1. Fu san ede wi musu bribi trutru na ini Gado Wortu?

TE DEN owruman o luku efu wan sma kan go na ini a preikiwroko makandra nanga a gemeente, dan den e aksi densrefi a sani disi: ’Den sani di a sma e taki, e sori taki a e bribi trutru taki Bijbel na a Wortu fu Gado?’ * Efu wan sma wani tron wan Kownukondre preikiman, dan a musu man piki na aksi disi nanga „iya”. Fu taki en leti, wi alamala musu sori taki wi e bribi taki Bijbel na Gado Wortu. Fu san ede? Te wi e sori taki wi e bribi na ini Gado Wortu èn te wi man gebroiki en bun na ini a preikiwroko, dan wi o man yepi sma fu kon sabi Yehovah èn fu kisi frulusu.

2. Fu san ede wi musu ’tan du den sani di wi leri’?

² Na apostel Paulus ben sori o prenspari Gado Wortu de. A ben skrifi gi Timoteyus: „Yu musu tan du den sani di yu leri èn di yu e bribi, fu di sma sori yu krin taki den de so.” „Den sani” di Paulus ben e taki fu den, na den tru leri fu Bijbel di meki taki Timoteyus bribi a bun nyunsu. Den tru leri disi tranga a bribi fu wi tu, èn den e ’meki wi kon koni, so taki wi kan kisi frulusu’ (2 Tim. 3:14, 15). Nofo tron te wi wani sori sma taki Bijbel e kon fu Gado trutru, dan wi e sori den san Paulus taki na 2 Timoteyus 3:16. (Leisi en.) Ma wi srefi kan leri moro fu a tekst disi tu. Meki wi luku en moro fini. Te wi e du dati, dan a bribi di wi abi taki den leri fu Yehovah „reti”, o kon moro tranga.—Ps. 119:128.

3-5. (a) San wan bigi ipi sma du di Petrus taki nanga den na a Pinksterfesa, èn fu san ede den du dati? (b) Fu san ede furu sma na ini Tesalonika tron Kresten? (c) San furu sma na ini a ten disi e si te wi e preiki gi den?

³ Yesus ben taigi a pipel Israel: „Mi e seni profeiti nanga  koniman nanga leriman kon gi unu” (Mat. 23:34). Dyaso Yesus e taki fu den disipel fu en. A ben leri den fa fu gebroiki Gado Wortu na ini a preikiwroko. Wan fu den „leriman” disi ben de na apostel Petrus. Na a Pinksterfesa fu a yari 33, a ben e taki nanga wan bigi ipi sma na ini Yerusalem. A taki fu difrenti pisi fu den Hebrew buku fu Bijbel. Di den sma yere fa Petrus fruklari den pisi dati, „den konsensi bigin fon den trutru”. Den sma sori berow gi den sondu fu den èn den aksi Gado fu gi den pardon. Tapu a dei dati, sowan dri dusun fu den sma dati tron Kresten.—Tori 2:37-41.

⁴ Na apostel Paulus, di ben de wan fu den leriman tu, ben preiki a bun nyunsu na ini foto bun fara fu Yerusalem. Fu eksempre, di a ben de na ini Tesalonika, wan foto na ini Masedonia, a taki nanga den sma di ben de na ini wan snoga. Dri Sabat-dei Paulus „taki-go-taki-kon nanga den fu Gado Buku. A gebroiki den sani di skrifi na ini Gado Buku fu buweisi èn fu tyari kon na krin taki Krestes ben musu pina èn taki a ben musu kisi wan opobaka.” San ben de a bakapisi? „Wan tu fu den [Dyu] tron bribiman”, sosrefi „wan heri ipi fu den Grikisma”.—Tori 17:1-4.

⁵ Furu sma na ini a ten disi e si taki wi man sori den na ini Bijbel taki den sani di wi e leri den, na tru tori. Di wan sisa na ini Switserland leisi wan Bijbeltekst gi wan man na ini a preikiwroko, a man aksi en: „Fu sortu kerki yu de?” A sisa piki en: „Wi na Yehovah Kotoigi.” A man taki: „Mi ben sabi. Na Yehovah Kotoigi wawan ben o kon na mi oso fu leisi Bijbel gi mi.”

6, 7. (a) Fa den brada di e gi leri na ini wan gemeente kan gebroiki Bijbel moro bun? (b) Fa wi kan gebroiki Bijbel moro bun te wi e studeri Bijbel nanga sma?

⁶ Fa wi kan gebroiki Bijbel moro bun te wi e gi sma leri? Efu yu abi a grani fu hori lezing na ini wan gemeente, dan taki fu spesrutu Bijbeltekst di e leri sma wan sani. No taki nomo san wan tekst e taki, no leisi a tekst puru fu wan papira, fu wan cèl noso fu wan pikin computer. A moro bun fu opo yu Bijbel leisi a tekst. Gi den arkiman deki-ati tu fu du a srefi. Boiti dati, yu musu fruklari a tekst na so wan fasi, taki den arkiman e frustan fa den kan kon moro krosibei na Yehovah. No gebroiki agersitori di muilek fu frustan èn no fruteri ondrofenitori soso fu meki sma lafu. Na presi fu dati, gebroiki a ten di yu abi fu tyari Gado Wortu kon na krin.

⁷ San wi musu hori na prakseri te wi e studeri Bijbel nanga sma? Te wi e gebroiki wan fu den buku fu wi fu studeri nanga wan sma, dan wi no musu frigiti fu leisi den Bijbeltekst di kari na ini. Wi musu gi a studenti deki-ati fu leisi den Bijbeltekst èn wi musu yepi en fu frustan den tekst disi. Fa wi kan du dati? A no wi wawan musu taki nomo, ma wi musu gi a Bijbelstudie na okasi fu taki tu. Na presi fu taigi en san a musu bribi noso san a musu du, wi kan poti bun aksi gi en di o yepi en fu frustan san Bijbel e leri. *

8. Sortu feti Paulus ben musu feti?

⁸ Den owruman na ini a gemeente abi a frantwortu fu gi rai noso piri-ai na „den wan di abi a gwenti fu du sondu” (1 Tim. 5:20; Tit. 1:13). Ma a prenspari tu fu piri-ai gi wisrefi. Paulus ben de wan Kresten di ben abi wan krin konsensi (2 Tim. 1:3). Ma toku a ben skrifi: „Mi e si taki wan tra wèt de na ini mi skin, èn a e feti nanga a wèt fu mi frustan. A wèt dati na a sondu di de na ini mi skin, èn a e basi mi.” Meki wi luku san Paulus ben musu du fu man basi den sondu firi fu en.—Leisi Romesma 7:21-25.

9, 10. (a) Sortu swakifasi Paulus ben abi? (b) Fa Paulus ben e feti nanga den swakifasi fu en?

 ⁹ Sortu swakifasi Paulus ben abi? Paulus no taki sortu swakifasi a ben abi, ma na ini wan brifi di a ben skrifi gi Timoteyus a ben taki dati en na wan man „di no ben abi syen” (1 Tim. 1:13). Bifo Paulus tron wan Kresten, a ben e du furu ogri nanga den bakaman fu Krestes. En srefi ben taki: „Mi ati ben e bron nanga den srefisrefi” (Tori 26:11). Bakaten Paulus leri fu no kisi atibron so esi moro. Ma toku a ben abi fu feti nanga a firi disi ten na ten èn a ben abi fu hori ensrefi fu no taki sani di no bun (Tori 15:36-39). San yepi en fu man hori ensrefi?

¹⁰ Di Paulus skrifi wan brifi gi den Kresten na ini Korente, a fruteri fa a ben e piri-ai gi ensrefi. (Leisi 1 Korentesma 9:26, 27.) A taki dati a ben e feti nanga en sondu skin. Soleki fa a sori, a ben e suku rai na ini Gado Wortu, a ben e begi Yehovah fu yepi en fu du san a leri èn a ben e du muiti tu fu du den sani dati. * Wi kan leri furu fu na eksempre fu Paulus, fu di wi srefi musu feti nanga den sondu firi fu wi.

11. Fa wi kan „tan ondrosuku” efu wi e libi trutru soleki fa Bijbel e taki?

¹¹ Noiti wi musu denki taki wi kan tapu fu feti nanga den swakifasi fu wi. Na presi fu dati, wi musu „tan ondrosuku” efu wi e libi trutru soleki fa Bijbel e taki (2 Kor. 13:5). Te wi e leisi tekst soleki Kolosesma 3:5-10, wi kan aksi wisrefi: ’Mi e feti trutru nanga den sondu firi fu mi, noso mi e bigin lobi son sani di Yehovah no feni bun? San mi e du te mi kon na wan website di e sori seksprenki noso tra sani di no bun? Mi e puru a website wantewante, noso mi e go suku den sortu website disi?’ Te wi e prakseri fa wi kan gebroiki den rai fu Bijbel na ini wi libi, dan wi o ’tan wikiwiki èn wi o tan na ai’.—1 Tes. 5:6-8.

12, 13. (a) San a wani taki fu „poti sani kon reti”? (b) Fa wi kan teki na eksempre fu Yesus te wi wani „poti sani kon reti” nanga wan sma? (c) Fa wi no musu taki te wi wani „poti sani kon reti” nanga wan sma?

¹² Den Griki wortu di vertaal nanga „fu poti sani kon reti” wani taki „fu meki wan sani kon bun, fu seti wan sani kon bun baka, fu poti wan sani leti-opo”. Son leisi wi musu „poti sani kon reti” te wan sma no e frustan bun san wi taki noso fu san ede wi du wan sani. Den Dyu kerki fesiman ben feni taki Yesus lobi den sondari èn den sma di e teki belasting-moni gi lanti. Ma Yesus taigi den: „Gosontu sma no abi datra fanowdu, ma na siki sma abi datra fanowdu. Fu dati ede, go leri san disi wani taki: ’Mi wani sari-ati, mi no wani srakti-ofrandi’” (Mat. 9:11-13). Nanga pasensi èn na wan switi fasi a ben e tyari Gado Wortu kon na krin gi ala sma. Dati meki den sma di ben abi sakafasi kon sabi Yehovah leki „wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki” (Eks. 34:6). Sobun, fu di Gado Manpikin du muiti fu „poti sani kon reti”, meki furu sma kon bribi a bun nyunsu.

¹³ Wi musu teki na eksempre fu Yesus te wi e pruberi fu yepi sma. Ma den sani di wi e leisi na 2 Timoteyus 3:16 no wani taki dati wi musu taki na wan grofu fasi te wi wani „poti sani kon reti”. Bijbel no e taki dati wi kan taki nanga sma fa wi wani. Wi musu hori den firi fu sma na prakseri te wi e taki nanga den. Te wi wani seti sani kon bun nanga wan sma, ma wi e taki grofu nanga en, dan nofo tron disi no e tyari bun bakapisi kon. A o de ’neleki na dyuku wi e dyuku trawan nanga wan feti-owru’.—Odo 12:18.

14-16. (a) Te son sma abi problema, dan fa owruman kan yepi den fu „poti sani kon reti”? (b) Fa papa nanga mama kan yepi den pikin te den musu „poti sani kon reti”?

 ¹⁴ Fa wi kan sori taki wi abi pasensi nanga switifasi te wi wani „poti sani kon reti”? Kon meki wi taki dati wan trowpaar e meki trobi furu tron èn den aksi wan owruman fu yepi den. San na owruman musu du? A no musu teki a sei fu a masra noso a wefi èn a no musu taki san ensrefi e denki fu a tori. Na presi fu dati a musu gebroiki Bijbel fu yepi den frustan fa den kan tapu fu meki trobi. Boiti dati a kan gebroiki den rai di skrifi na ini kapitel 3 fu a buku A sroto gi wan kolokoe osofamiri. Te den e taki fu den rai disi, a masra nanga a wefi o frustan kande taki den musu tyari wan tu kenki kon. Bakaten na owruman kan aksi den fa a e go nanga a problema fu den èn a kan yepi den moro fara efu dati de fanowdu.

 ¹⁵ Fa papa nanga mama kan yepi den pikin fu den te den musu „poti sani kon reti”? Kon meki wi taki dati na umapikin fu yu abi wan nyun mati. Kande yu feni taki a mati disi no bun gi yu pikin. Ma fosi yu taki wan sani, a bun fu kon sabi moro fu a mati disi. Te yu du disi èn toku yu e feni taki a mati disi no bun, dan yu kan taki nanga yu umapikin. Kande yu kan gebroiki den Bijbel rai di skrifi na ini a buku Wat jonge mensen vragen — Praktische antwoorden, Deel 2 (Sani di yongu sma e aksi—Piki di kan yepi den, Pisi 2). Baka dati yu musu du muiti fu abi moro ten gi yu pikin. Na so yu kan si fa a e tyari ensrefi na ini a preikiwroko noso te unu e du sani makandra leki osofamiri. Te yu abi pasensi nanga en èn te yu e taki nanga en na wan switi fasi, dan en srefi o si taki yu lobi en èn taki yu wani sabi fa a e go nanga en. Disi o yepi en fu teki a rai di yu gi en èn na so yu kan yepi en fu no du sani di kan tyari takru bakapisi gi en.

¹⁶ Wi kan sori pasensi nanga switifasi tu te wi e gi deki-ati na den sma di abi broko-ede fu di den e siki, sma di e firi brokosaka  fu di den lasi den wroko, èn sma di e feni en muilek fu teki son Bijbel leri. Te wi e gebroiki Gado Wortu fu „poti sani kon reti”, dan wi o kisi furu wini fu dati.

17. Fu san ede wi musu de nanga tangi taki wi e kisi rai noso piri-ai?

¹⁷ „Te sma e kisi strafu, dan a no de wan prisiri sani na a momenti dati, ma a e hati. Ma bakaten den wan di e leri wan sani fu a strafu disi, e kisi blesi di e tyari freide kon èn den e du san reti” (Hebr. 12:11). Furu Kresten di de bigisma kaba feni taki a piri-ai di den kisi fu den papa nanga mama, yepi den furu. Te Yehovah e piri-ai gi wi nanga yepi fu den owruman, dan dati kan yepi wi fu tan na tapu a pasi fu libi.—Odo 4:13.

18, 19. (a) Fa Odo 18:13 kan yepi owruman fu gi piri-ai „na wan reti fasi”? (b) Te owruman e sori safri-ati nanga lobi gi wan sma di du wan sondu, dan san na a bakapisi nofo tron?

¹⁸ Fa owruman èn papa nanga mama musu gi piri-ai? Yehovah taigi wi taki wi musu gi piri-ai „na wan reti fasi” (2 Tim. 3:16). Fu dati ede, te wi o gi sma piri-ai, dan wi musu meki Bijbel tiri wi. Wan fu den Bijbeltekst di kan yepi wi fu gi piri-ai na wan reti fasi, na Odo 18:13 pe skrifi: „Te wan sma e gi piki fosi a yere wan tori, dan dati na wan don sani fu du. A o kisi syen.” Sobun, te wan sma taigi den owruman taki wan brada noso sisa du wan seryusu sondu, dan den musu sorgu taki den sabi ala sani finifini fosi den piri-ai gi a sma (Deut. 13:14). Na a fasi dati wawan den o man gi piri-ai „na wan reti fasi”.

¹⁹ Gado Wortu e gi Kresten owruman a rai tu fu gi piri-ai „nanga safri-ati”. (Leisi 2 Timoteyus 2:24-26.) A tru taki a sondu di wan sma du kan gi Yehovah porinen èn a kan abi takru bakapisi gi trawan. Ma efu wan owruman e gi wan sma rai nanga atibron, dan a no o man yepi en. „Fu di Gado abi bun-ati, meki a e pruberi fu meki [sma] abi berow.” Sobun, te owruman e teki na eksempre fu Gado, dan den kan yepi wan sma fu abi berow.—Rom. 2:4.

20. San papa nanga mama musu hori na prakseri te den o gi den pikin piri-ai?

²⁰ Papa nanga mama musu kweki den pikin fu den „nanga a leri èn nanga den rai fu Yehovah” (Ef. 6:4). San wan papa musu du te wan sma taigi en taki a boi fu en du wan sani di no bun? Fosi a strafu a boi, a musu suku fu sabi efu a tori disi tru. Sosrefi, nowan sma na ini wan Kresten osofamiri musu kisi so wan atibron taki a ben o gi wan trawan mankeri. ’Yehovah lobi sma trutru èn a abi sari-ati’. Papa nanga mama musu teki na eksempre fu en te den e gi den pikin piri-ai.—Yak. 5:11.

21, 22. Sortu pisi fu Psalm 119:97-104 e sori fa yu e denki fu a Wortu fu Yehovah?

²¹ Wan leisi wan futuboi fu Yehovah fruteri fu san ede a lobi a wèt fu En. (Leisi Psalm 119:97-104.) Fu di a ben e studeri Gado Wortu, meki a kon koni èn a kon frustan sani moro bun. Fu di a ben e gi yesi na Gado Wortu, meki a ben man wai pasi gi son sani di ben o tyari takru bakapisi gi en. A ben lobi studeri Gado Wortu trutru èn a ben e kisi furu wini te a ben teki den rai di skrifi na ini. Fu dati ede, en heri libi langa a ben e du muiti fu gi yesi na den wèt fu Gado.

²² Yu e si Bijbel leki wan buku di prenspari trutru? Bijbel kan yepi yu fu kisi wan moro tranga bribi na ini den pramisi fu Gado. Den rai fu Bijbel kan yepi yu fu no du sondu di o tyari dede kon gi yu. Te yu sabi fa fu tyari en kon na krin gi sma, dan yu kan yepi den fu kon na tapu a pasi fu libi èn fu tan waka na en tapu. Meki a de so taki wi gebroiki „ala den sani di de na ini Gado Buku” aladi wi e dini wi lobi-ati Gado Yehovah di abi ala koni.