1. Ngera uchul me ngkired el mui el oumerang er a Biblia?

 A UCHEI er a bo lomuchel el oldingel ngike el mesuub er a Biblia, e ngkirel el ochotii el kmo ngoumerang el kmo a Biblia a Tekingel a Dios. * Me a tekoi el doruul me a dolekoi a kirel el ochotii el kmo kede rokui el oumerang er a Biblia. Me a mui el klaumerang er kid er a Biblia me a ungil el usbeched er ngii er a omesiunged a mo uchul e ngsebeched el ngosuterir a rechad el mo medengelii a Jehovah, e dirrek el mo metik er a rael el mo er a diak a ulebengelel el klengar.

2. Ngera uchul me ngkired el oltirakl a tekoi el bla desuub?

² A apostol el Paulus a mileketeklii el kmo a Tekingel a Dios a kmal klou a ultutelel. Ngmilluches el mo er a Timothy el kmo: “Bo mesisiich el ngar a ikel bla msuub el msal oumerang.” E ‘a ikel bla lsuub’ a klemerang er a Biblia el silsichii a klaumerang er ngii el kirel a ungil chais. Me aike el desuub er a Biblia a dirrek el sebechel el smisichii a klaumerang er kid, e ‘mekllemesii a rengud’ me kede “mo suobel.” (2 Ti. 3:14, 15) Me a ongingil el tekingel a Paulus a ochotii el kmo a Biblia a mla er a Dios el mei. Engdi ngera lmuut el bebil er a tekoi el sebeched el suub er a tekingel el ngar er a 2 Timothy 3:16? (Monguiu.) Kede mo mesaod a lmuut el dmolech el omesodel tia el bades me lluut el mo ulterekokl a uldesued el kmo a osisecheklel a Jehovah a “di blechoel el merang.”​—Psa. 119:142.

3-5 (a) Ngera dilubech er a uriul er a longedecheduch a Petrus el mo er a klou el seked er a Pentekost, e ngera uchul? (b) Ngera uchul me a rebetok el mla er a Thesalonika a kilengei er a klemerang? (c) Ngera te mesang a rechad er chelecha el taem el kirel a rolel a dolisechakl?

³ A Jesus a dilu er a rechad er a Israel el kmo: “Ak mo oldurech er a re profet ma re mellomes a rengrir el chad ma re sensei el ekor kemiu.” (Mt. 23:34) A Jesus a milsaod el kirir  a redisaiplo er ngii. Ngullisechakl er tir el mo meduch el ousbech a Bades el omerk er a klumech. Me ngar er a Pentekost er a rak er a 33, e a apostol el Petrus a milengedecheduch er a klou el seked er a Jerusalem. Ngmilsaod a bebil er aike el Bades el mle llechukl el tekoi er a Hebru. Me sera lorrenges er ngii el mesaod aika el bades e a rebetok er tir a kmal mlo ouuchel a rengrir er a mekngit el omerellir. Me te ulebult er aike el omerellir e ullengit er a Dios me lousubes er tir. Me seikid el sils e a bekord el edei el telael er tir a mlo Kristiano.​—Rel. 2:37-41.

⁴ Ngdirrek el sebeched el ngmai a klubeled er a apostol el Paulus el ulemerk er a ungil chais er a ikrel a beluu er a Jerusalem. Ngar er a mats er a Thesalonika er a beluu er a Masedonia, e ngullisechakl er a Rechijudea er a blil a ongdibel er tir. Me ngar er a chelsel aike el edei el Ulengull el Sils, e a Paulus a “ulebengterir a re chad el mesaod a tekoi er a Chedaol Llechukl” el ulemeketakl el kmo a Kristus a mle kirel el mo chuarm, e dirrek el mo mekiis er a kodall. Me a rebebil er tirke el Chijudea me a rebetok el Rechigrik a mlo oumerang.​—Rel. 17:1-4.

⁵ A rebetok el chad er chelechang a medengei el kmo kid a sebeched el ousbech er a Biblia el omeketakl a tekoi el dolisechakl. A ta el odos er kid er a Switzerland a milenguiu er a bades er a loldingel, e a chad er a blai a uleker er ngii el kmo ngchedal a ngera el klechelid. Me ngdilu er ngii el kmo ngii me ngike el odos el ulebengkel a Sioning er a Jehovah. Me ngii el chad a dilu el kmo ngmle kirel el medengei, e le te di Resioning er a Jehovah a mei er a blil e menguiu er a Biblia.

6, 7. (a) Te mekera tirke el olisechakl er a ongdibel e mo ungil el ousbech er a Biblia? (b) Ngera uchul me ngklou a ultutelel el kired el mo ungil el ousbech er a Biblia sel dosuub el obengkel a chad?

⁶ Ngera kot el ungil el rolel e kede ousbech er a Biblia el olisechakl? A lsekum ngkirem el oltobed a cheldecheduch er a miting e mousbech er a Biblia. Lak di mosaod er a bades el mo er a rechad me a lechub e ke menguiu er ngii el bla mlechesii er a babier me a lechub e ng computer, e bai monguiu er ngii el ngar er a Biblia. E molengit er a rechad me lousbech a Biblia er tir. Mosaod er a belkul a bades me sel rolel e ngsebechel el ngosuterir el mo olekes er a deleuill er tir me a Jehovah. Lak mousbech a okesiu el meringel er a rechad el mo medengei me a lechub e mosaod a tekoi el dilubech el di meruul er tir el mo ocherchur, e bai mousbech er sel taem el mesaod a Tekingel a Dios.

⁷ Ngera kired el melatk er ngii sel dosuub er a Biblia el obengkel a chad? Lak dobes aike el bades el ngar er a babilenged. Me sel mosuub e molengit er ngike el chad me longuiu a bebil er ngii. Bo dekerekikl me lak di dosaod el rokui e bai debsang a techellel me lolecholt er a uldesuel. Lak dorrimel er ngii el mo oumerang a tekoi el dolekoi me a lechub e dosaod er a rolel e ngkirel el mo meruul a tekoi. Ngbai ungil a doker er ngii a ker el sebechel el ngosuir el mo medengei a tekoi el lolisechakl a Biblia. *

8. Ngera ulemekringel er a uldesuel a Paulus?

⁸ A remechuodel er a ongdibel a ngar er ngii a ngerechelir el omeklatk e mellach er tirke el mo er a klengit. (1 Ti. 5:20; Tit. 1:13) Engdi kid a dirrek el kired el di kid el mellach er kid. A Paulus a mle ungil el Kristiano el mle ‘klikiid a ukltkel.’ (2 Ti. 1:3, BT) Engdi ngmla er ngii a tekoi el ulemekringel er a uldesuel. Ngdilu el kmo: “[Ak] metik er a kuk tar a blekeradel el ngar ngak el oureor, el ngii el blekeradel a omtok er sel llach el ungil er a renguk. Me ng rullak mak kelebus er a llach er a klengit.” Kede mo mesaod a tekoi el leriruul a Paulus el uchul me ngmlo sebechel el mo mesisiich er a chelitechetul.​—Monguiu er a Rom 7:21-25.

9, 10. (a) Ngera mle chelitechetul a Paulus? (b) Ngmilekerang e oumekemad el omtok a chelitechetul?

⁹ A Paulus a dimlak louchais er a chelitechetul  engdi ngmilsaod el kmo ngmle mekngit a blekerdelel. (1 Ti. 1:13) Ngkmal mle mekngit a omerellel el mo er a Rekristiano er a uchei er a bo loumerang er a Kristus. Ngdilu el kmo “ng mle imis el kesib a renguk er tir.” (Rel. 26:11) Ngmilsuub el mo sebechel el kilmeklii a ngesechel a rengul, engdi ngdirk mle kirel el mo omtebechel a cheldechedechal me a uldesuel. (Rel. 15:36-39) Ngera ngilsuir?

¹⁰ Ngar sel kot el babilengel a Paulus el mo er a rechad er a Korinth e ngmilsaod a tekoi el lurruul me bo el sebechel el di ngii el mellach er ngii. (Monguiu er a 1 Korinth 9:26, 27.) Ngmle blak a rengul el omtok aike el chelitechetul. Ngulterekokl el ulsiik a omellach er a Bades, e milluluuch el olengit a ngeso er a Jehovah, e dirrek el millasem er a tkurrebab el sebechel el oltaut ngii el omellach. * Ngsebeched el mesuub er a Paulus e le ngdirrek el kired el oumekemad el omtok a chelitechetud.

11. Kede mekerang e mo “ungil el merriter” er kid el kmo kede merael el oltirakl er a klemerang me a lechub e ngdiak?

¹¹ Ngkmal diak el kired el omdasu el kmo ngmo diak doumekemad el omtok a chelitechetud. Ngkired el mo “ungil el merriter” er kid el kmo kede merael el oltirakl er a klemerang me a lechub e ngdiak. (2 Ko. 13:5) Sel donguiu er a Kolose 3:5-10, me a lmuut el bebil el bades el uai ngii e ngsebeched el di kid el oker el kmo: ‘Ngblak a renguk el oumekemad el omtok a chelitechetuk? Me a lechub e ngsokok el meruul a tekoi el diak el soal a Jehovah? A lsekum a mekngit el Web site a me duum er a computer er ngak e ak di mereched el chosmerii, me a lechub e ak bai osiik aika el mekngit el Web site?’ A lsekum kede melatk er a rolel e ngsebeched el oltaut a omellach er a Tekingel a Dios er a klengar er kid, e ngmo sebeched el di “mekar e lulterekokl a rengud.”​—1 Th. 5:6-8.

12, 13. (a) Ngera belkul a dosmechokl a tekoi? Kede mekerang e oukerebai er a Jesus sel dosmechokl a tekoi? (b) Ngkirel el mo uangerang a cheldechedechad a lsoad el mesmechokl er a ta er a chad?

¹² A Biblia sel lolekoi el kirel a ‘omesmechokl’ e ngbelkul a kmo ngremuul a tekoi el mo ungil me a lechub e ngomeklemalt er ngii. A lebebil er a taem e ngkired el sumecheklii a uldesuel a chad el dimlak bo lungil el medengei a tekoi el mildung me a lechub e ngmileketmokl. El ua tiang, a Refarisi a milengeremrum el kmo a Jesus a mle ungil a omerellel el mo er a re “chad er omelai el tax ma re kuk bebil er a re mekngit a chisir el chad.” Me a Jesus a milsmechokl a uldesuir el dilu el kmo: “A re diak el secher el chad a diak lousbech er a toktang; ng bai tirkel smecher ousbech er ngii. Ka bo morriter er a belkul sel Chedaol Llechukl el melekoi el kmo, ‘Ng soak a klechubechub; ng diak el tenget el charm.’” (Mt. 9:11-13) A Jesus a dirrek el milsmechokl a uldesuir a rechad el kirel a Dios. Ngmle klou a rengul e ungil a omerellel el olisechakl er a rechad el kmo a Jehovah a ‘Dios el mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng ma blakerreng.’ (Exo. 34:6) Me tiang a mlo uchul e a rebetok el melemalt a rengrir el chad a kilengei er a ungil chais.

¹³ Ngkired el oukerebai er a Jesus sel dolasem el olengeseu er a rechad. A ulekrael el medung er a 2 Timothy 3:​16 a diak el belkul a kmo ngkirel el mo mekngit a tekinged sel dosmechokl a uldesuir a rechad. Ngdirrek el diak lebeskid a llemelted el di melekoi a tekoi el diak domekerreu a rengrir a rechad. A mekngit el omelekinged a sebechel el mo “ua saider el merus.” Ngbai mo uchul a kngtil a rengul e dirrek el diak a ngera el lengesuir er ngii.​—Osi. 12:18.

14-16. (a) Te mekerang a remechuodel e mesmechokl a tekoi er sel taem el lousbech a ngeso a rebebil? (b) Ngera me ngklou a ultutelel el kirir a ruungalek el ousbech a Bades el mesmechokl a tekoi er a chelsel a telungalek er tir?

¹⁴ Kede mekerang e olecholt er a kllourreng  er sel taem el dousbech er a Biblia el mesmechokl a tekoi? Ka molatk er a rubekel el di blechoel el kautoketok. Me te mo olengit a ngeso er a ta er a remechuodel. Ngkmal diak el kirel ngike el odam el mo mesebechakl er a tang me a lechub e lolecholt a di uldesuel el kirel a mondai er tir. Ngbai kirel el ousbech a omellach er a Biblia el olengeseu er tir el mo diak di lekautoketok. Ngdirrek el sebechel el ousbech a omellach el ngar er a 3 el bliongel er a babier el Moruul er a Delengcheklem me leborngii a Deurreng. Me sel losaod aika el ulekrael e te locha mo melechesuar el kmo ngkirir el melodech a bebil er a tekoi. E a uriul e ngike el odam a mo oker er tir el kmo te uangerang, e dirrek el sebechel el dirk olengeseu er tir a lsekum ngmo kirel.

 ¹⁵ Te mekerang a ruungalek e olengeseu el mesmechokl a uldesuir a rengelekir? Ka molatk er a ngelekem el redil el mla mo er ngii a beches el sechelil. Engdi ke melatk el kmo ngii el sechelil a kora diak el ultebechel a uldesuel. A kot e ngkirem el mo medengei a lmuut el betok el kirel ngike el sechelil a ngelekem. E a lsekum e ngdirk suebek a rengum er a ngelekem e ngsebechem el mengedecheduch er ngii. Ngsebechem el ousbech a omellach er a Biblia el debetik er a babier el Questions Young People Ask​—Answers That Work, Volume 2. E melasem el mengoit er a klou el temem el obengkel. E mo kerekikl el omtab a omerellel sel lebo loldingel a obliil me a lechub e ngteloi er kemiu el telungalek. Me a kllourreng er kau me a ungil el omerellem a omongedecheduch er ngii, a rullii el mo medengei el kmo ngbetik a rengum e dirrek el semeriar er ngii. Ngoeak tiang e ke ngosuir el mo kongei el oltirakl a ulekrael el momsang el kirir a resechelil me lak bo luchul a telemellel.

¹⁶ Te rua techang a dirrek el ousbech a ngeso er kid? Ngsebeched el oba kllourreng me a delemedemek el mesmechokl a uldesuir a rechad el suebek a rengrir el kirel a klisichel a bedengir me a lechub e ngmekngit a rengrir e le te mla mo diak loureor, me a lechub e ngrrau a rengrir el kirel a bebil el osisecheklel a Biblia. Ngmo uchul a klungioled el rokui sel dousbech er a Tekingel a Dios el mesmechokl a tekoi.

17. Ngera uchul me ngkired el kongei el oltirakl a omellach?

¹⁷ A Biblia a melekoi el kmo ngblechoel el diak el soad a omellach. Me ngsebechel el mo meringel er kid el kongei er ngii. Engdi sel dekengei er a omellach e doltaut er ngii e ngrullid el mo melemalt el chad. (Heb. 12:11) A ruumesingd el meklou el chad el Kristiano el mlukeroul er a klemerang a melekoi el kmo a omellach er a rechad er a blirir a ngilsuterir. Me sel lollach er kid a remechuodel el ousbech a llechul a Jehovah e ngsebeched el melemolem el merael er a rael el mo er a klengar.​—Osi. 4:13.

18, 19. (a) Ngera me a remechuodel a kirir el oltirakl er a Osisechakl 18:13 sel lollach er a rechad? (b) Ngmo mekerang a chad a lsekum a remechuodel a mellach er ngii el oba bltikerreng me a delemedemek?

¹⁸ Te mekerang a remechuodel me a ruungalek e mesuub el mo ungil el mellach? A Jehovah a mla subedid el kmo ngkired el “olecholt a meral rolel a ungil klengar.” (2 Ti. 3:16) E tiang a belkul a kmo ngkired el ousbech a omellach er a Biblia sel dollach er a rechad. A ta el klou a ultutelel el omellach er a Biblia a ngar er a Osisechakl 18:13 el kmo: “A lsekum a chad a onger a ker er uchei er a lorrenges, e ng klebelung e otuball.” Me a lsekum a chad a ouchais er a remechuodel el kmo a ta el odam me a lechub e ngodos a mla rullii a oberaod el klengit, e ngkirir a remechuodel el mo ungil el merriter er tia el tekoi er a uchei er a bo lollach er a chad. (Dut. 13:14) Seikid e ngmo sebechir el melemalt el mellach er ngii el chad.

¹⁹ A Biblia a dirrek el omeklatk er a remechuodel me bo le ‘medemedemek a ngerir’ sel lollach er a rechad. (Monguiu er a 2 Timothy 2:24-26.) A chad el mo er a klengit a sebechel el tomelleterir a rebebil me a lechub e ngrulleterir a rechad el mo omdasu a mekngit el bedul a Jehovah. Engdi a lsekum a ta er a remechuodel a ngmasech a rengul er sel taem el lollach er a chad, e ngulterekokl el diak el sebechel el ngosuir. Engdi a loukerebai er a Dios e bo lungil el mengedecheduch el mesmechokl er a chad, e ngsebechel el obult er a mekngit el omerellel.​—Rom 2:4.

20. Ngera el omellach a kirir a ruungalek el oltirakl sel lollach er a rengelekir?

²⁰ A ruungalek a dirrek el kirir el oltirakl a omellach er a Biblia sel lollach er a rengelekir. (Efe. 6:4) Ngmo mekerang a chedam a lsekum a chad a subedii el kmo a ngelekel el sechal a mla rullii a mekngit? Ngkirel el mo ungil medengei a rokui el tekoi er a uchei er a lollach er a ngelekel. E diak el kirel a Kristiano el kmal mo kesib a rengul e lemeringel el mengelebed er a ngelekel. A Jehovah a “kmal bekokuii e chubechubchad,” me a ruungalek a kirir el mo oukerebai er ngii sel lollach er a rengelekir.​—Jak. 5:11.

21, 22. Ngera el tekoi el ngar er a Psalm 119:97-104, a ochotii a uldesuem el kirel a Tekingel a Jehovah?

²¹ A ta el mesiungel a Dios a uluuchais er a uchul me ngkmal betik a rengul er a llechul a Jehovah. (Monguiu er a Psalm 119:97-104.) Ngoeak a omesubel e ngkmal mlo mellomes a rengul e mlo dmolech a klemedengei er ngii. Me ngii el uleltirakl a omellach er a Biblia a uchul me ngmle sebechel el oleiub er ngii er a cheleuid el tekoi el lurruul a rebetok el chad. Ngmle dmeu a rengul el mesuub er a Biblia e dirrek el ngilai a betok el klungiolel er ngii. Me ngtilbir el mo melemolem el oltirakl a llechul a Dios er a klengar er ngii.

²² Kau, ke omes er a Biblia el kmal mekreos? Ngsebechel el smisichii a klaumerang er kau el kmo a Dios a mo otaut a moktek er ngii. A ulekrael er a Jehovah el ngar er a chelsel a ngosukid el mo diak doruul a klengit el mo uchul a kodall. Ngsebechem el ousbech er ngii el ngosuterir a rechad el mo metik er a rael el mo er a klengar e melemolem el merael er ngii. Me ngkmal kired el melemolem el ousbech er a Biblia el meruul aikang sel dosiou er a mellomes a rengul e betik a rengul el Jehovah el Dios er kid.