1. Bilong wanem yumi mas bilip tru long Tok Bilong God?

 PASLAIN long wanpela Baibel sumatin i kirap long autim tok, em i mas kamapim olsem em i bilip olsem Baibel em i Tok Bilong God. a Long rot bilong ol pasin na tok yumi mekim, yumi olgeta i mas kamapim klia olsem yumi trastim tok bilong Baibel. Taim yumi bilip tru long Baibel na lain long yusim gut long mekim wok autim tok, yumi inap helpim ol narapela long kisim save long Jehova na luksave long rot bilong kisim laip oltaim.

2. Bilong wanem yumi mas bihainim yet ol samting yumi bin lainim?

² Aposel Pol i kamapim klia olsem Tok Bilong God em i bikpela samting. Em i raitim pas na tokim Timoti olsem: “Yu mas bihainim yet ol samting ol arapela i bin lainim yu long en.” Dispela “ol samting” em Timoti i bin lain long en em ol tok tru bilong Baibel we i helpim em long bilip long gutnius. Ol samting yumi lainim long Baibel inap mekim bilip bilong yumi tu i kamap strong moa. Baibel inap helpim yumi long kisim “savetingting na bai God i ken kisim bek” yumi. (2 Tim. 3:14, 15) Tok em Pol i mekim bihain long dispela i soim klia olsem God yet i kamapim ol tok i stap long Baibel. Tasol yumi inap kisim wanem narapela skul long ol tok i stap long 2 Timoti 3:16? (Ritim.) Orait nau yumi bai stori gut long dispela ves, na dispela bai strongim bilip bilong yumi olsem olgeta tok bilong Jehova i stret.—Sng. 119:128.

3-5. (a) Wanem samting i kamap taim Pita i givim tok long bikpela lain manmeri long Pentikos? Bilong wanem? (b) Bilong wanem planti manmeri long Tesalonaika i kisim tok i tru? (c) Long wok autim tok bilong yumi, ol man long nau i luksave long wanem samting?

³ Jisas i tokim lain Israel olsem: “Mi bai salim ol profet na ol saveman na ol tisa i kam long yupela.” (Mat. 23:34) Dispela lain em Jisas bai salim ol i go em ol disaipel bilong em. Jisas i bin skulim ol long yusim buk bilong God taim ol i autim  tok. Long Pentikos bilong yia 33 C.E, aposel Pita i givim tok long bikpela lain i kam bung long Jerusalem. Em i kolim sampela tok bilong Ol Skripsa Hibru. Taim Pita i stori gut long ol dispela ves, planti manmeri i bel hevi tru long ol pasin nogut ol i bin mekim. Ol i hevi long ol rong ol i bin mekim na ol i askim God long lusim rong bilong ol. Long dispela de, inap olsem 3 tausen manmeri i kamap Kristen.—Apo. 2:37-41.

⁴ Aposel Pol i bin autim gutnius ausait long Jerusalem, na yumi inap kisim skul tu long pasin bilong em. Long taun Tesalonaika bilong Masedonia, Pol i toktok long ol Juda em ol i mekim lotu insait long sinagog. Long 3-pela sabat, Pol “i toktok gut wantaim ol long ol Rait Holi” bilong kamapim klia olsem i gat as na Krais i bin karim pen na hevi, na bihain em i dai na em i kirap bek. Sampela bilong lain Juda i kamap bilipman, na planti Grik tu i mekim olsem.—Apo. 17:1-4.

⁵ Planti manmeri long nau i luksave olsem yumi save yusim Baibel bilong kamapim klia ol samting yumi skulim ol long en. Wanpela sista bilong yumi long Swiselan i ritim wanpela skripsa taim em i autim tok, na man bilong haus i askim em long em i bilong wanem lotu. Sista i bekim tok olsem em na narapela sista i kam wantaim em, ol i Witnes Bilong Jehova. Dispela man i tok em inap luksave long dispela, long wanem, ol Witnes Bilong Jehova tasol i save kam long haus bilong em na ritim Baibel.

6, 7. (a) Olsem wanem ol man husat i mekim wok tisa long kongrigesen i ken yusim gut Baibel? (b) Taim yumi mekim Baibel stadi wantaim ol narapela, bilong wanem em i bikpela samting long yusim gut Baibel?

⁶ Olsem wanem yumi inap yusim gut Baibel taim yumi skulim ol narapela? Sapos yu kisim asainmen bilong mekim tok o mekim wanpela hap bilong miting, orait yusim stret ol skripsa. No ken tokim odiens long ol tok bilong wanpela skripsa o ritim long wanpela pepa o kompiuta, nogat, mobeta yu ritim long Baibel bilong yu yet. Askim odiens tu long yusim Baibel bilong ol. Stori gut long mining bilong dispela ves, na stori long olsem wanem dispela skripsa inap helpim ol long pas gut moa wantaim Jehova. No ken yusim ol tok piksa we i hatwok long kliagut long en, o ol ekspiriens we bai mekim ol man i lap tasol, nogat, mobeta yu yusim dispela haptaim long stori gut long Tok Bilong God.

⁷ Yumi mas tingim wanem samting taim yumi skulim ol Baibel sumatin? Taim yumi stadi wantaim wanpela, yumi no ken abrusim ol skripsa ol i raitim long buk na i no kamapim tok bilong en. Larim sumatin i ritim ol dispela skripsa. Na taim yumi stori long dispela ves, yumi no ken mekim planti tok, yumi mas larim sumatin long kamapim tingting bilong em. No ken tokim em long ol samting em i mas bilip long en, o wanem pasin em i mas bihainim, nogat, yumi ken givim ol gutpela askim bilong helpim em long kliagut long tok bilong Baibel. b

8. Pol i gat wanem hevi?

⁸ Ol elda insait long kongrigesen i gat wok long stretim ol man husat i wokabaut long pasin bilong sin. (1 Tim. 5:20; Tai. 1:13) Tasol yumi tu i mas stretim yumi yet. Pol em wanpela gutpela Kristen na maus bilong bel bilong em i stap klin. (2 Tim. 1:3) Tasol em i gat wanpela hevi. Em i tok: “Mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi.” Bai yumi stori long samting Pol i bin mekim long daunim dispela hevi.—Ritim Rom 7:21-25.

9, 10. (a) Ating Pol i bin gat wanem ol pasin kranki? (b) Ating Pol i bin mekim wanem bilong daunim ol dispela pasin kranki?

⁹ Pol i no bin kolim stret wanem kain pasin kranki em i gat, tasol em i tok em i bin “mekim pasin bikhet,” olsem em i gat hatpela pasin na em i no rispektim ol narapela. (1 Tim. 1:13) Paslain long Pol i kamap Kristen, em i bin mekim nogut tru long ol Kristen. Em i tok olsem em i “belhat nogut tru long ol.” (Apo. 26:11) Pol i lain long bosim belhat bilong em, tasol ating em i mas wok  strong yet long bosim ol samting em i pilim long bel na ol tok em i mekim. (Apo. 15:36-39) Wanem samting i bin helpim em?

¹⁰ Long namba 1 pas bilong em long ol Korin, Pol i stori long ol samting em i mekim bilong stretim em yet. (Ritim 1 Korin 9:26, 27.) Em i bin wok strong long daunim pasin kranki bilong em. Em i painim ol tok kaunsel long ol skripsa, beten long Jehova long helpim em long bihainim ol dispela tok kaunsel, na wok strong long bihainim. c Yumi inap kisim skul long dispela stori. Yumi tu i mas mekim wankain pait bilong daunim ol pasin kranki bilong yumi.

11. Olsem wanem oltaim yumi inap “skelim” yumi yet bilong save olsem yumi bihainim yet tok i tru?

¹¹ Yumi no ken ting olsem yumi no gat wok moa long daunim ol pasin kranki bilong yumi. Oltaim yumi mas “skelim” yumi yet bambai yumi inap save olsem yumi bihainim yet tok i tru. (2 Kor. 13:5) Taim yumi ritim tok bilong Kolosi 3:5-10 o wankain skripsa olsem, yumi ken askim yumi yet olsem: ‘Mi wok long pait strong long daunim ol pasin kranki bilong mi? O, mi wok long laikim ol samting em Jehova i tok ol i no stret? Olsem: Sapos wanpela Web-sait bilong pasin pamuk i kamap, kwiktaim mi save pasim dispela Web-sait? O, mi save painim ol Web-sait nogut?’ Sapos yumi skelim olsem wanem yumi ken bihainim tok kaunsel i stap long Tok Bilong God long laip bilong yumi yet, yumi inap “was i stap na holim stretpela tingting.”—1 Tes. 5:6-8.

12, 13. (a) Yumi ken mekim wanem bilong mekim ol samting i kamap stret? Olsem wanem yumi inap bihainim pasin bilong Jisas long mekim ol samting i kamap stret? (b) Sapos yumi mas stretim tok wantaim narapela, yumi mas abrusim wanem kain pasin bilong mekim tok?

¹² Taim Baibel i toktok long “mekim ol samting i kamap stret,” dispela i makim pasin bilong mekim wanpela samting i kamap gutpela o stretim samting. Sampela taim yumi mas stretim tok taim wanpela i no kliagut long tok o samting yumi bin mekim. Olsem: Ol hetman bilong lotu Juda i toktok planti olsem Jisas i mekim gut long “ol takisman na ol sinman.” Jisas i stretim tingting bilong ol na tok: “Ol man i no gat sik ol i no save go lukim dokta, tasol ol sikman ol i save go lukim dokta. Orait, go nau na kisim save long mining bilong dispela tok: ‘Mi no laikim sakrifais, mi laikim pasin marimari.’” (Mat. 9:11-13) Jisas i bin stretim tingting bilong ol manmeri tu long God em i husat. Em i skulim ol manmeri long pasin isi na gutpela pasin olsem Jehova em i ‘God bilong marimari na sori, no save belhat kwik, laikim tru olgeta manmeri, na em i save bihainim olgeta tok bilong em.’ (Kis. 34:6) Olsem na planti manmeri husat i gat pasin daun ol i bilip long gutnius.

¹³ Yumi mas bihainim pasin bilong Jisas taim yumi helpim ol narapela. Ol tok i stap long 2 Timoti 3:16 i no makim olsem yumi mas mekim hatpela tok long ol narapela bilong stretim hevi, nogat. Tok bilong ol skripsa i no makim olsem yumi toktok nating long narapela na i no tingim filings bilong em, nogat. Sapos yumi mekim hatpela tok bilong bagarapim bel bilong narapela, ol tok bilong yumi i kain olsem “bainat i sutim em.” Yumi bai mekim em i bel hevi na yumi no inap helpim em liklik.—Snd. 12:18.

14-16. (a) Ol elda i ken mekim wanem taim ol narapela i nidim helpim long stretim hevi bilong ol? (b) Bilong wanem em i bikpela samting long ol papamama i mas yusim Baibel long stretim hevi insait long famili bilong ol?

¹⁴ Olsem wanem yumi ken stap isi na bihainim gutpela pasin taim yumi yusim Baibel long stretim ol hevi? Tingim olsem: Tupela marit i save tok pait planti taim. Ol i askim wanpela elda long helpim ol. Elda i no inap sapotim wanpela, na em i no inap kamapim tingting bilong em yet long stretim hevi bilong ol, nogat. Em bai yusim ol stiatok bilong Baibel long helpim ol long kliagut long olsem wanem ol inap lusim pasin bilong tok pait. Em inap yusim ol stiatok  i stap long sapta 3 bilong buk Rot Bilong Famili i Ken Stap Amamas. Taim ol i stori long ol dispela stiatok, man marit na meri marit bai luksave olsem ol i mas mekim sampela senis. Bihain elda bai sekim sapos hevi bilong ol i stap yet o nogat, na em bai redi long helpim ol sapos ol i nidim helpim.

 ¹⁵ Olsem wanem ol papamama i ken helpim ol pikinini bilong ol long stretim ol hevi? Piksaim long tingting olsem yangpela pikinini meri bilong yu i gat nupela pren. Tasol yu ting olsem dispela nupela pren i save mekim ol disisen i no stret. Pastaim, yu mas kisim sampela save moa long pasin bilong dispela pren. Na sapos yu wari yet long pikinini meri bilong yu, orait yu ken toktok wantaim em. Yu ken mekim wok long ol stiatok bilong Baibel i stap long buk Questions Young People Ask—Answers That Work, Volume 2. Yu mas lusim sampela haptaim moa long stap wantaim em. Yu ken skelim gut pasin em i mekim long taim bilong wok autim tok na long taim em i stap wantaim famili. Sapos yu soim pasin isi na gutpela pasin taim yu toktok wantaim pikinini meri bilong yu, em bai save olsem yu laikim na tingim em. Dispela bai helpim em long bihainim tok bilong yu taim em i makim ol poroman, na em inap mekim ol gutpela disisen long laip bilong em.

¹⁶ Husat moa inap nidim helpim bilong yumi? Long pasin isi na gutpela pasin, yumi inap helpim ol narapela taim ol i wari long helt bilong ol, bel hevi long ol i no gat wok mani moa, o ol i paul long wanpela tok em Baibel i kamapim. Taim yumi yusim Tok Bilong God long stretim hevi, yumi olgeta bai kisim helpim long kain kain rot.

17. Bilong wanem yumi mas amamas long kisim tok em narapela i givim bilong stretim yumi?

¹⁷ Baibel i kamapim olsem yumi no save amamas taim narapela i stretim yumi. Na moa yet, i hatwok tru long yumi orait long en. Tasol sapos  yumi orait long dispela tok na bihainim, dispela tok bilong stretim yumi inap mekim yumi kamap stretpela man. (Hib. 12:11) Planti Kristen husat i kamap bikpela long tok i tru, ol i stori olsem ol i bin kisim helpim long ol tok em papamama i bin givim bilong stretim ol. Na taim ol elda i givim tok bilong Jehova long stretim yumi, yumi inap stap yet long rot bilong kisim laip.—Snd. 4:13.

18, 19. (a) Bilong wanem tok kaunsel i stap long Sindaun 18:13 i bikpela samting long ol elda taim ol i givim tok bilong stretim ol narapela? (b) Taim ol elda i bihainim pasin isi na pasin laikim taim ol i givim tok bilong stretim man, orait man inap mekim wanem?

¹⁸ Olsem wanem ol elda na ol papamama inap lain long stretim narapela long gutpela pasin? Jehova i tok yumi mas bihainim “stretpela pasin” taim yumi stretim ol narapela. (2 Tim. 3:16) Dispela i makim olsem yumi mas mekim wok long ol stiatok bilong Baibel taim yumi stretim ol narapela. Wanpela gutpela stiatok bilong Baibel i stap long Sindaun 18:13, em i tok: “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin na yu gat sem.” Olsem na taim wanpela i tokim ol elda olsem wanpela brata o sista i mekim wanpela bikpela rong, ol elda i mas painimaut na save gut long olgeta samting i bin kamap paslain long ol i givim tok bilong stretim man. (Lo 13:14) Taim ol i mekim olsem, ol inap bihainim “stretpela pasin” taim ol i stretim man.

¹⁹ Baibel i tokim tu ol elda long bihainim “pasin isi” taim ol i stretim ol narapela. (Ritim 2 Timoti 2:24-26.) Em tru olsem taim wanpela man i mekim rong, dispela inap kirapim ol narapela long kisim tingting kranki long Jehova o dispela inap bagarapim bel bilong ol narapela. Tasol sapos elda i kros taim em i givim tok kaunsel long dispela man, em bai i no inap helpim dispela man. Sapos elda i bihainim pasin bilong God na toktok long gutpela pasin taim em i givim tok bilong stretim man i mekim rong, orait ating dispela man inap tanim bel.—Rom 2:4.

20. Taim ol papamama i stretim pikinini, ol i mas bihainim wanem ol stiatok?

²⁰ Ol papamama tu i mas bihainim ol stiatok bilong Baibel taim ol i stretim ol pikinini bilong ol. (Efe. 6:4) Olsem: Papa i mas mekim wanem taim wanpela i tokim em olsem pikinini man bilong em i mekim rong? Papa i mas painimaut na save gut long olgeta samting i bin kamap paslain long em i panisim pikinini. Insait long famili Kristen, belhat i no ken daunim wanpela na kirapim em long pait na bagarapim narapela. “Jehova i gat pasin bilong sori tru na marimari,” na ol papamama i mas bihainim pasin bilong em taim ol i stretim ol pikinini.—Jems 5:11.

21, 22. Taim yu ritim tok i stap long Song 119:97-104, wanem ol tok i kamapim tingting bilong yu yet long Tok Bilong Jehova?

²¹ Wanpela wokman bilong God i bin stori long as na em i laikim tru lo bilong Jehova. (Ritim Song 119:97-104.) Em i bin stadi gut long lo bilong God, na long dispela rot em i kisim savetingting na lain long kliagut long ol samting. Taim em i bihainim ol stiatok i stap long ol skripsa, em i abrusim ol popaia em planti man i save mekim. Em i bin amamas tru long stadi long ol skripsa, na ol tok kaunsel bilong en i bin helpim em taim em i bihainim. Em i tingting strong long bihainim ol lo bilong God long laip olgeta bilong em.

²² Olsem wanem? Yu tingim Baibel olsem samting i dia tumas? Baibel inap helpim yu long strongim bilip bilong yu olsem God bai truim samting em i tingting pinis long mekim. Baibel i kamapim ol tok kaunsel i kam long Jehova na dispela i helpim yumi long abrusim pasin bilong sin we bai mekim na dai i painim yumi. Yu inap yusim ol dispela tok kaunsel long helpim ol narapela long kisim save long olsem wanem ol inap wokabaut long rot bilong laip na bihainim yet dispela rot. Yumi mas wok yet long yusim Baibel long ol dispela rot taim yumi mekim wok bilong Jehova, em God husat i gat pasin laikim.