1. Mang fan nthingari pagan’dad ko Thin rok Got?

 U M’ON ni nge un be’ ni ma fil e Bible ko machib, ma thingari m’ug ni ke mich u wan’ ni Bible e Thin rok Got. * Gad gubin nib t’uf ni nge m’ug ko ngongol rodad nge thin rodad ni be pagan’dad ko thin nu Bible. Faanra rib pagan’dad ko thin nu Bible ma kad nanged rogon ni ngad fanayed nib fel’ rogon u nap’an e machib, ma aram e rayog ni ngad ayuweged boch e girdi’ ni ngar nanged murung’agen Jehovah mi yad pirieg fare kanawo’ ni yan ko yafas ni manemus.

2. Mang fan ni susun e ngaud pared ko tin riyul’ e thin ni kad filed?

² Ke tamilangnag apostal Paul nrib ga’ fan e Thin rok Got. I yol ngak Timothy ni gaar: “Nguum par ko tin nib riyul’ e thin ni kan fil ngom.” Fapi “thin” ni ke fil Timothy e aram e tin riyul’ u lan e Bible ni ir e ke gelnag e michan’ rok ko fare thin nib fel’. Pi n’en ni kad filed u lan e Bible e rayog ni nge gelnag e michan’ rodad. Bible e ku rayog ni nge ayuwegdad ni ngad ‘thapgad ngak Got.’ (2 Tim. 3:14, 15) N’en ni migid ni yog Paul e be tamilangnag ni Bible e yib rok Got. Machane, mang e ku rayog ni ngad filed ko fapi thin ni bay ko 2 Timothy 3:16? (Mu beeg.) Chiney e ngad weliyed e re thin nu Bible ney nib fel’ rogon ya nge yag ni ngari mich u wan’dad nib “riyul’” urngin e pi n’en ni ma fil Jehovah ngodad.​—Ps. 119:142.

3-5. (a) Mang e buch u tomuren ni pi’ Peter ba welthin ni nge rung’ag ba ulung i girdi’ u nap’an e Pentekost, ma mang fan? (b) Mang fan ni boor e girdi’ u Thessalonika ni mich e tin riyul’ u wan’rad? (c) Mang e ke guy e girdi’ u rogon e machib ni gad ma tay e ngiyal’ ney?

³ I yog Jesus ko fare nam nu Israel ni gaar: “Bay gu pi’ boch e profet nge boch e girdi’ ni llowan’ nge boch e tamachib ngar bad ngomed.” (Matt. 23:34) U roy e be weliy Jesus riy murung’agen pi gachalpen ni ke fil ngorad rogon ni ngar fanayed  e thin ko Babyor nib Thothup u nap’an ni yad be machib. U nap’an e Pentekost ko duw ni 33, me pi’ apostal Peter ba welthin ni nge rung’ag ba ulung i girdi’ ni yad boor ni kar muulunggad nga Jerusalem. Immoy yu yang ko Fapi Babyor ko Bible nni Yoloy Nsom’on ni Thin ni Hebrew ni i sul u daken e thin riy. Ma nap’an ni rung’ag e girdi’ rogon ni ke weliy e pi thin nu Bible nem, ma boor i yad e kireban’rad ni bochan e kireb ni ur rin’ed. Ma aram mar kalgadngan’rad ko denen rorad mi yad wenig ngak Got ni nge n’ag fan rorad. Rofen nem e sogonap’an dalip biyu’ e girdi’ nra uned ko taufe ni kar manged boch e Kristiano.​—Acts 2:37-41.

⁴ Ku rayog ni ngad filed ban’en rok apostal Paul ni i machib u wuru’ yu Jerusalem. Nap’an ni immoy u lan fare mach nu Thessalonika ni bay u lan yu Macedonia, me machibnag e pi Jew ni ur moyed u tafen e muulung rok piyu Israel. Ma dalip e rran ni Sabbath ni i welthin riy ngak e girdi’ u “lan e babyor nib thothup” ni be guy rogon ni nge micheg ngorad nthingari gafgow Kristus me tomur riy min faseg ko yam’. Immoy boch e Jew nge piyu Greece ni mich e thin rok Got u wan’rad.​—Acts 17:1-4.

⁵ Boor e girdi’ e ngiyal’ ney e kar guyed nrayog ni ngad fanayed e thin nu Bible ni ngad micheged e pi n’en ni gad be machibnag. Bay reb e ppin ni walagdad u Switzerland ni beeg reb e thin nu Bible ngak be’ u nap’an e machib, me fith facha’ ngak fare walag ko mang e teliw rok. Me yog fare walag ngak ni ir nge faen ni yow be machib u taabang e yow l’agruw e Mich Rok Jehovah. Ma aram me yog fare moon ni susun ni manang e re n’em ni bochan e yigoo Pi Mich Rok Jehovah e yug rayog rorad ni ngar bad nga tabinaw rok ngar beeged e Bible ngak.

6, 7. (a) Uw rogon nrayog ni nge fanay e piin ni yad ma fil ban’en u lan e ulung e thin nu Bible nib fel’ rogon? (b) Mang nib ga’ fan ni ngan fanay e thin nu Bible nib fel’ rogon u nap’an ni yibe fil e Bible ngak be’?

⁶ Uw rogon nrayog ni ngad fanayed e thin nu Bible nib fel’ rogon u nap’an ni gad be fil ban’en ko girdi’? Faanra ngam welthin u p’eowchen e girdi’ u nap’an e muulung, ma ga fanay e thin nu Bible. Faanra bay reb e thin nu Bible ni ngam beeg, mag beeg u Bible ko bin ni ngam yoloy nga bang ngaum beeg, ara mu beeg u computer, ara mu weliy e n’en ni be yog. Kub ga’ fan ni nga mog ko piin ni yad be motoyil ni ngar yaliyed fapi thin u lan e Bible rorad. Mu weliy fan fapi thin nu Bible ni kam beeg nge rogon nrayog ni nge ayuweg e girdi’ ni nge fel’ e tha’ u thilrad Jehovah. Mu fanay e re ngiyal’ i n’em ni ngam weliy e Thin rok Got ko bin ni ngam weliy boch e fanathin nib mo’maw’ ni ngan nang fan ara boch ban’en ni ke buch rok boch e girdi’ nib mak’ak’ar.

⁷ Mang e susun ni ngad lemnaged u nap’an ni gad be fil e Bible ngak be’? Ba ga’ fan ni ngad beeged e pi thin nu Bible ni bay ko fare ke babyor ni gad be fil. Nga dogned ngak facha’ ni nge beeg fapi thin nu Bible. Ma nap’an ni gad be weliy fan e pi thin nem, ma gathi yigoo gadad e ngaud nonad ya ngkud paged facha’ ni ngki yog laniyan’. Rayog ni ngad fithed boch e deer ngak nra ayuweg ni nge nang fan e n’en ni be weliy e Bible ko bin ni nga dogned ngak e n’en ni nge mich u wan’ ara n’en ni nge rin’. *

8. Mang e magawon rok Paul?

⁸ Ba milfan ngak e piin piilal u lan e ulung ni ngar ginanged ara ngar yal’uweged e piin ni kar denengad. (1 Tim. 5:20; Titus 1:13) Machane kub t’uf ni ngad yal’uweged gadad. Paul e ir reb e Kristiano nib fel’ mab beech e nangan’ rok. (2 Tim. 1:3) Machane, i yog ni gaar: “Reb e motochiyel nib thil ko biney e gu be guy ni be maruwel u fithik’ i dowag​—reb e motochiyel ni be togopluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen ni ir e be maruwel u fithik’ i dowag.” Ngad weliyed e n’en ni rin’ Paul ya nge yag ni gel ko pi meewar rok.​—Mu beeg e  Roma 7:21-25.

9, 10. (a) Mang reb e meewar ni dabisiy ni immoy rok Paul? (b) Uw rogon ni gel Paul ko re meewar nem?

 ⁹ De yog Paul ko mang meewar e immoy rok, machane i yog ni ir be’ ni ma “yog e thin nib kireb,” ni aram e dariy fan e girdi’ u wan’. (1 Tim. 1:13) U m’on ni nge mang reb e Kristiano, mab gel e gafgow ni i tay ngorad. I yog ni ‘kari damumuw ngorad.’ (Acts 26:11) Ke yag rok Paul ni nge gel ko damumuw rok, machane dabisiy ni kub t’uf ni nge kol ayuw u rogon ni ma lem nge rogon ni ma non. (Acts 15:36-39) Ere, mang e ke ayuweg?

¹⁰ U lan e gin som’on e babyor ni yoloy nge yan ko ulung nu Korinth, me weliy riy rogon ni i yal’uweg ir. (Mu beeg e 1 Korinth 9:26, 27.) I rin’ boch ban’en ya nge yag ni gel ko pi meewar rok. Dariy e maruwar riy ni i gay e fonow u lan fare Babyor nib Thothup, me meybil ngak Jehovah ni nge ayuweg ni nge fol ko pi fonow nem, me athamgil ni nge fol riy. * Bay ban’en nrayog ni ngad filed ko n’en ni rin’, ya ku er rogodad nib t’uf ni ngaud gayed rogon ni ngad gelgad ko pi meewar rodad.

11. Uw rogon ni ngad ‘changargad ngodad’ ngad guyed ko gad be yan u kanawoen e tin riyul’ fa danga’?

¹¹ Dab da lemnaged ni ngad talgad i gay rogon ni ngad gelgad ko pi meewar rodad. Ya ba t’uf ni ngaud ‘changargad ngodad’ ngad guyed ko gad be yan u kanawoen e tin riyul’ fa danga’. (2 Kor. 13:5) Nap’an ni gad ra beeg e Kolose 3:5-10 ara boch e thin nu Bible ni taareb rogon ngay, ma rayog ni ngad fithed gadad ni nge lungudad: ‘Gu be gay rogon ni nggu gel ko pi meewar rog? Fa gu be tabab ni nggu adag e pi n’en ndabun Jehovah? Bod ni faanra gu bay ko Internet me m’ug yaan boch ban’en nib kireb, ma gu ma guy rogon ni nge chuw fapi n’em nib papey? Fa gu ma yan ni gu ma gay yaan e pi n’em?’ Faan gad ra guy rogon ni ngad folgad ko pi fonow ni bay ko Thin rok Got, ma rayog ni “nguud pired ni gadad be od ma ba tamilangan’dad.”​—1 Thess. 5:6-8.

12, 13. (a) Mang e be yip’ fan ni ngan fulweg e girdi’ ko ngongol nib fel’? Uw rogon ni ngad folwokgad rok Jesus u rogon ni ngad yal’uweged boch e girdi’? (b) Faanra ba t’uf ni ngad yal’uweged be’, mab miti mang thin e ba t’uf ni ngad siyeged?

¹² Fare bugithin ni kan piliyeg ni ngan “fulweg e girdi’ ko ngongol nib fel’” e be yip’ fan ni ngan yal’uweg ban’en ara ngan sulweg nge fel’ rogon. Yu ngiyal’ e ba t’uf ni ngad yal’uweged boch ban’en u nap’an ni ka dogned ara kad rin’ed ban’en ni ke kirebnag laniyan’ be’. Bod ni pi tayugang’ ko teliw rok piyu Jew e ur gun’gun’naged Jesus ni bochan e i sumunguy ngak e “piin ni yad ma kunuy e tax nge piin ndabun e girdi’ nu lan binaw dakenrad.” Ere, ke yal’uwegrad Jesus, me yog ngorad ni gaar: “Piin ni yad ba gol e dariy fan e togta ngorad, ya ke mus ni piin ni yad mm’ar e ba’ fan e togta ngorad. Marod ngam guyed fan e re bugithin ni baaray u lan e babyor nib thothup ni gaar, ‘Dabug ni ngan pi’ e gamanman ni maligach ngog, ya runguy e gub adag.’” (Matt. 9:11-13) Ki yal’uweg Jesus rogon ni i lemnag e girdi’ murung’agen Got. I yog ngorad u fithik’ e gum’an’ nge sumunguy ni Jehovah e ir reb e Got ni “ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” (Ex. 34:6) Angin ni yib riy e boor e girdi’ nib sobut’an’rad ni mich fare thin nib fel’ u wan’rad.

¹³ Susun ni ngad folwokgad rok Jesus u rogon ni gad ma ayuweg boch e girdi’. Fare thin ni bay ko 2 Timothy 3:16 e gathi be yip’ fan ni ngad yal’uweged e girdi’ u fithik’ e thin nib gel. Ku der pi’ e Bible mat’awdad ni ngad darifannaged boch e girdi’. Faan gad ra togopuluw ngak be’, ma thin rodad e rayog ni nge ‘maad’ad nga laniyan’ nib toar ni bod bangi sayden.’ Ma re n’ey e ra kirebnag laniyan’ ma dabiyog ni ngad ayuweged.​—Prov. 12:18.

14-16. (a) Uw rogon nrayog ni nge fulweg e piin piilal e girdi’ ko ngongol nib fel’ u nap’an nib t’uf ni ngar ayuweged be’ ko magawon rok? (b) Mang nib ga’ fan ni nge fanay e piin gallabthir e thin nu Bible ni ngar yal’uweged boch ban’en u lan e tabinaw rorad?

¹⁴ Uw rogon ni ngad fulweged e girdi’ ko  ngongol nib fel’ u fithik’ e gum’an’ nge sumunguy? Susun e bay ba wu’ i mabgol ni ka rognew ngak reb e piilal ni Kristiano ni nge ayuwegrow nge dab ku ur tugthingow. Ere, mang e ra rin’ fare piilal? Rayog ni nge fanay e thin ni bay ko guruy ni 14 ko fare ke babyor ni Mang e Ri Be Fil e Bible? ni nge ayuwegrow ngar lemnagew boch e pi kenggin e motochiyel nu Bible, ma dabi fol ngak bagayow. Nap’an ni be non fare piilal ngak fa wu’ i mabgol, ma sana yow ra pirieg boch e fonow nrayog ni ngar folgow riy. Ma rayog ni nge ba ngiyal’ nga tomuren e ngiyal’ ni baaram ni kar nonad me fith fare piilal ngak fa wu’ i mabgol ko ke uw rogon e tabinaw rorow, ma faanra kab t’uf e ayuw rorow miki guy rogon ni nge ayuwegrow.

 ¹⁵ Uw rogon nrayog ni nge fulweg e gallabthir e bitir rorad ko ngongol nib fel’? Susun e bay reb e ppin ni fakam ni kab fel’ yangaren ni ke yag reb e fager ngak nib beech, ma ga be lemnag nre fager rok nem e de puluw e pi n’en ni ma mel’eg ni nge rin’. Ere, som’on e ngam gay boch ban’en u murung’agen e re fager rok nem. Ma faanra ka be magafan’um ko bitir rom, ma rayog ni ngam non ngak. Rayog ni ngam fanay e pi kenggin e motochiyel nu Bible ni bay ko fare ke babyor ni Questions Young People Ask​—Answers That Work, ko Volume 2 ara boch e article ni bay ko Fare Wulyang ko Damit nrayog ni nge ayuweg. Susun e ngam guy rogon ni nge ga’ e tayim ni gimew ma rin’ boch ban’en u taabang. Ma rayog ni ngam yaliy rogon e ngongol rok u nap’an e machib ara nap’an ni gimed be rin’ chon e tabinaw romew boch ban’en u taabang. Faan ga ra non ngak u fithik’ e gum’an’ nge sumunguy, ma rayog ni nge nang nrib t’uf rom ma ga ma lemnag. Re n’ey e ra ayuweg ni nge fol ko fonow ni kam pi’ ngak u murung’agen e piin ni ma chag ngorad me siyeg e pi n’en nde puluw ni nge rin’.

¹⁶ Mini’ e kub t’uf ni ngad ayuweged? Rayog ni ngad yal’uweged e piin ni be magafan’rad ko m’ar rorad, ara piin ni ke kireban’rad ni bochan e kan talegrad ko maruwel, ara piin nde puluw rogon ni kar nanged fan boch e machib u lan e Bible. Ngad rin’ed e re n’ey u fithik’ e gum’an’ nge sumunguy. Nap’an ni gad ra fanay e Thin rok Got ni ngad yal’uweged be’, ma gad gubin nra yib angin ngodad.

17. Mang fan ni nga i m’agan’dad ngay ni ngad folgad ko fonow ni kan pi’ ngodad?

¹⁷ Be yog e Bible ni gathi ri gad baadag ni ngaun fonownagdad. Bin riyul’ riy e, bay yu ngiyal’ nib mo’maw’ ni nge m’agan’dad ko fonow ni kan pi’ ngodad. Machane, faanra m’agan’dad ngay ma gad fol riy, ma rayog ni nge ayuwegdad nge yal’uw pangidad u mit Got. (Heb. 12:11) Boor e Kristiano e ka rogned ni fonow ni i pi’ e gallabthir rorad ngorad e ir e ke ayuwegrad. Nap’an nra pi’ Jehovah e fonow ngodad u daken e piin piilal, ma rayog ni nge ayuwegdad ni ngad leked fare pa’ i kanawo’ ni be sor i yan ko yafas.​—Prov. 4:13.

18, 19. (a) Mang nib ga’ fan ni nge fol e piin piilal ko fare fonow ni bay ko Proverbs 18:13 u nap’an ni yad be fonownag be’? (b) Mang e ra rin’ be’ ni ke denen ni faanra fonownag e piin piilal u fithik’ e sumunguy nge t’ufeg?

¹⁸ Uw rogon ni nge fil e piin piilal nge piin gallabthir rogon ni ngar pied e fonow nib fel’? Ke yog Jehovah ngodad nib t’uf ni ngad fonownaged e girdi’ u rogon e ngongol ni ngar pared riy ni ir e “mmat’aw.” (2 Tim. 3:16) Re n’ey e be yip’ fan nib t’uf ni ngad fanayed e pi kenggin e motochiyel nu Bible u nap’an ni gad be fonownag boch e girdi’. Reb i kenggin e motochiyel ko Proverbs 18:13, (BT) e be gaar: “Mmotoyil u m’on ni ngam non. Ya ra danga’ ma gur be’ ni ga ba pinat ma ga ra reg ku be’.” Ere, faanra ke yog be’ ko piilal ni bay reb e walag u lan e ulung ni ke rin’ reb e denen nib ubchiya’, ma susun ni nge guy e piin piilal rogon ni ngar nanged urngin ban’en ni ke buch ngemu’ mfin nra pied e fonow. (Deut. 13:14) Faan yad ra rin’ ni aram rogon ma aram e rayog ni ngar pied e fonow ni “mmat’aw.”

¹⁹ Be yog e Bible ni thingari pi’ e piin piilal e fonow u fithik’ e “sumunguy.” (Mu beeg e 2 Timothy 2:24-26.) Riyul’ ni denen ni ke rin’ be’ e rayog ni nge kirebnag thin Jehovah u wan’ boch e girdi’ ara kireban’rad ngay. Machane, faanra damumuw e piin piilal u nap’an ni yad be fonownag facha’, ma dabiyog ni ngar ayuweged. Ma faan yad ra folwok rok Got ngar nonad ngak u fithik’ e sumunguy u nap’an ni yad be yal’uweg, ma rayog ni nge kalngan’.​—Rom. 2:4.

20. Mang kenggin e motochiyel nu Bible e susun ni nge fol e piin gallabthir riy u nap’an ni yad be fonownag pi fakrad?

²⁰ Thingari fol e gallabthir ko pi kenggin e motochiyel nu Bible u nap’an ni yad be fonownag pi fakrad. (Efe. 6:4) Bod ni faanra ke yog be’ ngak reb e matam ni bay ban’en ni ke rin’ fak nib kireb, ma mang e susun ni nge rin’? Susun ni nge guy fare matam rogon ni nge nang urngin ban’en ni ke buch ngemu’ mfini gechignag fak. Ma dariy be’ u lan e tabinaw ni Kristiano ni nge damumuw nge pag rogon me cham. Thingari folwok e gallabthir u rogon ni ma fonownagdad Jehovah ni ir reb e Got ni “ma runguy ma ma taganan’ ngak e girdi’.”​—Jas. 5:11.

21, 22. Mang boch e thin ni bay ko Psalm 119:97-104 ni be weliy rogon e Thin rok Jehovah u wan’um?

²¹ Immoy reb e tapigpig rok Got kakrom ni yog nib t’uf rok e pi motochiyel rok Jehovah. (Mu beeg e Psalm 119:97-104.) I mang be’ nib gonop me fil rogon ni ngari tamilang boch ban’en u wan’ ni bochan e fol Bible ni i tay. Nap’an ni fol ko pi kenggin e motochiyel ni bay ko fare Babyor nib Thothup, me yag rok ni nge siyeg e pi oloboch ni i rin’ boch e girdi’. Ri baadag ni ma fil e thin ni bay u lan fare Babyor nib Thothup me yib angin e pi fonow riy ngak. Ere, ke dugliy u wan’ ni nge fol ko pi motochiyel rok Got u n’umngin nap’an e yafas rok.

²² Ba ga’ fan e Bible u wan’um, fa? Bible e rayog ni nge ayuwegem ngari mich u wan’um nra lebguy Got e pi n’en ni ke micheg. Bay e fonow riy ni ke pi’ Jehovah nra ayuwegdad ni nge dab da rin’ed boch e denen nra fekdad i yan ko yam’. Ku rayog ni ngam fanay ni ngam ayuweg boch e girdi’ ni ngar pirieged fare kanawo’ ni be sor i yan ko yafas mu ur leked. Ere, susun ni ngaud fanayed e Bible ko pi kanawo’ ney u nap’an ni gad be pigpig ngak Jehovah ni ir e Got rodad nib gonop ma ma t’ufegey.