1. Kay ano nga kinahanglan bug-os an aton pagsarig ha Pulong han Dios?

KON gin-uusisa han mga tigurang kon an usa nga Bible study kwalipikado na ba nga makigbahin ha ministeryo, ira ginpapakianhan an ira kalugaringon, ‘An iya ba mga ginyayakan nagpapakita nga natoo hiya nga an Biblia amo an giniyahan nga Pulong han Dios?’ * Para ha usa nga naruruyag magin magwarali han Ginhadian—ha pagkamatuod, para ha ngatanan nga surugoon han Dios—an baton kinahanglan matin-aw nga oo. Kay ano? Kay kon bug-os an aton pagsarig ha Pulong han Dios ngan mahibaro kita paggamit hito hin epektibo ha ministeryo, mabubuligan naton an iba nga makilala hi Jehova ngan magkaada kaluwasan.

2. Kay ano nga kinahanglan ‘padayon nga buhaton naton an mga butang nga aton hinbaroan’?

² Ginpabug-atan ni apostol Pablo an pagkaimportante han Pulong han Dios han nagsurat hiya kan Timoteo: “Padayon nga buhata an mga butang nga imo hinbaroan ngan nakombinse ka nga toohan.” An gin-unabi ni Pablo nga “mga butang” amo an mga kamatuoran ha Biblia nga nagpagios kan Timoteo nga magkaada pagtoo ha maopay nga sumat. Ini nga mga kamatuoran may pariho liwat nga epekto ha aton yana, ngan padayon nga ginbubuligan kita hito nga magpabilin nga “maaramon para ha katalwasan.” (2 Tim. 3:14, 15) An sunod nga ginsiring ni Pablo kasagaran na nga ginagamit naton ha pagpakita ha iba nga an Biblia tikang ha Dios, pero kita liwat makakakuha hin dugang nga kapulsanan tikang hito nga mga pulong nga mababasa ha 2 Timoteo 3:16. (Basaha.) Aton hisgotan hin mas detalyado ini nga bersikulo. An pagbuhat hito magpaparig-on han aton pagsarig nga an ngatanan nga katutdoan ni Jehova “matadong.”—Sal. 119:128.

3-5. (a) Ano an reaksyon han mga tawo ha pahayag ni Pedro han Pentekostes, ngan kay ano? (b) Kay ano nga damu ha Tesalonica an nagkarawat han kamatuoran? (c) Ano an naoobserbaran han mga tawo yana ha paagi han aton pagsangyaw?

³ Hi Jesus nagsiring ha nasud han Israel: “Nagsusugo ako nganhi ha iyo hin mga propeta, mga maaramon, ngan mga magturutdo.” (Mat. 23:34) Gintutudlok dinhi ni Jesus an iya mga disipulo, nga iya gintutdoan ha paggamit han Kasuratan ha ira ministeryo. Han Pentekostes 33 C.E., usa hini nga “mga magturutdo,” hi apostol Pedro, nagpahayag ha damu nga tawo ha Jerusalem, ngan iya ginkotar an pipira nga bahin han Hebreo nga Kasuratan. Han nabatian han mga tawo an pagsaysay ni Pedro hini nga mga bersikulo, damu ha ira an sugad hin ‘gintusok an kasingkasing.’ Nagbasol hira han ira nabuhat nga mga sala. Mga tulo ka yukot ha ira an nangaro hin pasaylo ha Dios ngan nagin mga Kristiano.—Buh. 2:37-41.

⁴ An usa pa nga magturutdo, hi apostol Pablo, nagsangyaw han maopay nga sumat ha higrayo nga lugar ha gawas han Jerusalem. Pananglitan, ha syudad han Tesalonica ha Macedonia, nagpahayag hiya ha mga nagsisingba ha usa nga sinagoga. Ha tulo nga sunod-sunod nga Sabbath, “nangatadongan hiya ha ira tikang ha Kasuratan. Igin-esplikar niya ngan ginpamatud-an pinaagi hin mga reperensya nga kinahanglan mag-antos an Kristo ngan mabanhaw.” Ano an resulta? “An iba ha ira [mga Judio] nagin tumuroo,” sugad man an “damu gud nga Griego.”—Buh. 17:1-4.

⁵ Damu yana an nakakaobserbar nga ginagamit naton an Biblia basi pamatud-an an aton igintututdo. Ha Switzerland, katapos pamatian an pagbasa hin teksto han usa nga sister, an tagbalay nagpakiana: “Ano an iyo relihiyon?” Binaton hiya: “Mga Saksi ni Jehova kami.” Nagsiring an tagbalay: “Nasiring pa gud ako. Hin-o pa ba labot han mga Saksi an makanhi ha balay basi magbasa han Biblia?”

6, 7. (a) Paonan-o magagamit hin maopay han mga nagtututdo ha kongregasyon an Biblia? (b) Paonan-o naton magagamit hin epektibo an Kasuratan kon nagba-Bible study?

⁶ Paonan-o naton magagamit an Biblia ha pinakamaopay nga paagi ha aton pagtutdo? Ha kada panahon nga may pribilehiyo ka nga magtutdo ha kongregasyon ha mga katirok, gamit hin espisipiko nga mga teksto ha Biblia. Imbes nga unabihon la an ginsisiring han mga teksto o basahon ito ha printout o ha gadyet, abrihi an Biblia ngan basaha ito, ngan aghata an mga mamarati nga buhaton liwat ito. Paggahin liwat hin panahon ha pagsaysay han kahulogan han mga bersikulo ngan kon paonan-o ito makakabulig ha ira nga magin mas duok kan Jehova. Imbes nga gumamit hin komplikado nga mga ilustrasyon ngan eksperyensya para la magpatawa, gamita an panahon ha pagsaysay han Pulong han Dios.

⁷ Ano an kinahanglan naton hinumdoman samtang nagba-Bible study kita? Ha aton paggamit han aton mga publikasyon, kinahanglan diri naton laktawan an mga teksto nga gin-uunabi. Sadang naton aghaton an aton Bible study nga basahon an gin-unabi nga mga teksto ngan buligan hiya nga masabtan ito. Paonan-o? Diri pinaagi han hilaba nga pagsaysay nga tungod hito baga na kita hin nagpapahayag, kondi pinaagi ha pag-aghat ha iya nga iyakan an iya panhunahuna. Imbes nga sidngan hiya kon ano an iya sadang toohan o buhaton, mahimo kita magbangon hin ginhunahuna hin maopay nga mga pakiana nga makakabulig ha iya nga magkaada husto nga pagsabot. *

8. Ano nga pakig-away an gin-atubang ni Pablo?

⁸ Kasagaran na nga ginhuhunahuna naton nga buruhaton han mga tigurang an “pagsaway.” Oo, responsabilidad han mga paramangno nga ‘sawayon an mga nagbubuhat hin sala.’ (1 Tim. 5:20; Tito 1:13) Kondi importante liwat an pagsaway ha aton kalugaringon. Hi Pablo usa nga susbaranan nga Kristiano nga may malimpyo nga konsensya. (2 Tim. 1:3) Bisan pa hito, hiya nagsurat: “Nakikita ko ha akon lawas nga may iba nga balaud nga nakikig-away ha balaud han akon hunahuna ngan naghihimo ha akon nga bihag han balaud han sala.” An pag-aram han konteksto hini nga iya ginsiring mabulig ha aton nga mas masabtan kon ano an  kinahanglan buhaton ni Pablo basi maatohan an iya mga kaluyahan.—Basaha an Roma 7:21-25.

9, 10. (a) Ano an posible nga mga kaluyahan ni Pablo? (b) Ano an posible nga ginhimo ni Pablo basi maatohan an iya mga kaluyahan?

⁹ Ano nga mga kaluyahan an ginpangalimbasogan ni Pablo nga malamposan? Bisan kon waray niya espisipiko nga igsiring kon ano ito, nagsurat hiya kan Timoteo nga hadto “nanmamaltrato” hiya. (1 Tim. 1:13) Antes hi Pablo nagin Kristiano, nangangalas gud hiya ha mga Kristiano. Mahitungod han iya inaabat ha mga sumurunod ni Kristo, hiya nagsiring: “Napupungot ako ha ira.” (Buh. 26:11) Nahibaro hi Pablo pagkontrol han iya kasina, kondi may mga panahon nga sigurado nga nangalimbasog gud hiya pagkontrol han iya inaabat ngan ginyayakan. (Buh. 15:36-39) Ano an nakabulig ha iya nga maglampos?

¹⁰ Han nagsurat hi Pablo ha mga Kristiano ha Corinto, iya iginsaysay an iya ginbuhat basi sawayon an iya kalugaringon. (Basaha an 1 Corinto 9:26, 27.) Nangalimbasog gud hiya nga atohan an iya mga kaluyahan. Posible gud nga namiling hiya hin mga sagdon tikang ha Kasuratan, nanginyupo kan Jehova nga buligan hiya nga iaplikar ito, ngan ginbuhat an iya gimaopayi basi sundon ito. * Mahimo kita magpahimulos ha iya ehemplo kay nakikig-away liwat kita ha aton mga kaluyahan.

11. Paonan-o naton ‘padayon nga mauusisa’ an aton kalugaringon basi mahibaroan kon naglalakat kita ha dalan han kamatuoran?

¹¹ Kinahanglan diri gud kita magin kampante ha aton pagsingba. Lugod, kinahanglan ‘padayon nga usisahon’ naton an aton kalugaringon basi masiguro nga naglalakat gud kita ha dalan han kamatuoran. (2 Cor. 13:5) Kon ginbabasa naton an mga teksto sugad han Colosas 3:5-10, mahimo naton pakianhan an aton kalugaringon: ‘Nangangalimbasog gud ba ako nga patayon an akon makasasala nga mga tendensya, o nagtitikaluya an akon moralidad? Kon nag-i-Internet ako ngan tigda nga may nagawas nga malaw-ay nga web site, ginpaparong ko ba ito, o namimiling ako hin maraot nga mga web site?’ An pag-aplikar ha aton kinabuhi han sagdon ha Pulong han Dios mabulig ha aton nga ‘padayon nga mag-agma ngan tipigan an aton maopay nga panhunahuna.’—1 Tes. 5:6-8.

12, 13. (a) Ano an sadang naton magin tumong “ha pagtadong,” ngan paonan-o naton masusubad an susbaranan ni Jesus ha pagbuhat hito? (b) Ano nga paagi han pagyakan an sadang naton likyan kon gintatadong naton an iba?

¹² An Griego nga pulong nga iginhubad nga “pagtadong” nangangahulogan nga “himoon nga maopay, tadungon, ibalik ha husto ngan matadong nga kahimtang.” Usahay kinahanglan may-ada kita himoon basi tadungon an iba nga may sayop nga panhunahuna ha aton o ha aton ginbubuhat. Pananglitan, an mga lider han relihiyon han mga Judio nagreklamo nga hi Jesus buotan ha “mga parasukot hin buhis ngan magpakasasala.” Hi Jesus binaton: “An mahimsog diri nanginginahanglan hin doktor, kondi an may sakit. Salit lakat kamo ngan sabota an kahulogan hini: ‘Karuyag ko an kalooy, diri an halad.’” (Mat. 9:11-13) Iginsaysay niya ha ngatanan an mga pulong han Dios ha mapailubon ngan buotan nga paagi. Salit hinbaroan han mga mapainubsanon nga hi Jehova “usa ka Dios nga maloloy-on ngan mapinairon, mahinay ha pagkasina, ngan hura hin pagkalooy ngan hin kamatuoran.” (Eks. 34:6) Tungod han pangalimbasog han Anak han Dios “ha pagtadong,” damu an nagkaada pagtoo ha maopay nga sumat.

¹³ An susbaranan ni Jesus nagtututdo ha aton kon paonan-o sadang buligan an iba. An usa nga nasisina bangin magsiring ha maisog nga tingog, ‘May-ada ako karuyag tadungon ha imo.’ Kondi an sugad hito nga paagi han pakiistorya diri amo an katuyoan han ginsiring ha 2 Timoteo 3:16. “An ngatanan nga Kasuratan” waray maghatag ha aton hin katungod nga magyakan ha iba nga diri gintatagad an ira pagbati. Pariho hin “nadulot nga kampilan,” an masakit nga paagi han pagtadong agsob magresulta hin duro nga kabido ngan bangin diri ngani makahatag hin kapulsanan.—Prob. 12:18.

14-16. (a) Paonan-o magtatadong an mga tigurang ha paagi nga mabubuligan an iba nga masulbad an ira mga problema? (b) Kay ano nga an “pagtadong” ha paagi nga uyon ha Kasuratan importante gud ha pagpadaku ha mga anak?

 ¹⁴ Kon sugad, paonan-o naton maipapakita an pagpailob ngan pagkabuotan kon gintatadong naton an iba? Pananglitan may usa nga mag-asawa nga nangaro hin bulig ha usa nga tigurang basi diri na hira magdiniskusyon. Ano an bubuhaton han tigurang? Diri hiya maugop ha bisan hin-o ha ira, ngan diri hiya maghahatag hin personal nga opinyon mahitungod ha ira problema. Lugod, gagamiton niya an mga prinsipyo ha Biblia basi buligan hira nga hibaroan kon paonan-o mauundang an ira pagdiniskusyon. Puydi niya gamiton an mga prinsipyo nga ginhihisgotan ha kapitulo 3 han libro nga An Sekreto han Kalipayan ha Pamilya. Samtang ira ginhihisgotan ini nga mga prinsipyo, mahimo masantop han bana ngan asawa kon ano nga sagdon an kinahanglan mas iaplikar nira nga mag-asawa. Ha urhi, papakianhan hira han tigurang kon kumusta na an ira pamilya ngan magtatanyag hiya hin dugang nga bulig kon kinahanglanon.

 ¹⁵ Paonan-o ‘tatadungon’ han mga kag-anak an ira mga anak ha paagi nga makaparig-on ha espirituwal? Pananglitan karuyag mo buligan an imo tin-edyer nga anak nga babaye nga malikyan an diri maopay nga mga sangkay. Siyahan, kinahanglan hibaroan mo an tinuod nga kahimtang. Katapos, kon may hinungdan ka nga mabaraka, mahimo mo hiya kaistoryahon, ngan puydi mo gamiton an mga punto ha Questions Young People Ask—Answers That Work, Volume 2. Ha sunod nga mga adlaw, mahimo ka maggahin hin dugang nga panahon upod ha iya. Puydi mo liwat obserbaran an iya disposisyon kon nagsasangyaw hiya o kon nagpapahalibway upod han pamilya. Kon magpapakita ka hin pagpailob ngan pagkabuotan, maaabat han imo anak nga hinigugma mo hiya ngan interesado ka ha iya kaopayan. Posible gud nga mapagios hiya nga iaplikar an imo sagdon ngan likyan an paghimo hin sayop nga mga desisyon.

¹⁶ Ha mapailubon ngan buotan liwat nga paagi, mahimo naton dasigon an iba nga nababaraka ha ira  kahimsog, nanluluya tungod han kawad-i hin trabaho, o nawuwurok ha pipira nga katutdoan ha Biblia. An paggamit han Pulong han Dios “ha pagtadong” nagriresulta hin damu nga kaopayan ha katawohan ni Jehova.

17. Kay ano nga kinahanglan mapasalamaton nga karawaton naton an disiplina?

¹⁷ “Waray disiplina nga makalilipay samtang iginpapadapat, lugod masakit ito.” Pero “katapos, nagbubunga ito hin kamurayawan ngan katadongan ha mga nabansay hito.” (Heb. 12:11) Kadam-an han adulto nga mga Kristiano an nauyon nga nakabulig ha ira an disiplina han ira Kristiano nga mga kag-anak. Ngan an pagkarawat han disiplina ni Jehova, nga iginhahatag han mga tigurang, nakakabulig ha aton nga magpabilin ha dalan ngadto ha kinabuhi.—Prob. 4:13.

18, 19. (a) Kay ano nga an sagdon ha Proberbios 18:13 importante gud ha “pagdisiplina uyon ha katadongan”? (b) Kon an mga tigurang nagpapakita hin pagkamalumo ngan gugma ha ira pagtratar ha mga nakasala, ano an agsob nga resulta?

¹⁸ An paghatag hin epektibo nga disiplina usa nga abilidad. Ginsidngan ni Jehova an mga Kristiano nga buhaton ito “uyon ha katadongan.” (2 Tim. 3:16) Salit sadang naton gamiton an mga prinsipyo ha Biblia sugad nga giya. Usa hito nga mga prinsipyo an mababasa ha Proberbios 18:13: “Hiya nga nahatag han baton nga diri pa hiya nakakabati, amo an kalurongan ngan kaalohan ha iya.” Salit, kon kinahanglan kaistoryahon han mga tigurang an usa nga bugto nga gin-akusaran nga nagbuhat hin daku nga sala, kinahanglan mag-imbistigar hira hin maopay basi hibaroan an ngatanan nga impormasyon may kalabotan hito. (Deut. 13:14) Katapos hito, dida la hira makakapadapat hin disiplina “uyon ha katadongan.”

¹⁹ Dugang pa, ginsusugo han Pulong han Dios an mga tigurang nga “may pagkamalumo” nga tadungon an iba. (Basaha an 2 Timoteo 2:24-26.) Oo, an usa nga indibiduwal mahimo makabuhat hin pagpasipara kan Jehova ngan makasakit ha inosente nga mga tawo. Bisan pa hito, an tigurang nga nasisina kon nagsasagdon hito nga indibiduwal diri makakabulig ha iya. Kondi, kon ginsusubad han mga tigurang an “pagkabuotan han Dios,” bangin mapagios nira an nakasala nga magbasol.—Roma 2:4.

20. Ano nga mga prinsipyo an sadang iaplikar han mga kag-anak kon nagdidisiplina ha ira mga anak?

²⁰ Ha pagpadaku han mga kag-anak ha ira mga anak “uyon ha disiplina ngan sagdon ni Jehova,” kinahanglan iaplikar nira an mga prinsipyo ha Biblia. (Efe. 6:4) Pananglitan, ano an sadang buhaton han usa nga amay kon may magsumat ha iya nga nakabuhat hin sayop an iya anak? Sadang niya siguruhon nga maaram hiya han ngatanan nga detalye antes niya sirotan an iya anak. Ngan diri sadang magin madarahog an bisan hin-o ha Kristiano nga pamilya tungod han duro nga kasina. “Hi Jehova mapinalanggaon ngan maloloy-on,” ngan an mga may responsabilidad ha pagdisiplina ha kabataan sadang mangalimbasog nga ipakita liwat inin mahigugmaon nga mga kalidad.—San. 5:11.

21, 22. Ano nga mga pulong ha Salmo 119:97-104 an nagpapahayag han imo inaabat mahitungod han Pulong ni Jehova?

²¹ Iginpahayag han usa nga surugoon han Dios kon kay ano nga hinigugma niya an balaud ni Jehova. (Basaha an Salmo 119:97-104.) Pinaagi ha pag-aram hito, nagkaada hiya kinaadman ngan matin-aw ngan hilarom nga pagsabot. An pagsunod han sagdon hito nakabulig ha iya nga malikyan an pagbuhat hin mga sayop nga nagresulta hin kasákit ha iba. Para ha iya, makalilipay ngan mapulsanon an pag-aram. Determinado hiya nga sundon an Dios nga naghatag hin mga instruksyon nga damu gud an kapulsanan ha iya.

²² Ginpapabilhan mo ba “an ngatanan nga Kasuratan”? Pinaagi hito ginpaparig-on mo an imo pagtoo nga tutumanon han Dios an iya katuyoan. An giniyahan nga sagdon hito nabulig ha imo nga diri magbuhat hin sala nga magriresulta hin kamatayon. Ngan pinaagi ha pagsaysay hito hin maopay ha iba, mabubuligan mo hira nga maglakat ha dalan ngadto ha kinabuhi ngan magpabilin dida hito. Hinaot pahimulsan naton hin bug-os “an ngatanan nga Kasuratan” samtang nag-aalagad kita ha aton maaramon ngan mahigugmaon nga Dios, hi Jehova.