1. Engvângin nge Pathian Thu kan rin pumhlûm tlat ang?

KOHHRAN upate’n Bible zirlai chu thu hrilh rawngbâwlnaa tel tûra a tlin leh tlin loh an ngaihtuah hunah heti hian an inzâwt a ni, ‘A ṭawngkam chhuak chuan Bible hi Pathian thâwk khum Thu a ni tih a rinzia a târ lang em?’ tiin. * Lalram thuchhuahtu ni duhte tân—a nihna takah chuan Pathian chhiahhlawh zawng zawngte tân—a târ lang chiang hle tûr a ni. Engvângin nge? Pathian Thu kan rin tlatna leh thu hrilh rawngbâwlnaa kan hman thiamna chuan mi dangte chu Jehova hria a, chhandamna hmu tûra ṭanpui tûrin min pui ang.

2. Engvângin nge kan ‘thil zir leh hriat chianahte chuan kan awm reng ang’?

² Tirhkoh Paula chuan Timothea hnênah: “I thil zir leh i thil hriat chianahte chuan awm reng rawh,” tia lehkha a thawn khân Pathian Thu a pawimawhna chu a sawi uar a. Paula’n “thil” tia a sawi hi chanchin ṭhaa rinna nei tûra Timothea chêttîrtu Bible thutakte a ni. Chûng thutakte chuan tûn laiah pawh kan chungah nghawng a nei a, ‘chhandamna hmu khawpa fing’ taka awm reng tûrin min ṭanpui a ni. (2 Tim. 3:14, 15) Bible hi Pathian aṭanga lo chhuak a nihzia mi dangte hnênah kawhhmuh nân Paula thusawi a dawta Bible châng hi kan kawhhmuh ṭhîn a; mahse, 2 Timothea 3:16-a thute chu keini pawhin a mi mal takin kan hlâwkpui thei a ni. (Chhiar rawh.) Kimchang zâwkin chu Bible châng chu i lo ngaihtuah ang u. Chutianga tihna chuan Jehova zirtîrna zawng zawngte chu a ‘dik’ tih kan rinna a tinghet dâwn a ni.—Sâm 119:128.

3-5. (a) Pentikost-a Petera thusawi kha mipuiin engtin nge an chhân lêt a, engvângin nge? (b) Engvângin nge Thessalonika khuaa mi tam tak chuan thutak an pawm? (c) Kan thu hrilhna chungchânga engin nge tûn laia mite rilru khawih mai thei?

³ Isua chuan Israel hnam hnênah: “In hnênah zâwlnei  te, mi fing te, Dân zirtîrtute [“mipui zirtîrtute,” NW] ka rawn tîr dâwn,” tiin a hrilh a. (Mt. 23:34, C.L. Re-edited) Chu chu an rawngbâwlnaa Pathian Lehkha Thu hmang tûra a hrilh a zirtîrte chungchâng a sawina a ni. C.E. 33 Pentikost khân chûng “mipui zirtîrtute” zînga pakhat, tirhkoh Petera chuan Hebrai Pathian Lehkha Thu aṭanga thu tam tak la chhuakin Jerusalema mipui pungkhâwmte hnênah thu a sawi a. Petera’n chûng thute a hrilhfiah dân an ngaihthlâk hnu chuan, mi tam tak chu “thinlunga chhun ang an lo ni ta a.” An thil sual lo tih tawhte chu an sim a. Pathian ngaihdamna zawngin, mi sângthum lai chu Kristian an lo ni ta a ni.—Tirh. 2:37-41.

⁴ Mipui zirtîrtu dang, tirhkoh Paula chuan Jerusalem aṭanga hmun hla takah chanchin ṭha a hril a. Entîr nân, Makedonia ram Thessalonika khuaa Judate inkhâwmna ina awmte chu thu a hrilh a. Paula chuan Chawlhni vawi thum lai chu “Pathian Lehkha Thu aṭangin khûn taka chhûtpuiin, Krista chu hrehawm tuar tûr rêng a nihzia te, mitthi zîng ata pawh tho leh tûr rêng a nihzia te chu a hrilhfiah a.” Chu chuan eng nge a rah chhuah? “Grik mipui tam tak” ang bawkin “[Juda mi] ṭhenkhat chu thlêmthlûkin an awm a,” ringtu an lo ni ta a ni.—Tirh. 17:1-4.

⁵ Tûn laia Pathian chhiahhlawhte Bible hman dân chuan mi tam takte rilru a khawih hle a. Switzerland rama in neitu pakhat chuan kan unaunu pakhatin Bible châng a chhiarsak a ngaihthlâk hnuah, “Eng kohhran nge in nih?” tiin a zâwt a. “Kei leh ka ṭhiannu hi Jehova Thuhretute zînga mi kan ni,” tia a chhân chuan, chu pa chuan: “Chu chu hre tûr ka ni asin maw le. Jehova Thuhretute ni lo tudang nge Bible chhiar tûra ka ina lo kal tehlul ang?” tiin a sawi a ni.

6, 7. (a) Engtin nge kohhrana zirtîrtute chuan Bible chu ṭha taka an hman theih? (b) In lama Bible zirpuinaah engvângin nge Bible chângte thiam taka hman a pawimawh êm êm?

⁶ Kan zirtîrnaah engtin nge Bible chu kan hman lehzual theih ang? Kohhranah platform aṭanga zirtîr theihna chanvo i neih chuan, Bible chângte chu hmang ang che. Bible châng pawimawh laite sawi chhuah mai emaw, computer aṭanga print chhuah sa chhiar chhuah mai emaw, a nih loh leh electronic thil mobile leh tablet aṭang emawa chhiar mai ai chuan, i Bible aṭang ngeia keuvin chhiar la, ngaithlatute pawh chutianga ti ve tûrin fuih rawh. Tin, Jehova hnaih lehzual tûra anmahni ṭanpui nân Bible chângte awmzia hrilhfiahna hun insiam bawk ang che. Ngaithlatute tihhlim nân maia tehkhin thu chipchiar tak leh thiltawnte sawi ṭeuh ai chuan, hunte chu Pathian Thu hrilhfiah nân hmang zâwk rawh.

⁷ In lama mite Bible kan zirpui hunah eng nge kan hriat reng ngai? Kan Kristian thu leh hla chhuahte kan hman hian, Bible châng târ lante chu hmaih lo tûrin kan fîmkhur tûr a ni a. Zirlai chu Bible châng târ lante chhiar tûra fuihin, a awmzia hre thiam tûrin kan ṭanpui tûr a ni. Chu chu engtin nge kan tih ang? Hrilhfiah duah avânga zirna chu lecture inpêkna anga chantîr lovin, zirlai chu Bible chângte chunga a ngaih dân sawi chhuak tûra fuih zâwk tûr a ni a. A thil rin tûr emaw, tih dân tûr emaw hrilh ai chuan, thu tlûkna dik a siam theihna tûra ṭanpui nân, ṭha taka siam zawhnate kan zâwt thei a ni. *

8. Paula chuan chhûng lamah eng nge a do ngai?

⁸ “Thiam loh chantîr” chungchâng chu Kristian upate tih tûr angin kan thlîr ṭhîn a. A nihna takah chuan ‘thil tisualtute zilhhau,’ a nih loh leh thiam loh chantîr chu upate mawhphurhna a ni rêng a ni. (1 Tim. 5:20; Tit. 1:13, 14) Mahse, mahni thiam loh inchantîr pawh thil pawimawh tak a ni a. Paula chu chhia leh ṭha hriatna thiang tak nei, Kristian entawn tlâk tak a ni. (2 Tim. 1:3, 4) Chuti chung pawhin: “Ka taksa  pêngahte hian dân danglam a awm tih ka hria, chu chuan ka rilru dân a do va, . . . sualna dân awm hnênah chuan salah mi hruai ṭhîn,” tiin a ziak a ni. A chung leh a hnuai thute zirna aṭang chuan Paula’n amaha sual awm thunun tûra a beih ngai chu kan hre thiam lehzual ang.—Rom 7:21-25 chhiar rawh.

9, 10. (a) Paula’n a hmachhawn a chak lohna chu eng nge ni thei ang? (b) Paula sual do dân ni theia lang chu eng nge ni?

⁹ Paula chuan eng chak lohna nge hneh a tum? Chûng chu sawi lang chiah lo mah se, Timothea hnênah “sawisatu” a nih ṭhin thu a ziak a. (1 Tim. 1:12, 13) Paula chu a inleh hmain Kristiante chungah nasa takin a thinur a. Krista hnungzuite chunga a rilru put hmang chungchângah: “An chungah ka kawlh êm êm a,” tiin a inpuang a ni. (Tirh. 26:11) Paula chuan a thinurna thunun dân a zir a; mahse, a rilru leh ṭawngkam thunun tûra a beih hrâm hrâm a ṭûl châng erawh a awm ngei ang. (Tirh. 15:36-39) Engin nge hlawhtling tûra ṭanpui?

¹⁰ Paula chuan Korinth khuaa Kristiante hnêna a lehkha thawnah mahni inzilhau dân a târ lang a. (1 Korinth 9:26, 27 chhiar rawh.) A chak lohna laite chu ṭha taka tinzâwn thlarau lam kut tumin a hnek a ni kan ti thei ang. Chutianga ti tûr chuan Pathian Lehkha Thu-a zilhnate chu zawngin, nunpui a tumna kawnga Jehova ṭanpuina a dîl ang a, hmasâwn tûrin a thawkrim hle ngei bawk ang. * Kan ṭhat famkim lohna rilru put hmang chu chutianga kan do ve avângin, a entawn tûr siam chu kan hlâwkpui thei a ni.

11. Thutak kawng kan zawh leh zawh loh engtin nge mahni kan ‘in fiah ṭhin’ theih?

¹¹ Pathian kan biaknaah hian kan inthlahdah ngai tûr a ni lo. Thutak kawng kan zawh tak zet tih kan “in fiah ṭhîn” zâwk tûr a ni. (2 Kor. 13:5) Kolossa 3:5-10 ang chi Bible chângte kan chhiar hunah: ‘Ka ngaihtuahna sual tihlum tûrin ka thawkrim nge ni a, nungchang lamah ka tlahniam zâwk? Internet ka hmanin, nungchang ṭhat lohna lam hawi site a lo lan hunah ka chhuak vat nge ni a, Web site ṭha lote chu ka zawng zâwk?’ tiin kan inzâwt thei a ni. Hetianga Pathian Thua zilhnate mi mal taka nunpuina hian ‘menga ngaihven’ reng tûrin min ṭanpui ang.—1 Thes. 5:6-8.

12, 13. (a) ‘Zilhna,’ a nih loh leh thil siam ṭhatnaah chuan eng nge kan tum tlat tûr chu ni a, engtin nge chutianga tihnaah chuan Isua entawn tûr siam chu kan zui theih ang? (b) Mi dangte nêna kan inkâr ‘siam ṭhatnaah’ eng ang ṭawngkamin nge hmun chang lo?

¹² Grik thu mal “zilh” tia lehlin hi “siam ṭha, ti dik, dinhmun ṭha neih lêttîr” tihna a ni a. Keimahni emaw, kan thiltih emaw hre sualtute nêna kan inkâr siam ṭha tûra hma kan lâk a ngaih châng a awm ṭhîn a ni. Entîr nân, Juda sakhaw hruaitute chuan Isua chu “chhiahkhawntute leh mi sualte” chunga ngilneihna a lantîr avângin an sawisêl a. Isua chuan: “Mi chakte chuan dâktawr an ngai lo va, mi bawrhsâwmte zâwkin an ngai a ni. Chutichuan, ‘Inthawina duh lovin khawngaihna ka duh e,’ tih hi, a awmzia va zir rawh u,” tiin a chhâng a ni. (Mt. 9:11-13) Ani chuan mi zawng zawng hnênah dawhthei tak leh ngilnei takin Pathian thu a hrilhfiah a. Chuvâng chuan, mi inngaitlâwmte chuan Jehova chu “Pathian lainatnaa khat, mi khawngaih thei tak, thin nel tak, ngilneihna leh thu tak ngah” a ni tih an hria a ni. (Ex. 34:6) “Zilh,” a nih loh leh siam ṭha tûra Pathian Fapa thawhrimna chu chhâng lêtin, mi tam tak chuan chanchin ṭha chu an ring ta a ni.

¹³ Isua entawn tûr siam chuan mi dangte kan ṭanpui dân tûr min zirtîr a. Kan chunga thinur tuemaw chuan ‘Nang nêna kan inkâr hi siam ṭhat ka duh a ni,’ tiin bung takin a sawi mai thei a. Mahse, chutiang tih dân chu 2 Timothea 3:16 thuin a tum a ni lo. “Pathian Lehkha Thu zawng zawng” chuan mi dangte rilru tûr ngaihtuah lo va duh ang anga ṭawng tûrin thuneihna  min pe lo. ‘Khandaih chhun ang’ maiin, mi dangte sawisêlna chuan mite a tina a, hlâwkna a thlen khât hle a ni.—Thuf. 12:18.

14-16. (a) Engtin nge upate chuan mi dangte chu an buainate chingfel tûr zâwnga ṭanpui nân an “zilh,” a nih loh leh an siam ṭhat theih? (b) Engvângin nge naupangte enkawl seilennaah Pathian Lehkha Thu anga “zilh” chu a pawimawh êm êm?

¹⁴ A nih chuan, ‘zilhnaah’ chuan engtin nge dawhtheihna leh ngilneihna kan lantîr theih? Entîr nân, nupa tuak khat chu an inhnial reng ṭhin avângin, Kristian upa pakhat hnênah ṭanpuina an ngên angah han ngai ta la. Upa chuan eng nge a tih tâk ang? Ani chuan ṭan lam nei lovin, nupate chu Bible thu bulte a sawipui thei a, The Secret of Family Happiness tih bu bung 3-naa thu chu a hmang pawh a ni thei. Upain sawihona a kaihhruai laiin, nupate chuan an pahniha an nunpui lehzual tûr zilhna thu chu an lo hre chhuak thei a. A hnuah upa chuan an chhûngkaw dinhmun zâwtin, a ṭûl chuan ṭanpuina pêk belh pawh a duh mai thei a ni.

¹⁵ Engtin nge nu leh pate chuan an fate chu thlarau lama tichak tûrin an “zilh,” a nih loh leh an siam ṭhat theih ang? I fanu tleirâwl chu ṭhian ṭha lo pumpelh tûra ṭanpui duh angah han inmitthla teh. A hmasain, thil nih dân chu i hre phawt tûr a ni a. Tichuan, ngaihtuahawm nia i hriat chuan, amah chu i be thei a, Questions Young People Ask—Answers That Work, Volume 2-a thu awmte pawh i hmang thei ang. A hnu lamah amah chu hun tam lehzual i hmanpui thei a. Thu hrilh rawngbâwlnaah emaw, chhûngkaw intihhlimnaah emaw a tel huna a rilru put dân chu i chîk thei bawk a ni. Dawhtheihna leh ngilneihna i lantîr chuan, i fanu chuan i ngaihsakna duhawm tak chu a lo hre thiam ang. I zilhna chu nunpui tûra chêttîrin a awm thei ang a, a nunah thil ṭha lote chu a pumpelh thei ang.

¹⁶ Chutiang dawhtheihna leh ngilneihna lantîr chungin, an hrisêlna lungkhamtute, hna an chân avânga rilru hahte, a nih loh leh Bible zirtîrna engemaw tak hre thiam lote chu kan ṭanpui  thei a. Pathian Thu hmanga ‘zilhna,’ a nih loh leh siam ṭhatna chuan Jehova mite chungah hlâwkna nasa tak a thlen a ni.

17. Engvângin nge zirtîrna, a nih loh leh thununna chu lâwm taka kan pawm ang?

¹⁷ Bible-a 2 Timothea 3:16-a “zirtîr” tia lehlin thu hian awmze zau tak a nei a. Entîr nân, “thunun,” “kaihruai,” “siam ṭha,” leh “hrem” tih awmziate a nei a ni. “Thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn.” Mahse, “tuar hnuah erawh chuan chu mia sawizawia awmte tân chuan rah thlamuanawm tak, felna chu a chhuahsak ṭhîn.” (Heb. 12:11) Kum puitling Kristian zawng zawng deuhthaw chuan ringtu an nu leh pate hnên aṭanga zirtîrna, a nih loh leh thununna an dawn chuan a ṭanpui tih an pawm a. Tin, Kristian upate hmanga Jehova pêk zirtîrna pawmna chuan nunna kawngah min kaltîr a ni.—Thuf. 4:13.

18, 19. (a) “Felna zirtîr” tûrin engvângin nge Thufingte 18:13 thu hi a pawimawh êm êm? (b) Upate’n thuhnuairawlh tak leh hmangaih taka thil tisualtute an dâwrna chuan, eng rah nge a chhuah ṭhin?

¹⁸ Thununna sâwt tak pe tûr chuan thiam a ngai a. Jehova chuan Kristiante chu ‘fel taka’ zirtîrna, a nih loh leh thununna pe tûrin a hrilh a ni. (2 Tim. 3:16) Chuvângin, Bible thu bulte chu min kaihruaituah kan hmang tûr a ni. Chutiang thu bul pakhat chu Thufingte 18:13-ah hmuh theih a ni: “Ngaihthlâka hmâa chhân chu a tân âtthlâk nihna leh mulphona a ni,” tih hi. Chuvângin, upate’n sual pawi tak titu nia ngaih mi tuemaw an biak a ṭûl hunah thil nih dân zawng zawng chu chipchiar takin an zawng chhuak phawt tûr a ni. (Deut. 13:14) Chu mi hnuah chauh chuan ‘felnain an zirtîr,’ a nih loh leh an thunun thei ang.

¹⁹ Chu bâkah, Pathian Thu chuan Kristian upate chu ‘thuhnuairawlh taka’ mi dangte siam ṭha tûrin a hrilh a. (2 Timothea 2:24-26 chhiar rawh.) Tuemaw chuan Jehova hming a tichhiain, pawisawi lote a tawrhtîr pawh a ni ngei ang. Chuti chung chuan, chutianga mi a zilh laia thinur upa chuan ani chu a ṭanpui lo vang. Mahse, Upate’n ‘Pathian ṭhatna’ an entawn chuan, thil tisualtu chu sim tûrin an chêttîr mai thei a ni.—Rom 2:4.

20. Nu leh pate chuan an fate an thunun hunah eng thu bul nge an nunpui ang?

²⁰ ‘Lalpa thununnaah leh zilhnaa’ an fate an enkawlnaah, nu leh pate chuan Bible thu bulte an nunpui tûr a ni a. (Eph. 6:4) Pa ber chuan a fapa khawsak dân chungchângah leh lam thusawi chauh ṭanchhanin a hrem tûr a ni lo. Kristian chhûngkuaah chuan nasa taka thinurnain hmun a chang lo. ‘Jehova chu khawngaihnaa khat leh zahngai thei tak’ a ni a, ṭhalaite thunun tûra mawhphurhna neite chuan chûng mize duhawm tak chu lantîr an tum tlat tûr a ni.—Jak. 5:11.

21, 22. Sâm 119:97-104-a lang eng ṭawngkamin nge Jehova Thu chunga i rilru put hmang chu târ lang ṭha ber?

²¹ Pathian ngaihsak mi pakhat chuan ṭum khat chu Jehova dân a ngainat chhan a târ lang a. (Sâm 119:97-104 chhiar rawh.) Bible a zirna aṭangin, finna leh hriat thiamna a nei a ni. Bible thu bulte zawmna chuan mi dangte tawrhna thlentu kawng dik lo pumpelh tûrin a ṭanpui a. A tân chuan Pathian Lehkha Thu zir chu a nuamin, a lungâwithlâk a ni. Ani chuan a zirtîrna hmanga hlâwkna tam tak petu, Pathian thu âwih chu a tum tlat a ni.

²² “Pathian Lehkha Thu zawng zawng” chu i ngaihlu em? Chu chuan Pathianin a thiltum a hlen dâwn tih i rinna chu i tinghet a. Pathian thlarauva thâwk khum a zilhna thu chuan thihna thlentu thil sual tih fona lakah a vênghim che a ni. Tin, Pathian Thu chu thiam taka hrilhfiahin, mi dangte chu nunna kawng zawh tûr leh chuta kal reng tûr chuan i ṭanpui thei a ni. Fing ber leh hmangaihna ngah ber Pathian Jehova rawng kan bâwl lai hian “Pathian Lehkha Thu zawng zawng” chu i hmang ṭangkai hle ang u. (w13-E 04/15)