1. Għala jrid ikollna fiduċja sħiħa fil-Kelma t’Alla?

META l-anzjani jikkunsidraw jekk student tal-Bibbja jikkwalifikax biex jipparteċipa fil-ministeru tal-għalqa jistaqsu lilhom infushom, ‘Il-mod kif jesprimi ruħu l-individwu juri li hu jemmen li l-Bibbja hija l-Kelma mnebbħa minn Alla?’ * Għal xi ħadd li jixtieq isir pubblikatur tas-Saltna, fir-realtà għall-qaddejja kollha t’Alla, it-tweġiba għandha tkun ċara—iva. Għala? Meta jkollna fiduċja fil-Kelma t’Alla u nitgħallmu kif nużawha tajjeb fil-ministeru, inkunu nistgħu ngħinu lil oħrajn isiru jafu lil Ġeħova u jiksbu s-salvazzjoni.

2. Għala għandna ‘nkomplu f’dak li tgħallimna’?

² L-appostlu Pawlu enfasizza kemm hi importanti l-Kelma t’Alla meta kiteb lil Timotju: “Kompli f’dak li tgħallimt u li emmint għax sirt konvint li hu minnu.” “Dak” jirreferi għall-veritajiet Bibliċi li Timotju kien tgħallem u li qanqluh ipoġġi l-fidi fl-aħbar tajba. Dawn il-veritajiet għandhom l-istess effett fuqna llum, u jkomplu jgħinuna nibqgħu ‘għorrief għas-salvazzjoni.’ (2 Tim. 3:14, 15) Spiss nużaw il-kliem taʼ Pawlu f’vers 16 biex nuru lil oħrajn li l-Bibbja ġejja minn Alla, imma nistgħu niksbu benefiċċju personali minn dan il-kliem. (Aqra t-2 Timotju 3:16.) Ejja nikkunsidraw dan il-vers f’iktar dettall. Jekk nagħmlu hekk, se nsaħħu l-fiduċja tagħna li t-tagħlim kollu taʼ Ġeħova hu ‘tajjeb.’—Salm 119:128.

3-5. (a) Folla nies kif irreaġixxew għat-taħdita li ta Pietru f’Pentekoste, u għala? (b) Ħafna nies f’Tessalonika għala aċċettaw il-verità? (ċ) In-nies illum b’hiex għandhom mnejn jibqgħu impressjonati dwar il-ministeru tagħna?

³ Ġesù qal lill-ġens t’Iżrael: “Qed nibagħtilkom profeti,  għorrief, u nies li jgħallmu fil-pubbliku.” (Mt. 23:34) Ġesù kien qed jitkellem dwar id-dixxipli tiegħu. Hu kien għallimhom jużaw l-Iskrittura fil-ministeru tagħhom. F’Pentekoste tas-sena 33 E.K., wieħed minn dawn in-“nies li jgħallmu fil-pubbliku,” l-appostlu Pietru, ta taħdita lil folla kbira f’Ġerusalemm li matulha kkwota diversi siltiet mill-Iskrittura Ebrajka. Pietru spjega dawn l-iskritturi lis-semmiegħa tiegħu, u kliemu “nifdilhom qalbhom.” Huma nidmu mid-dnubiet li kienu għamlu fil-passat. Madwar tlett elef minnhom talbu lil Alla jaħfrilhom u saru Kristjani.—Atti 2:37-41.

⁴ L-appostlu Pawlu, li wkoll kien jgħallem fil-pubbliku, ipprietka l-aħbar tajba lil hinn minn Ġerusalemm. Pereżempju, fil-belt Maċèdonija taʼ Tessalonika tkellem maʼ dawk li kienu qed iqimu f’sinagoga. Għal tliet Sabatijiet, Pawlu “rraġuna magħhom mill-Iskrittura u spjega u ta prova permezz tar-referenzi li kien meħtieġ li l-Kristu jbati u mbagħad iqum mill-imwiet.” X’kien ir-riżultat? “Xi wħud minnhom [mil-Lhud] emmnu,” kif għamlu “kotra kbira taʼ Griegi.”—Atti 17:1-4.

⁵ Ħafna nies illum jibqgħu impressjonati bil-mod kif il-qaddejja t’Alla jużaw il-Bibbja. Wara li inkwilin fl-Iżvizzera ta widen lil oħt hekk kif qratlu skrittura, hu staqsieha: “Lil min tirrappreżentaw?” Hi wieġbet: “Aħna tnejn mix-Xhieda taʼ Ġeħova.” Qalilha: “Missni bsart. Minbarra x-Xhieda taʼ Ġeħova, min jiġi d-dar biex jaqrali mill-Bibbja?”

6, 7. (a) Dawk li jgħallmu lill-kongregazzjoni, kif jistgħu jużaw tajjeb il-Bibbja? (b) Għala hu tant importanti li nużaw l-Iskrittura b’mod effettiv waqt studju tal-Bibbja fid-dar?

⁶ Kif nistgħu nużaw il-Bibbja iktar bis-sħiħ fit-tagħlim tagħna? Jekk għandek il-privileġġ li tgħallem lill-kongregazzjoni minn fuq il-platform uża referenzi speċifiċi mill-Bibbja. Minflok maʼ tgħid l-iskritturi prinċipali fi kliemek jew taqrahom minn karta printjata jew minn fuq xi apparat elettroniku, iftaħ il-Bibbja u aqra minnha, u ħeġġeġ lill-udjenza biex tagħmel bħalek. Ukoll, ħu l-ħin biex tapplika l-versi b’tali mod li jgħin lill-udjenza tersaq eqreb lejn Ġeħova. Minflok ma tuża tixbihat komplikati u esperjenzi li l-uniku skop tagħhom hu li jnisslu tbissima, uża l-ħin biex tiftaħ fuq il-Kelma t’Alla.

⁷ Xi rridu nżommu f’moħħna waqt li nkunu qed nikkonduċu studju tal-Bibbja fid-dar? Hekk kif nużaw il-pubblikazzjonijiet Kristjani tagħna, irridu noqogħdu attenti li ma naqbżux ir-referenzi tal-Bibbja. Għandna nħeġġu lill-istudent biex jaqra l-iskritturi ċitati u ngħinuh jifhem xi jfissru. Kif? Mhux billi nispjegaw fit-tul, tant li nbiddlu l-istudju f’serje taʼ prietki, imma billi nħeġġu lill-istudent jesprimi ruħu. Minflok ma ngħidulu x’għandu jemmen jew jagħmel, nistgħu nistaqsu mistoqsijiet maħsubin sew li se jgħinuh jasal għal konklużjonijiet tajbin. *

8. Pawlu maʼ xiex kellu jissielet?

⁸ Spiss inħarsu lejn it-‘twiddib’ bħala xi ħaġa li għandhom jagħmlu l-anzjani Kristjani. U huwa minnu li l-indokraturi għandhom ir-responsabbiltà li ‘jwiddbu lil dawk li jipprattikaw id-dnub.’ (1 Tim. 5:20; Titu 1:13) Imma hu importanti wkoll li nwiddbu lilna nfusna. Pawlu kien Kristjan eżemplari li kellu kuxjenza nadifa. (2 Tim. 1:3) Xorta waħda kiteb: “Fil-membri taʼ ġismi nara liġi oħra tiġġieled kontra l-liġi taʼ moħħi u tjassarni għal-liġi tad-dnub.” Jekk nistudjaw il-kuntest taʼ dan il-kliem, se nifhmu aħjar dak li kellu jagħmel Pawlu biex jissielet  kontra d-dgħufijiet tiegħu.—Aqra Rumani 7:21-25.

9, 10. (a) X’setgħu kienu xi dgħufijiet li Pawlu ssielet kontrihom? (b) Pawlu kif x’aktarx li baqaʼ jiġġieled kontra dawn id-dgħufijiet?

⁹ Pawlu liema dgħufijiet stinka biex jegħleb? Ma qalx x’kienu, imma lil Timotju kitiblu li qabel kien “raġel insolenti.” (1 Tim. 1:13) Qabel ma sar Kristjan, Pawlu kien jiħodha qatta bla ħabel kontra l-Kristjani. Rigward kif ħassu dwar is-segwaċi taʼ Kristu, hu ammetta: “Kont mitluf bir-rabja kbira li kelli għalihom.” (Atti 26:11) Pawlu tgħallem kif jikkontrolla t-tempra, iżda kultant żgur li kellu jissielet biex jikkontrolla s-sentimenti u l-kliem tiegħu. (Atti 15:36-39) X’għenu jirnexxi?

¹⁰ Meta kiteb lill-Kristjani f’Korintu, Pawlu spjega x’kien jagħmel biex jibqaʼ jwiddeb lilu nnifsu. (Aqra l-1 Korintin 9:26, 27.) Kien jieħu azzjoni serja kontra d-dgħufijiet tiegħu. X’aktarx li hu kien ifittex pariri fl-Iskrittura, jitlob lil Ġeħova jgħinu japplikahom, u jħabrek biex jitjieb. * Nistgħu nibbenefikaw mill-eżempju tiegħu għax aħna niġġieldu bl-istess mod kontra t-tendenzi midinba tagħna.

11. Kif nistgħu ‘nibqgħu ngħarblu’ lilna nfusna biex naraw jekk aħniex mexjin fit-triq tal-verità?

¹¹ Qatt m’għandna naħsbu li nistgħu nieqfu nissaraw kontra d-dgħufijiet tagħna. Minflok, għandna ‘nibqgħu ngħarblu’ lilna nfusna biex nagħmlu ċert li tassew qed nimxu fit-triq tal-verità. (2 Kor. 13:5) Meta naqraw skritturi bħal Kolossin 3:5-10 nistgħu nistaqsu lilna nfusna: ‘Qed nistinka biex immewwet it-tendenzi midinba tiegħi jew qed niddgħajjef moralment? Meta nuża l-Internet u titlaʼ Websajt immorali, nagħlaqha mill-ewwel jew noqgħod infittex Websajts mhux xierqa?’ Jekk napplikaw il-parir tal-Kelma t’Alla b’mod persunali, se niġu megħjunin “nibqgħu mqajmin u f’sensina.”—1 Tess. 5:6-8.

12, 13. (a) X’għandha tkun il-mira tagħna meta ‘nikkoreġu,’ u kif nistgħu nsegwu l-eżempju taʼ Ġesù meta nagħmlu dan? (b) Liema tip taʼ diskors ma jkunx f’loku meta nkunu qed ‘nikkoreġu’ lil ħaddieħor?

¹² It-terminu Grieg tradott “tikkoreġi” jfisser “li tirranġa, tiddritta, u ġġib f’kundizzjoni xierqa u tajba.” Xi kultant ikollna nikkoreġu l-affarijiet maʼ wħud li jifhmu ħażin dak li ngħidu jew nagħmlu. Pereżempju, il-mexxejja reliġjużi Lhud gergru għax Ġesù kien qalbu tajba “mal-kolletturi tat-taxxi u l-midinbin.” Ġesù wiġibhom: “Nies f’saħħithom m’għandhomx bżonn tabib, imma l-morda iva. Morru, mela, u tgħallmu xi jfisser dan, ‘Ħniena rrid, u mhux sagrifiċċju.’” (Mt. 9:11-13) Bil-paċenzja u b’qalb tajba, hu spjega l-kliem t’Alla lil kulħadd. Għaldaqstant, uħud umli saru jafu lil Ġeħova bħala “Alla ħanin u grazzjuż, bil-mod biex jirrabja u għani fil-qalb tajba bl-imħabba u l-verità.” (Eżo. 34:6) L-isforzi tal-Iben t’Alla biex ‘jikkoreġi’ wasslu lil ħafna nies biex ipoġġu l-fidi fl-aħbar tajba.

¹³ L-eżempju taʼ Ġesù jgħallimna kif għandna ngħinu lil ħaddieħor. Xi ħadd li jħossu mweġġaʼ għandu mnejn jgħid b’ton kemxejn aħrax, ‘Għandi bżonn nikkoreġik dwar xi ħaġa.’ Imma ma nkunux qed insegwu l-ħsieb li nsibu fit-2 Timotju 3:16 jekk inkellmu lil xi ħadd b’dan il-mod. “L-Iskrittura kollha” ma tagħtiniex id-dritt li nċanfru lil oħrajn. Bħad-“daqqiet taʼ sejf,” kritika ħarxa spiss tikkaġuna ħafna wġigħ u rari ġġib benefiċċji.—Prov. 12:18.

14-16. (a) L-anzjani kif jistgħu ‘jikkoreġu’ b’tali mod li jgħinu lil oħrajn isolvu l-problemi tagħhom? (b) Meta trabbi t-tfal, għala hu importanti ħafna li ‘tikkoreġihom’ b’mod Skritturali?

 ¹⁴ Allura kif nistgħu nuru paċenzja u qalb tajba meta nkunu qed ‘nikkoreġu’ lil xi ħadd? Ejja ngħidu li koppja miżżewġa jitolbu l-għajnuna taʼ anzjan Kristjan għax spiss jiġġieldu. X’għandu jagħmel l-anzjan? Mingħajr ma jżomm maʼ ħadd, jistaʼ jirraġuna mal-koppja fuq prinċipji tal-Bibbja, forsi billi juża dawk li jinsabu f’kapitlu 3 tal-ktieb Is-Sigriet taʼ l-Hena fil-Familja. Hekk kif l-anzjan imexxi d-diskussjoni, ir-raġel u l-mara jkunu jistgħu jaraw liema pariri għandhom japplikaw iktar bis-sħiħ individwalment. Wara ftit taż-żmien, l-anzjan jistaqsi lill-koppja kif sejrin l-affarijiet u jekk ikun hemm bżonn joffri iktar għajnuna.

 ¹⁵ Il-ġenituri kif jistgħu ‘jikkoreġu’ lil uliedhom b’tali mod li jissaħħu spiritwalment? Immaġina li trid tgħin lil bintek, li hi żagħżugħa, tevita ħbiberija li tistaʼ tkun taʼ influwenza ħażina. L-ewwel għandek issir taf iktar dwar dan il-ħabib jew ħabiba. Imbagħad, jekk tara li għandek raġun tinkwieta, tistaʼ tkellem lil bintek, forsi billi tuża punti mill-ktieb Questions Young People Ask—Answers That Work, Volume 2. Fil-ġranet taʼ wara, tistaʼ tqattaʼ iktar ħin magħha. Tistaʼ wkoll tinnota l-attitudni tagħha hekk kif tieħu sehem fis-servizz tal-għalqa jew fir-rikreazzjoni mal-familja. Jekk turi paċenzja u qalb tajba, bintek se tinduna li int jimpurtak minnha għax tħobbha. X’aktarx li hi se titqanqal biex tapplika l-parir li tkun tajtha u tevita li taqbad triq ħażina f’ħajjitha.

¹⁶ B’paċenzja u b’qalb tajba nistgħu ninkuraġġixxu lil dawk li jkunu inkwetati dwar saħħithom, qalbhom sewda għax tilfu l-impjieg, jew konfużi minħabba  ċertu tagħlim Skritturali. In-nies taʼ Ġeħova jibbenefikaw bil-kbir meta jużaw il-Kelma t’Alla biex ‘jikkoreġu.

17. Għala għandna naċċettaw bi gratitudni d-dixxiplina li ningħataw?

¹⁷ “Ebda dixxiplina ma tidher li hi taʼ ferħ, imma taʼ niket; iżda wara, lil dawk li jkunu tħarrġu biha tagħtihom frott li jġib il-paċi, jiġifieri, is-sewwa.” (Ebr. 12:11) Il-biċċa l-kbira mill-Kristjani adulti jaqblu li d-dixxiplina li ngħataw mill-ġenituri tagħhom għenithom. U l-fatt li naċċettaw dixxiplina mingħand Ġeħova, li ningħataw permezz tal-anzjani Kristjani, jgħinna nibqgħu fit-triq tal-ħajja.—Prov. 4:13.

18, 19. (a) Il-parir fi Proverbji 18:13 għala hu tant importanti meta “tiddixxiplina fis-sewwa”? (b) Jekk l-anzjani juru ħlewwa u mħabba meta jagħtu d-dixxiplina, spiss xi jkun ir-riżultat?

¹⁸ Hija sengħa li tagħti dixxiplina b’mod effettiv. Ġeħova qal lill-Kristjani biex jiddixxiplinaw “fis-sewwa.” (2 Tim. 3:16) Għalhekk, għandna nużaw il-prinċipji tal-Bibbja meta nagħtu dixxiplina. Prinċipju minnhom jinsab fi Proverbji 18:13: “Meta xi ħadd iwieġeb qabel ma jismaʼ l-kwistjoni, dan ikun bluha min-naħa tiegħu u umiljazzjoni.” Għaldaqstant, meta l-anzjani jkollhom ikellmu lil individwu li jkun ġie akkużat li dineb serjament, iridu jisimgħu ż-żewġ qniepen ħalli jiksbu l-fatti kollha. (Dt. 13:14) Huwa biss meta jagħmlu hekk li jkunu jistgħu jiddixxiplinaw “fis-sewwa.”

¹⁹ Iktar minn hekk, il-Kelma t’Alla tgħid lill-anzjani biex jikkoreġu lil oħrajn “bil-ħlewwa.” (Aqra t-2 Timotju 2:24-26.) Huwa minnu li individwu jistaʼ jġib tmaqdir fuq Ġeħova kif ukoll iweġġaʼ lil nies innoċenti. Xorta waħda, anzjan li jirrabja meta jkun qed jikkoreġi lil individwu bħal dan mhux se jkun t’għajnuna. Madanakollu, meta l-anzjani jimitaw “il-qalb tajba t’Alla” jistgħu jqanqlu lil dak li jkun dineb biex jindem.—Rum. 2:4.

20. Il-ġenituri liema prinċipji għandhom japplikaw meta jiddixxiplinaw lil uliedhom?

²⁰ Huma u jrabbu lil uliedhom “fid-dixxiplina u l-gwida mentali taʼ Ġeħova,” il-ġenituri għandhom japplikaw il-prinċipji Bibliċi. (Efes. 6:4) Missier għandu jevita li jikkastiga lil ibnu wara li jismaʼ qanpiena waħda biss dwar l-imġiba tiegħu. Ġo familja Kristjana m’hemmx lok għal rabja vjolenti. “Ġeħova juri affezzjoni b’tenerezza kbira u hu mimli ħniena,” u l-ġenituri, li għandhom ir-responsabbiltà li jiddixxiplinaw lil uliedhom, għandhom iħabirku biex juru l-istess kwalitajiet kollhom imħabba.—Ġak. 5:11.

21, 22. Meta taqra Salm 119:97-104, liema kliem jiddeskrivi bl-aħjar mod kif tħossok dwar il-Kelma taʼ Ġeħova?

²¹ Qaddej t’Alla darba qal għala kien iħobb il-liġi taʼ Ġeħova. (Aqra Salm 119:97-104.) Hu studjaha, u b’hekk kiseb l-għerf, id-dehen, u l-abbiltà li jifhem. Peress li segwa l-pariri tagħha, ġie megħjun jevita li jaqbad xi triq ħażina li ġġib qsim il-qalb lil ħaddieħor. Kien jieħu pjaċir u jħossu sodisfatt meta jistudja l-Iskrittura, u kien determinat li jobdi lill-Alla li l-istruzzjonijiet tiegħu kienu tawh tant benefiċċji f’ħajtu.

²² Tqisha bħala prezzjuża “l-Iskrittura kollha”? Permezz tagħha tistaʼ tibni l-fidi tiegħek li Alla se jwettaq l-iskop tiegħu. Il-parir imnebbaħ tagħha jipproteġik kontra l-effetti qerrieda tad-dnub. U billi tispjegaha bis-sengħa, tistaʼ tgħin lil ħaddieħor jaqbad it-triq li tagħti għall-ħajja u jibqaʼ miexi fiha. Jalla nużaw bis-sħiħ “l-Iskrittura kollha” hekk kif naqdu lil Alla Ġeħova li hu mimli għerf u mħabba.