat aalajangiusimavaa.

²² Biibili erlinnartutut isigaajuk? Guutip siunertaminik naammassinnikkumaarneranik upperinninninnik nakussatsitsinissannut iluaqutigisinnaavat. Tamatumani siunnersuutinik isumassarsiarititaasunik maleruaanerit ajortuliortarnernik toqumik kinguneqarsinnaasunik ingalassimanninnissannut iluaqutigissavat. Allat inuunerup aqqutaaniilernissaannut aqqutaaniittuarnissaannullu ilinniartikkaangakkit atorsinnaavat. Qanortoq Guutitta, Jehovap, ilisimassuseqarnerpaaq asannittorlu kiffartorfiginerani “Allakkat Illernartut” tamaasa tamakkiisumik atortaritigit.