1. Mukonda diahi tua tokala ku dielela ni muxima uoso mu Mak’â Nzambi?

PHALA o tufunga kuijiia se o dixibulu dia Bibidia ua tokala kiá ku kituka muboki mba kana, ene a di ebhuidisa: ‘O kuila o ukexilu ua muthu iú ulondekesa kuila muéne u xikina o Bibidia kala Mak’â Nzambi?’ * Oso a mesena ku kituka aboki a Utuminu—ni jiselevende joso ja Nzambi—tua tokala ku xikina kuila o Bibidia, Mak’â Nzambi. Mukonda diahi? Se tu dielela mu Mak’â Nzambi, anga tu kala ni uhete ua ku longa o Bibidia, tua-nda kuatekesa akuetu kuijiia Jihova, ni ku tambula o muenhu ua kalelaku.

2. Mukonda diahi tua tokala ku ‘kolokota mu ima i tua di longo?’

² O poxolo Phaulu ua londekesa o valolo ia Mak’â Nzambi kioso kia sonekena Timote: “[Kolokota] mu ima ioso i ua di longa jinga, i ua mono ia kidi.” O “ima ioso” ia tumbula Phaulu, o kidi kia Bibidia kia bhangesa Timote ku xikina o Njimbu ia mbote. Lelu, o kidi kiki ki tu “ijidisa o kubhuluka.” (2 Tim. 3:14, 15) Tuene mu londekesa velusu mu Bibidia, phala ku kuatekesa akuetu kuijiia kuila o Bibidia Mak’â Nzambi, maji ithangana ioso, etu tu tena ku katula ué mbote mu velusu íii i tu sanga mu divulu dia 2 Timote 3:16. (Tanga.) Tua-nda di longa kiambote o velusu íii. Mu kiki tua-nda kolesa o kidielelu kietu kuila, o milongi ioso ia Jihova ia ‘iuka.’—Jisá. 119:128.

3-5. (a) Ihi ia bhange o athu kioso kiévu o diskursu dia bhange Phetele mu Pendekoxi, ni mukonda diahi? (b) Mukonda diahi athu avuludile mu Tesalonika a xikinine o kidi? (c) Mukonda diahi o athu a diuana kioso ki tu boka?

³ Jezú uambela akua Izalaiele: “Ngi mi tumikisa jipolofeta  ni jinjimu ni jimesene ja kulonga.” (Mat. 23:34) Jezú ua zuela ia lungu ni maxibulu mê, mukonda muéne ua a bhele itendelesu phala kulondekesa o Bibidia mu ukunji. Mu Pendekoxi ku muvu ua 33 K.K, o poxolo Phetele uexile ‘mesene ia ku longa,’ ua bhangele diskursu phala athu avulu akua Jeluzaleme. Mu diskursu didi muéne ua tumbula ibatulu iavulu ia Kikutu Kiokulu. Kioso o athu kiévu kiki, “kia a talakanha ku mixima.” Ene a diela o ituxi iâ. Midi jitatu ja athu ndenge a bhingile muloloki kua Nzambi, anga a kituka Jikidistá.—Ika. 2:37-41.

⁴ O poxolo Phaulu, mesene ia mukuá ia ku longa, ua boko o njimbu iambote mu jixi ja lungile ni Jeluzaleme. Mu mbanza ia Tesalonika, mu ixi ia Masedonha, muéne ua zuelele ni athu akexile mu bheza mu tembulu. Mu Sábhalu jitatu “u zuela-nau, hé u a jingunuina o Madivulu ma Nzambi ni kuidikisa ni kulombolola kuma kia fuamene Kristu ku bhita mu jiphaxi ni kufukunuka ku’alunga.” ‘Saí iá akua Jijudé a xikina, ni mundu uavulu ua akua Jingeleku.’—Ika. 17:1-4.

⁵ O athu a diuana kiavulu kia mona o uhete ua jiselevende ja Nzambi ua ku longa ni Bibidia. Kioso o mukua dibhata mu ixi ia Suíça kiai ni kuívua phang’etu ia muhatu ua kexile mu tanga o velusu mu Bibidia, muéne ua mu ebhuidisa: “Enu mu boka mu dijina dia nanhi?” O phang’etu ua tambuijila: “Etu tu Jimbangi ja Jihova.” Muéne uambe: “Mua lungu’enu. Mukonda o Jimbangi ja Jihova, ene ngó eza ku bhata diami mu tanga o Bibidia.”

6, 7. (a) Kiebhi o jiphange ene mu bhanga madiskursu mu kilunga a tena ku longa kiambote ni Bibidia? (b) Mukonda diahi ku bhinga ku longa o Bibidia ni uhete kioso ki tua mu longa dixibulu dietu?

⁶ Kiebhi ki tu tena ku longa o Bibidia ni uhete kioso ki tu kuatekesa akuetu? Se uala ni ujitu ua ku bhanga diskursu mba mbandu ja mukuá mu kilunga, londekesa o ibatulu ni jivelusu mu Bibidia. Mu veji dia ku tumbula ngó o izuelu ia Bibidia, tanga o kibatulu mu Bibidia, suínisa ué o jingivuidi ku tanga mu Bibidia iâ. Zuela se ihi ilombolola o kibatulu ki ua tange, londekesa ué kiebhi o Bibidia i tena ku a kuatekesa ku zukama kua Jihova. Mu veji dia ku bhanga ifika i bhonza ku i tendela, mba kuzuela ima i bhangesa o jingivuidi kuelela, jimbulula kiambote o Mak’â Nzambi.

⁷ Ihi i tua tokala kuijiia kioso ki tu longa o Bibidia? Kioso ki tua mu longa o Bibidia, tua tokala ku tanga o ibatulu ia Bibidia iala mu divulu. Tua tokala ku suínisa o dixibulu dia Bibidia ku tanga o ibatulu ioso ia sanga mu divulu, ni ku mu kuatekesa ku tendela kiambote o ibatulu íii. Kiebhi ki tu tena ku bhanga kiki? Kioso ki tua mu longa o dixibulu, ki tu tokala kuzuela kiavulu, tua tokala kuehela o dixibulu kuzuela o ima ia banza. Mu veji dia ku mu zuelela o kima kia tokala ku bhanga, tua tokala ku mu ebhuidisa ima i mu kuatekesa ku tendela kiambote o ibatulu ia Bibidia. *

8. Ihi ia di bhana na-iu Phaulu?

⁸ Tuejiia kuila o tufunga, ene ala ni kikalakalu kia “kubazela itondalu.” Mu kidi ene ala ni kikalakalu kia ‘ku bazela ió a ta kituxi.’ (1 Tim. 5:20; Tit. 1:13) Maji tua tokala ué ku di bazela mudietu. Phaulu uexile Kidistá iambote, ua kexile ni kitongoluelu kia zele. (2 Tim. 1:3) Maji né kiki, muéne ua soneka: “Nga mono kuila Kitumu kiengi kia mu tumina mu idiandu iami, kiala ku di lua ni kitumu kia ngi kala mu kilunji kiami, kiene kí kiala ku ngi kutila mu ubhika ua kitumu kia ituxi.” Tua-nda di longa se ihi ia bhange Phaulu phala ku langa o ukexilu uê ua ituxi.—Tanga Loma 7:21-25.

9, 10. (a) Ukexilu uahi ua ituxi ua dibhana nau Phaulu? (b) Nange ihi ia bhange Phaulu phala ku bhânga ni ukexilu uê ua ituxi?

 ⁹ Ukexilu uahi ua ituxi ua di bhana nau Phaulu? Sumbala muéne ka zuela kiambote o ima ia kexile mu di bhana na-iu, muéne ua sonekena Timote kuila, uexile ‘diiala dia bhukumuka.’ (1 Tim. 1:13) Ande dia ku kituka Kidistá, Phaulu ua kexile ni njinda iavulu ia Jikidistá. Mukonda dia njinda iê ku Jikidistá, muéne uambe: “Njinda ia ngi kuatele kinene.” (Ika. 26:11) Phaulu ua di longo ku tululukisa o njinda iê, maji nange muéne ua kexile hanji ku bhanga nguzu phala ku tululukisa o njinda iê ni izuelu iê. (Ika. 15:36-39) Ihi ia mu kuatekesa?

¹⁰ Kioso kia sonekena akua Kolindo, Phaulu ua zuela ihi ia bhangele phala kueha o ukexile uê. (Tanga 1 Kolindo 9:26, 27.) Ni kikuatekesu kia Bibidia, muéne ua bhânge ni ukexilu uê ua ituxi. Sé phata, Phaulu ua soto itendelesu mu Bibidia, ua sambe kua Jihova phala ku mu kuatekesa, iu ua bhangele nguzu phala ku i kumbidila. * Tu tena ku katula mbote mu phangu ia Phaulu, mukonda tuene mu di bhana ué ni ukexilu uetu ua ituxi.

11. Kiebhi ki tu tena ku ‘di tonginina’ phala ku mona se tua mu kaiela njila ia kidi?

¹¹ Ki tu tokala ku xinganeka kuila, ki tu bhingi dingi ku bhânga ni ukexilu uetu ua ituxi. Mu veji dia kiki, tua tokala ku ‘di tonginina’ phala ku mona se tua mu kaiela njila ia kidi. (2 Kol. 13:5) Kioso ki u tanga o divulu dia Kolose 3:5-10, tu tena ku di ebhuidisa: ‘O kuila nga mu bhanga nguzu phala ku bhânga ni ukexilu uami ua ituxi, inga nga mu uabhela o ima ia zembe Jihova? Se ku moneka jifoto ja ufusa kioso ki nga mu kalakala ni mutelembe ua internete, ngi i jika inga ngi mesena ku i mona?’ Se tu kaiela o itendelesu ia Bibidia, tua-nda ‘kala ku mesu azele.’—1 Tes. 5:6-8.

12, 13. (a) Ihi ilombolola ‘ku iukisa ia bhengalala’ ni kiebhi ki tu tena ku kaiela o phangu ia Jezú mu ku bhanga kiki? (b) Se tu mesena “kuiukisa iabhengalala” ni akuetu, ukexilu uahi ua kuzuela u tua tokala kueha?

¹² O kizuelu mu Ngeleku “kuiukisa ia bhengalala,” kilombolola “ku bhanga kima kiambote.” Saí ithangana ku bhinga ku iukisa ia bhengalala ni muthu ua tu tendela kia iibha mu kima ki tua zuela, mba ki tua bhange. Mu kifika, o atuameni akua Jijudé a divu kia iibha kioso kia mono Jezú ni “akua ku tambula lubhaku ni akua ituxi.” Jezú ua tambuijila: “Oso a di sanza ka bhindamena [dotolo], kikale ió a kate. Ndenu-phe mu di longe kioso ki kia jimbulula, kuila: Nginda o ku kuatela mukuenu henda, ki ngindi sata.” (Mat. 9:11-13) Muéne ua jimbulula o Mak’â Nzambi ku athu oso, ni muanhu ni henda ioso. O athu a lenduka ejidile kuila Jihova, “Nzambi ia jihenda ni kiadi, ua lenduka, u kukoloka mu kuthathamana, u kôla mu ku kuatela henda, ufiiele u vula.” (Mak. 34:6) Mukonda dia nguzu ia bhange o Mon’â Nzambi phala “kuiukisa ia bhengalala,” athu avulu a xikina o njimbu iambote.

¹³ Tua tokala ku kaiela o phangu ia Jezú phala ku kuatekesa akuetu. Nange o muthu uala ni njinda u zuela ni dízui dia suína: ‘Nga mesena ku iukisa ia bhengalala n’eie.’ Maji o uzuelelu ua muthu iú, ki uene u tu longa mu divulu dia 2 Timote 3:16. ‘O Mak’â Nzambi,’ ka tu bhana ufôlo ua kuzuela ni akuetu mu ukexilu iú, sé ku xinganeka kiebhi kia-nda divua. Se tu kala ni ukexilu iú ua iibha ua kuzuela ni akuetu, o izuelu ietu i difuangana kála o ‘jiphondo ja xibhata ji toma ku muxima.’—Jisa. 12:18.

14-16. (a) Kiebhi o tufunga kia tena ‘ku iukisa ia bhengalala,’ phala ku kuatekesa akuâ ku batula o maka mâ? (b) Mukonda diahi kima kiambote o jitata kulondekesa o Bibidia phala “kuiukisa iabhengalala,” ku muiji?

 ¹⁴ Kiebhi ki tu tena kulondekesa o muanhu ni henda kioso ki tu “kuiukisa ia bhengalala?” Xinganeka o dikaza di zoka mu ithangana ioso. Ene a bhinga ku kafunga phala ku a kuatekesa ku batula o maka enhá. Ihi ia tokala ku bhanga o kafunga? Mu veji dia ku bhangela muthu, muéne ua tokala ku a londekesa itumu ia Bibidia phala ku a kuatekesa ku batula o maka a mu bhekela o ku zoka. U tena ué kua londekesa o milongi iala mu kibatulu 3 mu divulu, O Segredo de Uma Família Feliz. Kioso o kafunga kia-ndaia ni ku a jimbuluila o itumu ia Bibidia, o dikaza dia-nda kuijia o ima ia tokala ku lungulula mu ukexilu uâ. Mu ku bhita kithangana, o kafunga ua tokala ku ebhula o dikaza kiebhi kia mu kuenda o ima ku muiji, ni ku a bhana dingi kikuatekesu se ku bhinga.

 ¹⁵ Kiebhi o jitata kia tena ‘ku iukisa ia bhengalala,’ phala ku kuatekesa o tuana tuâ ku kolokota mu nzumbi? Xinganeka kuila, eie ua mesena ku kuatekesa mon’ê ua muhatu ua mesena ku bhanga ukamba ni muthu, maji o muthu iú sumbala muthu ua iibha. Kia dianga, bhanga nguzu phala kuijiia kiambote o muthu iú. Se u mona kuila muéne muthu ua iibha, u tena ku kuatekesa mon’ê mu ku mu londekesa ibatulu mu divulu, Os Jovens Perguntam — Respostas Práticas, Volume 2. Sota ku bhita dingi thembu ni mon’ê mu izuua ia-nda kaiela. Tonginina kiambote o ukexilu ua mon’ê kioso ki mu boka, ni kioso ki mu bhanga itonokenu ku muiji. Se ulondekesa muanhu ni henda kioso ki ua mu zuela ni mon’ê, muéne ua-nda mona kuila eie ua mu zolo, ni kuila ua mesena o mbote iê. Kiki kia-nda mu kuatekesa ku kaiela o itendelesu i ua mu bhana, ka-nda mesena dingi kubhanga ukamba ni athu a iibha.

¹⁶ Ni muanhu ni henda ioso, etu tu tena ku kuatekesa ué o athu a mu kata ni athu a  mu divua kia iibha mukonda dia ku kamba salu, ni iá ka mu tendela kiambote o milongi ia Bibidia. O kulondekesa o Mak’â Nzambi phala ‘ku iukisa ia bhengalala,’ ku bheka mabesá avulu ku mundu ua Jihova.

17. Mukonda diahi tua tokala ku xikina o kitendelesu kia tu bhana ni kisangusangu?

¹⁷ “Kioso kia tu [bazela,] mu kithangana kienhokio tu ki mona kuiibha, ki tu ki uabhela, kana.” Maji-phe “kuila kia bhiti kiá, ki bhekela ió oso a a [bazela] mu ku a longa, kutambula kisakidilu kia muenhu uaiuka, ua paze.” (Jihe. 12:11) Jiphange javulu amba kuila, o ku a bazela ku jitata jâ kia kuatekesa. O ku xikina ku tu bazela kua Jihova bhu kaxi ka tufunga, ki tu kuatekesa ku kolokota mu njila ia muenhu ua kalelaku.—Jisa. 4:13.

18, 19. (a) Mukonda diahi o kitendelesu ki tu sanga mu divulu dia Jisabhu 18:13, kima kia tokala phala “kuijidisa uendelu uambote”? (b) Se o tufunga a bhana itendelesu ni kulenduka ni henda, ihi ia-nda bhanga o muthu ua te kituxi?

¹⁸ Phala ku bazela mu ukexilu uambote ku bhinga uhete. Jihova ua tu tendelesa ku bazela ni “kuijidisa uendelu uambote.” (2 Tim. 3:16) Kiki ki lombolola kuila, tua tokala kulondekesa o itumu ia Bibidia, kioso ki tu bhazela. Tu tena kulondekesa o kitumu ki tu sanga mu divulu dia Jisabhu 18:13: “Ku vutula kua lusolo, kuila ioso kiluua u ivua, ió uôua ni ku di bhekela sonhi; kota o kudianga kuividila.” Mu kiki, se o tufunga evua kuila saí phange ua te kituxi, ande dia ku mu bazela a tokala ku tongolola kiambote o maka. (Mate. 13:14) Kioso kia-nda tongolola kiambote o maka, ene a tena ku bazela ni “kuijidisa uendelu uambote.”

¹⁹ O Mak’â Nzambi a tendelesa o tufunga ku bazela akuâ ni ‘kulenduka.’ (Tanga 2 Timote 2:24-26.) O muthu u ta kituxi, u tena ku bhangesa o athu ku bhukumukina o dijina dia Jihova mba ku luualesa akuâ. Maji se o kafunga u bazela muthu ni njinda, ka-nda tena ku mu kuatekesa. Se o tufunga a kaiela o ‘kulenduka kua Nzambi’ kioso kia bazela muthu, ene a kuatekesa o muthu iú ku diela o ituxi iê.—Loma 2:4.

20. Itendelesu iebhi ia tokala ku kaiela o jitata kioso kia mu bazela o tuana tuâ?

²⁰ O jitata a tokala ku kumbidila o itendelesu ia Bibidia ia ku ‘sasa o tuana ni ku a beta, ni ku a longa kioso kia tumu Jihova.’ (Efe. 6:4) O tata ka tokala kuívua ngó mbangi imoxi phala ku bazela mon’ê ua diiala. O usuéia ki uala ni kididi ku muiji ua Jikidistá. “[Jihova] ua vula o kukuatela henda ni kulendukila,” mu kiki o jitata a tokala ku kaiela o phangu ia Jihova kioso kia mu bazela o tuana tuâ.—Tiia. 5:11.

21, 22. Izuelu iebhi mu divulu dia Jisálamu 119:97-104, ilombolola kiebhi ki u divua kioso ki uivua o Mak’â Nzambi?

²¹ Saí ithangana o selevende ia Nzambi ua zuela se mukonda diahi muéne ua zolele o kitumu kia Jihova. (Tanga Jisálamu 119:97-104.) Mukonda dia ku di longa o kitumu kia Jihova muéne ua kituka njimu, ua tendela kiambote o ima. Kioso kia kumbidila o itendelesu ia Bibidia, muéne ka bhange o ima ia iibha ia kexile mu bhanga akuâ. Muéne ua uabhele kiavulu ku di longa o Bibidia. Muéne ua solele ku belesela o Nzambi ua mu bhanene o itendelesu ia mu kuatekesa ku muenhu uê.

²² O kuila eie u bhana valolo ku ‘Mak’â Nzambi?’ Ene a tena ku ku kuatekesa ku suínisa o kixikanu kiê kuila Nzambi ua-nda kumbidila o kikanenu kiê. O Bibidia i bhana itendelesu i tu kuatekesa ku lenga o ituxi i tu bhangesa ku texi o muenhu uetu. Se u kala ni uhete ua ku longa ni Bibidia, u tena ku kuatekesa akuenu ku sanga o njila iambata ku muenhu ua kalelaku. Tua tokala kulondekesa o Bibidia mu maukexilu oso u tua di longo, kioso ki tuia ni ku sidivila Nzambi ietu, Jihova.